HABITŪ table (尖沙咀)

之前同朋友講過想食caffè HABITŪ既精選甜品拼盤，
今日終於有機會一試，下午兩點左右已經到達目的地，
店內人流唔多，得小貓三四隻，唔洗等位就可以入座～

等左十五分鐘左右個拼盤就到左！
一共有八款小食。

-Cheese Cake
好濃郁既芝士味，好甜，個Cake整得好密實，好味！

-Chocolate brownie
第一次食過啲咁難食既brownie，同朋友一致應同隻味好似老婆餅！
而且係甜到好離譜，好難食呀！

-Cookie + Vanilla ice cream
無咩特別，同平時食到既味道一樣。

-Strawberry + Chocolate sauce
粒士多啤利酸到喊！

-pudding
幾好食！幾重奶味，而且好滑，加埋啲紅色既汁黎食真係一流～

-杏仁餅 + 野莓(?)
粒莓酸到喊，個杏仁餅甜到喊，兩樣野加埋一齊黎食個味覺效果又真係幾得意既～
不過唔係我口味囉！

-蛋撻(?)
唔知咩黎，個樣似蛋撻，但完全唔係蛋撻既味，而且口感仲要怪怪地，佢上面有層cream咁既野，真係好難食...

-Tiramisu
成個盤最好食我諗係呢個～好creamy好有口感，味道適中唔太甜！
可惜係最後先食佢，所以個人已經好飽！食唔哂呀

呢一餐食左個半鐘左右～雖然佢寫住係2~4人份量，但2個人食又真係飽得濟，我同我朋友仲要食到最後食唔落添
不過呢個拼盤其實都係得個樣～味道真係好一般！食一次就夠lu

Paul Lafayet (銅鑼灣)

同朋友食完晚飯，就黎左Paul Lafayet食飯後甜品，
佢既Creme Brulee好出名係人所皆知既事，
價錢其實比出面食到既Creme Brulee貴小小，一客盛為$40。

落左order之後好快就送到，
果然係名不虛傳，呢個招牌甜品真係好好味，
口感好滑，有啲似食緊雪糕既感覺，
唔會太甜，真係非常好味！

不過個場就真係細左啲，食左陣已經有好多OL企左係隔離等位，
想坐多陣都唔得，真係掃哂興

會再去試食佢其他既甜品！

Holly Brown (尖沙咀)

記得前排去食Holly Starlet既時候，個雪糕真係炒得好好味架，水準岩岩好，雪糕唔會太溶，材料亦炒得均衡，我同朋友都大讚好味！
Holly Starlet應該係佢地自創既味道？因為我係其他雪糕店都未食過呢種味道，係好特別但真係太甜了，叫左個Large size兩個人share，我同朋友都一致認同真係甜到飛起
不過都食得開心既，起碼個賣相真係好靚先！琴日再帶另一位朋友去食多次！叫左杯Vanilla Thrilla，因為佢中文名叫波斯貓，好似好得意咁，然後都係叫左Large size諗住share食，因為上次既份量真係好夠兩個人share食！
可能係星期六既關係，等左十分鐘先等到位，不過等到位啲服務員又唔清垃圾同抹台，搞到所有野都要自己做
落完order之後就等佢整好，一共有兩個女店員負責炒雪糕，一個就手勢勁好，一個就杯杯都炒到成餅屎咁
結果我就真係果個炒到成餅屎既女店員幫我炒，佢真係好唔掂囉，同佢一齊炒雪糕既果個女仔，Large size既雪糕佢真係會筆好大個雪糕球，但技術差啲果個，佢筆既雪糕球，Large size同Medium size基本上係一樣。（因為係我前面又係有勁多人order左炒雪糕，所以我留意左佢好耐，無屈佢！）
然後佢真係炒得好肉酸，我唔知佢唔夠力定點，我見佢炒果陣手腳勁慢，啲雪糕都溶得七七八八，其實佢大可以搵人幫手，好過炒到成餅屎咁拎完杯野之後我個朋友都即刻話，嘩乜炒成咁呀，好似屎喎！
跟住食落口啲雪糕真係好溶，味道係唔錯，但無咩特別囉，同出面食到既vanilla雪糕係無分別，而且佢呢個所謂既Large size真係比上次細好多（有相為證）。
食完之後同其中一位店員講，你個同事真係炒得好唔掂，
佢整埋啲好驚訝既表情，之後”下”左聲就咁就走左去，再自己細細聲同個收銀講啲唔知乜，完全冇同我交代過任何野，你同我講話你同事係新人所以炒成咁都好丫？
而家咁我真係覺得好唔專重囉因為係你個同事有問題喎，但你而家咁同你個另一個同事咬耳仔，我會講得你似係講緊我壞話多啲囉

整體黎講食呢間野既質素真係一時一樣，我將我件事講比其他食過holly brown既朋友聽，原來佢地都試過食過啲炒到好靚同好味既雪糕，亦都試過食啲炒到食餅屎既雪糕。
至於服務質素，真係不值一提，大家自己去感受下囉
不過如果要我好似碰運氣咁黎呢度食雪糕，咁我寧願唔再幫襯咁多
因為價錢又唔係平，如果要我去碰氣睇下會食到正野定食到屎，咁我就真係寧願食番哈根XX！

Ocio (銅鑼灣)

食左兩次，十分推介呢間甜品鋪！
呢間鋪人流唔多，兩次黎食都係冇咩人，唔洗排隊！
店員都好細心，一坐底就主動拎兩杯水黎
仲會好定時咁主動行過黎添水。

呢度仲出名既就係waffle，所以我第一次食就點左佢個chocolate情迷朱古力！
個waffle係外脆內軟，非常好食！
朱古力味都十分適中，唔會太甜亦唔會太淡！
同我之前係糖XX食既waffle感覺完全唔同，糖XX既waffle雖然賣相好靚，但成件waffle真係好乾爭爭，又硬，個waffle又凍冰冰咁 而且都要四十蚊，諗番起都覺得唔抵！

第二次去，我都係叫番chocolate情迷朱古力，
而朋友就叫左個雞蛋布丁，
試左朋友既雞蛋布丁，好滑好正，
而賣相都好得意

一定會再去食

Monster Sushi (旺角)

早幾日係銅鑼灣食過一次，發現原來價錢都唔算太貴，
有部份壽司既價錢仲平過街知行聞既元X壽司，
咁岩同媽媽係旺角行街，於是就帶左佢黎旺角既呢間Mon Su度試下。

去到既時候大約係六點，店內人流唔算多，好多吉位，
好慶幸唔洗等位！
同個店員講左兩位之後，都未帶我地入去就已經同我地講：「限時個半鐘。」
仲要講左兩次囉 點姐而家？我連野食都未點你就計我時？

之後就比人安排左坐露天既位，
當我媽同個服務員講話想調番入店內坐既時候，
條友就已經用啲好串既語氣話：「坐入面既話要坐吧位喎，要打對坐架喎。」
之後我同我媽都勁無奈咁話：「咁算啦！」

之後我地叫左六件壽司，
點完菜之後隔左一陣另一位服務員就勁無禮拜咁dum張單落我地台面，
個態度真係完全差到爆囉
咩事呀而家？點解要dum落黎？
忙到唔代表可以咁無禮貌囉！

之後啲野食又黎得勁慢，
五至十分鐘先黎一碟，
食完一碟又要等勁耐先有得食下一碟，
果種心情真係好痛苦！
仲要限時個半鐘，我真係真心覺得呢間野既制度好有問題，
上菜速度又唔係快又要限人地時，
係咪有病呀？

之後有一碟個服務店又係勁大力咁放底碟野，
搞到碟上面既壽司反轉左，
佢仲要扮無野，勁快咁行開，對唔住都冇聲！
啲三文魚同舊飯分開左，
啲沙律醬本身響舊三文魚上面都比佢搞到痴哂落隻碟度！！！！！！！！！

食到中間我媽見到有$68六件三文魚既牌，
於是就向左一個趕頭趕命既服務員落單，
等左10分鐘，張單紙都仲未黎，
過多5分鐘，就向第二位服務員問多次，
到底有冇幫我地落單，之後佢就話幫我地check下，
再等多10分鐘，都係乜都冇黎！
我同我媽都已經食哂六碟壽司！！！！

同佢講埋單，嘩呢下又好快手喎，1分鐘都唔洗就拎左本埋單薄埋黎。
但張單度又有寫我地有點到個$68六件三文魚喎！
咪一肚火咁同個服務員講要取消囉，
點知佢仲整個唔取消得既表情俾我睇！
終於我忍唔住勁大聲咁同佢講：「點呀而家？等左咁耐都未黎，催又催左你兩次，我而家要走呀！」
佢仲整個不滿既表情比我睇，之後先轉身幫我取消張單。

我認為吳先生唔應該開壽司店，而係開快餐店！
食呢間野簡直就係貼錢買難受囉！
啲服務態度簡直就差到冇人有！！！快餐店啲員工都好禮貌過呢間鋪頭入面啲人囉！！！
又串又黑面！　不知所謂！
野食再好食都冇用，食到我一肚火！