((哩篇野真係好長氣… 因為我係足本將我光顧韓辛既經歷/對話全部寫哂出黎! 唔介意既大家可以食住花生睇… ))
原本打算跟同事食另一間韓燒, 剛好見到韓辛做團購, 就提議同事們一齊去試下。為免BOOK唔到位, 我提早左2個星期打去~ 聽電話果位應該係男老闆, 佢講英文, 所以如果大家訂台就做好心理準備啦! XD
食飯當晚, 我跟2位同事特登早少少去到攞位坐低, BOOK7點既我地6點40分已經到左門口。 去到門口, 見到有位唔似香港人又唔似韓國人既女侍應, 我就同佢講我買左團購訂左位, 佢就係咁E望下本簿仔, 就話冇我個電話 (當下我都有望2眼又真係唔覺有我電話 = =), 我就同果位女侍應講咁你依家有冇位坐(當時店內只有3台客)? 佢就叫左相信係男女老闆既人黎喇, 嘰哩咕嚕講左一大輪就叫我地去角落頭一張冇燒烤爐既位坐… 當時真係好無奈…
同事坐低左既時候… 我就見好唔對路, 就走出去問下啦! 我面前有一位女侍應,一位男侍應, 2位都望住我, 我講左句”唔該”, 竟然2個當我冇到行開左!?!?!? 咁我唯有問女老闆啦! 以下就用英文同佢對話喇(請原諒我D爛英文): “Do I need to give you this (coupon) now?” “Do you have reservation?” “yes, I did, but there’s no record in your list (我SHOW我個電話記錄俾佢睇, 想證明我有打過俾佢), this is your phone no. right?” 跟住2個人一齊行去睇多次個list, 2個人一齊望, 又唔知點解, 我突然見到我個電話號碼! 我就指住我個電話俾佢睇啦! 佢就好似有D激動咁對住我講 “It must have a record if you have reservation! If you no reservation you cannot use the coupon!”跟手拎左我D coupon … … 我心諗, 我有乜得罪你… 我都好冷靜咁問你… 我又唔係冇訂位… 我又冇鬧你又冇發爛渣你唔俾我用coupon… 你無啦啦咁瀲動做乜 = =”???
算啦… 既然搞清楚件事, 我就好聲問下佢, 會唔會留左張燒烤台俾我地坐啦? 咁佢好爽快叫我地換位, 坐低就慢慢睇menu, 諗下食乜好, 等埋另外2位同事到, 就落Order啦! 第一輪叫左 *五花肉 *超級牛肋骨 *豬皮 *雞肉 *魷魚 *生菜籃(嗯...生菜係要俾錢) 果位女侍應完全面無表情咁望住我, 完全唔駛寫紙仔就咁UP左一下頭就走左… 係哩個moment我跟同事都只係覺得佢好勁唔駛寫低就記得我地落咩order!
我地叫既野食陸陸續續咁黎喇, 佢地會主動幫你燒, 我地就坐係度望住佢地燒, 哩諗番起係韓國食既時候D侍應都係會主動幫你燒哂, 燒完就叫你食~ 哩個讚!
我終於可以講下D食評…
*五花肉
– 正! 夾住生菜食起黎同韓國食差唔多
*超級牛肋骨
– 味道一般以上, 唔知係咪我唔好彩… 我食果塊咬唔開… 但同事就話好淋…
*豬皮
– 口感好得意, 有咬口, 好煙韌, 有稍為醃過所以有少少醬料味道
*雞肉
– 好大碟, 但係我覺得有少少雞膻味
*魷魚
– 佢地切成一個個圈咁樣燒, 原本好驚會好難趙, 又估唔到咁爽口陣牙!! 好好味!!
食到中間, 我問老闆娘可否加D泡菜俾我地, 點知佢好簡潔大聲地講 “X X 10蚊!” (X果2個字我聽唔到)… 跟住就繼續做自己既野走左… 當堂我同D同事們係度面面相覷… 我個心又諗…我又有邊度得罪左你?
既然要加錢, 我地就諗住不如算啦… 就繼續食… 食到差唔多… 就一齊傾下仲有咩想食... 一次過叫埋佢啦!! 襯老闆娘岩岩幫我地好燒完野食, 我又同佢講 “excuse me, I want this (指住個menu)… “ 其實我仲未講完… 老闆娘又唔知做咩又好激動咁講 “XXX this and than XXX !! you cannot XXX!! So you now want a pan cheon?”
我當下真係完全窒哂! 我班同事都望住老闆娘! 我大約估佢意思係講:”你哩下又叫哩樣果下又叫果樣,咁樣好麻煩架!咁你依家係咪淨係要個煎餅” 我真係唔明…我唔明點解我落Order要受人脾氣? 我黎幫襯你, 就算我拎coupon黎食都不至於掛? 咁究竟… 第3次… 我究竟邊度得罪左你?
眼見同事們都係哂度望住哂, 我點都要處理左件事, Order還是要落, 我就同老闆娘講, “OK, yes, one pan cheon, and then …. (下刪5樣order)” 跟住老闆娘又唔知做乜好似冇哂事咁講 “OK”就走左去… = =” 有冇人可以話我知究竟發生咩事… 嗚…
冷靜D… 我地又講番D食評:
*泡菜煎餅
– 餅身做得好軟身但又唔會好濕, 泡菜唔係好酸, 咸度都適中, 5個人都詰好好味!
*牛小排
– 個人覺得哩個比牛肋骨好味, 較有牛味, 食起黎都比較淋
*五花肉
– 無錯, 又係五花肉, 哈! 但係我仔細一望… E? 點解仲未解凍既? 今輪燒得比較香口, 有少少焦~ 既然凍都未解, 醃都冇醃過之下, 燒出黎又真係幾好味既~
*炒雞排+炒飯
– 必食推介!!! 作為最後飽肚一道!! 仲記得係韓國食到個嘴辣到冇知覺! 好彩韓辛既雞排只係辣炒年糕既辣度, 辣中帶點甜味, 食到一半追加炒飯落去, 拌飯既材料再撈埋D辣汁, 稍稍鋪平慢慢等D飯吸哂D辣汁, 再加少少既飯焦, 簡直係一流!!
*米酒
– 直接係韓國入口既米酒, 再用韓國小酒壺上台, 用埋米酒專用既碗仔飲, 風味十足!!
*汽水
– 普通罐裝可口可樂囉… 哈哈!! XD
講下環境衛生丫: 整體黎講唔錯!
見到有台人走左, 老闆執完台都會噴D消毒劑抹台, 地下又唔會油淋淋,
可能燒烤台有抽風管, 油煙味都唔係好勁, 番到屋企件衫都唔係好大陣味道
食完哂, 高高興興, 大家打算埋單啦(因為加一要俾現金唔可以用coupon扣), 女侍應咁岩經過, 我同事就同佢講埋單, 女侍應真係非常之有性格, 下巴微微向上, 跟住就走左去… 下!? 咩事啊!? 發生咩事!? 我乜都唔知… 但我好肯定佢唔係去幫我地埋單…
跟住同事見到有人行去收銀埋單… 就提議不如直接行去俾錢啦! 好… 我地又去俾錢… 埋單計埋coupon總計平均付人$180, 幾抵食~ 如果用原價食, 每人都$330, 咁就真係唔太抵食喇… 仲要我經歷埋以上過程… 你俾$330我都唔想再食了…
我知道… 食野唔係食服務…
但係…都不至於要受氣食野掛??
我知道… 我地係拎coupon黎食野已經拎左著數…
但係… 都不至於得罪左你掛?
我自問自己問野落order前後都會講聲唔好意思唔該, 又冇港女mode公主病覺得自己客人就大哂, 大家同事們諗住開開心去食餐飯… 遇著D咁既服務態度令到我成餐飯都講唔到幾多野… 燒完我地就係咁食食食… 食完臨尾佢地係咁狂收起哂台上面D野… 雖然眼見出面都冇人等台… 我地都唔敢坐咁耐…
走左之後我同D同事一路行就一路咁諗究竟老闆娘咩事… 仲大家係咁搵藉口幫住老闆娘… “可能文化差異呢”... “可能佢聽唔明誤會左呢”… “可能佢太忙呢”… “可能佢講得好直接姐”…
我唔會唔推薦大家食, 所以我都係俾個”OK”, 因為佢既食物, 環境衛生都好好, 或許我只係100個咁岩既一個不幸, 撞正老闆娘果日唔開心掛…
... 唔UP喇! )
