尖沙咀著名台灣料理「圓山台灣料理」，幾年冇食，水準依舊。 掛住台灣美食，可以來呢度止心癮。 #果香酸湯桂花魚 第一次食用蘋果一齊煮既酸菜魚，冇諗過蘋果同酸菜魚可以咁夾，浸完酸湯既蘋果好好味，配料仲有雲耳，萵筍，薯粉。 #蒜燒香腸 烤好既台灣腸，切片，再加上蒜片一齊食，味覺享受提升左另一個層次。 #台灣炒新竹米粉 其中一樣我好掛住既台灣美食，不過圓山呢個炒米粉比較淡左少少。 其他美食仲有 #台南蚵仔煎 #台式鹽酥豆腐 #泡椒豬手

健康早晨常見項目方包，減肥真係成日都會食，食得多好易分到食唔好食。 Doughman出品既方包 $22/4塊，好軟熟，順滑，唔會覺得好乾既感覺，幾重奶味，而且好厚切，食2塊實夠飽。

太子花園街向來都係美食重鎮，能夠喺呢條街站穩陣腳一定係有一定實力。 老牌粥粉麵店 — 七喜 既#腰潤粥 $42 絕對係有水準既出品。 厚切豬腰豬潤，口感爽脆。粥底香濃綿密。 加埋鹹肉糭就夠晒飽，餡料有蛋黃和咸豬肉，再配上秘製豉油，味道很夾。

Cafe向來都係熱打卡聖地，所以Cafe既競爭越來越激烈，除左裝修，味道外，擺餐既款式都係其中之一。 呢間位於尖沙咀既Cafe，雖然叫「婆婆」，但路線非常年輕，吸引唔少年青人幫襯。 #野菜南瓜豚肉卷 配 #蟹肉味增飯 餐飲 #美式咖啡 #nuttyblend $183 蟹肉味增飯 香甜軟熟既珍珠米，配上鮮甜蟹肉，立即令白飯提升去另一層次。 野菜南瓜豚肉卷 配料有南瓜和薯仔，半肥瘦豬腩肉做成卷狀，再燒香，果陣豬油香，未食已經覺得興奮，再將肥膏連肉一啖咬落去，係享受。 其他小食： #香脆蕃薯條 $38 #名古屋手羽先 $42 #魷魚軟骨 $42

終於食到呢間特色雞蛋仔名店，鐘意食雞蛋仔又鐘意食葡撻既朋友，一間店滿足晒。 澤賢記既招牌 — 葡撻雞蛋仔 $38 即叫即做，揸上手熱辣辣，雞蛋仔外層香脆，每粒雞蛋仔內都係流心葡撻蛋漿，好似一淡一隻迷仔葡撻咁，好滿足。

荔枝角 #沙嗲牛肉麵 名店「#好好運快餐店 」，果然名不虛傳，超濃沙嗲汁，重花生味，帶少少甜，微辣。牛肉肉質一啲都唔柴口，處理得好好。紅腸厚切，口感勁正😍 沙嗲牛肉最襯都係公仔麵，公仔麵灣曲的麵身，好掛汁。 #百搭早餐 （任選三餸）$41 正常茶餐廳格局，座位唔算迫，而且仲保留隔板保持衛生及私隱度。價格與附近茶餐廳相約，屬正常水平。

呢間可以話係餃子名店，有網民話佢既餃子係地表最強，我亦都試過買生餃返屋企打邊爐食，但最好味都係堂食。 今日食既餃子係 #香芹芫荽豬肉餃 餃子好飽滿，好大隻，皮薄，佢地亦都煮到剛剛好，沒有煮到過熟，不會表皮破爛。 湯餃子麵（5隻） $43 另一樣深受食客歡迎就係 #蝦米辣菜脯 一開瓶蓋，果陣麻香已經好吸引，味道幾辣，岩晒喜歡食辣既朋友。 #麻辣雞腎 $38 雞腎口感爽脆，麻辣醬汁好惹味。 座位雖然比較迫，但疫情過後仲保持隔板，增加衛生和私隱度。

太子好味重慶雲吞（$35/20粒），豬肉餡料夠晒鮮味，雲吞皮夠薄夠滑，麻油芫荽湯底。細細粒一啖一粒，夠晒風味。 超高性價比，即叫即煮，夠晒新鮮熱辣辣，夠晒抵食飽肚。

第一次食呢間位於MOKO新世紀廣場既日本料理，質素有驚喜。 #北海五色丼 配料有海膽，吞拿魚腩蓉，三文魚子，帶子，蟹肉 刺身好新鮮，海膽好鮮甜，蟹肉連飯一齊食，好治癒。 #燒雞軟骨 #燒牛舌 鹽燒，表面燒得好乾身脆口，內裡Juicy，牛舌係厚切。 小小投訴，絕對明白香港寸金尺土，座位密在所難免。食店既菜單上有燒肉呢個項目，都要顧及一下隔離枱沒有點燒肉客人既感受，我不停被隔離枱既油煙味同油彈親。希望侍應日後安排座位時可以多加注意。

大圍人氣中菜館 — 大圍小館
講得人氣，要排隊就難免啦，平日都要排超過一小時。

環境座位闊落，每張枱都用大膠板隔開，亦唔會搭枱。

招牌名物 #第一叉 $158 只限午市供應，用梅頭肉及麥芽糖燒成，而且勁厚切。溫馨提示，一碟有五件，最好五個人去食，每人一件會好啲。食兩件已經好飽。

#灌湯餃 $65 傳統方法製造，用餃皮包住餡料和湯，難度極高，餡料有蝦肉，豬肉，瑤柱，冬菇。

#老港銀針粉 $48 炒銀針粉而家真係買少見少，佢用蝦米，肉絲，芽菜，甘筍絲 同埋 鹹蛋黃炒成，超惹味。

#鮮筍蝦餃 $25/2粒 蒸得剛剛好，冇蒸爛表皮，亦食到蝦餃應有既荀味。

其餘點心有 #薑蔥牛肉餃 $33 #花菇金腿鮮肉燒賣 $48/4粒 #三色腸 $48 都係有質素之作。