兩年多前經過太子分店，一試之下非常驚喜，啲雞好滑，個湯底好飲，即時買外賣比家人試。後來知道旺角都有分店，每次出開黎都必食黑蒜湯底，可惜近年水準一次比一次差，啲雞件冇以前咁滑、啲米線又唔夠爽口，今日嗰碗湯又唔夠熱，個米線係碗裡直頭係＜一pat麵餅＞咁款，要自行整散佢，啲雞件又斬得衰，幾嚿都痴埋一齊，仲枉佢加左價！有次去食，埋單時價錢比menu價錢貴左（初時我仲以為自己聽錯），我問個收錢女仔，佢目無表情只重複個價錢，禮貌欠奉！食物水準下降之餘又貴左，唔怪得近來少左客，以前見lunch time要排隊等位的，希望店主睇到各方評語後提升返食物同員工質素，我都好想繼續幫襯你地，唔好再令人傷心。。。

難得跟家中長者出來食餐生日飯，千揀萬揀竟揀中呢間 最難食係個豆腐，整碟完完全全冇味，係一啲味都冇！估計應該係用水烚熟所有配料然後埋獻就算，真係第一次見識到完全冇味的食物！！碟菜都有啲老，龍蝦一般般又係比較多獻，相比下乳鴿算最好食但係偏咸些。個男部長態度有啲晦氣，不禮貌地將單據放在枱上，見佢跟其他客人說話態度都冇乜禮貌。三個人食左$706，一肚氣咁走，平時老人家慳慣食剩會打包，但連佢都話唔想攞走，睇見就嬲咁話！

帶小朋友入大埔農莊玩，搵到呢間環境優美的餐廳，就順道慶祝埋老公生日，訂了室外的屋仔用餐，有食私房菜的感覺 不過坐室外比較適合秋天天氣，4月時份如果唔開冷氣會有啲焗，一定要開晒兩邊側門先通風，但就更惹蚊。職員很熱情跟你溝通，亦主動幫你拍照，態度良好。食物方面比預期遜色，跟期望有點距離，價錢唔平，這價錢會有其他更好的選擇。

11點幾去到已有3枱人食緊，得我一枱落order但都可以落錯單 好彩唔趕時間可以再等！坐的位置地面好跣，店員已提示小心但真心唔明點解唔係營業前處理好？食食下的時候清潔姐姐先係度抹地，大家邊食佢就邊抹，感覺唔多舒服。午市極上壽司（$98）原來唔包前菜及湯，壽司好細件，當日胃口麻麻但食完都唔覺飽，新鮮度又不是非常出眾，非常不值。收呢個價錢我寧願去食迴轉壽司好過！

味道: 火山排骨的實物賣相跟餐牌上的賣相有點距離，係有少少失望，但是幾好味。如果炒金邊粉的酸甜味可以濃一點點會更好。青檸荔枝沙冰好飲，反而果汁類就普通 環境: 滿意 服務: 扣分位~ 訂位時指明要卡位，但入座時竟安排普通4人枱，要主動出聲先可以轉返卡位。 加分位~ 食唔晒打包，女店員主動幫忙入盒（而且仲汁還汁、餸還餸一盒），夠貼心 衛生: 滿意 抵食: 唔算非常抵食，但位處如心廣場又有靚裝修，都要咁上下了 建議: 希望餐牌可以加多幾款走辣的小食/主菜（我明我明，食泰國菜就係要食辣😅 但老人家及小朋友食唔到辣，有多些選擇就更好），另外唔明點解椰青要咁貴（$68/個）？價錢令人卻步

想食清啲就黎左呢度，叫了一碗《海南雞絲扎肉金邊粉》，普普通通ookk咁啦，無乜特別。最特別係喺碗裡發現一隻小蚊滋，不過心口掛了勇字所以照食，都費事投訴…… 老公就叫左《馬拉盞豬頸肉炒米粉》，等左好耐都未到，催單後先話唔好意思請再等一等，估計係漏單，但當時已過了午飯高峰時間終於等到炒米粉，一睇賣相就大失所望，啲豬頸肉好乾（非平時食炭燒豬頸肉嗰種質素），其中有些仲韌到好似緊香口膠咁 搵唔到會再來的理由！

想係香港食葡國菜選擇不多，今次就趁生日黎呢間試下，點菜前做足功課睇食評……點了必食的馬刀貝、 八爪魚沙律，都好味符合預期。但炸馬介休、葡國雞就有一點失望了，蒜蓉什菜就更更失望，只係將蒜蓉鋪在白烚的蔬菜上而已，早知點多個沙律好過 這裡甜品選擇很多，最後點了生果撻及apple crumble（餐牌上冇寫的），兩樣都不錯。菜式價錢絕對唔平，想食葡國菜的話，過大海食計埋交通費都冇咁貴！

無意中發現有此主題餐廳，係冇得飛的日子，就趁生日來自我安慰一下😝😜 飛機餐的份量看似不多但原來都👌夠飽（大食人士除外），只是欠一杯餐飲（真正的飛機餐一定會有杯果汁或餐茶，但這裡要加$20才有餐湯+餐飲）。三文魚味道不錯，只可惜餐包及意粉未能有一致的水準。黑毛豬鞍扒就不過不失，收$185就相對地不太值得了。最喜出望外反而係甜品，味道剛好。 值得留意的是餐廳廁所（在室外），不論門口或廁所內的大小都似足真機艙，到底該不該讚呢？🙈🤣

黎開呢頭，見呢間食評唔錯又好想食喇沙，就算天氣熱都想黎會一會佢，可惜一切不如預期……碗喇沙味道合格（但又未算好高分，略嫌份量不多，只是碗大而已），海南雞就比較失色，肉質唔夠滑嫩，即使係近脾位的肉質都唔滑，但論最敗筆都遠遠不及杯咸檸水……完全冇咸檸味，只得嗰2小粒咸檸檬（註: 2小粒加埋先=半粒咸檸檬），死篤爛篤都出唔到味，完完全全只係飲緊杯清水唔明白為何有如此多好評？？ 題外話，用膳中途隔離枱位女士點了肉骨茶及檸茶，上菜後好快就聽到佢話骨肉茶有酸味（疑似變越了）、檸茶有漂白水味（職員聽到都好愕然），唔知係位女士味覺有問題還是食物本身……？雖然佢食了兩啖就起身走人，但我見佢有比錢的，不是想食霸王餐

去完二手寄賣店，無意中經過又剛巧肚餓就即管試試，見午餐價錢都ok抵食，平均$6X，但一般拉麵店一碗拉麵冇可能咁平，於是心諗食鰻魚飯穩陣啲，質素ookk可接受，但食得出鰻魚的質素只屬一般（始終一分錢一分貨），前菜普普通通冇驚喜，另加小食枝豆（$8/份），差不多食完碗飯先上枝豆，奈何不是慢工出細貨，而係一睇就知overcook，好老好乾，好多枝豆已經焗到爆晒口（通常微溫已足夠），食左幾條已食唔落去……