原本都無打算寫第一次去嘅食評，因為又普通又無禮貌嘅體驗。但經過2次訂座，更加有點不吐不快！
先講第一次經OpenRice 訂座12點去時體驗。

想試下香港食韓粥同韓國有咩分別，又有咩特別。
點菜時見到樓面只有一個廣東話不咸不淡女人，氣焰十足似足老闆娘，好無禮貌。
因為朋友未到同佢講好快就會點餐，佢已經黑面。問佢Menu 嘅嘢好似唔想應我咁，嗰刻已經知咩料，無咩心情食。

好彩朋友唔夠3分鐘都入座，救咗自己一命咁。環境方面︰
地方細小，座位狹窄。
小食︰
淹蘿蔔？定酸瓜？送粥係幾唔錯，但幼絲泡菜剩係得個辣字，卻淡而無味。 主食方面 - 釜山魚糕烏冬︰
用對筷子串起當特別，比人打卡係有心思，但都要味道配得起先有用。
湯或似普通甜味味精湯，無特別魚 / 肉/ 其他鮮味，就好似屋企自己加雞湯煮一樣。
魚糕的確有少許魚肉味、魚腐味，算彈牙嘅，但現成貨嚟講要賣到依個價錢一碗，不如去隔離買冷凍貨自己煮。。。
烏冬偏淋，普通嘢，純粹用分量塞飽人。如果烏冬愛好者，建議去返食日式料理餐廳。主食 - 蔬菜蝦粥︰
用湯底去煮，但無有任何鮮味突出。米粒算綿身，又係好多米量，加萬能紫菜調味。
但其實真係無特別，就似平常港式粥同湯飯之間嘅質感。 蝦大小中規中矩，得3、4隻，成煲好似只係食剩粥一樣。總結︰
其實食物無咩特別，服務又差，座位少都坐唔滿。氣焰又唔使去大到咁嘅。

再次誤打誤撞，試到傳統美味印度菜。室內印度風設計帶點時尚、高級感，相當精緻細膩。
侍應們全部印度男士，服務態度十分好，有禮貌又有耐性聽取客人要求，細心照顧。 餐牌經過精心設計，以大閘門造型製作封面，高貴又特別。食物方面 - 餐前脆餅︰
脆餅輕微帶點小麥烤烘香，脆身又輕巧，作餐前小食一流。
配兩款不同沾醬，黑色一款味道近似港式甜醬及海鮮醬混合；綠色一款則似青醬，但味道偏淡不膩。豆腐牛油果藜麥沙律︰
豆腐經煎後變得香口，輕微豆香；
醃漬蕃茄乾將清淡沙律菜味道提升，混合牛油果更能減少膩感。烤牛肉︰
味道及質地都似漢堡扒，牛肉打碎加入洋蔥及其他配料壓成非常厚實的肉卷。
外皮香脆，內在則帶濃郁牛香，肉佔量比脂肪多，吃下去比較滿足而且飽肚。烤雞肉串︰
必點！兩大串調味烤雞肉上桌，氣勢及打卡氣氛已經很好。侍應會待客拍照後將肉分於碟上，細心位加分。 雞腿肉十分嫩滑、濃烈雞肉味再帶少許油脂香，不得了。
肉質保持濕潤外皮腳焦香脆口，加上醃料調味剛好，微咸又有濃郁印度風味香氣。Mezze Platter︰
原味印度烤薄餅配混合醬汁，烤餅只有5個切角但醬料卻有5大碟及一款是小食 - 脆炸豆餅，份量及比例不符。 希望可以再多點烤餅，因為烤餅不論味道、質感還是烘烤度都做得好，會想續食。甜品方面 - 檸檬雪芭︰
侍應告知，如果客人現場評分及提供意見，則免費得到一份甜品。而且更可以於主餐單上任意選擇，朋友選了最高價的檸檬雪芭。 輕輕檸檬香又卻十分甜，一灌大家心中印度甜品的定位。
總結︰ 無論食味味道、食材質素、環境、飲品或服務態度都十分好。
翻桌意慾max！

家人一直推薦依間偏遠小cafe，咖啡、窩夫必食？講到咁高分梗係要去試啦~小店座位舒服、位置寧靜，整體環境係唯一高分部份。

食物方面 - Happy Tummy (全日早餐)︰ 份量富，單睇外表 $118 可以接受。炒蛋嫩滑但炒到碎濕濕，口感一般；
配菜輕炒聖女茄，味道偏酸但因為落太多油，所以變得唔清爽；磨菇帶有濃郁菇味，質素正常；小堆生菜淋上酸黑醋汁，平均返整體油膩；
兩條肉腸外皮煎脆，但脂肪比例較多，又多另一樣令人飽濟嘅食物；
煙肉質素正常，只係加埋落成個餐中，變成膩上加膩；
最後窩夫，一上碟已經見到烘焗時間唔夠。雖然用料十足令中間夠實在，但無脆邊之餘只要放涼一陣就變得好韌，完全唔係窩夫應有鬆軟質地。
低碳飲食加吐司︰
份量都係足夠，但額外加一塊吐司加自製果醬幾啖就要 $25，而且唔熱、唔脆，好似擺到變凍咗。只係一塊厚身白麵包，太唔合常價吧！？
其實果醬都唔係特別出色，我寧願去食就近出名果醬吐司cafe會更開心。 煙三文魚都係現成貨，質素一般且正常，無咩功夫可言；
配菜聖女茄、磨菇同黑醋生菜同Happ Yummy餐一樣，油膩；
煎蛋中間有流心黃嘅，但落太多油喇，真心會食到好濟。
半個熟成牛油果軟身而且有果香味，但當其他食物都多油嘅時候再加牛油果，感覺不太好了。 飲品方面 - Latte︰
咖啡師沖啡底已經聞唔到豆香，已經感覺味道會偏淡；
上桌時見到奶泡又打得好厚實喎，拉花都堅挺，但.....杯熱Latte，係凍㗎.....
真係無其他意見了。 總結︰
成餐感覺好似比屋企人呃咗咁，仲特登入西貢試。連成日大推想翻桌嗰位，都話唔會再有下次。
性價比真係除咗份量豐富，無其他加分位。
大家可以去一試究竟，睇下會唔會每次都有唔同嘅水準或者驚喜？

今年有幸受邀出席週年舞會，第一次參加馬會會所宴會。
地點果然隔涉，要駕車或者的士先到達，環境寧靜，私隱度高。
當晚大排延開十席，現場服務職員數量足夠，唔會出現嘉賓求助無門情況。而且職員態度相當好，令大家都滿意。

「席珍」食物方面 - 精美拼盤︰
百花乳豬蝦多士 - 爽口彈牙嘅蝦膠假扮成乳豬肉疊在底層，再利用豬皮包頂。整件經過輕炸卻唔油膩，口感與味覺都有驚喜。
脆鱔 - 幾條相對幼細鱔條，感覺有點零落。
菊蜜鮮淮山 - 香甜杞子襯托清淡淮山粒，淮山粒潺滑粉軟，沾滿幽香菊蜜，健康清爽。
三文魚籽野菜百頁卷 - 外層用百頁腐皮包裹爽口菜絲，單調味道卻能重點帶出三文魚籽濃鮮味。腿蓉椒醬大蝦皇︰
拌碟西蘭花平衡濃郁腿蓉椒醬嘅油膩。
完隻蝦身體積好似碟咁大，頭部佔一半，內藏新鮮蝦膏。蝦身肉多且肥美，爽口彈牙。舞茸無花果瑤柱燉花膠︰
湯底應該無加味精，只用乾貨食材原身咸味調味。舞茸菇將其他食材精華全吸收，香濃咸鮮；
清甜無花果用以平衡咸度，亦將鮮味昇華；完整一片花膠，雖然品質唔算高級，但表現絕不欺場。蠔皇花菇扣原隻鮑魚︰ 鮮花菇香味濃郁，烹煮時間足以吸收大量蠔皇汁，水份十足。
原隻鮑魚清爽彈牙，唔會因過火而變得煙韌。豆酥蒸老虎班柳︰
豆醬混合豉油香甜帶咸，味道清淡唔會蓋過魚鮮香。
魚肉蒸煮時間調節得好，肉質爽口嫩滑而且厚身，食得滿足。當紅炸子雞︰
薄薄一層雞皮炸得脆口，配上蝦片有著食片皮鴨感覺，卻唔算油膩。 雞肉嫩滑，輕微雞油香令肉質保持水份。菜肉雲吞撈薑蔥竹昇麵︰
兩隻雲吞皮薄餡靚，菜與肉餡料平均，唔肥膩。
竹昇麵軟硬度適中，用來當撈麵口感非常好，吸汁度高。總結︰
場地佈置精緻、服務態度質素好、上菜速度快，而且味道卻不失禮。 整場晚宴的確令在場嘉賓都稱心滿意。

下午茶時間嘆杯清新雞尾酒、高纖果汁及健康小食。
入座食客大多數都係女士，大家追求健康與美，沙律主題食店確實帶有一份清爽感覺。

食物方面 - 小食冷豆腐︰ 一心以為豆腐質地軟爛，原來餐廳使用板豆腐，切落去相對厚實。豆味唔濃，板豆腐吸收醬汁效果少，但口感卻比軟豆腐更好。
店家自製汁咸酸比例做得唔錯，偏淡而稀薄，符合健康主題。配上幼碎木魚絲，小許鮮咸香，剛好平衡齋豆腐。
蟹肉蟹籽沙律︰
頂層舖上一堆蟹籽，混合新鮮清菜及蟹肉，增強整體鮮味。
蟹肉雖然被拆成肉碎，實質份量算對得起價錢。肉質帶微微鮮味，店家並唔會用普通蟹柳蒙混過關，有誠意。
底層新鮮清菜絲及沙律醬份量適中，入口無油膩感，連蟹肉蟹籽咸甜度非常夾。
飲品方面 - Mojito︰ 店家自動去糖水syrup，只混合強烈薄荷葉、清新青檸及份量適中嘅RUM。
整杯飲落好順暢，完全無酒精飲品感覺。
即打紅火龍果汁︰
鮮果即打成果汁，全無添加色素及糖精調味。
比較細杯，性價比相對遜色。

約朋友食飯，嚟到姊妹店ZipZip。裝修、座位、菜色名還是味道都同總店一樣。

食物方面 - 個名好長唔記得，大槪咪即係粟米帶子沙律︰ 粟米好好食！雖然份量少，大約只有半條粟米再𠝹開4塊。香濃超甜粟同沙律底酸辣汁好夾，勁開胃。
帶子只有兩隻，外面輕煎微溫，中間仲係生帶子而且凍凍地。質感同味道都可接受嘅，但如果唔鍾意食生，應該可以要求煎全熟。
沙律菜底、聖女茄份量太少喇，酸辣汁又多，入口攻喉。
以價錢評論，味道OK。不過我作為女生就算晚餐份量都覺得少，大班朋友分享會變成爭食了。
另外又係個名好長 - 唔知咩炸白飯魚魷魚墨魚意大利飯之類︰ 魷魚有驚喜，爽口彈牙而且都有丁點海鮮香，不過就無燉飯嘅墨汁味，只有鹽咸味。
意大利飯偏濕，飯煮成一糰糰，相對黏口。
飲品方面 - Gin Tonic︰ 普通Cafe cocktail 質素啦，濃度都OK 㗎。 

去日本旅行前幫媽媽慶生，仲食日本菜。
話說，經OpenRice 訂座備註寫上生日飯，古今無蛋糕或甜品之類，所以無為意。點知師傅會大碟上壽司，用燒汁寫上「生日快樂」加個心心，好貼心啊！真心有驚喜。另外都想讚下職員服務態度好、有禮貌，主動幫助客人，加分。唯一缺點係餐面太細，座位感覺麻麻。

古今出名精緻打卡壽司，原來味道同份量都睇得食得。
食物方面 – 粉紅佳人︰ 滿滿魚子、一堆吞拿魚蓉蓋頂，輕微辣度夠香口、再灑上碎薄脆增加口感。
大件壽司豐富到一啖咬唔晒，味道好夾，係所有壽司當中最鍾意一款，性價比好高啊！
午夜牛郎︰ 特別之處係炸卷，唔會好乾身，外面輕輕脆口，味道亦係平穩普通之作。 彩虹卷︰ 以三種唔同刺身 包括︰三文魚、吞拿魚及 (帶子? 忘記白色係咩) 包頂做成色彩繽紛。
中間只有牛油果加蟹柳，普通，無乜特別。 加州卷(左)︰ 小朋友口味，都係普通款。蟹子相對地爆多，基本上灑滿3分1隻碟。
超級龍卷風(右)︰ 兩條大炸蝦天㷌羅，入口啖啖肉，加上鰻魚油脂重，一軟一脆口感有層次。 倫敦橋︰ 一層厚身海膽舖滿卷面，色澤新鮮，份量亦無欺場。
鹽燒鯖魚︰ 魚肉油脂平衡，香口惹味，薄魚皮烤得脆身。
可惜鹽量太多，成條魚變得相當咸。
炸芝士年糕︰ 外脆中間軟糯，年糕皮包住芝士夾心，溶化芝士令炸物唔會乾身。
芝士咸度適中，整體味道非常好，追加食物之一！ 總結︰ 性價比中級，有部份卷物份量、味道、刺身配搭的確有驚喜。但有一半都只屬普通質素，未算突出。
如果想試特色口味，我諗要揀用料豐富嘅卷物先可以有新鮮感。

博物館地下餐廳嘆份豐富全日早餐後，去欣賞「香港電影服裝展」。
上網見到好多評語話服務態度好差，我個人而言覺得中規中矩，但都比大量市區同類型連鎖餐廳或小店Café好。
幾年前都有去分店食過，記得味道同質素唔錯先再翻食，結果……；
  食物方面 – 餐付甘荀湯 湯質入口綿密，清淡得嚟帶輕微甘荀香，又無濃烈草青味。健康開胃，應該小朋友都接受到。 主食 – 全日早餐 (蛋奶素食)︰ 見到食物配搭有誠意地做，每款份量準備得岩岩好。營養均衡，有齊所需素食者脂肪、澱粉、纖維等。
杏脯多士 – 外脆內軟，麵包邊唔會烘過火變硬。但切成一細片，份量相當少。 烤蕃茄、炒菇 – 不過不失，基本嘢。 香烤南瓜 – 外皮帶點燒烤味而且同肉質一樣粉嫩香甜，可惜整體油味太強。 炒蛋 – 原味無添加任何調味，淡得只食到極微蛋黃同黑松露香。算滑身，無炒到變乾。 歐式西蘭花 – 好硬！硬到好似無炒過、無煮過一樣。 希臘乳酪配蜂蜜 – 清甜開胃，係全個All day 最滿意部份。 總結︰ 計味道的話，性價比只屬中下。份量係優勝之處，亦有用心為食客調配各種食材，不過味道太清淡同時又多油，唔適合我個人口味。
如果評價多為服務質素差，建議部份店員多點笑容，客人求助唔好無視對方就更好。

無服務嘅細分店、環境、座位同中環總店差很遠。

食物方面 - Green cleaner 清新Detox： smoothie底可自選唔同奶類，連燕麥奶都有，值得加分。我揀咗脫脂奶，更突出濃郁螺旋藻、香蕉、牛油果、芒果。
Toppings 份量、款式豐富，作為午餐對女生嚟講絕對夠飽肚。而且味道天然甜，健康無內疚感。
可惜價錢偏高，以過百蚊嚟講，性價比拉低了。
全日早餐： 兩小片煙三文魚、兩隻蛋、幾條沙律菜、一片薄麵包加半件窩夫。
正常普通嘢，真係屋企煮都有更好嘅味道。
窩夫質素相比中環總店食過嘅質素差，成碟份量又少又無誠意，性價比超低。 總結： 可以再揀，只會去總店。
但如果 Green Waffle Diner 質素整體已經變得咁差，就不值得再比機會喇。

作為金鐘上班族，想慳家就自備午餐。節日慶祝或者老闆心血來潮請食好野，亦只會揀高價同靚餐廳一齊嘆世界。
每次經過依間Simplylife，由未夠12點到2點幾，總係排長龍。今日難得家人探班，時間仲係11點45分，終於試一次金鐘版Simplylife！
先講個人揀餐廳，一直都好睇重服務態度︰Simplylife 帶位小姐相對正常；點餐男侍應雖然黑面，但都算有對答、有反應； 上餐、收餐、送餐飲3位女侍應黑面就不在話下，問一個半個問題都完全唔理唔應加聽唔到，勁！難度請佢哋返工只做送餐，而不包接待食客嗎！?
食物方面，附加餐湯 - 甘荀濃湯配法包︰ 將甘荀打碎煮成湯，質地濃稠再加少許軟身甘荀粒，味道清新又無草青味，開胃唔膩。
法包烘暖外脆內軟，外皮鬆脆唔硬。包身鬆軟綿密，氣孔平均分佈，帶有輕微酵母香，沾滿甘荀湯後更加突出烘烤香！
只需附加 $10 就有以上兩種餐前開胃菜，絕對值得。 主菜 - 烤美國春雞半隻、香草烤薯、翠玉瓜︰ 半隻春雞體積相當大啊，份量十足，性價比中高。
雞味濃、烤烘後肉汁仍然保留；薄薄一層雞皮烤成脆身，帶少許雞油，邪惡之食；雞腿肉鮮嫩滑身，胸肉烤得有點乾柴。
配菜有用心製作，青黃兩款翠玉瓜脆軟兼備；烤新薯外皮微脆、調味濃郁，薯肉中間粉嫩軟糯。 全日早餐︰ 用料充足，香烘厚切多士，外脆內軟；炒蛋未經調味以突出微微蛋香，要自行加胡椒鹽；
兩片厚質煙肉偏向脂肪感，肉嘅部份只有1/3非常少，但煎烤時間做得唔錯，有脆邊；
德國白肉腸大條粗身，肉質豐富，腸衣爽脆唔油膩；
其他配料蘑菇、焗豆，烤蕃茄片只係基本野。
總結︰ 只為食物味道的話，坐落金鐘性價比算中高。如果對環境、服務態度有要求之人，就要考慮下接唔接受到了。