本人好鐘意食越南野，係openrice搵到呢一間咁多好評，即管試吓，果然係名不虛傳！我次次都會嗌雞扒撈濛，因為真係好出色！首先個雞扒煎到好香，份量適中，個魚露都好夠味，但略嫌少咗啲，但好彩叫佢畀多啲都會肯！我已經幫襯第三次，水準依舊，今次仲試埋雞翼湯河同越式炸春卷，兩樣都好好食！尤其是個炸春卷，炸得好香脆，入口即爆，入面啲芋頭好正！ 如果 keep到水準，我係會繼續幫襯既！！ PS: 因為太好食，所以全部相都係食到一半先記得影！

話說今晚非常肚餓，本來諗住食越南野，點知滿座要等位，咁見對面間小南洋冇乜客，心諗咪試吓新野囉，點知就真係想講句我知錯了，我應該信自己對眼，間餐廳冇乜人，仲走入去！？ 點完餐未夠五分鐘就唻齊啲食物，首先嗌咗燒雞喇沙，咦，個碗咁細既？我以為點咗兒童餐，心諗唔緊要啦，好食咪得囉，點知一食個燒雞，嘩，凍既！咦係咪搞錯咗？我叫燒雞唔係海南雞喎，我問個侍應，係凍食架？侍應話係呀，室溫。嘩大佬，你開緊冷氣喎，室溫咪即係凍？凍既燒雞咁盞鬼？ 然後到個海鮮喇沙，碟軟縠蟹係硬既，唔脆，應該係擺咗好耐之後整熱佢。再唻，隻蝦係冇味既！再唻，隻帶子係韌到車胎咁，我阿婆唻食一定假牙都飛埋出唻！最最最大既大佬係杯龍眼水，嘩！糖漿唻既？！我飲一啖即刻feel到成個喉嚨畀糖漿痴住咗！！ 我覺得好難得，成間餐廳可以近乎所有野都錯，令我相隔多時再出山打食評，所以佢係得既。 公平少少啦，碟雞翼係ok既。不過人生食野quota 寶貴，呢間真係請都不了，真上了一課

呢度店小小，但裝修同食物都好新派，我點咗個滑蛋叉燒飯。 個蛋係幾滑炒得唔錯，仲要有啲沙律菜，我覺得唔錯。但係舊叉燒真係麻麻地了，我一食落口，就係覺得好硬！硬到差啲咬唔爛，唔止硬仲要好乾，呢個真係扣晒分。另外個飯都有啲痴埋一舊，真心內啲失望。 不過都讚返佢啦，個奶茶大杯，夠奶味又唔會太苦，算係有分加。另外店員服務態度好，坐我對面個人唻錯咗奶茶，雖然已飲咗，客人話冇所謂但店員堅持換畀佢。我覺得好好呀，因為我好重視服務態度，如果服務態度唔好，你幾好食我都唔會走去搵氣受囉，因為咁我都blacklist咗幾間。 所以我希望呢間餐廳繼續改善，下次可以寫返篇文讚好！

好耐未試過排隊食飯，今日為咗呢間foodo而破例。 成間餐廳大約有二十幾個位，裝修簡約，牆身掛有店長既照片，店內只有兩位店員，但相當勤快，係樓面應付有餘。 餐牌唔算多野揀，揀咗醃肉太陽蛋手工闊條麵同波菜葉芝士pizza. 首先講吓個闊條麵，啲麵非常有口感，出面啲工廠製麵完全冇得同佢比，原來手工麵真係差咁遠！呢度啲野食比其他地方係要等耐少少，因為佢真係即叫即煮！好熱辣辣，好有鑊氣！ pizza比手工麵遲唻，但同前者一樣，都係啱啱整好，一食落去啲芝士拉絲係扯唔甩咁滯！識食既朋友應該知道要做出拉絲效果，就知啲芝士一定要新鮮焗好，所以真係即叫即煮，童叟無欺。講返個味道，我覺得芝士配波菜葉好清新，雖然有兩層芝士，但一啲都唔漏，好好食。 雖然啲份量係少咗啲，不過呢度唔收加一，最重要真係即叫即煮，好有誠意，有機會絕對會再encore!

難得出街食，要揀間啱心水既餐廳真係難。難得係地圖搵到間，又有我最愛喇沙，梗係要去試吓。 友人嗌的豬骨雞湯手撕雞麵，湯濃得唻有陣清新感覺，用料十足，啲冬菇有過年的味道，豬肉丸非常彈牙，係啲雞略嫌鞋咗少少，份量十足，友人食到捧住個肚。 我就嗌咗個海鮮喇沙，個湯底一樣好濃，有香辣有椰味，有三隻大蝦，再加上魷魚翼，魚片蟹棒等，份量十足，摻摻油麵有口感，米粉軟硬適足。 總的來說我食得好滿足，位處新城市，價錢適中，絕對值得再幫襯！

友人曾提過這間餐廳好食，但一直未有機會試，至上月忙裡偷閒，終於找到時間試這位於大圍的西餐廳。 七點入去客人唔多，侍應殷勤，加上裝修有格調，由於訂座關係，一早就留咗張大枱畀我地，坐得舒服。 一打開menu, 的確有畀佢價錢嚇親，你睇我之前啲食評都知本人係食開街坊野，呢度二人餐閒閒地都七百蚊賣單，呢樣野大家要留要生意。 我地點咗田螺，蜜瓜pama ham同一碟rib. 我只可以講每一味餸都有水準，我尤其鐘意個rib, 啲肉好淋好入味，重要啲薯條直情係畫龍點晴，可以話係我食過最好食既薯條。 其實佢食物水準都算唔錯，不過我真係覺得價錢係有啲貴，就算好食都好難成日去食，間唔中同朋友gathering 都可以選擇吓

想試呢間好耐，但每次都被門口那長長的人龍嚇怕而過其門而不入。 今次六點零經過，見到門口只有兩個人排，於是咪諗住今次應該唔使等好耐，點知因為店太細，啲人又啱啱入座，卒之都等咗半個鐘先入座。 侍應首先奉上一杯水，杯水飲落好清甜，問侍應原來入面加咗越南運來的斑蘭葉，唔怪得咁好飲。 友人叫咗奧巴馬濛粉，即係燒豬肉濛粉，上菜時侍應會教你點食，由於啲粉同湯係分開，首先先落香葉，然後再將啲粉好似沾麵咁一注一次咁浸落個湯度食。呢個湯係令人震驚咁好食，有魚露味，又有少少辣，每食一口都感覺到有好多種味覺係口腔翻騰，越食越滋味，加上啲肉都非常入味，又有口感，呢個粉，我畀滿分。 我就試咗個札肉雞絲澇濛，可能之前個奧巴馬濛粉太驚艷，令到佢就稍為失色，但係其實佢都唔差，首先雞絲都札肉都係先煎香，呢點已經贏晒，煎完啲雞絲非常香，口感香脆，配埋撈濛，真係一流！ 我地食得好開心，明白點解成日有人排隊，下次經過，如果好彩冇乜人排，一定會入去試多次！

由東涌行咗三個鐘入梅窩，係酷熱天氣警告下，抵達目的地第一件事梗係醫肚！ 我地揀咗呢間冰室，乾淨光猛，座位亦多。我點咗牛腩米粉茶餐，有多士，煎蛋同火腿！ 首先講吓個多士，佢係冇飛邊架！宜家有幾可食到冇飛邊既多士，啲牛油唔算香，但多士都係咁上下啦。至於個蛋煎得啱啱好，外脆內流心，正呀！ 不得不讚就係個牛腩米粉，果然係秘製，我冇諗過冰室居然會有咁出色既牛腩，首先啲腩肉係炆得非常林同入味，啲筋仲正，入口即林，但又保留到膠質感覺，好好味！ 友人另外仲叫咗餐蛋麵，我就冇試，但佢話好好味，完全食返舊時既味道咁！ 仲有離島真係特別悠閒，冰室居然可以得耐，真係令我有衝動係梅窩住吓！ 食物唔需要花巧，最簡單，尋回傳統既味道就係正！

一直很想試這家店，今天終於來了。 環境光猛，座下有籃放袋，貼心，不錯。 台式餐廳來說，選擇算多，除了必有的牛肉麵，滷肉飯，乾拌麵外，亦有不少小食。 點了半筋腩牛肉麵，滷肉乾拌麵和蛋卷。點完後才發現原來用餐時間只有四十五分鐘？！包埋揀餐，等上菜，吃完，四十五分鐘，well，咁即齋食唔使傾計。正當我狐疑係咪真係咁誇既時候，旁邊的枱已經有個侍應問佢可唔可以埋單，哇，我當時真係即刻好大壓力。 首先來的是原味蛋卷，頗有台灣味，感覺清新，我覺得係最好味一道菜。跟住唻既係牛肉麵，首先個麵幾彈牙，個湯底亦算惹味，佢個辣我係接受到的，個筋有口感，可惜牛肉我覺得未夠林，不過總的來說呢個麵我係畀中上分既。 至於個乾拌麵我冇試，所以我不予置評。 總的來說，一碗索價八十多元的牛肉麵，人均消費一百多元的餐廳，居然要你坐四十五分鐘就走人，我覺得性價比太低，一點都唔值。如果你的價錢似xx來了，限坐半小時，我心甘命抵，但現在一百多元，又未至於好食到我要頂住壓力食，我有大把選擇食得輕鬆啲，所以下次無論吃什麼，都不再揀吃什麼了

沙田有唔少街坊食肆，沙田中心呢間乾乾淨淨咁，咁啱今晚獨食，一於入去試吓。 全店搭枱，仲要搭得幾逼吓。話說我一人拎飛，侍應哥哥不停鍁二至三人飛，四至五人飛，好多遲過我來的人都入座了，我已經被遺忘痴痴的等，明明我是一人飛的第一位呀。。。卒之哥哥見我呆晒咁企咗咁耐，就話畀我入先，話見我等得耐。。。。well, OK. 由於等得太耐，一入去已經叫咗海南雞飯，唔使三分鐘就菜，好快！我其實好鐘意食雞油飯，呢度個海南雞飯仲要號稱招牌菜呀，我當然有期待，但我一食落去。。完全冇味，亦唔香，同白飯唔知有咩分別，我好失望，仲要我食食吓食到幾粒硬野，唔知係飯焦定乜鬼，搞到我都唔敢食晒啲飯。食食吓覺得太唔掂所以半路中途先決定要影相寫食評。至啲雞尚算ok, 都真係去晒骨，似雪藏雞啲質地，啲汁係唔差既，但個飯真係扣晒分，搞到我食完完全都唔開心，有五體不滿足既感覺，嚐唔到味，冇下次。