食完拉麵有啲口渴，行過見有茶星人，好冷清完全無客，啲人係咪北上飲啦？ 落左杯仙草奶茶同黑糖珍奶，要大杯的，細杯500ml唔夠飲，大杯700ml就啱啱好啦。 ⭐黑糖波霸炭燒奶茶 朋友叫左呢杯，佢次次都唔叫少甜又嫌人地太甜😤個黑糖真係落左好多，激甜，我覺得還好，個黑糖幾香呀。但珍珠外層太淋個心又硬，扣分。 ⭐仙草里香烏龍奶茶 自己叫呢杯，要左少甜，甜度啱啱好，奶茶又香又滑好好飲，😍仙草好多有咬口，同埋呢個價錢咁大杯好抵飲。 行住海旁一路飲，好寫意😎

放工時間遇啱撞車，成條彌敦道塞住左，咁就同同事去附近食個飯先走啦。經過西洋菜街，呢條街好多米線舖，睇下食邊間好先，點知泰源個阿姐勁落力sell，又套餐又雞煲，又自助沙律bar，咁有誠意就試下佢啦。餐牌好多野揀，最後決定叫個二人餐，二百幾蚊無加一，抵食吖。⭐排骨肉骨茶
湯品揀左肉骨茶，一大碗有四支骨，熱辣辣香噴噴，勁重胡椒味😆辛辣感都幾強烈，啱晒天氣凍飲喎。⭐新加坡海南雞
例牌size都ok，唔算太細份吖，雞件已去骨，啖啖肉勁嫩滑，但雞肉本身偏淡，點左醬料就好味好多了😋⭐青椒炒蛋
大大盤炒蛋，炒得勁嫩仲有蛋汁㗎，青椒香口但唔辣的，下飯一流🤤⭐鮮草紅豆冰
個餐唔包飲品，但加杯特飲都係加8蚊，好抵😘朋友叫左鮮草紅豆冰，鮮草好滑紅豆軟綿，微甜啱口味喎。⭐新加坡三色奶茶
自己就叫左三色奶茶，但黎到個茶已經攪混左得返兩色😆茶香奶滑，雖然個底有厚厚一層糖漿，但椰糖唔會太甜，飲落幾正😋 食物不錯，價錢貼地，加上坐位寬濶好坐立，想食新加坡菜可以黎泰源呀👍

新記雞粥在元朗已經有好多年，食開又新街店，但個邊無做了，是晚就黎安寧路呢邊食啦😋 先進左喎可以用qr code落單，個餐牌越來越多野食，粥品、炒粉麵飯、炸物小食、燒味飯、小菜飯餐、西式焗飯、三文治、菠蘿油…實在太多選擇，仲犀利過茶餐廳😆 ⭐酥炸魷魚鬚 炸得勁香口，而且炸漿唔厚，條條都係細魷魚鬚，唔會咬到牙都軟😎勁好食，呢樣必點！ ⭐香脆炸大腸 個人喜好鍾意食炸大腸，好香好脆又唔油，點埋個酸味汁就完美了😋 ⭐香脆炸兩腸粉 油炸鬼細細條，包埋腸粉啱啱好一口一件，甜豉油正，如果有埋麻醬就更好啦。 ⭐豬潤肉丸粥 大大煲熱辣辣，豬潤爽脆肉丸彈牙，份量仲下得唔少添，食完無口渴喎，靚粥黎呀😋 ⭐XO醬海鮮炒飯 朋友叫左炒飯，炒得金黃香口，海鮮有魚柳、蝦、魷魚等，XO醬微微辣好惹味👍 ⭐珍珠奶茶 & 凍檸茶 估唔到粥舖都有珍奶食，朋友叫返杯試下喎，奶茶口味係港式奶茶，珍珠有咬口，走左甜啱啱好😋凍檸茶檸香茶濃，同樣叫左走甜呀。 飽到上心口都唔使三舊水，好食又抵食，正呀😍

星期六放半晝，放工同朋友到尖咀韓國街食韓國野😆一街都係韓食店，一時間唔知揀邊間好添。 望左陣決定食轉角位呢間韓文字餐廳，旁邊有細字寫住叫Maido，唔寫真係唔識讀😆 店員應該唔識廣東話，佢手語示意落單寫紙仔，都好吖唔洗指手畫腳😆 落完單便送上韓式前菜，個人覺得個薯仔幾好食，有蒜油香😋 ⭐醬油炸雞翼 餐牌內炸雞，咁叫個燒雞翼過下口引，所謂的醬油原來係柚子醬，甜甜酸酸都幾好，但雞翼本身無調味，所以食完個雞皮後就偏淡了。 ⭐炒韓式豬血腸 除左主角豬血腸，仲有年糕、椰菜、紅蘿蔔、洋蔥、粉絲等同炒，醬汁微辣幾惹味，豬血腸軟軟糯糯口感特別，意外地無腥味，幾好食喎😋 ⭐石鍋牛肉拌飯 上枱時熱辣辣香噴噴勁吸引，避免太多飯焦，即刻落辣醬撈一撈先，怕太辣先小試牛刀落少少醬，微辣飯香口，飯焦有口感，加上蛋汁勁正吖🤤 叫太多好飽呀，食淨左少少飯同配菜，下次都係唔好貪心叫咁多嘞。

朋友介紹左一間好食嘅砂鍋粥，是晚見涼涼地，就去試下先。 地點在大角咀內街，都有啲難搵，而且附近好靜，唔講真係唔知呢度有野食呀😌 餐廳六點先營業，我地早左到，店員示意可以到店內坐住睇餐牌先，廚房就快ready㗎啦。 ⭐乾鍋田雞 先來一份乾鍋田雞，辣野啱哂送粥嘛，雖然好多辣椒，但其實食落只係微辣，一口接一口完全無難度，呢個辣度我覺得啱啱好😋田雞肉質鮮味，蛙身幾大啖啖肉，好正喎🤤 ⭐椒鹽九肚魚 再黎一份椒鹽九肚魚，香口野同樣啱哂送粥，炸漿沒過厚，外層酥脆，內邊的魚肉嫩滑，入口即溶，加上蒜香辣椒香真係勁正😍 ⭐招牌砂鍋粥（細） 最後就係主角砂鍋粥，加了蠔仔、乾瑤柱、鹹蛋、皮蛋，另外粥底本身有薑絲、冬菜、蔥花等，蠔仔鮮甜，瑤柱鹹香，加埋鹹蛋皮蛋真係色香味滿分🤤同埋細鍋都好大鍋，兩個人食一人分到五碗，飽到上心口😆 食物好食又足料，環境靚靚好坐立。唯一唔明係收$10茶芥/位，但只有碟花生小食，水都係要問先有，如果有壺茶就完美了😎

出黎深水埗食tea，附近間間都多人等位，就揀左間無人等兼入面有幾張吉枱嘅澳葡牛奶餐室，此澳牛不是彼澳牛😆 大家嘅聽覺都有啲問題，無法聽到店員問咩，而我落單嘅內容店員亦聽不懂，真係廢了好大勁先落到單，不如餐廳考慮整返個qr code😂 ⭐蕃茄濃湯牛脷米線 朋友點嘅蕃茄湯米線，濃湯欠奉，個湯底基本上無蕃茄味，橙色的清湯😂牛脷煎過味道正常，米線無過淋ok嘅，但如果想食米線的話我就唔推介了。 ⭐紅豆西多士 好失望嘅西多士，單片薄切麵包，有用蛋漿浸過先炸嘅，但無味㗎…紅豆好硬又唔甜，下面有啲白色水但又唔係煉奶黎，感覺似紅豆冰拎返出黎嘅紅豆😂 ⭐熱檸水 全餐最正常嘅野，有三片薄切檸檬浸滾水，穩陣之選👍 見餐牌寫住加十蚊可以有葡撻，而葡撻又係呢間嘢嘅招牌貨，就諗住加一個啦，點知店員話買曬冇啦😂可能米線同西多士都唔係澳葡名物，叫錯野食了，呢餐真係堅失望… 題外話：枱面、櫈、用具、餐牌都痴立立，希望店家可認真清潔一下💦

花墟呢帶勁多餐廳、酒吧、小食等，是晚便同朋友黎搵食😋見呢間燒味店人氣不俗，燒味熱騰騰好吸引，就食佢啦。 坐低後伙計便送上水，得知呢度出名乳豬同燒鵝，可惜燒鵝已賣晒，咁就試個乳豬先。 ⭐乳豬五寶飯 朋友話佢要貪心啲一次過試晒所有🤭賣相幾吸引，乳豬脆卜卜，豬油甘香，切雞嫩滑，好正😍 ⭐叉燒燒肉飯 自己就揀左雙併，賣相同樣吸引，燶邊叉燒呀，顏色仲好正常，半肥瘦肉質軟嫩香甜。燒肉個皮仲脆㗎，層肥層瘦咬落皮脆肉嫩，勁好食😍 ⭐佛山燻蹄 薄切的豬小腿肉，咬落豬皮爽口有口感，唔過肥亦不膩，點少少醋食勁正👍 ⭐手拍青瓜 覺得肉太多又後加咗一份手拍青瓜，青瓜爽脆有蒜香，酸酸的醋味正好去膩，呢餐完美作結😋 估唔到燒味飯都可以咁高質，唔怪得店內全部係熟客啦，食完真係會返轉頭。

舊地重遊，好久以前在石門返工，現在多了商場同好多食店，回想過去lunch time真係無啖好食㗎😂 食店太多，一時間唔知食咩好，經過聚友小廚，個老闆（？）大力推薦佢地嘅小菜，就試下呢間啦。 ⭐椒鹽鮮魷 先來個香口野，確實炸得很香脆，魷魷大大塊份量很多，但個人覺得椒鹽唔夠多，偏淡了點，食慣重口味嘛😆 ⭐西芹腰果炒肉丁 西芹爽脆甜，炒得乾身唔油膩。 ⭐蒜蓉豆苗 大大盤豆苗正喎，有鑊氣有蒜香😋 ⭐蒜子火腩大鱔煲 火腩同鱔都多，一大煲無稀場，個煲燒到啫啫聲勁香呀，鹹香鮮味，下層有幾件蘿蔔，吸飽汁超正，唯美中不足係蒜子唔多，哈哈😆 ⭐生炒糯米飯 冬天必食名物，呢間個糯米飯都炒得唔錯喎，香甜軟糯😊 無估到碟頭咁大，叫太多超飽呀😆

是晚除夕夜，同朋友來到最近好多人講的Dabinlo，主打賣串燒同火鍋料，仲提供地方可以即刻煮，咁得意就特登約朋友黎試下。 食物選擇多，包裝乾淨衞生，感覺不錯喎😊 大概五點幾來到，買野嘅人多，但現場食就得幾枱，時間尚早嘛😆爐具幾新淨，抽風唔錯無油煙味。 先燒野食吧，買左少少玩下咋，朋友唔太like燒烤，佢prefer打邊爐多啲。 店家會提供調味品，有辣醬、燒汁、泰式酸辣汁等。 個爐幾猛㗎，一陣就燒熟，三文魚腩脆卜卜，滿口魚油幾正🤤燒飯糰塗啲燒汁去燒，香口甜美，有飯焦嘅口感🤤 再黎就打邊爐先，買左好多肉🤤仲有菜同丸，當然唔少得湯底啦。 湯底買左冬蔭功，店員示意一盒湯再加一盒水，1比1嘅比例係最好喎。 湯底好濃郁，個人覺得唔使再點調味料了，牛板腱有肉香，普通肥牛都唔錯，仲買左羊肉片同麻辣牛丸🤤肉肉好味🤤 明碼實價方便衛生，食完唔使洗碗，現場仲有回收桶，將包裝盒分好類放返入個膠兜度，店家就會拎去綠在區區度回收㗎喇♻️

見X假期介紹呢間牛舌店，好吸引便同朋友黎試下。放工時段七點幾鐘黎到，雖然未使等位，但都全場滿座㗎，人氣滿滿呢。小店用qr code落單，主打牛舌，都有少量其他食材選擇的。⭐雙倍牛舌芯套餐
朋友揀左限量的雙倍牛舌芯，再加錢轉套餐，套餐有齊漬物、沙律、餐湯、紫菜飯同飲品，感覺抵好多嘛。⭐大啡菇併牛舌芯牛舌尖套餐
自己就貪心啲，一次試幾樣野，個人覺得呢個餐抵食喎，有兩條牛舌芯，四片厚切牛舌尖，仲有隻鮮味多汁嘅大啡菇🤤⭐雞皮餃子 & 吉列蠔
仲加左香口炸物小食😆雞皮餃子咬落滿口雞油好邪惡呀，吉列蠔脆卜卜好正。⭐大紅袍 & 茉莉綠茶
跟餐飲品揀左無糖茶，正好去下膩，呢餐太多肉啦🤭 無加一都幾抵食吖。