港鐵黃竹坑站上蓋一個新落成的飲食購物中心，因為方便我所以都常常去行下，星期五試咗皇后餐廳，以前會去又一城分店但已結業。晚上 6:00 入去當時得幾枱客，服務員都按我要求比卡位我哋 (三位) 落單爽快，食物上枱速度正常，真心喜歡羅宋湯，百飲不厭，外甥仔飲周打魚湯都話好飲，配合熱騰騰嘅餐包真係好有滿足感。主菜分別係牛扒，黑毛豬，蟹蓋意粉係套餐，配上蝦沙律，最後上埋飲品，當時已經係七點幾，望一望全場已有八成客，如果假期就訂位比較穩陣。總結侍應服務滿意，食物質素滿意，環境就冇又一城咁濶落舒適，三人用餐 $1250 左右。

裝修前都會嚟佳寧娜飲茶，裝修後今日第一次去，環境光猛咗，廁所乾淨，整體感覺都唔錯，食物方面保持水準，鹵水鵝掌翼好滑，最鐘意佢個鹵水汁，一啲都唔咸，味道啱啱好，蠔仔泡飯比以前好食咗，服務態度都滿意，兩人埋單四佰幾，絕對唔貴。

星期六下午三點幾，見門口冇乜人就排隊試下，等十分鐘已可以入座。地方都幾整潔，坐位傍有個籃比客人放手袋什物都幾細心。叫咗“小牛排＋牛板鍵 200g” 兩份套餐@＄128，之後再加 120g 和牛扒 ＄150。所有肉都已預先醃製醃料，味係比較重，但啱我口味，牛肉質素一般，和牛扒就麻麻比較韌，應該叫多一個套餐比較抵食，白飯分大中細三個份量可以選擇，我揀咗大碗，口感唔錯，溝啲枱面供應調味料，可以好快食晒一碗。一人一爐都幾好玩，油煙吸落底層所以冇油煙味，呢方面令我最欣賞。唔食牛嘅話，可以選擇雞肉或者豬腩肉片，價錢亦比較經濟。掃描 QR code 自己落單，埋單只收電子貨幣不收現金相信係大趨勢。提提大家，店內沒有免費茶水供應。

經過油塘大快活，突然想打邊爐，叫咗牛肉火鍋，花膠雞湯底，$70有找唔會有要求，真係好平，估唔到質素唔錯，抵食之餘食物賣相乾淨，感覺好過大家X，加上有感應器唔使自己抬住啲食物，想慳慳地打個邊爐係首選

其實都幫襯過“群記”好多次，今日心血來潮寫番篇食評比佢。 土瓜灣好多麵店，呢間可以話係咁多間麵店中“性價比”較高嘅一間，亦比較乾淨，次次我都好專一，只食爽腩河，爽腩夠稔，好易咬開，湯底唔咸，今日呢碗特別大，河粉實在太多，中間夾雜咗一塊好大瘦牛腩，心諗會好硬，點知入口好稔身一，無令我失望。 叫咗個腐乳通茶，我嫌佢唔多油，唔夠滑。 其實不時不食，我應該叫芥蘭好啲，有點後悔。 另外，呢期 lunch 免費送冷熱飲品，杯檸檬茶免費，但都有四塊檸檬，茶底都唔錯，好飲

之前聽聞佳佳甜品質素高，可惜佐敦我真係好少過去。朋友話土瓜灣開咗一間，lunch 食得唔 full，即刻行過去試下。睇下餐牌，好高興全部都係傳統中式糖水，叫咗個合桃芝麻露，入口好滑好香，可惜對我嚟講就唔夠熱，$22 係扺食，下次要加 $7有四粒湯圓先夠滿足，推薦

心血來潮，一個人想食火鍋，諗起呢間新開，試下先。帶位哥哥仔好有禮貌，先在外面揀肉類及湯底，我揀咗 $239 有豚肉，兩款牛肉，蝦，蜆，帶子，90分鐘任食。湯鍋比較細，湯底豬骨正常僱淡，蕃茄就真係好麻麻，好杰身，感覺似茄膏。豚肉，牛肉都唔錯，海鮮方面，帶子真係超迷你型，蜆唔錯，冇沙，蝦唔太新鮮，軟殼。外出啲配料都係大路嘢，幾款菜，貢丸，芝士波腸，粟米……反而熟食我冇試過，但見到都係白飯，日本咖哩，湯之類，冇乜留意。我嚟一心都係為咗食牛啫，唔試都唔係損失。枱面有一渣水狀物體，入面有塊綠色嘢，哥哥仔話係湯底真係清水咁款……佢啲醬油真係冇乜味，我唯有諗佢哋為客人血壓著想飲品都係汽水機，有咖啡奶茶。反而要提下，佢但自助軟雪糕，放題雪糕我食唔少，呢間係最好食，有質感又夠滑。總結：我自己會再去，不過就唔會食海鮮，唔會揀蕃茄湯底，平平哋 $189 已ok。

湯加，分店都唔少，每次經過都要等位，對於我嚟講係浪費時間，所以就算好想試都唔會排隊。上星期去開華貴坊做 facial，美容師講華貴坊外圍開咗一間湯加，咁我做完 facial 當然行過去睇下，可能時間尚早，黃昏 5:30 門口竟然冇人排除，諗都唔諗就入去坐底。店員好好，我話風口位大風，佢就幫我換位，親切打開餐牌，見有已 set 好嘅款式，亦有自選。有白飯之餘，還有藜麥三色飯……等幾款健康選擇，唔食飯有淮山麵，米粉……之類。叫 set 款還可免費添飯。我叫咗胡椒味菜滑雞豬肚湯飯。嚟到熱辣辣，一陣胡椒香氣撲埋嚟，加一個蒸藜麥飯。首先試個湯底，胡椒味香濃，豬肚當然係急凍貨色，但都入味爽口。最驚喜係雞件，估唔到師傅調味得咁好之餘重件件都好滑，加上窩中有唔少菜，我將個飯加入窩中，飯撈湯係我最愛，食得好滿足。還有，入去食之前感覺自己沾寒沾凍所以叫胡椒湯底，食完寒氣全消

朋友介紹，山道有間西餐小店食物水準高，一於試下。位置真係好隱蔽。入到去餐廳面積細大約可坐25人左右，不過佈置得很舒適。缺點係通風設備麻麻，出店後全身充滿油煙味，可能我有潔癖所以比較介意。 黑松露湯夠熱，香氣撲鼻。 和牛肉眼，五成熟剛剛好。 可惜西冷過熟，顯得比較硬。 香腸質素好好。 炸魚薯條，魚塊好滑，薯條一般。 反而限量漢堡沒有驚喜。 焦糖燉蛋，正到吖，必食。 總結，店主每一道菜都係用心制作，我會再帶朋友去試佢啲意粉，意大利飯，牛仔骨，酒煮硯……等等

“一蘭拉麵”比人吹捧咗好奈，一直想試下但我就冇咁神心去排隊。琴日黃昏六點經過，門口竟然一個人都冇，ok幫襯下。我選擇軟身麵淡味湯底加隻蛋。首先講格局，一人一格枱，唔比人騷擾嘅佈局我好鐘意。比隻杯我飲“美味嘅水”可惜隻杯入面附加咗一粒上手客人食剩嘅美味乾蔥……呢點令我扣分……麵嚟到，飲啖湯，好清，麵條質素對我嚟講冇驚喜，我選擇軟身麵，但比我預期硬。叉燒薄如紙，隻蛋係凍，可以話有點冰凍感覺……咁一蘭又唔係一無是處嘅，我要讚下佢個湯底，我飲咗一大半，唔會覺口渴。 $89 一碗麵+$14 蛋+10%服務費 = $113 只此一次，試過就算。