今年生日想食韓燒 見佢openrice好多好評 所以book左同朋友慶生。 朋友仲自製蛋糕 佢話切餅費要$100 ，都覺得合理可以接受。 我地叫左啲韓牛 牛舌 雞 鮑魚 韓國海鮮燒餅 魷魚。 講真 佢地食物質素真係好普通 除左韓牛 牛舌，其餘既食物都係無味 韓國燒餅好淡， 魷魚完全無鮮味，雞肉個老闆燒到燶哂，而且完全無雞味，佢咁既價錢其實食物質素真係好般。 講到呢度戲肉就黎喇，我地最後仲叫左塊韓牛扒，食埋就即刻叫人執枱準備切蛋糕。蛋糕整得好靚我地當然要影下相，影完相食左個蛋糕一半，突然個老闆走過黎大罵我地，話我地已經坐超過20分鐘，佢話用餐時間2個鐘，趕我地走。我當時好嬲覺得好掃興，朋友仲不斷同佢講話食埋個蛋糕就會走，但個老闆仲不斷係度咆哮，全間餐廳既人見到都o哂咀。 第一，我地完全唔知係2個鐘就要走，一直無任何人提我地用餐時間，我地走前20分鐘左右仲叫左個韓牛扒，如果無時間點解仲照同我地落單，又完全無last order呢啲呢？ 第二，我地見到其實仲有啲空枱 ，出面亦唔係好多人等位，枱根本一啲都唔緊張，點解會係我地切完蛋糕慶祝生日既日子，咁樣大鬧啲客人，我真係從來未遇過一間餐廳會有啲咁既態度同服務。 第三，我地係真金白銀俾錢食飯俾切餅費係呢度食野食蛋糕，唔知點解要受呢種侮辱, 仲要我地4個女仔俾個韓國大叔狂鬧。 最後我地離開餐廳，得3個外藉人士等緊位，佢地都問我地發生咩事，當我地講左一陣，個老闆又出黎再鬧我地，好兇惡咁望住我同鬧我，我直接問佢想點，佢叫我地要道歉，真係好好笑呢個韓國大叔，連啲外藉人士都有制止呢位大叔。 走既時候真係一肚氣，俾錢買難受，仲要俾個餐廳老闆係咁鬧，真係人生第一次。呢間餐廳永遠不會再踏足，因為佢連基本尊重客人既概念都無。

上星期跟朋友到餐廳happy Friday, 經朋友介紹所以黎試試。一入門有紅酒架既裝飾，燈光較暗，情調唔錯。 我們叫左6款菜式既set dinner。 頭一前菜係蜜瓜汁同Parma ham, 配搭新穎，一般都係蜜瓜一件配搭，食完個Parma ham飲個蜜瓜汁可以refresh一下。 自製麵包配兩款汁，麵包較普通未能令人有深刻印象。 另一前菜帶子配藜麥，帶子煮到半生熟，有點魚子及蛋白泡，味道較淡。 下一道是龍蝦湯，呢個湯好飲，龍蝦味好濃，感覺用左好多龍蝦mix出黎，有cream同蝦膏味，正。 鵝肝配南瓜蓉，鵝肝煮到剛剛好唔會過老，外脆內軟，俾個讚。南瓜蓉都好唔錯，一般都係襯蘋果紅苺，今次算係新鮮配搭既另一口味。 番石榴雪葩清一清口，清甜可口，正。 綠豆蓉配和牛面肉，碟係熱住上，熱辣辣既牛肉超淋用紅酒煮一段長時間，非常入味，反而綠豆蓉未有太特出。 食完主菜送左幾粒朱古力給我們等待下一甜品， 甜品係自製芝士蛋糕，味道較普通。 最後叫左個蘋果茶消滯，飲完仲不斷幫我加熱水再焗茶，既消滯又可再坐坐跟朋友談天說地。 總體環境同食物都唔錯，最讚係員工既服務態度，每一度菜都會簡單解釋用材及製作過程，態度既有善又細心。

朋友介紹話呢間餐廳既豬扒同炸雞脾唔錯，講左好耐終於約左幾個朋友黎呢度試下。之前聽佢地提過話個沙嗲汁好得，所以今次黎特別期待試呢個汁。 黎到當然叫最出名的豬扒同炸雞脾啦，因為今日唔係太肚餓揀左豬扒同炸雞脾薯菜同朋友share。 豬扒一到，我已經急不及待切開一啖擺入口， 豬扒肉質嫩滑好淋，表面煎得好香而且鎖住肉汁，好食，點埋個沙嗲汁真係無懈可擊。之後當然要試下個賣相炸得好脆既雞脾啦，一切開已經feel到個皮脆卜卜，入口都相當有水準，做到皮脆肉香既效果。薯仔可點少許糖醬食，另外蔬菜亦可以點個沙嗲汁調味。講返個沙嗲汁，汁夠杰，唔會好浠，杰身原因夠濃味但又唔會太咸，而且辣味夠，愛辣人士不妨一試。成餐飯感滿足，而且個茄子配菜都相當恰配，臨走時有啲衝動想攞走支沙嗲汁添。唔係朋友介紹都唔知呢度埋藏左間令人會encore既餐廳。

其實之前有黎過食一次晚飯, 但價錢偏貴, 份量唔多, 所以都無再去.
但都聽過人講呢度飲茶唔錯, 所以黎試下.

可能平日o既關係, 2點半後點心特價都唔駛等位, 真好!!!!!!!
我叫左:

燒賣 - 都好多肥豬肉同埋好少蝦, 個餡我覺得做得麻麻地, 下次我會試蝦餃.
鮑汁炆雞腳 - 鮑汁"杰杰地", 炆完雞腳實會比較"杰" , 唔會太甜, 雞腳既淋又入味.
薑蔥牛柏葉 - 唔係間間酒樓都有o既點心, 一向好鍾意食, 做到我一向食開o既水準.
好事炒鴛鴦麵- 好事當然有蠔士啦, 有少少蠔士味, 但又唔會腥, 裡面有少許乾瑤柱, 
金菇, 韭黃, 芽菜炒米粉同粉絲, 麵既份量好多, 但無乜配菜.
蠔士令整體味道更豐富, 加上炒麵唔少得o既爽口配菜(韭黃, 芽菜), 簡簡單單已經好惹味.

好彩唔係叫左太多點心, 因為個炒麵份量真係好多, 不過兩個人最後都可以掃哂全部.
價錢都係貴左少少, 特價時段兩人都要$180, 不過飲茶會比晚飯較化算, 如果飲茶o既話會再黎.

因為之前同朋友食粉麵, 佢知我鍾意食牛肚河或潮式既粉麵店,
就介紹左呢間成記俾我.

事隔都一段時間, 終於去開呢頭當然要試下啦.
去到見到係一間老店, 食客多數都係熟客仔, 坐底唔駛諗就即叫架喇.
我叫左牛肚河, 男朋友叫左牛丸河, 因為見到佢地貼出黎既雜誌訪問都係話牛丸出名, 
同埋個湯底有50年歷史架喇.

牛肚炆到好入味, 而且部位有兩款, 幾條係金錢肚, 有幾條係表面平滑既,
金錢肚唔駛講呢個成日都有得食, 但平滑嗰種真係無食好多年喇, 而家好
少粉麵店有呢隻牛肚, 記得好細個先食過.

牛丸我見到好多客人都叫, 好受歡迎.
我緊係要試下啦, 牛丸打得好鬆, 一咬就鬆開, 但又有肉絲既質感,
只係牛味淡左少少, 絕對明白佢何解如此吸引人.

河粉超滑, 加埋辣椒油食真係十分滋味, 食一碗其實有啲唔太夠喉呢

趕住去睇戲, 見到呢間新開既牛肉麵就即刻走左入去, 
因為時間無多同埋諗住求其食少少野. 

叫左牛筋麵同埋淨豬手, 麵既湯底有好濃既藥材味加微微既牛肉香.
麵質好煙韌, 較闊較厚, 好有質感.  
牛筋炆得好淋而且入味.

豬手用鹵水炆, 唔肥而且乾淨, 如果再炆耐啲再濃味啲會更好.
呢度既珍珠奶茶好有水準, 完全同台灣飲既一樣, 下次黎一定再飲.

位與位之間都好迫下, 食完都會即刻走, 不是好坐既地方.

一直都想試呢間大排檔, 就揀左呢晚同屋企人黎開飯.

當晚好凍, 二話不說就叫左一鍋雞粥暖下肚, take完order好快就上枱,
叫左大size, 份量都幾多, 粥煲得好棉, 雞夠滑, 唔會有雞既腥味, 食完即係暖哂,
冬天食感覺寧舍有風味!

食完粥緊係黎個豉油王炒麵啦, 都算有獲氣, 幾乾身, 麵有少少燶, 但反而脆脆地, 
幾香口.

仲有招牌菜, 紅燒乳鴿, 好大隻多肉, 本來以為咁大隻會偏"鞋" ,
但絕對無呢個問題, 做到皮脆肉嫩既效果.

豉椒炒鵝腸, 味道其實唔錯, 但炒得太濕同唔夠獲氣, 而且鵝腸太少, 麻麻地.,
避風塘炒蝦, 本應係一度好惹味既菜, 但蝦唔夠金黃唔夠脆,
就算有一大堆炸蒜都變得失色唔少.
西蘭花炒斑塊, 斑塊食到雪藏味, 掩蓋得唔夠好.
時菜炒肉片, 好夠獲氣, 但油左少少.

呢度兩款招牌菜確係做得唔錯, 但其他小菜水準卻一般,
住o係附近為佢既招牌菜再黎無妨, 但山長水遠的話一次就夠.

朋友生日揀左呢度同佢慶祝, 貪佢有outdoor, 有氣氛之餘又有新鮮感....
去到已經覺得好正, 出面有四個桭幕既屋仔, 全部大枱, 有三塊大布可以拉埋擋風, 
當晚雖然都幾大風, 但又ok喎, 果然又擋風既效用. 另外出面有for 4人坐既細枱,
呢啲就無得擋風, 如果冬天就會比較凍喇....

我地order麻辣田雞加皮蛋芫西湯底, 一向有食辣既呢鋪癮,
緊係要試下佢麻辣有無料到啦....

麻辣田雞個湯底好食, 超多花椒粒, 乾辣椒, 唔算好多辣油, 但越食越刺激,
反而比一啲專門食麻辣既火鍋店更令我喜愛, 一黎夠辣, 二黎唔會麻到令我口震, 
三黎唔會太油, 我十分欣賞呢個麻辣鍋...
反而個皮蛋芫西湯底真係有啲求其, 太淡, 又無乜皮蛋芫西既香味, 搞到我地食菜先用下呢邊咋!!!!

火鍋配料:
 - 黎到已經見到好靚, 肉既顏色同脂肪分佈一睇已經知道係好野, 
入口又淋又滑, 有新鮮牛肉味, 所以一碟都唔平架, 盛恵$298
手打蝦滑 - 新鮮彈牙, 呢度有加中芹同馬蒂, 出面好似未食過會加呢兩樣, 但都幾夾, 
多左啲香味同爽既感覺
手打四寶丸 - 蝦丸, 牛肉丸, 墨魚丸都新鮮彈牙, 唯獨鯪魚球又腥又唔新鮮, 加左太多新皮好苦
燕餃 - 一食就知道唔係自己整, 只係工場攞既貨, 完全無質素可言
鮮魷- 唔夠鮮味, 有少少腥, 仲要份量好少, 唔叫好過
雜菜- 叫雜菜比較抵食, 因為多款之餘份量都多, 比起就咁叫一款菜會比較化算...

都算貴既火鍋店, 無辦法啦, 又the one又食環境, 價錢一定偏貴...
但食物質素都係新鮮有質素既, 而且環境舒適, 唔會好嘈,
有種似平時同朋友去outdoor飲野既感覺, 但仲可以打埋邊爐tim喎, 絕對係一個唔錯既新體驗!!!!!!

自己一向都唔食香港既放題, 好細個食過一次之後就從來無再去過, 
做左咁耐人都知道呢個世界係一分錢一分貨, 2百多元既質素一定好極有限 (視乎你既個人要求)
今次黎呢個5百多元既放題, 未去已經十分期待!!!!!

去到好快就take order, 一客自選食物, 三選一- 鮑魚, 牡丹蝦, 帶子,
我同男朋友二話不說齊齊揀左鮑魚, 因為一向喜愛. 
鮑魚新鮮彈牙, 加左燒汁輕輕煮過, 令清淡既鮑魚味道更加豐富.
接著我地就order左

刺身拼盤- 有多款刺身: 劍魚腩, 帶子, 三文魚, 甜蝦, 赤貝, 希靈魚等等, 
根本上刺身係新鮮到爆, 差唔多可以媲美係日本食既質素, 絕對好過好多酒店buffet既刺身, 
加上刺身款式多, 完全可以滿足喜愛食刺身既朋友
燒銀鱈魚- 肉質好滑好淋, 表皮燒到金黃色帶少少脆, 加上燒汁連皮都相當吸引
海膽小手卷 - 海膽十分新鮮, 雖然海膽分量較少, 但細細個容易食, 最終忍唔住食左2個先夠
鐵板燒蝦, 帶子 - 燒蝦超爽口, 又多汁, 但帶子唔夠鮮味, 而且"鞋"口, 我較為喜愛燒蝦
鐵板燒鵝肝- 鵝肝表脆內嫩, 入口即溶, 加埋麵包食, 感覺無咁油膩
鐵板燒雞翼 - 燒得太乾, 味道太淡, 竟然比起平時自己落手落腳既日式燒略為遜色
盬燒大蝦 - 蝦唔夠新鮮, 係就係好大隻, 但肉質有少少霉, 鐵板燒蝦既蝦反而較新鮮 
燒羊架 - 好香羊肉味, 但又唔會穌, 而且好多肉汁, 如果燒得再生少少會更好, 最後都忍唔住叫多一客 
厚切牛肉粒- 燒得過熟, 令牛肉較為實得滯, 但味道其實幾好加埋炸蒜片好香 
薄燒牛肉 - 好油, 而且牛肉無味, 就算夾埋蔥一齊食都唔見得吸引
炸軟殼蟹 - 好多炸粉, 軟殼蟹好細, 無肉, 食唔到蟹既鮮味
炒雜菇- 食左咁多肉, 叫返碟素菜, 用牛油炒既雜菇, 少d油會更好最後送雪糕兩杯, 真是十分滿足.....
服務唔錯, 只係加茶唔太主動, 同埋茶唔夠熱, 整體都相當勤快
食物質素基本上無得彈, 係個別有少少問題, 總括都係好新鮮, no. 1絕對非刺身莫屬喇!!!!

今次第4次黎喇, 係因為有一次去大嶼山拜佛, 坐地鐵中途好肚餓,
於是o係荔景出閘, 咁就發現左呢間粥麵店!!!!!!!!!!!!

雖然只係普通一間老店, 但食物既味道卻一點都唔簡單!!!!

每次黎都必食既豬手河, 豬手炆得好入味, 皮夠淋, 但裡面既筋彈牙有趙口, 
就連普通既豬手都能帶俾你兩種層次....
湯底好清甜, 唔係只靠腩汁才有味道, 河粉又夠滑, 最瘋癲既事一碗只係$22, 
我地另外仲叫左碟大既炸魚皮, 魚皮唔厚, 炸粉好薄, 所以炸得好脆口,
大size都只收$10....

仲有油菜竟然只係$7, 點可能仲有咁平靚正既粥麵店架??!!
因為每次黎都唔駛我俾錢, 所以一直都唔知價錢, 今次對我黎講真係一個大發現呀!!!
如果我係街坊, 相信我一星期會黎食3-4次走唔甩