冇喺香港一排，返到嚟好多飯局，其中有個住元朗嘅朋友就推介去呢間日式餐廳食晚飯。 一坐低，我哋就叫左嘢飲先啦，呢度個飲品 menu都好多選擇，無論係酒精類定係非酒精類。朋友飲啤酒，我就揀咗日本山梨縣梳打。呢隻提子梳打好好飲！ (飲品 menu 其中一頁） 雖然呢間食堂叫野川拉麵，但好 surprised 嘅係其實拉麵之外嘅選擇係非常之多，拉麵之外仲有飯，刺身、壽司、各式小食、炸物、爐端燒、甚至連生蠔都有！嗰日我好想食生蠔，但心諗拉麵店賣嘅生蠔掂唔掂㗎？咁我就問下店員嘅生蠔喺邊度嚟？店員都好有耐性，同我解釋話生蠔喺美國嚟嘅，即叫即開，雖然唔算好大隻，不過唔錯架，佢哋自己都鍾意食。見到店員態度誠懇有禮咁我試一試啦，每人叫左 2 隻生蠔（$28/隻）。 生蠔其實唔算細，同埋望落去個樣幾靚仔，加啲檸檬汁，然後一口咬落去，蠔嘅鮮甜味喺個口度爆發出嚟，味道相當好，如果唔係已經叫咗其他嘢食，怕太飽，我會加單 encore 呢個生蠔。 佢哋除咗主餐牌外，仲有一張優惠 menu，部分items 高達主餐牌嘅半價，價錢都幾優惠，我哋就叫咗廣島吉列炸蠔、鰻魚壽司同帶子壽司。吉列蠔新鮮炸起，味道唔錯。鰻魚壽司同帶子壽司喺呢個價位來講，性價比都幾高。 （優惠 menu) （menu 其中一頁：超多款小食） 主食我哋叫咗兩款拉麵，一款係自家製豬軟骨拉麵，另一款係吉列豚肉拉麵，另加叉燒。湯底有幾款選擇，我哋揀咗豬骨湯底。我雖然知道豬軟骨唔係正宗日本拉麵嘅材料，不過比起日式叉燒，我真係好鍾意食醃到入晒味又炆得淋嘅豬軟骨，最緊要鍾意食咋嘛，理得佢正唔正宗丫，一於揀豬軟骨拉麵。拉麵配料都多：筍、木耳、溏心蛋、粟米、紫菜、蔥，而且拉麵軟硬適中，湯底夠味唔會過鹹，以 80 幾蚊的價位來講，呢兩款拉麵都相當有水準。 最後叫埋甜品：柚子味芝士蛋糕配雪糕，芝士蛋糕水準比我想像中好，柚子味都幾出而且同個芝士蛋糕配合得好好。曲奇雪糕就一般，唔係好夠香，大家可以試下其他味嘅雪糕。 我覺得餐廳食物選擇多，整體食物質素不俗，而且價錢都親民，會再去食😋

一向都鍾意食日式燒肉，燒香左的牛肉片配珍珠飯真係令人回味無窮。聽朋友講原來元朗都開咗一間主打日本和牛嘅燒肉店，想試一排，一於趁住拍拖紀念日去試下，順便慶祝一番。 門面佈置有心思，令人聯想到置身日本其中。 我哋叫咗燒肉二人前 B 餐。 前菜：蜜桃蟹籽沙律 呢個餐包兩杯特飲，我哋叫咗特濃忌廉朱古力特飲同忌廉綠茶紅豆冰，應該是用抹茶奶做膽的，有日本風情。 店內有卡位，張枱幾大，椅子舒適，都坐得幾舒服。另外，抽油煙的設備都好新。 日本岡山蠔、北海道魷魚： 我哋喺燒牛肉之前就燒咗蠔同埋魷魚，蠔嘅size都有好有份量㗎，燒好後，食落都好有鮮味。魷魚有鮮味之餘都好彈牙。 和牛眼芯、十勝和牛肉眼頂、十勝和牛貝肉、十勝和牛橫隔肌、米豚五花腩： 每款和牛上面都有名牌標明係邊個部位，咁就可以知道自己係食緊邊個部位，幾好。各部位的和牛口感不同，各有特色，我自己就最鍾意脂肪比例最高嘅和牛肉眼頂，燒好後，稍等一下，沾上燒肉汁，再放入口，和牛脂肪喺口入面融化，非常非常香，那刻覺得如此滋味只應天上有。和牛眼芯的脂肪比肉眼頂少一些，肉和脂肪比例均衡，也是很吸引。另外，豬的代表米豚五花腩也是頗誘人的呢~ 珍珠飯：套餐包每人一碗紫菜珍珠飯，與日式燒肉是絕配。 甜品有雪糕配紅豆，有幾款雪糕可供選擇。 因為有提及過是慶祝 anniversary ，餐廳特意製作咗以下嘅甜品畀我哋 ：） 晚市套餐，比大家參考下。

以前好鍾意去薩莉亞食 “多利亞雞飯” （忌廉焗雞飯），當時覺得好好味。今次去見到個餐牌有樣嘢都好吸引我，明太子海鮮意粉，就叫左呢個來食。 裏面係有明太子嘅，不過個醬汁調得唔夠濃，又唔夠鹹，都叫有味嘅，加上肚餓，所以都食晒。$40 無得要求太高，所以會比 OK ~ 另外我叫咗一個開心果雪糕蛋糕，估唔到都幾濃郁開心果味，個味幾自然，不過上下嘅餡就有啲過甜，對我嚟講過甜，利申我係一個唔係好食得甜嘅人，所以可能其他人會覺得呢個甜度 okay，值得一試。

想放任地食高質素亞洲野嘅時候，我同老公就會唸起校長燒肉，除咗韓式燒烤之外，仲有刺身、壽司、火鍋、點心、街頭小食、沙律同各式各樣嘅熟食、飲品、甜品，可以話係包羅萬有。無喺香港一排，非常掛住呢度，返來香港梗係要去食啦！ 刺身/壽司： 一去到就覺得好肚餓，見倒咁靚嘅刺身同壽司梗係即刻攞嚟食啦，店員都好好嘅，每次我點嘅每款刺身都會至少畀幾件嘅，咁就唔使走咁多轉喇。刺身都好多款，我食左三文魚、吞拿魚、帶子同赤蝦，各款刺身味道都算鮮甜，所以我地都 encore 左幾次。雖然刺身都仲凍，不過如果有冰塊墊底就會更好。壽司嘅質素都唔錯，料多飯少，亦都有好多款式，我自己就最鍾意鰻魚同埋玉子壽司。玉子壽司有厚切嘅玉子，上面有火灸過嘅 mayonnaise 同埋砂糖，食落去好特別。 （壽司 section) 火鍋嘅選擇都有唔少，肥牛同各式丸類都有，丸類推介香菇貢丸同獅子狗。 燒烤：燒烤肉類選擇都有唔少，各式牛、豬、雞部位同蔬菜都有，我特別鍾意一口牛同韓式豬頸肉，燒好嘅豬頸肉香氣四溢，食落口呢有少少入口即溶嘅感覺，豬香味在口中久久不散，一定要試下。 其他美味熟食： 川味鍋（牛肉+鮑魚）/ 章魚小丸子 / 豬肉燒賣，連鵪鶉蛋都有真係估佢唔到，味道唔錯，其實仲有好多，太多選擇都未試得晒。 飲品： 好多選擇，總有幾款合心意，酒類飲品也有，我見倒有啤酒、清酒同梅酒。 甜品： 有雪糕、雪條、mochi 同埋店家親自製作的各式甜品，我特別喜歡 mochi，呢款 mochi 個皮做得好軟糯，嗰日有 Vanilla 同朱古力味，兩款都正~ 太多美食，都沒空食沙律了。又是滿足的一餐！ (兩人卡位，檯面夠大，坐得舒服）

今日嚟到大角咀探朋友，朋友推介食呢間餐廳，話生蠔鮮甜味美，價錢又 okay，咁我梗係信朋友嘅介紹啦！ 我哋夜晚去嘅，叫咗兩個 set dinner，每個 $168。 Set dinner 包餐包、湯、主菜同飲品。另外但凡叫 set dinner 就可以加 $60 有六隻生蠔，我地都有叫。 餐包：睇落冇乜特別，不過食起上嚟香軟，又有好重嘅麥香味，配上 Lurpak 牛油，味道喜出望外！ 生蠔：set dinner 優惠，加 $60 有六隻嘅生蠔，店員介紹返品種係美國嘅 Pacific Rock，呢款生蠔充滿蠔的鮮甜味兼且易入口，相信來貨新鮮，我地食得好滿足，覺得意猶未盡。餐廳仲有提供好多唔同種類/產地的生蠔，可供散叫，下次要試下。 餐湯：黑松露蘑菇忌廉湯 主菜：蒜片活蜆炒意粉 無唸過百零蚊的套餐會用到 6 隻大蜆去炒，我以為係一般細細粒蜆仔。大蜆食落的鮮味同口感都比一般蜆仔突出同豐富，看得出店家的誠意。意粉調味適中，同蜆好夾。 主菜：黑松露野菌帶子天使麵 有兩粒大帶子，煎得金黃好看，個黑松露汁鹹甜適中、濃郁芬芳，配合野菌同洋蔥非常夾，如果無落咁多芝士鋪面，賣相應該會更加靚！ 餐飲： 要左凍奶茶和熱朱古力 甜品： set dinner 可以加錢配甜品，我地加左 $30 要左一個心太軟配雪糕。今晚雪糕是芝麻味，幾特別。心太軟朱古力味濃厚，好滿足。 食倒新鮮生蠔，又食倒美味的 pasta 同甜品，是滿足的一餐，下次再來探朋友的時候，會考慮再來呢度 encore 呢！

記禁晚市堂食前的一頓晚餐—— 一坐低，侍應首先送來一個刺身拼盤，俾你食住先，再慢慢用平板點其他食物。刺身拼盤質素不錯，三文魚肥美，螺肉都不錯。我哋有encore，第二、三輪上嘅刺身質素同樣不錯👍🏼 待應再送來就是一個海鮮拼盤，打邊爐用，有鮑魚、聖子等海鮮，味道 okay。 跟住自行點肉類打邊爐，牛肉高質素，食有牛香味但唔太肥，脂肪比例恰到好處，當然有encore 啦。 口痕又叫啲小食食吓，炸物類嘅小食表現穩定，炸饅頭伴煉奶尤其出眾！ 食到咁上下，又係另外一個胃- 甜品胃出動啦。呢度嘅甜品選擇都幾多，泡芙糕點布甸應有盡有，味道都挺好。仲有我最鍾意嘅紅豆味雪糕，雀巢其他味的雪糕一般，不過紅豆味超好食😋 一定要留肚食。又是滿足的一餐。

上個月嚟咗呢間人氣餐廳食晚飯，水準果然相當不錯！ 我哋各自嗌左個五道菜套餐。 一. 乳酪鮮蝦芒果沙律 啲蝦超新鮮，有鮮味兼夾爽口彈牙，乳酪汁好 refreshing!! 感覺超好味。 海鮮拼盤就唔包喺五道菜入面，不過見咁多網友推介，我哋又試吓先。所有海鮮都好新鮮。例如，生蠔好新鮮，唔會只得海水味。大蜆又有風味醬配搭，味道好有趣。食完感覺超滿足。 第二道：黑松露蘑菇湯 蘑菇打融咗，每一啖湯都食到碎碎嘅蘑菇。 第三道，清酒蟹肉年糕： 有點像奶油年糕，個汁幾 creamy，加上蟹肉令其更加矜貴。 第四道，主菜：精選雜扒配紅酒 牛扒固然高質好食，豬扒都非常高水準，雖然厚身，但不會硬身而且非常Juicy，問店員邊度來貨，店員回覆是西班牙豬的精選部位。雞扒都煎得香脆。拌碟是紫薯蓉，帶着紫薯清新嘅清甜味。 另一個主菜係扒雜海鮮拼白酒。有煎魚、鮑魚、蜆、蝦和螺。各海鮮都新鮮。不過要比較的話，我個人會比較喜歡吃之前的海鮮冷盤。 第五道菜：甜品 甜品味道不錯，但講真甜品真係太細件，如果可以大件啲會更加滿足。

唔係第一次來呢度喇，來呢度可以一次過滿足晒刺身、壽司、小食、點心、打邊爐、燒肉同埋甜品的慾望！而且佢各樣都有返咁上下水準，所以隔一排我地又會來。 刺身方面，我最鍾意呢度嘅三文魚同埋帆立貝，去到櫃檯即點即切，夠凍夠新鮮，好似喺酒店食自助餐咁。 壽司方面，炸蝦卷好有驚喜，佢整到似元氣壽司嘅炸蝦卷嗰種特別的味道，平時在元氣因價錢問題都唔會叫太多，呢度可以任食，正。 小食方面，有炸物、各式沙律，也有其他日式小食如中華沙律、章魚小丸子，整體質素不錯。 點心多款，質素正正常常。 食左咁多野，打邊爐錄下啲菜食，平衡番，都會食一些牛肉過下癮。今次發現雞軟骨餃子都唔錯喎。 甜品：佢都有啲自家製甜品例如 tiramisu 都幾好食，食埋呢個香港牌子的雪糕滿足晒。

今日約咗朋友喺荃灣食飯，佢介紹呢間酒吧餐廳。坐低揀咗嘢食之後，我地出左去玩美式桌球，哈哈。 店長介紹 weekday 套餐做 7折抵食，套餐$268有七折，折後連加一約 $200，沙律、主菜美國安格斯肉眼扒 / 法式香草煎焗羊架，同任何一杯酒精或非酒精類飲品😍 飲品我地揀左 2 杯 mocktail，始終要揸車走，不宜喝真酒啊。我揀左 rose garden，真係有玫瑰花瓣喺入邊，賣相都好靚。有氣果汁滲住玫瑰花香都幾特別，幾好飲。 主菜我地分別揀左一個牛、一個羊試下。個牛煎得超香，同埋本身肉質好，超好味😋😋 下次一定 encore。羊架做左層寶雲蘇，外層脆身，內裏肉嫩，都唔錯。配菜有薯角、蘆筍、草菇、烤蕃茄，都整得幾好味。 嘢食好味，飲品唔錯，又有得玩，唔錯唔錯。

呢間餐廳在元朗都薄有名氣，聽過朋友推介，但就未試過。今日突然想食日本野，拉埋男友去試下。 一到步，餐廳環境好日式，好骨子，感覺舒服。仲送上中華沙律比大家食住先。揭開餐牌，發覺好多野食揀，包羅萬有：從前菜、小食、串燒、壽司、手卷、剌身、鍋物、炒飯、煮物都有。 男友想食剌身飯，我就想食鍋物，可各取所需。 雜錦刺身飯主要有三文魚、油甘魚同劍魚腩，剌身冰鎮另上，刺身夠凍夠鮮味。 鍋物我揀咗安格斯牛小排壽喜燒，如果有買開凍肉，都應該知道牛小排價格貴過肥牛好多，亦都比肥牛更好食。我加左 $10 追加左一個飯拌來食。牛小排索左壽喜燒汁嘅味，勁入味，加上牛香溢出，是令人難以忘懷的味道。配料仲有鍋蛋同草菇、洋蔥絲、蘿蔔絲、椰菜絲，索左壽喜燒汁又係勁入味。 主菜之外，我地有叫左些小食。磯燒鮑魚，鮑魚餣得入味，食落有咬口，唔會乾身，美味。 鵝肝多士同西餐廳的質素相約。安格斯牛肉串用料上剩，頗為美味。 胡麻豆腐，$22 有 4 件豆腐同沙律菜蕃茄仔，好味又抵食。