一口和味 (元朗)

不經不覺, 師傅都有好一段時間冇單獨和好友食家"乜都放入窿"食飯, 冇辦法啦, 呢期大家各有各忙, 各有目標嘛! 不過最近好友靚仔正哥, 大隻佬和酒吧老闆聯手創業, 開食店, 仲要揀左喺元朗呢個地方紮根! 呢個地方話晒都係師傅半個地頭, 加上師傅和好友食家"乜都放入窿"作為佢地嘅老死, 冇可能唔撐, 於是昨天亦攪左個乜東飯局之一口和味!

先至聲名, 雖然師傅和食店東主屬好友關係, 不過師傅絕對會憑良心報導真相, 保証呢個食評係公正的, 絕經得起考驗! 閒話休提, 昨晚大約七時和好友食家"乜都放入窿"由九龍出發, 齊齊搭公車入去, 呢個時間都入去, 就足見師傅和好友食家"乜都放入窿"係幾咁有“刻”呢, 大約一個鐘到嘅車程就到達目的地, 落車沿著地址搜尋, 好容易就搵到間食店!

由於事前沒有向東主透露半句, 絕對係突擊, 所以去到食店亦未見到任何一位老闆! 其實在食店門外, 已經見到人亦唔算多, 直頭可以用小貓三隻黎形容! 如果平時見到咁嘅場面, 師傅肯定卻步, 但由於是次係專誠入黎, 所以絕對冇腳軟, 於是和好友食家"乜都放入窿"咁入黎照行入食店!

入到去食店, 望下張柯打紙, 都有幾多唔同選擇, 於是亦詢問下店員有咩推介, 再和好友食家"乜都放入窿"商量後, 就一口氣柯打左以下食物! 秘制勁辣魚蛋一串, 秘制炸燒賣一串, 板燒神秘牛仔骨兩份, 炸芝士年糕一份, 燒牛舌兩串, 燒免治雞肉棒兩串, 炸芝士雞卷一份, 板燒黃芥辣豬下青一份, 鐵板餃子(泡菜)一份和板燒香草羊架兩件!

落完單等一陣就有得食, 而最先登場的係大家都應該估到係秘制勁辣魚蛋同埋秘制炸燒賣! 先講下秘制勁辣魚蛋, 魚蛋體積屬細細粒型, 雖然係細粒, 不過入口都幾彈牙, 絕不粉口, 加上秘制咖哩醬香香辣辣, 而且辣嘅程度合乎師傅嘅口味, 絕對係惹味嗰種, 勁正呀, 食得辣嘅絕對要一試; 至於秘制炸燒賣真係炸得好脆, 而魚肉身亦唔會有太韌和太膠嘅感覺, 炸左後亦有少少魚肉嘅香味, 再配上秘制咖哩醬, 非常之正!之後嘅食物亦陸續登場, 先講下板燒神秘牛仔骨, 牛仔骨屬於半肥瘦, 肉質非常鬆軟, 絕不韌身, 加上燒得香時牛仔骨亦帶出少少牛味, 真的非常吸引, 而且調味洽到好處, 絕對係必食之選! 炸芝士年糕一份有三隻, 外面炸得脆, 而內裡嘅年糕煙煙韌韌, 配上芝士甚香, 香而不膩, 加上芝都有少少流心嘅效果, 真的不錯! 炸芝士雞卷亦炸得好脆, 不過呢個芝士味就欠奉, 幸好餡料內不太乾身, 但師傅就覺得冇咩特別! 再黎就係燒牛舌, 牛舌算係屬於幾厚身, 咬了一口後, 發覺口感一流, 皆因牛舌係爽口中帶鬆, 軟綿綿嘅感覺好正, 味道非常討好, 如果呢油能再少啲, 相信會更加吸引, 不過呢一刻嘅牛舌已令師傅欲罷不能, 另一必食推介! 師傅另一個至愛就係燒免治雞肉棒, 起初還以為係就咁免治雞肉, 餡料裡求其擺幾粒洋蔥, 點知入口後發現餡料除免治雞肉外, 還撈埋了雞軟骨, 呢個雞軟骨真係不得了, 令到個燒免治雞肉棒入口除左鬆之外, 仲有一種清爽口嘅感覺, 好似加左馬蒂咁, 不過就比馬蒂乾身, 加上爽口得黎絕不硬, 唔會令到牙肉受傷或受損, 呢個燒免治雞肉棒絕對係必食之選, 師傅大力推介!板燒香草羊架亦係師傅另一推介, 羊架嘅“嘥屎”都幾大件, 而且燒得好香, 肉質鬆軟而味道香酥, 揸住條骨黎食, 係另有一番風味, 加上只賣兩草野一件, 絕對係大件夾抵食, 嗜羊者不能錯過! 板燒黃芥辣豬下青就比較特別, 豬下青即係豬頸肉, 肉身爽口絕對唔乾身亦唔硬, 擦上黃芥辣亦唔太攻鼻, 師傅就算唔太鍾意食芥辣亦接受到, 想試新野應該要試呢個! 最後係鐵板餃子(泡菜), 一客有三隻, 餃子皮脆而不硬, 餡料帶微辣, 不過略嫌咸少少, 呢個較為普通!食左咁多野後, 當然一定要試埋呢度嘅一口炸雪糕, 一份有三粒, 入口覺得皮脆, 但厚身, 細看下才知原來係雪糕糯米慈, 唔怪之厚身啦, 不過外熱內凍又真係幾得意, 呢個一口炸雪糕絕對值得一試!總括黎講食物質素不俗, 有驚喜, 店內環境唔算大, 不過就乾淨清潔, 而店員亦服務有禮, 價錢就非常相宜, 食左咁多野, 每人都係一百一十元正, 但就食到師傅和好友食家"乜都放入窿"勁飽, 非常抵食! 師傅同好友食家"乜都放入窿"呢個乜東飯局之一口和味真係幾和味, 唔計私人因素都肯定會有下次, 笑臉係值得一比! 呢一刻師傅張枱面已經濕晒, 皆因一想起燒免治雞肉棒就已經不停流口水了!

添好運點心專門店 (旺角)

一間講左好耐要去食嘅食店, 師傅唔係唔得閒就係嫌太多人喺門口排隊, 就連封筆食家"今餐食乜好"都同太座試過, 師傅仍遲遲未去, 撞啱上星期師傅放假, 就一早問定好友食家"乜都放入窿"得唔得閒, 一齊黎呢間食店吃個午餐或下午茶咁啦, 結果好友食家"乜都放入窿"欣然答應, 亦令師傅終於有機會品嚐呢間食店!

好友食家"乜都放入窿"提議下午三點幾先去到呢間食店, 目的就係要盡量避開人潮, 結果呢一招好使得, 去到門口竟然冇咩人, 於是攞張飛等位, 竟然係等第二張, 師傅真的非常感恩; 而店員亦叫師傅同好友食家"乜都放入窿"柯打定食物, 這樣行軍迅速師傅還是第一次, 不過點心紙款式選擇不多, 於是就一口氣柯打左酥皮焗叉燒包, 黃沙豬膶腸, 煎腊味蘿蔔糕, 晶塋鮮蝦餃, 香滑馬拉糕, 鮮蝦腐皮卷同埋鮮蝦燒賣皇!

再喺門口等一陣就可以入座, 是次等候過程唔算耐, 師傅絕對接受到! 一坐底唔使好耐就已經有得食, 第一款登場點心係酥皮焗叉燒包, 一碟有三隻, 賣相吸引, 放入口發覺酥皮香脆鬆軟, 包身絕不黏牙, 而且叉燒肉汁勁多, 絕不乾身, 加上咸甜味道掌握得好好, 對於唔太鍾意食包嘅師傅亦覺得十分不錯, 水準頗高, 好掂, 絕對係必食推介; 之後其他點心亦陸續登場, 黃沙豬膶腸嘅豬膶夠香, 蒸完亦唔韌, 而腸粉亦十分滑身, 不過師傅略嫌腸粉太散, 一夾就會碎, 好唔容易先夾得一條完整的腸粉, 如果改善此點相信更佳!蘿蔔糕就煎得夠香, 而腊味, 蘿蔔同粉配合得好好, 所以蘿蔔糕唔會入口全部都係粉, 亦唔會散到夾唔到, 加上蘿蔔都幾多, 真的不錯; 至於蝦餃嘅水準真的十分之高, 蝦餃皮夠薄, 入口一d都唔韌, 蝦身勁爽口, 最重要係冇夾雜肥豬肉, 所以絕不油膩, 而且唔會一夾就散, 師傅真的非常欣賞; 馬拉糕一向師傅都唔太鍾意, 皆因怕甜, 但呢度嘅馬拉糕就唔太甜, 味道控制得好好, 加上馬拉糕非常鬆軟, 令人食到有一種唔想停一來嘅感覺, 絕對必食之選!食到咁上下師傅覺得意猶未盡, 於是決定再加單, 就揀左家鄉咸水角同潮州蒸粉果! 呢兩款點心未黎之前, 師傅繼續同好友食家"乜都放入窿"品嚐其他點心, 鮮蝦腐皮卷師傅覺得水準普普通通, 皆因腐皮卷煎得唔脆, 而且仲比較腍,算不上高水準, 始終當師傅試過萬發嘅腐皮卷後, 都相信冇幾多間可以相比了; 燒賣嘅蝦身好爽口, 最重要係燒賣唔肥膩, 皆因餡料係冇肥豬肉, 用料夠清, 食得健康!最後係家鄉咸水角同潮州蒸粉果, 咸水角係即炸(其實呢度嘅點心應該全部都係即叫即整), 入口勁脆, 餡料又熱辣辣, 而最值得一讚係咸水角一d都唔黏牙, 呢個位真係唔係好多食店做得到, 真的好有水準, 師傅覺得亦係必食之選; 潮州蒸粉果嘅餡料有馬蹄, 芹菜等, 餡料爽口清新, 加上芹菜嘅香味, 令人有種欲罷不能嘅感覺, 連師傅對芹菜一向有偏見的亦能接受, 而粉果皮入口唔會過韌, 皮嘅厚薄適中, 口感其佳, 師傅相信要有咁嘅水準才能盛載粉果嘅餡料, 所以粉果唔會一夾就散, 非常之好!總括黎講點心嘅質素相當出色, 算得上非常高的水準, 而服務亦十分友善, 全程不斷添茶, 係地方細少坐位較逼, 價錢亦相宜, 九款點心加上兩位茶錢(每位兩元), 冇加一, 埋單每人都唔使七十蚊, 師傅覺得好抵食! 望穿秋水師傅終能夠同好友食家"乜都放入窿"試到呢間食店嘅點心, 真的非常開心, 笑臉絕對值得一比, 師傅能試過一次已屬無憾了, 所以相信再來機會不大, 除非唔使排隊啦!

一品粥館 (鰂魚涌)

上星期某天, 師傅如常一兜友吃午飯, 但唔知點解當日有鋪癮想食粥, 其實師傅一向對粥品都麻麻地, 最主要原因係覺得唔太飽, 所以唔太抵食; 除非師傅病倒, 否則真係好少食粥! 但粥癮起, 點算好呢, 咁啱路經呢間食店, 就入去一試啦!

入到去食店真係非常細, 坦白講坐三個彪形大漢已經成間食店會水洩不通, 正常坐五個人已經去到盡, 但咁樣就最啱師傅, 因為一個人唔使理朋友嘅感受嘛! 而食店內招呼的真的十分客氣有禮, 師傅估該位應該係老闆娘!

坐底後即刻睇下有咩想食, 師傅本想食及底粥, 不過又想食皮蛋, 諗左一陣決定要皮蛋瘦肉粥, 正想落單之際竟然見到有皮蛋粥, 淨係皮蛋同粥, 感覺唔錯, 於是就柯打一碗皮蛋粥, 亦正如師傅話食粥唔飽, 所以即刻加一隻咸肉糉; 望多兩眼個餐牌又想食腸粉, 於是亦唔理咁多, 整多碟叉燒腸穩陣!

等嘅時間真係唔使好耐, 三款食第基本上都接近同一時間登場, 於是師傅先試下個粥先, 粥真係熱辣辣, 而且粥底尚算綿身, 至少唔係稀, 雖然算不上最佳, 但亦算合格; 皮蛋相對地令師傅失望, 皮蛋唔係溏心唔緊要, 但唔好有味, 入口有嗰重類似金屬味(不太知道點形容), 不太討好, 不過今時內今日要食到隻靚嘅皮蛋真的不易, 所以呢碗皮蛋粥全因為個粥底, 所以才合格!

再試咸肉糉, 咸肉糉未入口已經聞到好香, 除左荷葉香外, 亦有少少綠豆香, 未食都已然夠吸引; 入口發覺糉身比較實, 如果能夠鬆軟少少相信會更好, 而師傅覺得最重要嘅餡料咸蛋黃同肥豬肉都有齊, 糯米配咸蛋黃或肥豬肉, 再用少少豉汁襯托真係非常好味, 咸肉糉都算得上唔錯!

最後係叉燒腸, 腸粉望落去感覺就有少少膠膠地, 未入口賣相已經打左折扣, 再放入口一如所料腸粉唔滑, 而內裡嘅叉燒粒都幾瘦, 幸好瘦得黎唔韌, 為叉燒腸挽回少少分數, 不過師傅始終唔太推介!

總括黎講食物質素合格, 可惜無甚麼特別出位, 服務真係殷勤有禮, 環境就比較逼, 價錢亦算合理, 十五蚊碗粥, 十一蚊碟腸粉, 十蚊一隻糉, 埋單三十六, 喺呢區黎講都接受到! 粥癮起, 食三味! 不過呢三味又唔算好得, 加上呢個環頭真係唔多粥店選擇, 如果下次粥癮起, 都有可能會再黎, 但相信平時就真係好難會黎, 笑臉絕對比唔到!

國金軒 (尖沙咀)

太師母成日都話要請師傅飲茶, 於是師傅只好度個期比佢老人家啦, 而太師母係邊個? 咪就係師公個母親囉! 地點由師傅負責, 師傅當然係搵間未試過的, 不過價錢太貴的師傅又唔敢揀, 但太平太差的師傅又冇咩興趣, 諗到頭都爆後決定揀呢一間食店作為當天的午市飲茶啦!
師傅再早幾日留定枱, 當日準時到達, 去到環境覺得都幾舒服, 咁都好正常, 假假地呢間食店係入選米芝連, 所以師傅都幾期待; 坐底後先開壺茶, 揀左鐵官音, 未食野前當然係先品下茶, 發覺鐵官音味道好淡, 冇味道亦唔香, 係有色嘅滾水, 如果以茶黎講呢種茶都算得上劣, 師傅唔係好頂得順下再開多壺香片, 呢壺香片比鐵官音好得多, 雖然未能算得上勁芳香, 但至少有香味同茶味, 入口對辦好多!
之後師傅一口氣就劃左好多款點心, 當中不乏師傅嘅至愛啦, 排名不分先後分別有帶子燒賣, 香煎腐皮卷, 紫菜墨魚餅, 鮮蝦蒸腸粉, 叉燒包, 黑椒蒸爽肚, 蝦餃, 狗不理, 豉油王炒腸粉, 棉花雞, 蜜汁燒鱔, 滷水豬腳仔同雪菜鴨絲炆粉絲, 十二款點心加一款炒粉, 一定夠晒五個人食啦!
先講帶子燒賣, 帶子燒賣面頭粒帶子仔都實身, 肉質麻麻, 不過燒賣裡嘅肥豬肉真係少, 少到好似冇咁, 所以入口唔會成口油, 但略嫌實少少, 一般d; 香煎腐皮卷就真係好脆口, 而餡料係全蝦, 蝦身大隻爽口, 外脆肉爽堪稱一絕, 呢款點心絕對值得一試, 師傅就強烈推介; 紫菜墨魚餅入口食唔到有紫菜味, 更莫講話有墨魚味啦, 而墨魚餅就非常硬身, 而實又硬又唔香, 呢個真係可以唔試!




鮮蝦蒸腸粉嘅蝦又係勁大隻, 入口爽口新鮮, 半點雪味都食唔到, 不過腸粉就唔夠薄同滑, 如果腸粉再做得出色d相信更吸引; 叉燒包師傅真係唔多識講, 就係覺得間間酒樓都咁上下, 唯一食得出係叉燒係瘦多過肥膏, 口感較好; 至於黑椒蒸爽肚亦係一款令師傅喜出望外的點心, 皆因黑椒夠香, 香而不太辣, 加上爽肚十分爽口, 少少韌都唔會有, 香中帶爽, 值得一試!




蝦餃的皮不算薄, 入口略為煙韌, 不過師傅杯茶, 不過師傅相信一定有食客喜愛較煙韌的蝦餃皮, 至於餡料嘅蝦真係好大隻好爽口, 最過癮係連筍絲都唔多覺有條, 更莫講話肥豬肉啦, 夠膽用純蝦做蝦餃嘅餡真係冇咩幾多間, 真材實料, 縱使皮較煙韌但餡料嘅水準足以挽回所有分數, 得呀; 狗不理對於師傅黎講即係雞包仔, 包類物體師傅始終唔多識講, 一般啦!


豉油王炒腸粉係有色冇味, 如果唔點甜醬同麻醬, 真係唔多掂, 呢個都可以不理; 棉花雞師傅冇食到, 所以唔知水準如何, 不過都唔會太差啩; 至於蜜汁燒鱔亦係一道令人驚喜嘅小食, 鱔片燒得非常香口, 外身甜甜地, 肉身鬆軟新鮮, 最重要係冇骨, 唯一要彈係腥少少, 如果能除去腥味相信會更加好味; 滷水豬腳仔夠腍身冇異味, 可以啦; 雪菜鴨絲炆粉絲就唔掂喇, 冇雪菜味, 冇鴨絲味, 要用辣椒油先覺得有味道, 所以呢個雪菜鴨絲炆粉絲都可以不試!





總括黎講食物質素不俗, 有強項亦有弱項, 不過值得一讚係冇味精, 而環境亦十分舒服, 服務就真係五星級, 有禮貌有笑容, 價錢比師傅想像中平, 五個人埋單折埋都係八舊幾水, 用獅子銀行或咸濕銀行嘅白金卡都有九折, 好似仲有其他幾間嘅白金卡都有, 恕師傅未能詳列! 能夠同屋企人一齊飲餐茶, 相聚一刻, 確實係賞心樂事, 真的要感恩, 最後還得多謝太師母, 令師傅可以試呢一間食店; 有機會師傅都會再黎, 不過一定係晚市, 皆因好想試下隻北京田鴨, 笑臉值得一比!

和居和居 (銅鑼灣)

早一陣子師傅個手機忽然響起短訊, 望一望究竟係邊個搵師傅啦, 咦……稀客喎, 稀客搵師傅莫非有咩事? 再睇真d呢位稀客係搵師傅食飯見面, 睇完後令師傅鬼死咁開心, 更感動係原來呢位稀客仍然記得師傅, 至於呢位稀客就係傳說中嘅萍姐!

師傅於是就問下萍姐想食咩啦, 萍姐就揀食日本菜; 其實真係問黎都多餘, 識左萍姐咁耐都知佢係日本人啦, 次次飯局都以日菜為主打, 食日本菜係好理想當然嘅事; 但由於師傅冇咩心水, 又唔想盲中中咁搵一間, 於是又問下對日菜有番咁上下研究嘅封筆食家"今餐食乜好"有咩推介, 而封筆食家"今餐食乜好"就比左兩間師傅揀, 最後師傅揀左呢間食店!

師傅穩陣起見, 所以訂定枱, 然後當然準時去到食店啦, 至於萍姐當然係 “麗池”啦! 等左大約十分鐘萍姐先到, 等萍姐執番晒d眼耳口鼻, 師傅就問左萍姐一個問題, 就係 “有冇成年冇見呀?” 萍姐話應該冇咁耐, 但經師傅翻查後就算冇一年亦不遠矣, 冇三百六十五日都有三百五十日喇! 萍姐, 你真係快活不知時日過!

寒暄一輪後, 師傅就問下萍姐有咩想食, 而萍姐就話呢間食店嘅燒芝士年糕好出名, 係必試, 師傅估唔到萍姐都有做過下功課喎; 於是大家再商量一陣最後柯打左燒芝士年糕, 凍蕃茄, 串燒免治雞肉棒, 燒雞中冀, 燒牛舌, 燒雞軟骨同埋燒鯖魚, 再每人一杯生啤!

要知道師傅都有好一段長時間冇同萍姐飲過, 難得萍姐唔識死地陪師傅飲, 真係妙極! 落完單先有個小食, 係青瓜海浙, 青瓜幾清爽而海浙就算爽口, 味道微辣, 不錯! 之後第一道菜式登場, 佢就係凍蕃茄, 如果師傅冇記錯凍蕃茄係賣六十蚊一份, 賣得咁貴師傅當然好想知到底有幾多隻蕃茄啦, 最後發現只得一隻時真係有少少失望, 將一隻蕃茄切片, 感覺好似多幾件, 但實在係珍而重之; 於是將片凍蕃茄放入口後, 發覺凍蕃茄十分鮮甜, 而且亦非常多汁, 入口清新舒服, 配上少少沙律醬亦份外醒胃, 整個凍蕃茄真係十分美味, 好味到停唔到口, 當下真係有衝動再柯打多一客, 而師傅呢一刻都流緊口水, 雖然係貴少少但絕對值得一試!

而其他食物亦陸陸續續登場, 於是師傅先試下萍姐推介嘅燒芝士年糕, 一放入口芝士味十分香, 但味道唔會過濃, 而年糕亦十分煙韌, 加上唔係太大件, 所以口感一流, 整體水準真的不錯, 萍姐果然冇介紹錯; 串燒免治雞肉棒就係封筆食家"今餐食乜好"極力推介, 呢個賣相都幾特別, 將免治雞肉放喺根棒子上燒, 再配上豉油同生雞蛋, 撈勻後即可食用, 而免治雞肉嘅味道係非常鬆香, 香嘅主因係免治雞肉裡有少少洋蔥, 所以十分搶口, 不過個汁就稍為咸少少, 如果淡味番d相信會更加正, 呢個串燒免治雞肉棒亦係必食推介!

燒鯖魚亦係一道令師傅驚喜嘅菜式, 鯖魚燒得香肉身鬆, 入口亦冇咩骨, 加上一d都唔腥, 就連一向對燒魚冇咩興趣嘅師傅亦食到停唔到口, 而萍姐當然係相當滿意, 所以燒鯖魚亦係必食推介; 食到咁上下都覺得唔係好夠, 於是再加燒雞皮, 燒雞中冀(萍姐要求加單), 燒茄子同咖哩湯烏冬! 食到萍姐要加單嘅燒雞中冀, 師傅覺得一般, 燒雞中冀算得上皮香肉腍唔油, 但唔算突出!

燒牛舌就燒得爽口, 而且唔韌, 幾好味; 燒雞軟骨就普通, 不咩特別; 燒雞皮就燒得十分香脆, 而入口唔油膩, 能做到脆而不油真係唔錯, 不過呢d咁唔健康嘅食物, 師傅還是少吃為妙; 至於燒茄子亦十分腍身, 唔會勁硬, 收貨; 最後係咖哩湯烏冬, 咖哩湯烏冬亦係封筆食家"今餐食乜好"大力推介, 咖哩湯底係非常香濃, 味道微辣, 但幾惹味, 而烏冬本身煮得煙韌爽口, 口感同質感真的一絕, 封筆食家"今餐食乜好"果然冇介紹錯!

總括黎講食物質素甚佳, 服務態度友善, 地方唔算特別大, 不過就坐得幾舒服, 價錢都算貴, 咁樣食法埋單六百幾, 即每人三百幾, 但師傅都覺得幾抵食! 封筆食家"今餐食乜好"果然好介紹, 能夠同時間食到師傅同萍姐耳仔郁, 一d都唔少野! 值得一讚係食飽後侍應亦唔會催促客人埋單, 仲可以慢慢坐吹吹水, 絕對係食野同傾計嘅好地方! 呢間食店嘅笑臉當然要比, 而且好肯定仲會有下次!

最後師傅亦要在此再次多謝萍姐, 師傅期待下次與萍姐再聚時係唔需要等三百五十天啦, 記住下次到我做東喇!