California Pizza Kitchen (尖沙咀)

星期三就三人行來lunch

芒果烤雞pizza$86—三人中有一位是第一次幫趁cpk，對方一直都是幫趁開pizza hut，那麼言談間我就講到與cpk怎樣邂逅，明顯當然就係那次openrice半價pizza帶挈我…那次後，只要想食pizza又順路的話，即使沒promotion我一樣會照幫趁的。今次對方第一次幫趁，那麼我就試試將自己第一次的體驗向佢分享，叫佢試一試這個香芒烤雞。這款pizza是keep到的，香芒仍鮮甜多汁，當然仍帶有陣陣的咖喱香味，對方狀甚滿意，我還鬼馬問對方還會食pizza hut嗎？我向對方說道這款pizza雖然default了是厚批，但這款不會像pizza hut的厚批焗得太乾，乾得像食隔夜麵包，但乾中又鋪上厚厚的芝士搞到兩頭唔到岸咁，況且兩者價錢又差不多，對方又似乎認同了。

瑪嘉利特margherita pizza—這款是在埋單前後補點的pizza，因為似乎食了一個pizza再小食兼意粉其餘二人都覺得意猶未盡，而且厚批試了始終都對薄批充滿好奇心。這款薄批固然帶脆，雖然不是薯片那個feel，但就是「薄餐」新鮮滾熱辣上枱那種感覺，三人都很滿意。上面鋪的芝士頗滑同黐纏，但蕃茄方面又很濕潤，食落口的感覺整體很豐富，只是上面的鼠尾草我們不嬲都習慣不愛吃。

avocado rolls牛油果蛋卷—這個不及上次食的好。因為個皮唔夠上次脆，事緣今次店方第一碟時焗膿了，睇怕廚房怕再事敗再焗膿就唔敢焗得太脆太乾身，不過不需我提出廚房已默默耕耘咁幫我再整，只係店方沒再會我知等我仲以為侍應漏單，不過服務真的很禮貌盡責。但今次真係食到牛油果了。事緣我最近勁愛食牛油果呀！

chicken piccata檸檬白酒意粉—這個以檸檬汁味為主，頗酸呀！白酒味就唔多覺。雞肉還可以，遠看都頗似三文魚扒，搞到唔食魚的我勁怯。但個sauce真係頗醒神兼開胃，個意粉texture亦整得剛好唔太稔或太生，只係汁料中伴有一隻豆像醃過的茄乾或醃橄欖咁勁鹹，不是我們杯茶就被new晒出來冇食咁囉！

食後感：

整體服務真係好得沒事再挑剔，除了頻換碟和斟水，其次席間我們曾倒瀉過水，成棚侍應走埋來，又拎menu又芝士粉，真係好記性要乜有乜~thanks all

三人共$345

和宴 (尖沙咀)

原來不經不覺、又驚又險就一年…

今次再食又係因為生日。

二人叫了和牛拼盤、海鮮石頭鍋飯和梅子酒。

初初本來我仲以為自己要另叫冷麵和沙律，但可能平日飲食習慣肉類只佔飲食的1/3，突然食返咁多肉就很快飽，一來我們又飲酒，我真係驚自己一下子去咁盡飽到嘔就樣衰。XD

和牛拼盤除了肉類，另有少量的菇、粟米、青椒作為配菜。

和牛拼盤有甚麼牛肉我都不贅言了，可參考樓下各食家的意見。

不過幾種中有其中一種較重牛味，因為拼盤一來到我就係夾了這種來燒，但平日我都不尚算嗜牛，勁重的牛味我係可多可少。反而其餘的肉塊我燒到medium to rare時的口感係可以做到牛舌的肉汁效果，一咬落去嫰中擠出肉汁，真係正！基本上這裡的拼盤都試了幾次，事實和牛這款的切度較厚我自己覺得與早前這裡試過幾款的拼盤肉類比較。

至於石頭鍋飯經理同我講今日有新款的，但沒落menu，咁岩同行那位不想試新的就叫了海鮮這個，咁我就覺得海鮮這款石頭鍋比上次食的牛肉石頭鍋美味，亦比早前去韓雅林食那款海鮮石頭鍋美味，或者我鍾意和宴這裡飯中帶菜，而且帶有少許濕潤冇咁乾哽。

梅子酒好得！連我不喜歡飲酒的人都飲上了兩大杯，但又不會像choyo那隻咁甜，但今次飲的夠梅子香，少少甜，但慢慢含又有很少很少的水果酸味，酒精味少得不經意但又不會飲唔出，約略輕輕帶過，鍾意。因為這梅子酒經理話酒精含量約10-12%。嗯，我怎樣不愛飲酒？事實平日不嗜酒，最憎飲啤酒，只有baileys同jolly sandy我係稍為飲下，其餘的sub zero同diamond black我劑劑同親朋友去飲都飲剩三份二，因為我覺得很臭很難飲，畢竟這些酒都陪我渡過了讀書的日子。

食後感：

其實旅行固然要去，和牛固然要食，在香港食和牛經驗總約略有兩三次，曾經試過某酒店的和牛七百幾蚊得幾舊，味道食到我媽媽聲…自此真係很怕在香港食和牛，因為我怕得不償失。

地道不地道現在我唔理，但食我喜歡的烤肉，暫時我只會選和宴，初初第一次來我都係因為日本太太，她遠嫁來香港就常常話掛念她愛的烤肉，在這裡她找回失去的日本感覺，既然由她這麼說我亦因為咁去第一次幫趁，回頭望原來都有兩年幾…

至於和牛，在坊間我所曾經試過的，不論平或貴，多數的肥美真係像打邊爐的肥牛，形態der得頗難看，脂肪分怖不太平均，入口一絲絲的脂肪團係較為偏向肉的外圍，令我覺得很肥膩，食過的盛八就偏向我上述所講的這類型，雖然和宴的和牛都肥美，但今次食到的真係肥美得來係不會過火，除了肉質平均分怖，入口的肥美口感係乾淨俐落，肥美得不會令人反感猛吞口水，反而會想再燒多塊。

服務態度好得我沒事可挑剔，正常係想有下一次。

經理說黎緊將會加d新菜式，記憶中除了有麵，還有一個與芝士有關的飯，有緣的朋友可試試。

居食屋「和民」 (大埔)

假期最後的一天與母親大人循例去食一餐…但佢話今日個肚咕咕叫就要遷就佢食清淡少少。

坐低點菜佢淨想話食拉麵，結果點了豬軟骨拉麵$47。我們商議後另叫了一個牛肉火鍋$59同一個豪華壽司盛合$54。

豬軟骨拉麵—我們都覺得出奇地大碗，味道亦比我們預期中出奇地算唔錯，一致覺得好味過味千或連城的札幌拉麵。豬軟骨老媽怕膽固醇，多由我包底，咁我們都覺得都唔錯，肉中帶有少許膠質軟骨的咬口，算稱職的了。至於湯底是miso，食得出係出前一丁的湯包，慶幸麵質煮得剛好搭夠。

牛肉火鍋—像一般日式火鍋一樣湯汁帶點甜，材料都充足，有金菇、蘿蔔、津白。牛很肥美，老媽亦係怕肥多數由我食，只係湯底較油。不過我覺得五十零都算係咁，一般都唔會太多要求，相信大家樂都係咁上下價錢。

豪華壽司盛合—一碟六件，分別係鰻魚、三文魚海鮮和炙燒帶子，每款兩件。母親大人讚鰻魚唔錯，好味過板前，因為有次同佢去板前食佢猛話鰻魚腥，但平日佢勁食得腥魚，鍾意食嗰隻「釘公」。炙燒帶子，冇咩特別，淨記得食了芒果同粒帶子。三文魚海鮮，都係蟹子和沙律汁搭夠，三文魚快below average…總括而言，這裡的壽司款式係fusion款，但技術真係唔係壽司嗰皮，三件款式的整法都採用反卷形式，內包紫菜外黐飯，但三件壽司只要我輕力一夾就散晒跌晒落身，要靠匙羹盛住來食就不叫壽司啦！不過六件總共$54，除開都係$9百佳價錢，唉，算吧啦！

食後感：

唯一可取，勝在坐得舒服，同埋出面食飯來講唔算過鹹。

這間等位都等一粒鐘，初初等位的人多數係4-6人的組合，等等下都係只剩餘2-4人的組合。

和民其實由我01年yr1時已開始食，直到現時的menu都係大同小異，唯一令我冇改變諗法的是當多過3個人我諗我唔會揀和民，因為由初幫趁時我覺得食環境多於食得飽人，我仲記得初初我們三個女孩子去食永遠個dish係分唔勻，睇返今日個menu大多數件數每碟仍係保持5-7件，都係兩丁友去適合唔洗打交分贓，成棚人去我真係驚會碟數疊羅漢，或者我會揀pizza hut、任食火鍋填肚。

今日都尚算飽，或者壽司的飯填飽肚。

2人180

北京拉麵店 (旺角)

最近我有點放肆+放縱，似乎一連兩三篇的食評唔係甜就係heavy…-_-

兩個人叫了酸辣湯拉麵、南京牛肉擔擔麵、小籠包和雞絲粉皮share食。

酸辣湯拉麵一向都係我的愛將，麵與湯底的texture仍係依舊一貫的好，但今日只係鹹了少許咁啦！

至於南京牛肉今日我就轉叫配擔擔麵，牛腩都係仍然與上次食時一樣的好。既然牛腩事前落鑊爆香過，真係內心掙扎一番…上次我都講過跟拉麵睇湯都已經係肥膩，今日的牛腩與上次食時一樣仍係「撚」上少許白色的滑滑脂肪，肉質又沒令我倆黐牙，二人確係不約而同一致讚好，不過配上擔擔麵…真係我們心中有數，眾所周知擔擔麵的湯底係混入麻醬，基本上麻醬的香味除了香氣撲鼻外，亦遮掩了我們的視線唔會再睇到我上次食評幅相湯面浮油。故此我都溫馨提示，若然此店上個食評幅相已有網友友都覺得肥的話，我諗配上擔擔麵我真係驚佢承受不了嚇親…不能承受的卡路里呢！(紅肉的脂肪+麻醬的油份)~XD

但事實配擔擔麵又真係好食d，意境又好d…因為擔擔麵本身個特性就係爽身，食起上來真係好feel d嘅！我驚唔驚肥？都少少內疚感架！不過第二日食清d，瓜瓜菜菜，我諗都ok~今日我只食了一粒糖咁大把咋！一日冇一粒糖食我會唔開心，情緒低落。

在這裡都食了幾次小籠包，水準維持飄忽水平，已不止於小籠包的特價日星期一或正價的其他weekdays。此店本人的第一個食評記得當日係星期一，定為小籠包特價只需$9咋！那次小籠包的水準我真係俾到盡都係60分而已。當時返到屋企寫食評時就諗：$9貨式，我能夠要求d咩呢！？因為事實當日的小籠包肉餡很普通，冇咩鮮肉味，肉質除了係肥外，只係肉質鬆散唔係帶彈性；直到第二次幫趁時就係星期四的平日晚巿，而我們都係用了原價價錢叫這盅小籠包，第二次水準都係同第一次水準相差不遠矣！直到昨日的第三次，原來…都唔係我所想像中咁樣！本來經過第一、第二次，今次我本來沒打算過叫小籠包，係同我食diiner嗰位nur左我一輪，咁我唯有俾佢得逞就佢啦！慶幸今次又比我預期中好喎！得逞嗰位佢話因為睇到有個食客食到似賣緊廣告咁津津有味，佢話睇到彈肉汁喎！而我覺得呢…今次肉質鮮味好多，亦帶有彈性。咁小籠包上枱時又熱騰騰，包中lon lon下湯汁，個皮又唔會太薄或太厚，$9咁我覺得可以俾佢合格嘅！都有76分。well~麥記麥旋風都加到$9.3喇！

事後我倆討論這飄忽水準的現象係可能因為店方每次包餡時都準備一定的數量，就算採用FIFO的方法，但基於每日客人的需求量都唔同，所以點都會有某d數量既小籠包存貨係備用狀態，咁所以餡的鮮味當然與存放的日子係成反比…當然這一段的猜測係冇真憑實證，純粹我們言談間的睇法而已！咁所以應該與原價或特價叫就沒關係。

至於雞絲粉皮亦係肥膩之作，首要讚佢個粉皮又真係又滑又爽，只係混多了麻油…慶幸有青瓜絲等減低lup口感覺(搽lip gloss咁)，又香又少少辣，幾惹味嘅！

食後感：

服務都係一般啦！係話就話加一，侍應做左佢的職責佢的本份我就算的了。服務以外的笑容佢豪到俾我咪豪囉！…話晒人人日日有情緒返工日日都有情緒，佢唔笑唔通我打佢咩！？-_-

今餐固然係肥啦！唉…少少罪惡感~睇怕未來幾日皮膚當災囉！(淚)

睇來呢餐我豪左未來幾日食朱古力的quota出來…唉，諗起都傷心！我愛的古古力快d番來哦！

今餐二人共$92

XTC on Ice Gelato (九龍塘)

少食了一排xtc，真的久違了。

忽然想食雪糕調劑一下…

左睇右睇、左試右試，只有豆腐這味道一試傾心，撻著了心裡想要的那團火！^^v

事實去年某次幫趁xtc時係在試味中相遇過，當時豆腐留俾我的印象不大討好，像食緊落多了石膏粉的豆腐花，以致當時我沒有即時對它產生「非它莫屬」那種感覺。

一年後的今日再相遇時，豆腐這味道真的令我對它刮目相看。因為味道除了有食豆腐花在口中軟滑融化那種感覺，其次食時腦中係唔會令我諗起一舊舊豆腐或石膏粉，反而似豆漿那種感覺多d ya！甜度又剛剛好，真的希望xtc會keep住~well done！

反正雪糕味道來來去去都係得咁多選擇，試到仍沒得出結果時我就乾脆索性唔試味就配搭我心目中的信心保證—黑芝麻。

反而今日的黑芝麻與我心目中食過留俾我的印象失準了少許，因為黑芝麻像焊得過了火，帶有少許「火羅」味，煮燶左！？…同我dinner那位都覺得係呢！

年青女店員服務都唔錯，對雪糕味道都很熟識，仲一齊講雪糕經…又講白咖啡又講邊隻甜邊隻唔會太甜，又講到黑芝麻對頭髮亮澤又美顏，我同佢仲講到去年時食過的紅棗龍眼呢！我一講佢就g係sorbet！hahah…似女仔一埋堆講扮靚！ XD

雖然雪糕同dinner一樣一個得一個唔得，不過事實豆腐這味道真的有80分足以單憑它一種味俾笑面。

「雪糕大人，放心喎！我冇走左去，只係想留返d quota黎食朱古力之嘛！^3^」