忙咗一朝又食晏，响黃大仙唔想食太多但又唔想求其食頹飯，當然去我嘅飯堂。今日叫咗個南京牛肉配擔擔麵底加多杯豆漿，水準如一，牛肉入味夠㝝，麵底彈牙，湯香辣得令人要追住飲埋，最後飲埋杯濃豆漿解辣，保證可以幫我叉足電繼續搏殺！

前兩日老婆生日，訂咗枱試呢間。

穿過熱鬧的金馬倫道，利用專𨋢上餐廳，感覺非常良好，旺中帶靜。

今次試佢哋嘅Set Dinner。餐前小食賣相唔錯，但味道不太突出，令我食完都唔係太記得係乜。之後有個apertiser 南瓜泡沫洋蔥咖喱，味道唔錯，但如果帶酸味會更醒胃。


第三道係藍蝦配南瓜糖漬血橙及柑橘泡沫 ，外觀滿分，可惜帶唔出藍蝦的鮮甜。同樣煙燻帶子薄片配粟米栗子及黃酒啫喱 ，一開蓋煙燻味真係好貼題，但除這以外，帶子水份較多，鮮味減卻。第五道香煎鴨肝配糖漬紅蘋果及薑餅，鴨肝嫩滑，但煎得未夠香，如果能夠煎脆會更好。

我同老婆各自order，佢揀鱒魚柳配啤酒煮冬季蔬菜及白酒青口忌廉汁，而我要羊柳配焦糖鳳梨,紅酒燴啤梨及羊肉汁。鱒魚睇落煎得唔錯，老婆冇彈，但我個人就不喜佢個汁/伴碟嘅處理，佢用隻瘦弱嘅殻放响舊魚上面再落汁，簡直污染咗舊魚。呢個comment算係各花入各眼，可以不理。而我order嘅羊係去骨Rib，肉地嫩，羊肉沖補充咗肉內嘅肉汁，但呢個菜一定會嚇親唔食開羊嘅人，因為到第二朝羊羶味仲留响我個口度！

最後甜品係紅梅mousse配zX$&#y香濱薄片，香味同粉紅色外觀令人覺得好甜，唔嗜甜嘅真係會驚，食落唔算太甜，但唔太突出。

食完全餐整體感覺一般，未有驚喜，但值得一彈係呢度有好嘅環境，但帶著港式餐廳匆忙，冇空閒時間畀我影相，總評：只適合一啲負擔得起嘅初食者享受。

唔知幾時開始，每年都會嚟一次，今年都唔例外。見到伙記們的白髮，見證歲月如梭。

今日都係食下酸辣湯，三鮮炒麵，山東燒雞，醬爆肉絲，跟咗叉子燒餅同蒸炸銀絲卷各一，當然仲有拔絲香蕉。

可能係星期五，人好多，伙記忙過不停，少咗一份貼心。食物方面水準比去年略差，比較粗，但味道依然有水準。

總括多年經驗建議大家，如果想食好嘢，最好揀星期六晚。

去佐敦道攪完嘢，未夠鐘接下場，搵度飲杯咖啡攝下時間。諗起中港城呢間未去過，咪去試試。

去到試下佢個3D咖啡同件朱古力餅。如果只睇樣，冇失望，但入口就。

首先件餅，真係餅，唔係蛋糕，好硬。如果唔係有電話講緊，我真係會叫佢去叮軟佢。杯咖啡，睇係幾得意，但可能製作需時，只係一杯暖咖啡。而且太多奶，似係一杯咖啡味嘅奶。

總括而言，呢度只宜冧女，識食嘅唔洗試。

加人工請同事食飯，唔想行到飲茶了事，公司附近又冇乜好嘢食，於是訂枱食詠藜園。平時一條友食晏都會去，晏晝唔太多人，一條友易有位。

今次一行13人，叫咗個10人餐，再加炒飯、小籠包、生煎包，有同事識食，當然仲有叫兩碗擔擔麵大家食。13個人個個食到飽飽，一路食一路讚好食，最令我意外係成班同事做咗十幾年，居然大部份同事都未嚟過！

擔擔麵唔洗多介紹，嚟得呢度唔食真係損失。生煎包皮脆有肉汁，小籠包一般水準，因為同十人餐個過橋水餃比，始終水餃更出色，過橋啲辣油唔太辣，同水餃好夾。

十人餐啲前菜唔錯，好夠味，一陣風就清曬。主食有樟茶鴨、松子魚同雲吞雞，當中雲吞雞啲湯真係一流，一個大砂窩上到枱仍然滾滾下，好甜又冇味精。另外仲有賽螃蟹、上湯白菜、饅頭回窩肉，賽螃蟹唔夠滑，但回窩肉中嘅饅頭真係一絕，回窩肉汁滲入炸饅頭，值得再食。

另外豆漿都好正，香濃有質感。最後甜品嘅豌豆黃，淡淡豆香化曬之前濃烈味道，食完非常舒服。

開工拜神啲燒臘一向都唔會有乜驚喜，今次令我改觀。拜神，豬一定唔少得，但拜完神到食嗰刻基本上大部份都係硬野。今次定呢間真係令我有啲意外，首先山長水遠送到入西貢，去到切嗰刻仲有熱氣出已經唔簡單，到食落口，皮脆肉軟味甜，真係酒樓堂食都冇咁正。到隻雞，皮薄肉滑夠鮮，未試過真係唔信開公拜神都有好嘢食到，攪到正餐响六福啲餸菜都變得冇咁特色！

好少去茶餐廳食吉列豬扒，因為通常唔會有好結果，唔係乾硬化，就係霉𣺉牌。第一次去呢間食，見到隔離枱叫咗份，即刻轉呔，叫番份試試。先講賣相，外表冇過燶，份量係一個字「勁」：塊扒有塊面咁大不特止，仲要有兩塊，跟嘅沙律有足一個飯碗滿。真係抵食。食落外脆內軟有豬味，雖未及啲要排個幾鐘嘅日本豬扒舖，但茶餐廳有咁嘅質素算係交足貨有凸。

大記/加記我都有幫襯過數十次，相比之下食物味道始終係加記好D。但如果計抵食，非大記莫屬。四個人120蚊落樓有湯有糖水，算係咁啦。

街市熟食始終係街市熟食，咪諗住當係出面西餐廳，老友，想食就行多步啦，要記住自己係食緊熟食檔，您又諗諗過條馬路間大家樂，全自助都要收你成40蚊。

幫襯呢間記住落order要搵肥佬老細又或者後生阿姐﹐叫菜時要問佢今日有乜好菜，海鮮就問多句靚唔靚，就包冇失準。

今晚同個靚女去左利園Habitu食Dinner，座落冇耐已經有攪笑野，我地坐落冇耐我電話好唔通氣咁響，一聽之下居然係Habitu門口打o黎，問我洗唔洗留住將枱，我呆左一呆，然後答佢：「我已經o向你餐廳食緊啦喎！」眼尾望向門口，見到o既係打電話畀我果位waitress好瘀皮o既神色。

今日試左個「手造薯仔雲吞配安康魚意國青瓜花汁」，因為o黎係一次試，見到佢個賣相時我地即刻有個「！」，o向我地睇前只係見到一碟白色棉花糖狀物體，見唔到一o的類似雲吞/Dumpling狀o既野，於是乎就叫個waiter黎問個究竟，waiter見狀也覺奇，攞走碟野問阿Ger，阿Ger就攞番碟野過o黎，解釋番畀我地同個waiter聽呢碟就係我地要o既o野。成個過程已經夠攪野，食落之後仲出奇，所謂o既「手造薯仔雲吞」，我只可以用「貼題」o黎形容，「薯仔雲吞」有好淡o既薯仔味之外，仲有好強烈o既手汗味，真係令人......

好在個甜品同杯咖啡好掂，如果唔係真係...唉!