eriff 等級1 | 關注 留言給此食家 |
排序方法:
日期 笑臉 喊臉
編輯推介 餐廳總分
文章形式 | 地圖形式
2018-09-25
見到廣告話女士半價就去試吓,因為幾日前去過另一間台灣養生鍋好食嘛。我揀咗原價348果個和牛餐。 1)之前有人話會有一盆台灣蔬菜送(例如水蓮呢種香港比較少見嘅菜),我哋冇見到,不過唔緊要啦。2) 送嘅刺身中,白身魚有泥味,大概係唔夠新鮮,不過其他嘢都OK。 3)澳洲和牛我就真係食唔到有果種質感喇,係脂肪分佈比較平均而已,普通啦。 4) 墨魚滑基本上係粉團嚟。 5) 蝦滑因為冇打起膠,係一堆打碎蝦肉,不過起碼係食到蝦肉,比墨魚滑好。 6) 餃類都幾好食 7) 啲菜洗得唔多乾淨,好多碎咗嘅爛菜 8) 甜品OK,但芝麻糊煲燶咗照出,一食落口就有陣燶味,酸酸哋咁。 9) 烏賊幾好食。 其他嘢冇乜特別,環境唔錯,以二百蚊位嚟講,都算OK嘅。 畀錢果陣,條數除開每人係$209(加一用原價計),諗住每人畀$210嘅,其中一個朋友連果一蚊都唔畀多,似乎唔多滿意。侍應姐姐嚟到收個單夾,我多口講句:唔使找架喇,唔該。(因為出去食飯,一般多咗幾蚊都仲會返嚟找,費事畀客嘈嘛。我咁講純粹係費事佢要行多轉)侍應姐姐即刻大聲話:哦,多咗兩蚊唔使找畀你吖嘛!我順口答:係啊,特登擺落去架。 何必呢。
評分: 味道 3 環境 4 服務 2 衛生 3 抵食 3
2018-09-11
一支公咁啱行過,價錢OK環境睇落唔錯嘅小店就試吓,啲嘢真係唔錯。set dinner除咗湯同主菜牛扒之外,其實仲有個帶子沙律,不過食得太快唔記得影。我最鍾意係個湯,真係足料嘅蘑菇湯嚟,百幾蚊一個set好少食到咁足料,啖啖都充滿蘑菇味同鮮忌廉味。帶子沙律亦好食,主菜都唔錯,係牛扒熟度唔平均,我要五成,中間就啱啱好,個邊去到七八成就比較韌,但點都好唔係果種用鬆肉粉醃過嘅肉已經加分。最後杯洪都拉斯咖啡真係好勁,搞到我呢個咖啡上癮嘅人果晚好晏先瞓得著,轉晏畫飲攞嚟抵抗飯氣攻心就啱喇。 總之,中上環地區食完加埋一大概200蚊嘅足料牛扒3 course set dinner,店面細但都坐得舒服仲有wifi,仲想點? BTW,廁所分男女仲好乾淨,加分。
評分: 味道 4 環境 5 服務 4 衛生 5 抵食 5
2014-06-20
同朋友兩個九點左右喺旺角,兆萬間間價錢差唔多,揀咗小飛象食半自助餐。 我哋都揀咗葡式豬手($188),據侍應話攞過獎,果然好食。皮好脆,仲係完全脆,肉亦好嫩,唔會太鹹(德國豬手通常好鹹)。生蠔魚生都OK,新鮮。其他嘢老實講點都食唔落(隻豬手咁大隻),冇胃量去試啦。 據侍應話,下星期開始會將主菜減量,然後所有主菜都做埋任食,咁就可以試多啲唔同嘢,唔使一份主菜就飽哂。 呢個價錢,旺角中心地帶,食物質量又好,真係好抵食。
評分: 味道 5 環境 5 服務 4 衛生 4 抵食 5
|