串得起串燒專門店 (大圍)

串得起，認識我都知我是這兒常客，我倆每月總有三幾次來這兒開餐﹗

講緊既當然就係大圍顯田邨既串得起串燒專門店。

打從三年多前誤打誤撞來這兒吃了一餐後，這兒已成為我倆的心水食店﹗
是兩公婆經營的小店，座位也沒有二十個，故每每星期五六周末都爆場，現在來吃真的要老早訂位﹗經營已三年有多，也知道串燒店酒水的重要，小店最近申請了酒牌，可以賣酒，以後來吃酒水不用自攜了﹗

店內有提供清酒紅酒﹗

當然我最喜愛的啤酒是不可少了吧﹗
款式大眾化，貴一點的健力士藍妹有齊，平有平飲的青島、生力及獅威都有得選擇，認真豐儉由人。

價錢由罐裝$7至支裝的$25，我就一向對啤酒無咩要求，最緊要有得飲，咁就當然飲最平既獅威啦。

食物吃了好幾年也沒變，依舊簡約美味，價錢公道合理，最平的串燒$5至烤魚$60也有，選擇多。

食物款式多，調味粉不會下得過多，原汁原味，所有食物也是堅持生燒不是預早燒起加熱，就是這份對食物的情感已值得我倆繼續支持﹗

亦因為咁，來吃要有心理準備，只有佢兩公婆又要燒又要招呼執檯，要食就要等等了﹗雞軟骨是我倆最愛，每次來每人必吃兩三串，調味就是很簡單的灑上海鹽，已是美味的佐酒小吃﹗
比較特別的可試試這兒的燒魚皮餃，外皮烤至金黃色脆卜卜，食落香噴噴很過癮﹗這個煙肉廣島蠔卷是名物，兩者均為濃味之物，拼埋卻有想不到豐腴美味，Juicy啖啖肉汁，愛吃蠔的必要一試﹗清酒花甲一份才三十多元，只用蒜蓉及清酒吊吊味，吃得出海水鮮甜﹗食家愛吃大蔥，而我則鍾意後面厚切多汁的雞脾菇。
最近還有烤台灣腸，試過一次很香口呢﹗燒茄子絕對是手工菜，一條大大的茄子由生至熟起碼要花心機燒20分鐘，燒軟後在茄肉上灑上香蔥蒜泥及醬油，更能引出茄子的甜美﹗我不吃魚但食家來這兒必點大眼雞。
烤得火喉恰到好處，蘸日式豉油吃很美味，她次次一個人吃一條﹗如果與友共聚的話她會要求點一條大烏頭，烤魚時於魚身夾著香草來燒，一來去魚腥二來吃落更香，烏頭夠肥美魚味又濃，好此道者必吃。要一提這兒烤的雞翼，燒得外脆內軟，就是簡單的塗上蜜糖，每次吃數隻也不覺膩﹗牛肉方面我會揀佢地既牛肋粒，面頭灑上黑椒，牛味濃郁好吃﹗

愛吃菜的話可試這兒的炒雜菜或雜菇，夠哂牛油香﹗由於嗜酒關係，每次均會點幾隻魷魚乾剪碎來送酒，一片片的蘸豉油及日式芥辣同吃，香口惹味，正﹗之前無論來採訪的電視台、報紙及雜誌均一致推介的的牛油燒粟米，吃了好幾年還是我的最愛﹗

坊間大部份的燒粟米都是先用熱水灼熟才燒慳水慳力，這兒堅持原支街市新鮮粟米去皮去鬚便生燒，出來的燒粟米特別原汁原味，粒粒分明夠哂甜美，牛油香濃，不得不試。

如你對食物有咩要求，在落單時也可提出呢，佢地必樂於接受﹗

閒時我總會與食家二人世界食串燒傾計﹔
這習慣亦已傳染俾身邊老友記，每次聚會，便會想起串得起。

這種飲到成檯是啤酒罐的情況是等閒事﹗更誇張也試過呢﹗

相識多年，都知道現在小店確難維生，食材差不多每月加價，鋪租又加，鋪位細座位不多就算密密做七除八扣也賺不了多少，兩公婆是老實人，只有默默咬落牙關以價廉質優求存﹗
加油啊﹗期望這兒生意愈來愈好，堅持那份對美味的執著，我倆會一直幫趁的呢﹗

華神川菜火鍋城 (福田華強)

我倆嗜辣又愛打邊爐，常問朋友有什麼正宗的麻辣火鍋推介。
數名友人不約而同的介紹深圳的華神火鍋，話佢深圳最正宗，上兩個星期日膽粗粗同食家上去試試﹗

聽說華神是連鎖店，規模雖不及小肥羊但也有不少分店，今次試的是中航店，落馬洲打的來廿蚊搞掂﹗

來到當然一試這兒的招牌麻辣火鍋，我倆唔知死字點寫地點了一整個麻辣鍋。
但我建議朋友們，做人節目留一線，點個鴛鴦鍋準沒錯﹗

這是湯底，好戲在後頭﹗

店員從廚房拿了一個麻辣湯包在你面前打開並倒入鍋中﹗

湯底即時變成血海，好可怕﹗這就是華神牛油湯底了﹗
要說這鍋用的是正宗麻辣鍋必選的牛油作湯底，吃時會帶著一份牛羶香﹗很奇趣地，你一坐低店員就會送上生果給你，未吃火鍋先吃生果乎？

醬料是自助的，你想到的醬都會有。
我倆打邊爐從不亂溝，次次都是豉油、生蒜及蔥粒，能吊味之餘亦能提鮮。

但其實在這兒吃麻辣鍋，唔洗蘸什麼醬料你也可感受到那威力。

先來一碟拍青瓜作小吃，夠入味又脆口﹗

食家最愛吃鳳爪，還是第一次見鳳爪作生料﹗

想說這兒有個好處，就是絕大部份食材生料都可以點半份，岩哂我地呢尐二人組合，可以多吃幾款。

生蝦新鮮，隻隻仲會郁架﹗

在國內吃火鍋，牛肉是不會抱太大期望的。

要吃好的全都在香港，這份雪花肥牛$38，比較嚡口但有牛肉味，在國內已算不錯的了﹗

麻辣湯底吃粟米，是一種挑戰，咀不麻不腫的話算你叻﹗

雜菇用來吸湯一流﹗

土雞半份，有雞味，不是雪藏貨﹗

木耳爽脆﹗

食材沒什麼大不了﹗最重要的當然是湯底﹗

不是說笑，這兒的冷氣大得很，但我自吃第一樣食物後，額頭便開始冒汗﹗

再隔一會，頭皮、眼底鼻底連帶面頰，也冒出雨水般大的汗珠，不是因極辣而谷出來汗水，而是其花椒的麻勁揮發出來的作用﹗

湯底不死辣，食物不會因太辣而吃不下，只是越吃，汗便越下，雙唇麻得不聽使喚，嗜吃辣的朋友應會感到愜意過癮得不得了﹗

岩岩灼熟的菇和鳳爪，這種顏色你敢吃嗎？

食物不貴，碟碟也才三十多元左右，還可點半碟半份錢，最後飲了五六支大青島，兩個人埋單才250人仔左右，抵吃﹗

第一次吃牛油做的湯底，食物全帶羶油香，這就是麻辣鍋的正宗情懷，但當然油膩得很，不會吃得太多，因吃落雖過癮但實在膩透了﹗

不吃牛油的朋友，可選擇這兒的清油麻辣湯底，也可吃到那麻辣滋味﹗
我倆下次來也一於試試清油的，再比較味道如何﹗

一窩豐 (長沙灣)

終於都完成o左土耳其遊記，可以寫番食評﹗
係人都知我鍾意打邊爐，周圍試新野是必然﹗
今次就介紹番間比較得意的，可以一邊打邊爐一邊燒烤既小店﹗地點在長沙灣，叫做一窩豐﹗
小店大排檔格局，鋪子不大，座位三十來個，勝在冷氣足，點燒點打邊爐都唔會熱﹗

店內提供電爐，食客可以點食材來燒﹗
就現場所見，絕大部份既食客都係來玩燒烤﹗

食物價錢尚算大眾化，不過咩都想試的話就梗係貴啦﹗
你在呢度facebook打咭既話仲有腸仔送添﹗先來一個大蘑菇﹗
磨菇愈烤愈香，現烤下完全唔洗調味亦多汁，味道出眾﹗

店內大量調味料提供，孜然粉、海鹽、辣粉、蒜鹽椒鹽黑椒等等等都有﹗
你想落咩都得﹗岩哂鍾意自己玩調味既人﹗安格斯牛肉粒，睇樣色水幾好，可惜吃落重梳打味亦無牛味，可以不試﹗原隻大墨魚，肉厚味美，值得一試﹗
呢度自家出品既雞翼亦都醃得好入味，正﹗海鮮提供有限，我就打來訂位時已預訂了幾款想吃的五人分量﹗

要了大眼雞、蟶子、大蜆及鮑魚﹗

要彈既就係呢度個烤爐力度唔係好夠，燒烤時要俾少少耐性﹗
我地當然係飲住啤酒為樂，藍妹$22，青島$18，合理﹗蟶子不是巨蟶子，不過由於新鮮，咬口彈牙，加蒜加蔥一起燒，鮮甜非常﹗

大蜆及鮑魚仔亦新鮮，上枱時仲郁的﹗
大蜆海水味極濃，待其開口後加少少蒜泥，既惹味又清甜﹗正﹗
最後食完一碟唔夠喉再加多碟呢﹗鮑魚由於殼厚，真係要燒半小時先熟，真係等食等到發忟爭﹗
加少少香蔥，彈牙好吃﹗

老友在現場上facebook打咭，待應即送上台灣腸一碟，甜甜的，外層香脆，好味喎﹗話o左我地無耐性，玩左個幾鐘燒烤最後都係決定打埋邊爐﹗
安格斯大肥牛牛味濃，夠厚切，質感香軟，食得過﹗點了呢度既招牌牛腩湯底，茄味濃郁，牛腩亦味濃鬆化﹗手打蝦丸，吃得出由一粒粒的蝦肉打成，蝦味雖不算濃烈，口感還不錯﹗
友人還叫了魚頭、魚骹等食物，我唔食魚梗係唔理啦﹗我處理的燒墨魚，燒得唔錯呱，少少燶是很難避免的﹗哈﹗
刀叉切開齊分享，睇下幾厚肉，滿足﹗

大眼雞以為要燒好耐，反而仲快過鮑魚﹗

即日街市貨，夠大條魚味亦濃﹗

半殼生蠔﹗蠔海水味極濃，不吃慣的我覺得腥腥地﹗

整體來說食物不錯，只要多叫新鮮食物，準是不會失望的﹗

飲左十幾廿支啤酒，埋單每人$300，不便宜，不過幾好玩，如果有時間慢慢燒下吹下水飲下啤酒，這兒是好地方﹗

西貢松記車仔麵 (西貢)

周日又是行山日，同食家由北潭涌出發行入浪茄來回，24km﹗
路不難行，但行左成六個鐘成個人好似虛脫似的，一上小巴出西貢已瞓到成隻豬咁，又是搵食既時候﹗
上次食左海鮮唔太鍾意，今次又去試試其他野，到了小巴站旁的.....西貢松記車仔麵﹗
呢間野好多電視節目都介紹過，開業於1978年﹗
鋪位都幾大，茶記格局，燈火光鮮，不過要留意既係夜晚八點就收鋪，我地七點幾去到所餘的食物已不多﹗麵底$8一個﹗再加$4-$8的餸菜任擇﹗
食物選擇也不少了﹗
亦有0的招牌粉麵可以揀，$30有交易，價錢合理﹗買野食要自己出去揀餸，揀完之後就有人整好攞埋來座位俾你慢慢嘆﹗自己揀餸有樣好，就係見到邊樣賣相好就點邊樣﹗這是我的四餸麵，我點了魷魚、雞翼尖、墨魚丸及紫菜，再配上粗麵﹗
原本有個驚喜係呢度有得點我好想食既銀尖粉，點知又係因為就收鋪賣哂，慘呀﹗

麵底夠哂多，一個麵已是滿滿的，魷魚彈牙爽口無皂水味﹔雞翼尖一份竟然有成六七隻，夠哂多，鹵水入味﹔墨魚丸內有彈牙墨魚粒，口感足﹔最緊要一樣野係佢既紫菜，大餅得不得了，一箸麵配上紫菜味道更鮮美﹗

由於點得太多餸關係，試不出個湯底龍與鳳﹗食車仔麵，點會唔點炸魚皮，成碟上啦﹗薄身香脆，絕無走氣，雖魚味不太足夠，但蘸少少湯底同吃卜卜脆令人很受樂﹗食家要了招牌豬手牛筋腩麵﹗豬手炆得相當腍軟，咬落滿口膠質，醬汁入味，唔錯呢﹗牛筋食家大讚，腍得不得了，又綿又糯，入口不用咀嚼便像一陣風般溶化，配上的牛腩件牛味香濃，這個招牌餐值得一試﹗待應十分殷勤，拿著餐牌為我地介紹招牌菜﹗
呢杯凍鹹柑桔就係佢介紹，飲落很順喉，味道適中，喝完喉頭舒暢呢﹗埋單$90，飽飽的滿足﹗車仔麵來說雖無咩特別食材，不過整體也令人滿意，特別係食家那豬手及牛筋，值得一試呢﹗
原來松記條街入面勁多野食，下次再行完山可以再試多0的新野﹗

食店地址: http://hk.myblog.yahoo.com/smallsmalllin/article?mid=23536

我的飲食微博: http://t.sina.com.cn/smallsmalllin

和幸吧 (尖沙咀)

一年一度的情人節，這已是我同食家的第四個情人節了﹗
今次挑選了尖沙咀赫德道的和幸吧﹗

沒有什麼原因，就是因為她有露天座位，可以炭爐燒烤﹗

情人節邊到有得你揀，咪就係情人節套餐﹗
食物種類都有十種八種，勝在款多咩都可以試下，岩哂貪新鮮的我倆﹗

裝修得很不錯，以吃燒烤為主，食店以木作主調，室內大廳中有個超大的圓形吧枱，以電爐作燒烤﹗而露台則有五六張露天座位可以炭火燒烤﹗
我都好醒架喇，早左成個月已經訂定室外座位，炭火燒點都過癮點吧﹗室外為的就是棕櫚炭﹗
火夠哂猛，食物放在網上烤一陣就熟喇﹗咁開心既日子點可以唔飲酒？
點了神之河燒酌，比較淡身易入口，加冰飲多兩杯真係飲醉都唔知﹗情人節快樂﹗
為我們的第四個情人節飲杯﹗先來的是刺身拼盤，有牡丹蝦、三文魚及油甘魚﹗
蝦相當大隻，肉質既綿又鮮甜﹗正﹗
三文魚同油甘魚都新鮮厚切，食家話很不錯﹗再來一個和幸沙律，賣相幾有特色呢﹗
生菜底，上面的鹹餅乾，配上蕃茄及芝士。
芝士夠香、餅乾鹹脆、蕃茄酸甜，灑上沙律醋，味道配答相當適宜，清新之選﹗車海老酢物﹗
幾隻蝦加青瓜及酢紫菜，開胃菜，無咩特別﹗鹿兒島和牛﹗
肉質鮮紅，油花有如雲石般清晰，兩面係咁易燒下佢，牛油味出眾，質地軟熟，好吃﹗燒肉盛合，有三種，牛舌，牛五花肉，仲有雞腿肉﹗
特選薄切牛舌，我一向都唔食牛舌，今次試一試，印象難忘﹗
薄切關係不會太韌卻有嚼感帶牛香，幾得意喎﹗

呢個牛五花肉，真的乖乖不得了﹗
豬既五花腩就成日食，牛既真係第一次試﹗
由於夠哂肥美既關係，油脂香同牛味超濃，烤到有少少焦焦地，超香口，同食家都覺得佢仲好食過和牛﹗

雞腿肉﹗
普通野，不過佢用果汁來醃，我覺得甜甜地幾好味﹗

放在炭上慢慢烤焦，慢慢玩﹗
呢餐食左成兩個幾鐘﹗哈﹗牛油帆立貝及愛情豚﹗

愛情豚，佢話係送既，我同食家都話唔洗錢就話送o即﹗
愛情豚是日本豚肉，上網睇佢話原來係一個人照顧一隻豬，又有醫生睇住佢，對隻豬百般呵護，對佢好有感情，所以叫做愛情豬喎﹗
烤燒後夠肉香，豬味雖重卻不羶，加少少佢提供既蒜蓉好味道﹗

呢度服務唔錯喎﹗
待應生都好有禮貌，不時主動埋黎幫手，又主動幫我地影合照，仲要影得幾好無手震添﹗
食食下又幫我地換下網換下炭，又加酒又加冰，俾個五分佢﹗
換左炭，火力強勁了很多﹗即刻燒番片和牛先﹗

銀鱈魚，普通野，不提也罷﹗食家話幾滑﹗

帆立貝又食得喇，牛油味濃，雖是雪藏貨卻香甜﹗廣島蠔鍋﹗
室外凍凍地，整番個麵豉湯底既蠔鍋湯，成身暖哂﹗
入面有冬菇、大白菜、大蔥及椰菜等，再有四隻蠔，簡單得來卻算暖胃窩心，成鍋當然清哂啦﹗最後甜品是格仔餅雪糕，唔會太甜，岩哂我﹗
甜甜蜜蜜作結﹗

因飲酒關係埋單千二蚊，情人節出街食飯就一定貴架喇﹗
不過呢個餐多種類，每樣食物味道亦不錯，炭燒點都會覺得特別溫暖，難得今日又轉涼得9度，感覺特別開心﹗
價錢比盛八及伊呂波平，露台燒烤亦有特色，會再來的﹗前年送花比食家，佢話最憎大到好似成棵樹似的，今次花店醒目，幫我包得細束的又清0的，感覺幾好喎﹗想知邊間花店出品就pm我啦﹗哈﹗
情人節快樂，願每年也如此這樣的簡單快樂﹗

更多相: http://hk.myblog.yahoo.com/smallsmalllin/article?mid=23293

我的無聊微博: http://t.sina.com.cn/smallsmalllin