本來安排同朋友做生日，預先book 位問左可唔可以甜品寫句happy birthday ，咁個staff 話可以，我就先預訂個心太軟甜品，叫佢地寫係個個甜品度。 個Staff 都好好，話mark 低左，到時同事會安排到。 信心滿滿的我，諗比個驚喜個朋友。 黎到叫餐前，就當然提下佢，我預訂左個心太軟甜品要寫字，佢地都好有信心~當然沒問題。比到我都好有信心呢次會比到 surprise個朋友。。。 無幾耐叫main course，佢地竟然係我生日朋友面前講左句: “之後落左個，甜品，心太軟，要寫字，生日嘅，已經寫低左。。。。” 哈哈攪笑到。。。。。我都唔知比乜反應。。。。surprise。。。。。。。 最後，甜品出黎，係“沒有”任何生日字嘅。。。反正都已經surprise 左，都無乜surprise 的情況下，就無退返個甜品，要求佢要寫字，哈哈哈。。。 如果，普通食飯Ok，坐得舒服，野食Ok ，服務Ok ， 都係一個新嘅體驗。。哈哈， Murphy's law "Anything that can go wrong will go wrong."

最近譚仔出咗好多新嘢，所以太耐冇食南記，經過佢間舖頭心思思想回味一下，所以叫左個外賣。 點知。。。點咗個小鍋米線(中辣)酸辣。 個湯底除咗蕃茄味之外乜嘢辣味都冇 ，酸菜仲要係好似煲完湯嘅渣咁樣 ，一啲爽口都冇，又無乜味 有唔少人食南記，除左因為佢個招牌春卷之外， 另一個 吸引人嘅地方 就係 佢個小鍋米線，貪佢酸得嚟夠辣。 好可惜 味道已經不再。 春捲就還好啦， 雖然冇以前咁好食 。但最起碼keep到個樣。 整體嚟講， 好難會再令我想再去南記買 小鍋米線囉

我係"棋哥燒鵝"嘅粉絲，每一次行過都會買佢哋嘅燒鵝飯， 或者斬料加餸， 以前放工會買啦 ，而家在家工作 ，午餐都係食佢哋。 但佢地似乎越做越差，價值80蚊嘅燒鵝雙拼飯，d 鵝瘦到皮包骨（ 有圖為證）， 肉都冇。 仲要舊舊都係咁， 齋食皮。 佢做燒鵝出名嘅， 以前呢啲頭頭尾尾佢哋通常都唔會比出嚟比客人食 ，依家居然做到啲燒鵝出品咁樣 ， 我諗佢真係要檢討一下。 做壞招牌。 一直有幫襯開佢地，但今次真係好失望囉。 希望今次係個別事件， 但我諗我要過一排好長時間我先會再幫襯佢地。

之前未食過呢間嘢，喺到openrice咁多人點評，感覺上都ok ，再加上我食嗰啲嘢都係好簡單 ，車仔餸呀 ，腸粉同埋好普通麵 ， 應該都唔會出字啩 ， 點知個菜真係少得有啲離譜 。 所以今日重點想講，就係嗰個菜 ，價值18蚊但係就得嗰幾條， 好似有啲小氣， 其實18蚊呢嗰價錢，散點，我覺得可以畀多少少菜囉。 未食齋睇個樣已經感覺唔係太好 車仔餸味道都係一般， 其實就未至於要畀劣評，但係就係因為個菜 ，令到我覺得佢好似呃我錢咁 我估唔到18蚊嘅菜就係咁 。可能係出面買燒味飯搭嗰條菜可能仲會多啲。

2邊鋪，一邊廚房加2，3張室外枱。另一邊冷氣室內位&室外位：店小，食煙坐室外，無冷氣，唔食煙坐冷氣房。店內無跟政府規定 (枱與枱之間至少要有1.5米距離)，但地方小，都明白嘅。 冷氣房樓底不高，坐滿時就會超嘈。如果怕嘈就可能唔係好頂得住。 野食Ok ，雖然水準不定，但整體評分不錯。酒就經常賣曬未入貨，幾次一開門就賣曬，要選其他酒的品牌。 最近香港疫情，社會事件等，太多事發生，諗住夜晚飲酒，鬆一鬆。但食到一半，見到個個電視都播TVB 新聞，心情又變得沉重。

店內寫，冰是用日本來的冰，係唔係就唔知，但水果的確係好食，食得出係高質素水果。 外表好似好大杯，其實中間空心的，所以食完一碗無難度。 店仔細細，以簡單裝修為主，只可以容納大約20人左右。 只可落單一次，加單要再排隊。 店內寫明不可以拍攝廚房入情況。 店內有貼心提示，20秒內完成拍照，因為冰是會溶化的。 門口排隊以自助填寫名字方式，店員會在外面確認人數，及要在外面先落單，入店付款後才開始制作。 在店外等待時，大部分人都第一次食，及有不少外地觀光客人來試。

前幾日因為喺網上見到呢間，旺角開咗新店，專程去試下，食火鍋晚餐。 去到都有人等緊位，因為人未到齊，計時2小時，大家都唔入住，等到人齊先入去。所以其實人一到齊都唔洗等可以直接入去。 其實可以Download 佢地個Apps拿票排隊。 入座後可以用個Apps落單。如果想食嘅朋友可以Download 個Apps preview 一下。肉類唔多選擇，海鮮有殼嘅我都試左，好多沙。 其他沙律菜，打邊爐嘅菜，同埋飲品雪糕，全部自助出去拿。不過人多好窄，同一個Area擠滿等位嘅客人，拿沙律菜嘅，拿飲品嘅，尤其是飲品櫃門一開，係無位行，要慢慢移動。 佢最特別推介就有個叫檸檬燉蜂蜜嘅飲品，唔好飲，好苦檸檬皮味。 如果同其他日式火鍋店牛一/或者涮涮鍋比較下，我唔會揀呢間。第一價錢唔係平，差不多200元一個人。選擇唔多，又唔係特別多野食同埋唔特別好食。無論你叫乜野湯底，其實最後你都係自助形式加返個味精湯底落去。 最重要就係嗰啲服務態度，其實都唔係咁好。 完場前，半個小時前要埋單先。我個日講明只收現金。 埋完單可以繼續食埋你枱面d 野，同埋拿雪糕食，但就唔可以再加單。跟住繼續食啦。 我同我朋友就食埋雪糕再坐下慢慢飲埋杯汽水，諗住有人5分鐘前再提一下，其實自己都有睇住時間。但有時傾得興起，過左時間都唔知。就咁就唔小心就坐多左2分鐘。 突然有個人走過黎大聲講: 你哋已經坐到夠曬鐘，你哋好走喇喎。 我都知過左時間係我唔啱，但可以比小小禮貌，唔好用鬧嘅方式叫我走囉。

前2日貪得意就再去演藝學院Canteen食天tea，呢間Canteen係美心集團旗下自助形式校園餐廳。 未食前期望其實都唔係太大，所以都評分係Ok，就算無乜特別。 先講環境，唔會太dirty，自己食完要把盤放方去收集位，都有姐姐抹下枱。Tea 時段人亦唔太多，但門口有貼告示，12點半前， 由於座位有限 ，非校內人士要離坐， 讓校內的同學可以有座位食中午。（非校內的Walkin 客要注意啦） 講返我個日個Tea set， 豬頸肉肉燥撈麵配汽水或者茶 (29蚊)，味道唔差，普通快餐店水準。價錢方面，佢地有分2個價錢，學生同訪客不同價錢，訪客價錢其實同大家樂/或者 大快活嘅下午茶差唔多價錢。

平時都行過呢個位，但都唔係好覺有呢間餐廳存在。平時淨係見到個招牌，但係又唔會特登去睇。 呢間餐廳響地鋪，仲要行落一層（ 地牢） 九點之後有宵夜時段優惠 （星期五、六、日要另外加錢 ），就算早咗到都要等到九點先入座 。 去到佢就會畀張紙仔你任點任食， 有啲特別嘢食要另加錢。最基本嘅豬頸肉、牛肋骨、牛肉、豬肉、雞翼、腸仔 、蝦、蜆、 青口 呢唔使特別加錢。 但有一啲要加30蚊 先可以任叫任食(例如帶子) 同一啲靚啲部位嘅肉 。 除咗燒肉之外呢仲有熟食可以點， 譬如 ，炒韓國粉絲 、蛋包蝦 、湯 (例如 韓國辣海鮮湯 )都係任點任食。 飲品：自己響個汽水桶度搵， 選擇唔算多。 相對個價錢，性價比都算高，而且質素唔差 ，環境都算乾淨 ，食完個身唔會有陣 燒烤嘅味道

喺Openrice買咗優惠券148晚食足五小時，到場另外加98蚊現金，嗰晚點咗好多嘢食刺身質素好高，另外，熟食都好好食， 選擇唔算多普普通通咁啦 。但我好多人點蟹粥，同埋蟹膏煲仔飯睇嚟都幾好食，但因為太飽喇，我自己就無食。 飲品，最特別就係有清酒任飲個機器會自動幫啲清加熱酒，都幾好飲， 有啲食客唔識得用嗰部機，啲waiter都好有禮貌，慢慢教點樣用部機。仲有個汽水櫃，有啤酒汽水嗰啲之外，仲有相紙上面點嘅特別飲品。我見到隔離枱都叫左幾Round 特飲，睇黎應該都唔錯。 另外，仲有個甜品櫃，可以自己攞甜品。 服務態度都好好，好有禮貌，收碟碟都收得好快，除左一個啱啱新嚟嘅trainee好似有啲唔知自己做緊乜之外，（ 有碟炒蜆啱啱放落枱，個trainee就即刻想拎走以為已經食完）其他人都好快，好有禮貌同好醒目。 當日雖然係星期四，但係全場都滿曬，好多人食。嚟緊我應該都會再encore再食 就算無買Coupon價錢其實差不多，但唔係食 五小時。 所以計埋時間，買coupon係抵啲。