環境 服務 食物 價錢 一個人，想去享受下寧靜放鬆同Timeless既感覺，見到呢間闊落乾淨企理，就入去試下 餐牌睇落吸引，咩都想食叫左個飯，炸雞同杯荔枝馬格烈，食物質素味道都非常好，接近完美，出餐時間都快。 鰻魚resotto口感軟糯，汁均勻包住每粒飯，但鰻魚質素都係日餐既好 炸雞醬汁好惹味，配埋炸年糕，口感豐富，食而忘返，但雞件骨多肉少，炸粉又厚 馬格烈酒比例較高，鐘意飲酒會比較愛，我偏愛酒濃度低一點 環境非常舒適，森系裝潢，好有恬靜感，店內擺設乾淨俐落 服務都唔錯，就算一個人都有被關注既感覺但又唔會感覺到壓迫感，店員感覺都頗專業 價錢係偏高，只係配合左其他元素既，都係正常範圍內

已經好耐前黎，影低左相到而家先upload同寫食評，經過沉澱，評語反而覺得會更中肯 今次算係下午茶式咁食呢餐，點左2個餐，1個pizza+飲品+湯，1個甜品+飲品 環境❤️❤️❤️ 味道❤️❤️❤️ 服務❤️❤️ 價錢❤️❤️ 現在睇環境冇係apps,見既咁乾淨企理，d牆可能有d時日，或有污漬，或有少許剝落，或有點黑。梳化好多水漬食物碎屑，枱面痴立立，地下都好似好耐冇清潔咁黑黑既 味道overall中中挺挺，有d好食有d又差咁，感覺平民化少少，同佢打造既外型，理想同現實有出入 服務都冇乜，有d似茶記隨便，員工唔係衰但講野比較豪氣，水又自助，冇咩野需要服務 價錢，對比咁層次既食物質素，環境同服務，我稍為覺得偏高了

每次出黎都會食呢間，皆因每次食都滿意，性價比高，野食夠味，超正 我今日中午同夜晚都係呢頭，所以2餐都幫襯 中午：咖哩吉列厚豬扒飯 $67 味道❤️❤️❤️❤️❤️ 價錢❤️❤️❤️❤️❤️ 速度❤️❤️❤️ 服務❤️❤️ 12點食飯時間都未開始，坐低冇5分鐘，就已經問左3次落得單未，d店員又黑口黑面，我睇到個午餐顯示屏咁岩壞左睇唔到，問佢午餐係咩，語氣勁差指住張枱面，呢度囉～R哂頭，我都唔係講個餐牌 野食呢～真係冇得彈，塊豬扒勁大塊，個底我以為係薯仔頂起d豬扒，點知仲有豬扒係底，汁又夠多，有少少辣好惹味，又有椰香，大大碗飯都夠撈有多，如果唔係我咁大食既人，2個加多碗飯share個餸都綽綽有餘 晚餐：咖哩牛肉飯$65 西蘭花蝦球$88 蜜椒薯仔一口牛$78（冇keep單，大概係咁價錢） 味道❤️❤️❤️❤️❤️ 價錢❤️❤️❤️❤️❤️ 速度❤️❤️❤️❤️ 服務 味道都係個句，我超愛，仲成日介紹人去食，一口牛唔韌，蜜汁緊貼牛肉，又有肉汁，薯仔脆口。西蘭花蝦球，蝦好咬口，彈牙，味道恰到好處，西蘭花爽脆岩岩熟。咖哩中午已食過好食所以轉牛肉試，都差唔多既感覺，正 但服務真係超級差，我記錯5點有得叫小菜，個女收銀態度勁差話未有，趕客咁，到5點半叫得個陣，同我落單又勁唔耐煩，我已經係非常爽快既人，都咁，好無奈，等外賣期間見佢聽個外賣都想鬧人咁滯，係咁催，態度又差，得啦～［係咪咁係咪咁？得啦～］咁，真係不得了 衛生喇～廁所地勁跣，行過見d廚房水浸咁款，勁危險，d碗碟又一地都係，都唔明佢點過食環個關，厲害

又係忘記影相 2個人12點剛開舖入座，可能太早，得1個員工，未訓醒咁，位自己搵坐，睇完餐牌有個嬸嬸番工，就諗住叫佢落單，跟住開口講普通話，以為係同胞，原來係韓國人，知道之後改用英文同佢溝通，問佢係咪韓國人時，佢態度好嚴肅咁用英文答，呢度韓國店，當然係韓國人，呢點我有d反感，即係我都係問句，方便睇下以咩形式溝通者～同埋你咁講，我係咪可以話呢度香港，用番廣東話啦?咁?其實大家友善少少，唔好一黎就起槓囉～ 因為最近睇完韓劇超想食，就叫到成枱野，反正食唔哂打包～ 芝士火鍋烤雞2個味共16件，泡菜餅，炒粉絲午餐，炒年糕，2渣馬格利，1藍莓1桃味 味道真心100%好味，至少係好岩我胃口😀🥰， -烤雞配芝士，需邪惡但真心正，不過美中不足係，雞冇想像中脆口 -泡菜餅又香又脆，味道夠，唔會太咸冇泡菜味，又唔會淨係得泡菜味，食得出有層次感☺️ -炒粉絲又係我好鐘意既味，唔會好似韓米咁又乾又淨係得黑椒味，肉又冇味餸又少，咸、麻油、黑椒3隻味平衡，餸又足夠 -炒年糕軟硬適中，又多配料，汁好味但我個人感覺汁多左d，鐘意食汁人士就岩哂 -馬格利，係酒同一d果汁呀汽水呀個類既混合，有d仲會加冰blend下，呢度就應該係加果味糖漿加冰blend左下既個種，口感一流，味道都好，但係酒味係幾乎飲唔出，平時掂走即紅既我飲左2渣都冇反應 Overall，成件事都好爽既，因為係平日，又一早去，可以好清靜咁享受呢餐 咁樣就成1200蚊，其實唔算抵食，不過味道好份量夠，大集團形式黎講，真係已經非常好 **ps 我係食唔哂打包，因為全部都飽肚野，淨低既，夠2個人食多餐🫠🫠

價錢都平，性價比算高，份量都夠飽肚，味道都唔算差，炸雞幾juice，炒粉絲冇韓式個種油滑感，味道偏向黑椒味重，飲品幾平 聽講擒日新舖開張，但咁新就已經成間舖都有飛飛🐜🐝🪰🦗d人仲邊收錢，落單，又邊包卷切野，外賣又係個對手去包，仲有見到攞貨搬梯都係就咁埋番位整野食，d材料又街市買餸咁攤哂係度，衛生真係不得了，大菌食細菌😅😅冬天還好既，夏天就……腸胃夠強壯既話，都不防食下既～😆 員工就。。講野需要d技巧囉～話冇禮貌又唔係，就。。。怪怪地。。

好耐之前食過，忘記影相，但想紀錄下感想 個次2個大人1個小朋友，叫左d小食，雞粒，芝士年糕同蕃薯條，另外2個主食，好似係叫紅燒肉飯同個一個麵既，仲有幾杯飲品，叫左咩野飲已經唔記得，但記得唔好飲，小食都算好食既，但只係炸野冇咩技術可言，蕃薯條個味淡左d，記得個紅燒肉飯（記唔清個名），唔夠入味 員工唔太主動，唔醒目，好似有個男士（似係主管或老闆）就好主動醒目。食到尾有暗示我地埋單，我明白呢樣情有可原既，畢竟舖細枱少 一般而言，成日見佢排隊（可能食飯時間），又唔覺得值得排，非繁忙時間黎就ok

個日趕時間唔知食乜，突然想去中學時期最愛既其中一間連鎖店（暴露年齡🤭），就想話入去回味下 入到去見到咁靜，打左個突，因為係平日午飯時間，冇咩道理🤔🤔但又廢事要諗食咩，就入左去睇餐牌 其實我好懷念佢三文魚蟹籽飯，佢又唔比外賣，但我諗我真係好耐冇幫襯佢，個餐牌已經面目全非，咁就求其叫左d野食，員工同客人都冇咩眼神接觸，答問題又有d敷衍，成個場都冇人執枱。 野食價錢唔貴，平平地解決一餐係ok既，但味道除左個飯係正常水準之外，其他真係不值一提，飯既牛肉係吉野家咁多年黎招牌，呢個仲叫做keep到，咖哩感覺好似日本食品店買既咖哩磚開出黎，咁味道都ok既，抹茶紅豆冰，紅豆太少，唔夠甜，冇綠茶味，但6蚊。。。。。算係咁，真係唔能夠要求太多，關東煮係最差，完全冇味，d野食係淋到一個點，好難食

同樣地我仲未習慣影相同記錄，所以食物尚未有好完善介紹🤦‍♀️ 之前同朋友係灣仔個頭食過間喜馬拉雅餐廳，對其菜色味道念念不忘，但對新界仔黎講，個邊有點遠，最近見到呢間，差不多既類型，想解下癮就入去試試 裝修環境衛生服務坐位都係不過不失，可圈可點，冇咩野值得講，朋友就覺得都算有中東類2氣氛 食物都幾接近我所認為既正宗味，不過價錢就地區而言，佢同我之前灣仔食個間差不多，所以感覺少許貴左，不過就就腳d 下次再食寫番個詳細少少既report😜

抱歉，經常食完先醒起想食下食評，所以冇點影食品，以後會更用心🤪 個人十分喜歡食蛋包飯及咖哩，亦愛日本文化，偶然經過見到呢間店舖覺得幾有日本味就排隊食，當日雖然午飯時間但唔算多人，前面2個2位等，店員在客人入座前不斷提醒客人排隊要排到箭咀後，遮要點擺，稍微長氣同過份緊張😮‍💨 入座即遞上排隊時已填好既點餐紙，等左唔係好耐就已經黎到😋店員可能比較忙，長期都係緊張狀態，因為店舖細，座位窄，佢遞上餐點時我慣性想接，結果2次佢都好大反應，呢點我覺得好差。其一，我都係呢行既專業人士，可能我既慣性反應嚇到佢但，其二，佢反應唔駛咁大，可以好禮貌少少同我講佢做就得，其三，間舖細座位窄，我擔心佢會成盤跌我接有咩事都係我自己負責，其四，本人係孕婦而且身形都大份，佢叫我再借過少少，但我左邊有人坐，仲要係唔識同搭枱式坐，右邊就係玻璃，試問仲點借？ 好喇，到餐點，咖哩同蛋冇驚喜，同coco質素相同，比較日本本地食時就差一半（呢個意料之內），而且價錢較貴份量又少，加左碼都好少咁，所以整體係nono的。。。 唉。。。而家係香港想搵d所謂真係好食既野有d難。。。。。

靜靜地似cafe，諗住入去chill下食個甜品飲杯野，環境幾乾淨企理，可能因為比較新，都幾靚 但入面幾個員工係咁傾偈，都冇點巡下執枱收野同客人有咩需求，靠電話掃code落單既最大壞處就係，服務會好易差，同客人又有距離感 叫左原味同士多啤梨pancake，飲品第2杯半價，我地3個叫左3杯，第4杯原來冇確認要臨走時落😅 講番pancake，黎到時覺得好美觀好好食咁，但原來1份好漏，pancke係鬆軟同香，但雪糕太細唔夠配黎食，忌廉就太多喇，大致上唔錯既 飲品就恐怖喇，明明冇客都搞勁耐先出到一杯，然後我地叫好似係double chocolate 既飲品，我朋友話屋企沖美綠冇咁嬲，係多左d cream😆綠茶個杯好少少，少少囉。。。