星期二平日放假陪媽咪飲下午茶，糖心軒係疫情時偶然發掘的，食過一次就成日掛住，不過，我多數飲早市/下午茶優惠時段😅 食物每次都唔會令大家失望，點心款式係就少咗啲，但所有上枱食物夠新鮮又夠熱，而小食及小菜款式都相當出色，炸物唔會馬虎。今日呢個下午茶，名正言順平價包參翅肚餐，實在大滿足，兩個人清晒6樣食物，抱住個肚離開🤭間中黎飲茶當獎勵一下自己，亦支持香港飯店，留港消費😉今次唯一有少少失落係食唔到蛋散，因為售罄。下次定必埋坐即點

試左兩碗外賣車仔麵，有分湯盒，湯夠熱。 餸由$5-$8不等。但叫咗4-5樣餸點解會變左$60？原來淨湯麵$33。送熱飲。 豬紅一般，蘿蔔可以，豬手偏林，豬軟骨都夠林，豬腸都乾淨，牛百葉切得好幼，雞翼炸的，豬扒都夠林入味。 豬骨湯就唔可以辣。 食完感覺湯濃，但頗喝。 點解筲箕灣區要搵一間食得下既車仔麵係咁難🥲 4餸，6餸，2杯凍飲$6，外賣盒$2，外賣$133 最後發現比漏娃娃菜，返去取回$5。

睇食評黎大坑試食，早上未夠10:00前來，參考咗其他食評後決定呢間。有早餐餐牌，亦有車仔麵，兩樣都有試。 魚柳餐，都係普通無乜特別，份量比一般少，連凍飲差不多$50。車仔麵好似係$42/2餸麵，個別餸要$15（豬腸，牛腩，魷魚等），叫咗一碗5餸撈米，成為$80。豬紅個味整得幾好，魷魚都夠厚身，豬腸唔夠淋，蘿蔔無揸，齋正常。 鴛鴦走及茶走夠熱唔太甜唔太漏口，唔錯。鮮油多最驚喜，牛油鋪滿多士內，十分香脆。 唯一好奇，堂食飲品，餐廳會用外賣杯上，令人懷疑，飲品係其他餐廳送過嚟！😅 1份魚柳餐配凍飲，1份5餸車仔麵餐配熱飲，2件多士+1杯熱飲，成為$187，到此一遊，試過就算。

4個月前黎過食午餐，當時覺得十分驚喜，相隔4個黎食晚餐，都無令人失望👍🏼 小菜出式，服務熱誠。是晚最具特色的，係久違嘅味道，蘿蔔牛腩煲，食得出唔係冰牛，蘿蔔香甜，牛腩林入味，有筋有肉，十分欣賞😋 其他小菜都好出色😉

突然想食小菜，想起呢間位於筲箕灣多年既飯店，相信曾經轉過手，地方雖小，五臟俱全，街坊小店。今晚叫左3個小菜，十分驚喜又出色，比起區内多間小炒店，絕對有過之而無不及。 先叫鵝腸，份量足，味道適宜，而且有輕微麻油香，簡直食唔停。椒鹽白飯魚，粉漿做得薄脆，炸得乾身而不油膩，香脆可口。涼瓜斑頭腩，估唔到佢會用東星斑頭，就算係急凍貨，都無醒味，絕無花假。唯一要彈係若然少油及淡口啲，比較完美。只要保持水準，一定會再幫襯👍🏼

呢間火鍋店係灣仔已經一段時間，以前路過中午無乜人流，晚市火鍋先係佢既主打菜。今日路過，佢改咗火鍋x冰室，而且有d人流，即管入去試吓，午市餐牌主要係A-F餐，常餐及全日餐。我就點咗個有👍🏼既全日餐，總括而然，無乜特別，生炸雞肶本來寫住要20分鐘製作，點知5分鐘就上枱，第一眼望落雞肶又乾又柴，不如所料，「翻炸雞肶」，over cook之餘，無乜味，但多士就好香牛油味，說好的燶邊太陽蛋，都係一般太陽蛋啦，$65一個全日餐+$3凍飲黎講，都係選擇返正常既茶餐廳或冰室吧！唔係專長即唔係專長，或者店家只係唔想浪費左午市時段。

假日入黎行山，有緣買到兩款鳳凰卷，因為一早已知呢間店嘅鳳凰卷係要訂先有，老闆正新鮮製作中，我並無預訂，多口問老闆可否即買，佢望一望我，話個客未取，可先讓一盒比我，我話可以要晒2款嗎？🤣佢話事但啦！（可能見我買左5盒椒鹽魚仔，所以先咁順攤讓出兩盒鳳凰卷比我😝）返屋企立即試吓，的確皮薄餡正😀傳統既味道回憶返晒黎😀下次入嚟都係記得預訂🤭椒鹽銀魚仔，比出面買的夠細夠脆，不會用粉漿炸，魚仔夠香味。

星期日心血來潮入南丫島行山，居然人流唔多，估計大部分人外遊或北上。坐中午船由索罟灣起步行，約2點幾3點，去到榕樹灣覓食，本來想去書蟲西餐，但要等位，最後改去食中菜，隨便路過見壽記，一開門，d冷氣已經攻陷我哋心境，先黎冰凍汽水，再慢慢點菜。伙記無推銷海鮮，反而同我哋講有炒粉炒麵食。我二話不說先點豉油王炒麵，椒鹽鮮魷，煎咸魚肉餅，其後再點乾炒牛河和啫啫通菜煲，5個人share份量十足。 不得不讚整體食物調味適中，最欣賞不會過咸或油膩。尤其兩碟炒麵炒河😀👍🏼 碟底無油，河粉不會炒到碎，豉油香又夠鑊氣，連平時少食粉麵個仔，都話添食😌 個煲啫啫通菜煲，通菜爽脆，蝦乾鮮甜，仲有幾片豬頸肉搭配，熱辣辣放上枱，香氣撲鼻😋稍為無咁好食既咸魚肉餅和魷魚，雖然唔夠個3碟好，但都未至要投訴，魷魚炸得好，可惜魷魚無鮮味，似急凍貨，咸魚肉餅唔like佢係炸，無咸魚香味，得咸味。整體而然，下次入嚟會再幫襯。亦要一讚伙計有禮，期待下次入嚟試埋牆上既能手小菜。

呢間北角半島，長期排隊，一早已經想會下佢，襯今日有機會去試吓，早餐時段排幾個都等吓。 凍檸茶黎到見到咁淡色，未飲已感覺無乜茶味，一如所料。 牛扒和蛋黎到，已經大打折扣，蛋既賣相似集團餐廳bb蛋size, 牛扒易切，食落口無味，係乜味都無，食左2啖放棄。 還好，加錢$4轉左油尖多，黎到見到搽得滿滿，果然，亮點係多士，牛油味香濃，果醬搽得不吝嗇👍🏼 咁既質素早餐黎講，真係唔明白吸引排隊之處係咩！又眼見有人特登揸車去食，究竟係羊群丫還是個人口味問題。 BTW, 我暫無意慾再去消費，同區黎計，我相信有唔少競爭對手，唔洗排隊品質都比佢好。

通菜跟咕嚕肉及2個例湯和飯是2人餐$198，可加購飲品。 另本來想試招牌叉燒（黑毛豬，飛機運），但太貴了，例牌要$198，或者之後有機會試。 1）通菜上碟熱辣辣，夠火候先可炒出唔會發黃，味道岩好，如果少d汁會更好。 2）菠蘿咕嚕黑豚肉，甜酸得宜，夠脆。 3）椒鹽鮮魷粉漿夠薄，魷魚有鮮味，份量合理。 4）例湯連藕湯，唔似加料例水 5）白飯稍為林，若然能煮出一個香飯就完美 總括，整體食物質素令人滿意，環境可以，會再encore。