龍門一番 上海·紫砂燉湯 (荃灣)

荃灣是有名的美食天堂，在八咪半商場翻新後，帶來不少新的食店，龍門一番更是一間門庭如市的餐廳，經常很多人排隊，今日入手新電話後，反正要處理新電話的設定，就決定用這時間排隊。

排隊也接近排了半小時，還算不短的時間，店舖服務也很用心，店員會盛茶給等待的人享用，十分有心。經過耐心的等待，終於入座。

店舖裝潢比較時代感強，沒有傳統的味道，坐下來舒服自然的感覺。小籠包

一籠4隻的小籠包，湯汁頗多，鮮味不足，皮身較厚，特別是頂部更為嚴重，不過不失。紅棗糕

口感有的似馬拉糕，糕身過份濕，令到質感過份粘，紅棗味不夠香，不食也罷。雲吞雞湯

份量很大，料亦十分足，湯偏鹹，雞的鮮味不足，飲完還會很口渴，普通之作。

餐廳食品價錢不便宜，味道未見特出，一班人選擇來作聚會環境還是不錯的地方，以食物行先就可以再作考慮，有更好的選擇。

雲來軒 (尖沙咀)

雲來軒一直想試好耐，不過位置真係太唔方便一值都無試，難得今日有時間，就決定去試下。雞腳燉螺頭

用紫砂茶壺燉湯，配以茶杯飲湯，有心思。辣椒絲豉油用來食湯渣。湯大概有7-8茶杯份量，飲落會有濃既雞味配以淡螺香味，好飲，有一點咸，不過唔似味精既咸，似雞油過多引起。雞腳燉到淋身，燉頭爽口無沙，不錯。黑醋雲吞

雲吞炸得好脆，重要既係佢一的都唔油，抵讚，重點在於黑醋配上雲吞比想像中好食，可以減少炸雲吞既油膩感，更加上黑醋既酸味，令雲吞味道更豐富，做到黑醋比較杰身，方便沾抵讚。不過性價比較低。蝦餃

皮薄，蝦與肉比例份量合適，咬落有啖啖爽口既蝦肉口感，味道有蝦鮮味而唔會比肉味蓋過，好食。流沙奶皇包

一碟4個，竟然係2個炸2個蒸，估佢唔到。炸既外皮係脆而不油，奶皇香而有蛋味，但經過過火既炸唔再流心，哂左。相對蒸既奶皇包，包身鬆軟，配以香滑既流奶，正。唯一唔好就係流奶唔夠多。牛肉球

牛肉球口感一流，爽口但唔會太實既感覺，奈何最重要既牛肉味唔見左，最差既一個點心。三十年陳皮紅豆沙

陳皮味對鍾意食陳皮既人黎講唔夠濃，對唔鍾意食既人又會覺得太重口味，唔拖唔水咁。紅豆沙本身杰身，真係一碗紅豆沙唔係紅豆水，紅豆亦都有足夠香味，可以一試。所有野食都唔會難食，平均水準幾好。

當日食客唔多，職員主動執野加水，仲拎杯比我，抵讚，環境都舒服唔會太逼，唯一就係安排坐在係走廊位無咁舒服。

定食 Doraya (銅鑼灣)

銅鑼灣食日本野選擇好多，但要選一間好食又唔算貴既其實一的都唔易，Doraya絕對是一個好選擇，我都會定期就返黎食下佢。藍鰭吞拿魚扒定食 $138

吞拿魚扒的份量絕對不算少，都有十件，吞拿魚經過輕輕的炙燒，火喉控制得宜，有炙燒過的油脂香，保留左溶化口感，更有濃濃既吞拿魚鮮味，性價比十足。飯的醋味略重，但配合吞拿魚的油脂香，是一個不錯的混合。小食方面就全無特別，很普通。

P.S 此餐廳最好食的就是吞拿魚，其他的刺身相對是比較普通，環境比較狹逼的。

煙燻玉子燒 (荃灣)

荃灣食街鱟地坊，香港聞名，小店林立，自然要去試下。咁多選擇，係唔知決定食咩好姐。最後繞場一周，先食個紫薯玉子燒。$34/條

即叫即整關係，加上是日人山人海，等個不亦樂乎，足足等左半個鐘先有得拎。等左咁耐，係唔係咁好食先，即刻開餐啦仲等咩。咪住，店員話要等多3分鐘先好食喎，好我等。

終於有得食啦，一打開，熱氣四散，聞到既唔係蛋香，係一陣人稱煙燻味既味道洶湧而出，唔好講咁多，食啦，咬落去真係好熱好熱好熱(小心辣親呀)，食落蛋味不算濃烈，味道偏甜，仲要唔夠滑，好在佢都幾有咬口，夠堅挺。紫薯份量多又甜又香，好食過玉子，兩樣野放埋一齊，真係太甜，所以最後我決定分開黎食，先挑左的紫薯出黎食，再食玉子，得左。哈哈。

食落唔差，但要34元先得咁既份量真係太貴啦，試下無妨，ENCORE就未必會啦。

P.S 小街窄巷就唔好諗呢到有幾好環境，係唔會有台架。

漁米鎮菜館 (香港仔)

當年遠近馳名的謝記魚蛋，早已人面全非，取而代之的是叫做漁米鎮的餐廳。既然取代得一代名店，自然要去試一試味道。

炸魚片回想當年魚片，爽口彈牙，肉身富有魚香味，新鮮出爐更是非吃不可的選擇。除了味道，更是代表南區人的傳統及集體回憶(媽媽叔叔常常帶我去吃)。現在這間的魚片，不但魚味欠佳，份量又少，更甚的是並不彈牙。沒有了過往的熟悉感，只餘下一種陌生的裝潢。

茄子牛仔骨茄子煮得柔軟入味，茄子味十分豐富。相反牛仔骨味道不入味，而且汁跟牛仔骨配上來也是太淡的組合，食之無味，棄之可惜，肉質也不夠諗身。牛仔骨也太少了。

椒鹽鮮尤炸得恰到好處的一道鮮尤，不會太油亦不會太乾，香口得來亦保持著鮮尤的柔軟。而且不會沾得整隻尤魚也是太多粉，好。

炸子雞雞皮香脆，雞肉嫩滑，雞味亦算正常，好食的半隻雞。

整體來說，炸的食物做得是不錯，火喉控制十足，相對的是小菜的份量及味道還有很大的改善空間。

總結評分

味道:7/10 (炸子雞，椒鹽鮮尤)

價錢:6.5/10 (150)

環境:6/10

服務:6/10