高標準美食快線(半山)

中午時份, 同事仔另外有約, 一個人, 正在想食什麼之際, 往公司的外賣紙collection裡找. 發現一張已經派了多個月, 因為地點同好似冇送餐服務而一直沒有考慮的Gourmet Xpress. 反正是日沒有什麼事幹的, 中午正好做做運動. 上山找找看, 而且那$18叉燒飯promotion, 非常之吸引. 悠閒的lunch time, 就登高去. 上山就不行了, 坐巴士好d, 兩個站....

到達科達中心, 就在電梯大堂旁, 對著花園道既門口, 就是那小小的外賣攤檔. 落order, 就要到後面, 像是停車場收費亭既地方, 落單, 俾錢. 晏上來, 又冇打電話落定order, 是日的叉燒飯已經賣哂, 不想食素, 不想食其他燒臘, 不想食辣. 看了像走馬燈的LCD電子menu, 咖喱吧, 要一份咖喱牛腩. 之後等服務員從電梯出來, 外賣部加埋杯豆漿俾你. 自已拿走. 而我就輕步輕快的行落山.

打開飯盒, 咖喱味道好清, 不像一般茶餐廳的多油製品. 普通的有薯仔, 有牛腩啦. 味道還是可以. 可能是行落山時凍了, 感覺沒有熱辣辣咁好, 而且汁唔夠.

特登上來, 相信不需了, 不過就在半山上打工的人事. 如旁邊的百佳. 40元樓下的飯盒, 又近又抵食. 而且沒有味精. 真是不錯. 是日最可惜的, 就是吃不到那$18叉燒飯.

KK正宗印度餐廳(葵涌)

從以前大學老死Zia口中得知, 荔景山既印巴力量, 絕對不比佐敦, 重慶, 天水圍差. 而的確, 荔景山頭幾條屋邨, 周不時都有印巴家庭出沒, 落黎美孚地記返學既, 更多.

是鱔稿又好, 有附近食客倀過覺得正忍不住要寫一篇又好. 總之, 是看了某一個精彩的食評, 才吸引我放工, 兜一兜路上來, 試一試呢度既印度咖喱.

地點都幾隔涉, 出了荔景站, 仲要轉小巴上祖堯, 係商場落車, 上二樓, 大昌旁邊, 有一間門口閃著燈, 就是小小的咖喱屋. 能操一點廣東話的老闆娘同滿面鬍子老闆, 熱情的招呼我入內.

入到去, 由始到終都係只我一人, 小小店, 好重"星"味. 突然回想起Birmingham大學附近的小小Balti House, 冇乜人, 輕輕鬆鬆的一個人嘆咖喱. 是晚天氣冷, 朋友在facebook提起羊腩煲, 咁我就倒不如來一個咖喱羊 (Lamb Massala), 老闆娘問我Spicy or not Spicy, 那當然要Spicy啦, 不香辣怎成咖喱.

中間等了一會, 事因店主一家工口正忙著打理旁邊釘左版既吉鋪, 想必是另有新業務. 搬好野, 回來才即煮我既美味咖喱.

出來的小兜咖喱, 味道香, 羊肉亦好多件, 而且仲有一隻蛋, 印度的香料令到這兜野香噴噴, 天寒地凍, 特別的吸引. 盡管米飯只是普通的澳洲米, 雖覺得格格不入但也無礙. 淋上濃香的咖喱汁, 一啖熱飯, 一啖羊肉. 口感美味, 而且羊肉效應, 食飽走人時, 雖身在冷冷的荔景山頭等小巴回美孚, 但也感覺到暖氣慢慢從胃裡散發出來.....另外出來的不只是熱氣....記得當年的日香糖廣告嘛.....一句我剛剛食完印刷咖喱.....沒有口香糖....自已都聞到自己滿口咖喱味. 若是日食的話, 相信都會令自己自身散發出印度香.

味道, 果然是正宗, 這樣有心經營又好食的的小店, 值得帶多幾個人上黎, 開個小小印度會. 下月要搬離美孚時, 走之前約三五美孚葵青荃友, 來個為食入新界 荔景山的正宗印度力量 飯局又如何.

新藍塘餐廳麵包公司(半山)

因老細既事, 上左半山, 中午就自然地係山上搞掂. 係堅道, 西式的餐廳也許太貴了, M記是有的, 但不感興趣. 心中知道, 堅道好多茶餐廳. 本來打算誤打誤撞, 有間燒臘就準備入. 若不是同事仔發現對面馬路間藍塘, 都唔知道原來有好野.

在外面看, 是一間古早味的麵包鋪....(哈哈, 而家古早味, 古法已經變成常用詞). 再細心看一看, 有lunch menu的, 再深入少少望入去...原來內有雅座, 咁兩個人就決定過馬路. 入到黎, 原來是一間古早味的冰室. 服務半山student同打工仔. 不過可惜, 沒有嘉諾撒商科既靚妹仔係度食, 冇得邊昅女邊食飯.....

店內, 大部分是長者, 服務同食客也是. 前鋪麵包蛋糕香噴噴, 快餐果part也一樣香溢. 大叔伙記笑口笑面的. 介紹是日快餐. 於是, 同事仔要了一個著仔雞飯, 而我就另外向炒粉麵既餐牌看, 叫一個燴牛脷飯.

牆上大字報, 除了Menu外, 亦登出兩段報道, 說出多食咖喱減中風機會, 多吃洋蔥減老人痴呆機會....好明顯, 呢度既主要客源, 係附近既老中環街坊.

食落, 兩個飯, 味道都偏向清淡. 好開心食得出是沒有落味精的. 著仔雞飯, 雞肉嫩, 汁又夠. 可以好enjoy咁食. 而且份量適中, 唔係太大碟, 食唔哂只會倒, 浪費食物.

這裡說多吃洋蔥好, 我的燴牛脷飯就充滿了Onion, 而且是半熟洋蔥, 事後口氣真的好重....果然有殺菌功效...怪不得佛家人士要ban佢啦. 牛脷切成一條條, 煎得好香. 汁, 燴上的蕃茄汁又甜甜地. 味道濃而唔杰. 也是送飯一流既汁. 不過, 餐後兩杯奶茶唔夠熱, 失了分.

服務親子友善, 離開時, 不小心踢爆了人地既拖地桶, 應真不好意思.

Pret A Manger(中環)

一早, 來到呢頭, 為的除了交表之外, 並無其他意思. 作為一名鐘意飲飲食食既人, 知道花旗銀行個shopping centre有野食, 雖然只是三間連鎖 coffee shop, 既然來到, 不外賣一個早餐走, 總覺有點對不起他們.

Starbuck太多人排隊, Pacific在走時才留意到, 面前只有Pret, 簡單地買個凍治同coffee. 要就要了All day Breakfast三文治. 內有煙肉, 生菜同蛋沙律. 味道簡簡單單. 要再多一點花巧, 可能就要食其他bap了.

外國式三文治, 雖然是凍食同埋pre-packed, 但味道材料比起港式的什麼蛋治健康. 煙肉一小片, 少少脆. 蛋沙律味道又好至極, 加埋杯咖啡雖要$50. 貴, 但做得好, 總算叫做值值地. (不過, 係3大coffee shop買早諶, 根本是破財格.)

咖啡, 要了一杯Latte, 味道就比較淡同奶身比較薄. 做到好thick只會令人覺得飲一杯, 已不用食其他野. Latte已經是多奶, 不過奶輕身少少比較好.

花旗商場, 一眼睇哂, 3間coffee shop, 一間simply life. 全是西式, 全是serve老外的. 難道不能容立一些較中式的食肆嗎....? 由纜車站開始數, 至美國銀行花園道尾....都係呢d coffee shop為主, 難怪在那兒上班的朋友, 經常慘叫....冇野好食.

五陵會(中環)

朋友說明要同我搞返個生日局, 不打算推辭了, 便由他在facebook出event, 最後有18人出席, 一圍大檯, 甚是高興. 首先要多謝是晚出席的食友, 同百忙中都幫我作了打點的南瓜哥.

是晚菜單, 由經理譚生於最後一刻才幫我們finalise. 由兩圍的菜單, 改為檯半18人的菜單, 譚經理可真是非常幫得手.

其他事不說, 只說是晚食物吧. 譚經理精心為我們挑選了前菜四小碟. 紫羌糖心蛋, 美極排骨, 煎羅漢腐皮卷 同 蜜汁鴨胸肉.

紫羌糖心蛋, 皮蛋是靚, 不過我食過最靚既, 始終係鏞記既出品, 這裡的皮蛋, 有流心的蛋黃, 看到起冰花及晶瑩的蛋白, 黃甜甜地, 五陵會入貨入得都唔差. 惟是紫羌切得太厚, 薄片一點會更好.

美極排骨, 簡單說, 就是豉油排骨, 只是用了鮮醬油而非普通的生抽老抽. 排骨肉味係度, 說是落了美極去炒, 但味道完全沒有被過份濃既豉油味搶去. 因為食慣快餐, 美極真的好搶味道. 這排骨一致得到我們的稱讚.

煎羅漢腐皮卷, 看似普通酒樓的煎腐皮卷點心, 只是要試下佢地處理煎腐皮既功夫得唔得. 腐皮, 韌韌地, 但咬落有香脆的感覺, 再用力咬多一下, "sok"一聲, 腐皮就好完整地裂開, 裡面是羅漢上素, 所以冇乜汁, 亦因為咁, 所以內層腐皮有一定的韌, 外層腐皮有一定的脆. 不點喼汁也好食.

蜜汁鴨胸肉, 外國式的煙鴨胸肉出現在中菜當中已經不是新鮮新奇事. 只是有時真的要留意下, 用中國人手法去做外國人食開既食物, 是否真的work. 不過, 鴨, 中、法人士都識整識食. 這只不過是扎煙鴨胸再加蜜汁醃一醃, 再加以煎香. 此鴨胸的smoke味很重, 煎香後上碟, 食落口, 依然有煙燻味道. Raw, 開pack既時候, 一定是非常香的.

頭一道菜, 是炒班球. 一來來一個比較清淡的前戲, 廚房師父都好識分配. 班, 譚經理同我說是老虎班球. 肉質爽甜. 另外加上芹菜同露荀等去炒, 清清地, 不錯.

之後, 是富貴鴛鴦蝦球, 聽說蝦球是這裡師傅的拿手作之一, 一邊, 是水晶蝦球, 另一邊是雀巢沙律明蝦球. 蝦又爽又甜, 食大蝦, 要找到爽加甜, 真的不容易, 味道方面, 沙律醬的蝦球, 混在一起, 雙重味道. 水晶蝦球, 純新鮮蝦味, 而那雀巢, 是正宗用芋頭炸的, 我們一眾飲食怪客, 食完蝦, 當然要拆埋個巢, 吞埋落肚才安樂.

蝦球之後, 是湯, 名字長長的, 淮杞响螺花膠炖竹絲雞. 湯料有瘦肉, 淮山, 杞籽,响螺, 花膠 , 同竹絲雞一隻. 此為炖湯, 若是老火湯的話, 感覺來得更好更保. 炖湯, 一定冇老火湯咁濃郁架啦, 但竹絲雞, 响螺, 花膠, 同其他藥材, 味道好重. 清清的炖湯, 沒有落味精. 非一般的家庭式味道.

五陵會另一名物, 蝦子柚皮, 不過譚經理說扣埋個鵝掌, 口味會重D, 亦多D野咬口. 不過, 出到來, 扣鵝掌既味道也許過了少少, 蓋過了蝦子味. 不過, 鵝掌夠淋, 又大隻, 味道是蠔汁, 加上蝦子mix埋一齊既味, 感覺份外的特別. 柚皮, 好難得找到咁厚肉既柚皮, 而且仲要唔老. 炆得夠哂淋. 我姨丈是會員, 黎親都會食柚皮, 佢冇推介錯既.

改了單之後, 加食了一個砵酒焗桶蠔, 忘了問蠔既產地, 不過相個不是國產或港產. size是中等的大. 而且亦分得好, 一人一隻. 砵酒味, 加上適量的羌蔥, 味道不沒有太咸, 能讓人食到蠔既真味. 不過, 係覺得佢未夠king size, 大隻一點, 更加好食, 價錢, 當然會貴多一點啦.

眾人問有冇飯之際, 兩大煲煲飯已經ready, 不過, 大家在談笑中, 原本有齊所有臘味在上的, 已一早拿回廚房切切切. 侍應姐姐笑說, 早點出聲可以俾你地入廚房影....煲仔飯食得多, 咁大煲既始終不容易食到, 亦不容易做得好. 這個臘味飯, 有齊, 臘腸, 膶腸, 臘肉, 臘鴨. 味道濃烈, 可能天氣太凍, 飯的熱騰騰感覺是有, 但沒有好似永樂園成煲食咁, 由喉嚨熱到腸胃. 味道, 臘味是上等貨, 味道香而不油, 另外要說是那個杰杰的撈飯豉油, 真的想落多一點. 盛出18碗飯之後, 侍應把飯焦挖出來, 添飯的朋友, 運忙排隊去搶頭啖飯焦.

再來多一個清菜, 蟹肉竹笙扒豆苗, 蟹肉扒豆苗多吃, 加了竹笙, 多了些咬口, 令本來又悶又單調的菜式, 加了一個驚喜.

炸子雞就比較普通了, 雞未是最嫩, 皮脆呀, 但雞瘦, 又冇油. 來料問題吧....也許.

甜品time, 蛋白杏仁茶, 好多人都覺得有點失敗, 不夠滑, 不夠甜. 比一比其他酒樓既杏仁茶, 沒有過之, 只有不及.

壽包, 經理, 侍應姐講明是出面買, 失了意思, 而且眾人都已經飽到上心口. 不得不打包.

是晚, 開心中渡過, 我們本來把寧靜的五陵會變得熱鬧起來, 是小弟牛一之餘, 當中亦有兩名食友俾人玩到殘. 18人, 再加上經理同侍應姐姐. 20人, 一齊在這寒日渡過了歡暢的一個夜晚.

最後, 多謝是晚為我祝壽的所有朋友.

Na Na Banana(灣仔)

一個人到了灣仔辦事, 灣仔區, 來來去去都係食茶記, 燒臘, 感覺冇乜新意. 反正要係地鐵站附近等人, 就看看附近既pub, 有冇邊間打經濟牌, 冇既先回去茶記.

在地鐵站左近, 有間叫什麼banana既酒吧, 食泰國野. 再行前, 一就是實妹光管舞吧, 三就是成90幾一個set lunch既老外酒吧. 既然$48有湯有飯有飲品. 就回頭食個泰式pub lunch.

叫下是日午餐的泰式海南雞飯. 先, 泰國姐仔把是日例湯送來. 哈, 竟然是中式湯, 雪耳木瓜湯. 清潤湯水, 感覺夏天飲先啱feel, 不過前文提過熱湯勝過熱飲, 當然欣然暢飲它啦. 只是雪耳未起膠, 起了少少膠質, 膠膠地飲最好最潤. 湯太膠就唔得啦......(人太膠都唔得啦, 膠膠地就最好).

飯到, 一貫泰式做法, 凍雞, 暖飯. 飯就有香雞油味. 雞是去骨雞. 不過肉就鞋, 不是新鮮雞永遠覺得差少少. 味道是食開既泰式海南雞味道. 不過, 我就係唔鐘意佢係凍既....(可以天氣影響我對食既取向吧).

奶茶....不提也罷.

地方, 當佢係pub, 猜下拳, 對下啤, 仲不錯. 係因為要做pub lunch, 所以全部小檯圓凳...如果夜間品酒時也是這樣坐....我don't like it.

信寶餐館(羅湖火車站區)

難得深圳既事一早搞拈, 7點放人. 打電話給邊緣朋友, 原來是日不用當更, 正陪兒子玩著. 這樣就決定取道羅湖. 搞好就係關口食, 搞不好, 就過左關返大埔食. 不過, 在深圳地鐵車箱中, 考慮到天氣凍, 自己只有一件西裝褸. 由大埔火車站行去大埔墟, 病初癒的我好容易吹吹下又病返. 都係係羅湖食好. 最多, 返美孚先吃.

行人關, 其實已經留意到一間燈光同環境不錯既餐廳. 門口, 亦似足"花園", "新加玻" 類型既餐廳. 公關小姐給我看了看 menu, 有中有西的. 感覺良好, 入去, 就食左先過關啦.

是次, 點了一個豆腐炆腩肉飯. 先給我一個熱湯. 有時凍凍地, 來碗熱湯好比任何飲品. 是日什麼例湯, 竟然來了個不太合時宜既西洋菜湯. 不過, 寒冷的一天, 最重要是熱, 一飲落去, 味精是有的, 但落得好輕, 味道比較清淡. 菜又爽爽的, 飲完成身暖哂, 真係舒服過飲熱奶茶.

豆腐炆腩肉飯, 原來是濃味的客家做法. 汁夠濃, 看見有油, 但完全唔覺膩, 直情是送飯佳品. 在香港, 好難食到咁肥既豬肉, 但大陸冒檢測標準不同, 食豬肉, 幾肥既都有, 做扣肉, 鹵肉, 東玻肉, 圖中呢種腩肉, 其實是最佳產品. 不過基於健康理由, 建議大家不要多吃, 偶爾一餐半餐好了.

圖中的肥豬肉, 肥而不膩, 油已經在炆既過程中, 炆哂出黎, 反而, 個汁比舊肉更多油. 豆腐也是吸油的一份子. 味道濃, 入味. 不敢用太多汁送飯, 但若是沒有餸, 只有汁, 從前, 我老爸既年代, 送到3、4碗飯.

慢慢食, 慢慢飲埋杯奶茶. 看一看糖包, 原來是三島集團既食肆. 羅湖口岸, 三島有酒樓, 骨場, 麵檔, 茶餐廳, 出境位, 基本上俾佢霸哂黎做. "關係"一定是良好.

陶園燒臘飯店(佐敦)

星期一, 因老細要出差而中午被急急召上深圳. 計一計, 好似坐佐敦車, 同坐灣仔車用時一樣, 便決定過左海先, 貴便, 係佐敦D街仔搵野食.

時間不多, 最快, 茶餐廳, no, 快餐店, no, 斬大舊叉燒一定是最快的. 出地鐵口, 看到一個高掛的招牌. 燒臘店. 不理好不好食, 吔飽上路比較重要.

叉鴨飯, 又快又簡單, 出錯率又低. 病剛好, 不要湯要了可樂, 實在有點不應該. 飯到, 一看, 竟然有點失望, 給我的叉燒是極瘦之餘, 汁又唔夠, 鴨又唔靚, 用片大椰菜鋪住, 原來是為免我看到鴨肋.....

好少食叉飯要食到我要落豉油. 那個汁, 實在是唔夠味, 叉燒太瘦, 吃不出味道來, 鴨, 皮下就是骨, 吃不兇味道來, 快快食完要北上, 沒有用心去吃出佢既味道. 可能真的要好用心才感覺到佢既味道. 不過, 有一個味道是很強烈的, 就是我落既豉油.

10分鐘完事, 跑去童軍會車站.....一路向北.

旺記食堂(葵涌)

星期六, 修道日. 需要入屯門而想起不如經一經葵涌轉車, 順道探索下呢間係openrice咁出名既一言堂. 城巴沒有報站真不方便, 害我落早了兩個站, 搞到要由葵興行上去. 不過, 到不算難搵. 一行到路口, 就見到另一名物, 飛亞飯堂. 不過, 是日志不在此, 找不到旺記先算啦. 結果再入橫街仔直行, 一個小小門口, 手寫的店名. 就是馳名的旺記飯堂. 來到, 必然要試試呢間野有乜吸引, 可以令一名資深食家去"食親都寫一篇".

一貫簡陋的茶餐廳feel, 衛生一般. 地方不大, 相信呢檔野, 都係靠送外賣為主. 店內幾位大哥, 態度不錯. 同一些老工友, 有說有笑, 講聽日馬仔.

是日兩餸飯. 我就叫了京汁豬扒同芙蓉蛋. 說是快餐, 原來到不算, 所有野是即叫即做, 也許, 我來到時已經3點, 而且是星期六. 所以不預先做咁多.

京汁豬扒, 其實是咕嚕豬扒. 那咕嚕汁, 份量是剛好的, 味道亦酸中帶甜. 薄薄的汁, 又有味, 沒想到一向是求其做餐飯俾工友食既飯堂, 原來都有返咁上下散手.

芙蓉蛋, 內含叉燒同蝦仔. 不過蝦仔, 應該是雪藏餅裝蝦仔, "bea'水"bea"到冇哂蝦味. 不過, 蛋外熟內半熟, 火侯控制得好好. 而且, 要真係夠猛火同鑊氣才能煎得出來. 淋在蛋上的甜豉油, 撈飯食亦正.

奶茶, 是用黑白淡奶, 味道半濃, 有茶味. 雖然不香但茶味真的夠哂. 不知旺記有沒有參選黑白淡奶個奶茶比賽呢. 以前提及過, 港式奶茶比咖啡更高咖啡因, 係工廠區飲奶茶, 要令一眾工友同業有勁有精神做野, 一杯靚奶茶, 是必須的.

以工廠飯堂standard來計, 呢餐我食得開心, 令我滿意. 難怪吸引到OR的資深會員, 一冇帶飯返工就指定賣佢既外賣啦. 下次再來呢頭, 要試 "飛亞".

金利銀輝茶餐廳(美孚)

回到家, 才知道是日屋企冇人. 沒住家飯食時, 當然係美孚找找有什麼地方未食過. 美孚不大, 但當中真的有好多食肆. 再加上Manhattan Hill 既商場開張, 基本上, 食在美孚, 選擇只會有增無減.

身在萬事達廣場, 心想, 蘭秀道有一間係OR獲得不少好評既茶記, 是日天時地利人和三樣齊哂. 今日唔試下金利銀輝, 等下次就唔知要等到幾時.

9點多, 電視正播著宮心計, 而近電視的位子, 早已被劇迷霸著. 自己只能找個地方遠眺.

未看清楚Menu, 例湯己經先到, 美味的合掌瓜湯. 而且夠熱夠老火. 不過, 係嫌佢少少味精姐.

點食, 一個人始終都係碟頭美食. 就叫下大字報上的梅菜扣肉飯. 那梅菜扣肉值得一讚, 濃烈的正宗味道, 半肥瘦的腩肉. 又淋又入味. 而且梅菜味香, 食梅菜扣肉, 最重要, 就是香梅菜味, 帶入汁中. 客家餸, 味濃, 汁又夠好味, 是送飯最佳選擇呢. 而且, 扣肉處理得好好, 因為食落, 肉雖肥, 但唔覺, 亦沒有脂肪粘著個口.

食飽, 找數時, 行到 cashier, 精彩的宮心計, 有 d 位, 真的能令人停一停, 睇埋先走.

Maharani Mess(中環)

是日中午, 要搞搞飯局既野. 一個人先來到中環, 在等另一位朋友幫手之際, 走進了老蘭. 日頭既蘭桂坊, 而且是1點半既蘭桂坊, 顯得有點冷清. 我由山上的德己立街直落, 轉了彎, 路邊有個牌 "Set lunch for $48". 咖喱 set lunch, 又幾好播. 企在旁邊的星哥, 有如重慶的招攬手法. 帶我上樓, 食咖喱.

行入大廈大堂, 感覺同入到重慶無別. 舊式的商住大廈, 因為地方太舊而令人產生不衛生既錯覺. 入埋舊到唔舊既升降機. 上到黎, 是一間小小的, 重慶大廈咖喱王feel既小小curry house.

Set Lunch, 應該多年來都是這4款, 咖喱雜菜, 咖喱雞, 咖喱魚, 同咖喱羊. 而我就選下咖喱羊, 因為食印度餐, 不吃羊, 覺得完全不像話. 另外, 叫下一杯 Mango Lasse.

芒果乳酪, 即叫, 店主大哥即時拿出乳酪同罐頭芒果, 再倒落調酒杯, 即搖. 一杯黃色, 濃濃的 Mango Lasse就出現在我眼前. 味道, 充滿濃濃的芒果味, 而且夠凍, 好既Mango Lasse就要這樣, 濃芒果味, 不搶乳酸味, 而且不太酸.

Set Lunch, 有Tandoori Chicken 一件, 不過這是冷盤小食. 凍食的燒雞, 比較少食, 不過印度式燒雞, 一向選用上等瘦肉, 雞肉淋又不鞋口. 點一點咖喱汁, 反而覺得不襯托, 都係就咁食好味d.

咖喱羊, 份量雖少, 但其實夠食, 而且有飯, 有Naan, 會是非常飽肚的一個餐. 咖喱, 沒有理會是什麼咖喱種了, 辣不算辣, 香味普通. 味道比較甜口但又不像Korma. 感覺, 會是著通的Balti咖喱. 配菜有甜咖喱豆, 西蘭花, 一塊脆薄餅. 一份非常快的快餐, 有齊食咖喱館應食到既食物. 而且價鋨合理. 回到公司同同事宣傳下, 愛食咖喱的他, 亦嚷著說下次帶一帶他去.

平常別以為老蘭只有酒吧同高級食肆. 原來隱藏著一間咁地道而且價錢相宜既印度館子. 若不是印度哥搖指咖喱屋, 我都不會發現到呢間餐廳.

永記潮州粉麵(西環)

是日又要撲去西環做野, 當然, 外勤要選好時間. 順帶係果頭食埋lunch. 就在修打蘭街落車, 呢次, 就試下呢間人多多既麵檔.

雖然已經點半鐘, 店子依然全滿. 坐下來, 有不少西裝友. 相信呢度都幾吸引中環尾, 上環一帶既打工仔來食. 同檯, 亦有一位西裝畢直的老伯伯. 心想, 這店在潮州商會旁, 難道那伯伯是潮州商會的一名資深會員大老闆....而且佢又真係幾有"陳鴻烈" feel.

我點下一個雙拼, 牛腩加上豬粉腸. 湯底, 喝了一口, 不用問, 淨靠味道已經知道這是豬什湯. 只是比起皇后街街市的陳x記, 少了點胡椒味. 不過, 這樣也好, 豬什腥味沒有被胡椒嚴重蓋過. 而且, 可能這裡的豬什, 只是粉腸, 豬肝, 豬肺, 同 豬心, 味道冇咁腥.

牛腩, 就只是一般車仔麵店食到既碎腩冇分別. 沒有清湯腩的爽, 沒有傳統牛腩的濃. 但豬什方面, 就非常之好. 雖然, 我只食了豬粉腸, 夠淋之餘, 味道又唔係腥, 腸內脂肪夠粉. 咁多打工仔, 甚至老闆級人馬來食, 果然有返咁上下.

看了其他資深食家既食評, 原來這也是昔日修打蘭街大排檔之一, 老字號, 果然是老當益壯.

蘭芳園(尖沙咀)

是日能夠早下班, 沒有約會, 沒有飯開, 沒有飯局. 去完圖書館搜集資料, 之後便乘船過海, 行下街, 買到對新波鞋. 開心地行返入彌敦道搵食. 路過重慶, 看見前陣子朋友介紹的另弓個G.O.D. 復刻. 就落黎睇睇, 是什麼樣子. 而且, 當然是要來嘆下絲襪奶茶啦.

入到鋪頭, 令我聯想起的, 不是蘭芳園, 而是星座冰室. 因為, 同樣是地庫, 同樣在舊商場. 幸好, 不同的, 是呢個商場已經返新, 茶餐廳是新的, 舊, 只是G.O.D. 一眾designer, 喜歡玩的復刻.

環境格局上, 好過Starbuck好多, 因為是全間餐室, 都是復古設計. 每一個角落, 每一張檯凳, 都非常懷舊feel, 最能代表的, 當然是由中環舊鋪, 拆出來裝在新鋪的舊招牌. 不過, 圓凳整左個"蘭"字係度, 未免覺得G.O.D. 手多多.

病未癒,簡單一點, 食個撈丁, 而且, 來此, 當然不是為了呢個gimmick, 是為了試下新店的"Pantyhose(絲襪) Milk Tea(奶茶), 能不能保持到中環老店既水準.

點的那個撈丁, 叫什麼豬泵兜叉燒汁撈丁, 問一問老伙記, 豬泵兜是乜黎架, 原來是豬頸肉, 於是非常安心的點下. 個汁叫做叉燒汁, 但食落, 感覺好似食緊泰式豬頸肉咁既. 呢個叉燒汁蜜味較重, 重到有點像泰式醬汁....所以我話似泰式豬頸肉就係咁原因.

主角, 是馳名的絲襪奶茶, 夠滑, 夠香, 濃度適中, 不知有沒有把中環, 煲了幾十年個茶煲搬來呢, 因為要用這樣的茶壺, 才能夠沖出靚既奶茶. 感覺上尖沙咀店比起中環兩間店, 係差少少, 但師傅功力同茶底, 是一樣沒有太大出入. 如果, 佢唔玩懷舊feel, 淨用個名, 相信都一樣做到好生意.

不過希望, G.O.D. 玩還玩, 不要玩得太過....呢度已經唔覺得有煤氣燈街Starbuck, 當時做出黎果種熱潮啦.

後話, 食東西當中, 最最令我覺得同古代冰室相襯的, 是隻蚑仔, 飛黎飛去..............咁先似返間冰室架嘛......同你影張相, 說一句....老朋友, 您好.....

再要似的, 白衫(滿袋原子筆墨漬), 既制服代替Polo恤, 先會令人感覺回到60年代.

六榕仙館(佐敦)

這天, 到我同未來外母試衫. 果然, 我們花的時間比較少, 好快已經揀好. 9點多, 百母同姨仔話要試試六榕. 我們一行4人便漫步至佐敦. 到訪這一家老牌齋鋪.

大家都肚餓了, 未等百母點下菜時, 我們已先來兩個點心. 一個素咸水角, 同齋鹵味. 沒有肉的咸水角, 裡面是什麼, 看一看, 其實都是那些素肉碎之類的東東, 好的地方是不油膩, 不好的地方是放得太耐, 已經凍晒.

另外齋鹵味, 姨仔說, 看過OR, 說這兒的齋鹵味好食. 食落, 其實同一般齋鋪的差不多, 唯一一樣好的, 就是少油. 因為齋鹵味呢樣野, 十樣有九樣到經過油炸, 而且是澱粉積非常高的豆製或麥製食品. 吃得多, 其實是不甚健康的. 素雞, 素鵝, 算是不錯, 但咖喱根就完全不行, 沒有咖喱味, 又沒有辣味.

我們都是食炒粉麵為主, 叫了一個松子菜粒炒飯, 一個京醬辦麵, 同一個簡單的羅漢齋炒麵. 不過, 叫我三個炒物, 選最好的, 應該是個炒麵了.

炒麵, 最開心是個麵餅, 煎得夠脆, 食炒麵, 除了豉油王炒麵, 當然是煎麵餅, 同茨汁淋上去, 令到有汁既淋, 冇沾汁的脆口. 這裡的炒麵, 便做到這個效果. 不過, 就好似咸了少少.

京醬辦麵, 同了普通麵鋪既粗麵, 而且因為是辦麵, 濕麵的原固, 那個粗都已經是太過淋, 筷子操控得不精的話. 真係幾難夾起的, 味道, 是京醬麼, 又甜, 又辣, 又酸. 係, 京醬係咁既味道, 但賣相就完全不像, 只是用蕃茄加辣椒, 加茨汁弄出來的一個醬.

炒飯, 一兇來已覺得鑊氣欠奉, 松子不夠脆, 百母一說, 如果你們不是要試松子, 咸魚炒飯應該更好. 是日, 這個飯, 較淡, 應該沒有落蛋. 而且鑊氣真係唔係幾得.

本來星期天要為未來外婆在此設下壽宴的, 今次六榕失準, 我們決定改地點.

順景屋茶餐廳(中環)

一人做事來到中環, 找那豆腐店.......又唔開. 之後, 當然要找別的東西吃. 一個人, 不用就人家, 由威靈頓街尾行設頭, 看到這年多來, 中上環一帶, 食肆的變遷, 說大也不大, 但點都發現, 總有一兩間以前食過的, 已經搬走或結業.

找不到有什麼心水餐廳, 就隨便找一間未食過的茶記, 最重要輕便, 簡單, 快趣. 猶疑了一會, 決定入黎呢間順景屋. 試一試吧.

人其實病病地, 冇乜心機食野. 淡淡肉的實在沒興趣. 但身在茶餐廳. 好難逃過肉食呢一刧. 食比較簡單的, 就是魚, 一份塊塊配叉燒, 加粟米汁吧.

簡簡單單的快餐店式配搭. 應該唔會點出錯. 不過份量方面, 就失望了少少. 不過阿Q地說一句, 病病地冇胃口, 反而剛剛好. 兩塊仔魚塊, 雖是淋了汁, 但起碼保持到香脆. 叉燒, 就是普通的來貨叉. 成碟野靠汁搭夠.

$30, 此等普通貨式, 是病了味蕃試不出真味, 或是真係差少少, 是日, 好難客觀地分析.