魚一丁刺身居酒屋(九龍灣)

與友人難得一聚當然相約食個飯，地點在九龍灣的魚一丁。

八點幾來到，人客很少，大部份座位均是吉的，難道平日的夜晚德福就是如此？

兩個懶人看一看餐牌，最後決定都係懶得諗，點個二人餐便算﹗

先來的是三式刺身，刺身有三文魚、甜蝦及帶子，三文魚油份足，食落味帶脂香﹔帶子鮮甜爽口腍滑﹔甜蝦味道則較淡，不及另外兩樣好吃。

之後是海膽芝士豆腐，兩條大鄉里見待應放低仲心諗佢有冇俾錯食物我地，明明係豆腐點解一個二人餐得小小半件？
左諗右諗下原來係弱智的誤會，海膽芝士豆腐其實是那半件芝士的稱謂，是用來塗上多士來吃，同我地兩個心諗有件豆腐食真係差天共地，芝士入口有海膽甘香，味道濃郁而creamy，很滿意，找到未試過又好味的食物最令人高興。

再來的有天婦羅一客，有兩件蝦及茄子，佢一上枱我地已經即食，可惜咬落已凍，應是炸起後已放了一段時間，不是即點即炸，失望的天婦羅。

接著是牛油元貝，很大粒一開四，以小爐佐著慢燒，味道鮮甜，可惜我地燒得太久比較韌，建議略見元貝變色便吃一定更好味﹗

熱盤是芝士土豆雞塊，面頭淋的是燒汁，入口惹味開胃，雞肉都幾多質感嫩口，先經炸過食落皮脆更香口，伴以芝士燒汁同吃真的相當美味，二人都說好吃不過又叫好肥，可惜叫完好肥又後都係繼續夾，夾到碟面朝天方罷兵，這叫人「一世物一世食左先算」。

來多個稻庭烏冬作結，烏冬口感不煙韌卻細滑，湯底醬油味濃，夠味好吃。

最後甜品是芝麻雪糕，未算細滑卻尚算香濃，收貨。

整體來說對這個$360的二人餐很滿意，大家也給了一個good字，那就給她高分一點吧﹗

鴻發家庭小菜(太子)

睇完2012，老友相約食鴻發，就飛的到來開餐。

星期日假期，天寒地凍又落雨，人客不多，只在門外有一枱客在打邊爐，我地就像包場似的坐在鋪內。

凍冰冰當然來個鍋暖暖身，要了豬骨煲，份量超大，就像將成隻豬既豬骨都堆哂落去一樣，入面仲有大量粟米、蘿蔔等，湯頭夠味甜美，豬骨肉多腍香油脂豐腴，超正抵食，有個煲放在中間，即時成身暖哂﹗

簡單的要了荷蘭豆炒魚餅，食家一向不吃青色豆類，也夾完又夾，炒得乾身新鮮爽脆，好耐無吃過荷蘭豆的我真係食到唔停口，很有家庭風味。

韮菜花鮮魷是每次必叫食物，我愛韮菜花的濃烈青蔥香，鮮魷彈牙，蒜蓉下得恰到好處。

薑酒煮雞第一次食，上枱未吃先嗅到濃烈酒香，雞肉嫩滑醬汁入味，薑味做得不辣而清新，食家大讚，叫飯的話一定撈埋個汁﹗

雖然我已經打左兩日邊爐，不過都唔爭在叫老闆整多碟肥牛來繼續邊爐生涯，肥牛雖不是什麼靚貨不過瘦肉與肥肉在八二之比還可接受，有個爐又豈可無肥牛呢？

最後當然係要埋呢度最好食既蒜蓉炒飯，飯炒得乾身粒粒渾圓企身，蒜蓉味香濃鑊氣十足，至愛﹗

老友識呢度老闆兼大廚，又知我係小連，就同我地講最近「飲食男女」來了這兒做訪問，並應該會於下一兩期出街，相信到時又有不少食客冒名而來，到時我地來吃可能要排隊。

佢亦話之前我放了呢間食店既相同食評上網，都有好多後生仔女來試來吃，講真，不求什麼裝修格調，亦接受得到地踎街坊感覺吃飯的話，呢度既食物確值五分，價錢亦都又平又公道，呢晚我地五個人食左咁多野再加多五支大啤，埋單都係$400有找，絕對超值。

噴泉咖啡屋(尖沙咀)

周日當然閒情，同食家去華懋買飛睇2012，仲有成個鐘先開場，就來最就近的噴泉咖啡屋食個tea先﹗

毛毛細雨，坐在有傘子張開的露天位，落雨也不怕，唔知落雪怕不怕。

上星期同友人在隔離的酒吧飲完，細看這間噴泉咖啡屋的餐牌，價錢同對面差不多一樣，happy hour都係買一送一，就要了兩杯hoegarrden﹗

成4:00pm午餐都未食，食家點了火腿芝士水泡包，而我就要了隻大熱狗。

水泡包Bagel我咁大個人都係第一次食，麵包外皮烤得硬脆，裡面的麵粉味濃郁，質地煙韌，紮實帶有嚼勁，配以芝士及蕃茄同吃，好食﹗

熱狗包身鬆軟，熱狗腸香脆多汁，個汁醒胃香濃，也不錯﹗

在店內係咁影下相，吹下水，睇下雜誌，不知不覺就夠鐘睇戲。

2012超級好睇，不過下次睇戲前都係唔好飲啤酒，搞到成場走出走入幾次去廁所，錯過不了美妙鏡頭，這是敗筆。

大家樂(北角)

周六吃好一點，要了個大家樂超大早餐﹗

早餐包雞扒一塊、蘿蔔羔、餐肉兩片，仲有牛腩米粉一大碗。

雞扒佢話係楓葉蜜糖雞扒，楓葉既感覺我就唔多食到，不過雞扒外皮煎得脆口乾身，亦有濃烈蜜糖香，比起之前個皮又肥又軟的確是好很多。

蘿蔔糕及餐肉都是普通貨色，不評也罷﹔反而個牛腩米湯底做得幾濃郁，腩汁味香，不確的配搭。

加埋杯咖啡都係24蚊，抵吃，相當飽肚，足可應付地盤的半天辛勞工作。

泰興泰國菜館(觀塘)

周六收工閒來無事，相約老友食個lunch傾下計，走到街市熟食中心睇下有咩好野食﹗

2:30pm來到，大部份檔口都收哂落場，見到呢間泰菜依然燈火通明，就走來試下﹗

雖位處街市，但小店格局的泰興望落都幾四正整齊，座位擺切井井有條，我地一坐下老闆就一人俾左杯檸檬冰我地飲﹗(後來睇餐牌見到原來叫野食就有飲品送，可以選龍眼冰或檸檬冰)

睇睇餐牌所有食物均相當便宜，我地點了泰式生蝦($45)，炒雜菜($25)及三式串燒($30)再加多兩支獅威。

食物全部即叫即做，泰式生蝦$45有成十隻相當抵食，蝦身睇落雖未算晶瑩剔透，不過食落仍爽口新鮮，蝦身軟糯綿綿，蘸少少佢個泰式辣汁相當惹味，辣度足吊出鮮味，好吃﹗

馬介休炒雜菜份量足，除了大路的蔬菜外還有秀珍菇等菌類，足料﹗

沙爹串燒有雞、牛、豬各兩串，只係$30有6串圍起都係$5串，街邊食都唔止呢個價﹗
火喉燒得恰到好處，咬落仍有肉汁不會過老過乾，醃肉過程足，食物入味，不用蘸醬也可以﹔其沙爹醬汁有濃烈花生香，味道不錯﹗

埋單$120，三個餸，作為lunch已經相當豐富，估不到官塘街市有如此好味抵食小店，下次一於帶埋老豆來開餐先﹗

豆腐主義(荃灣)

不經不覺第一千篇食評，值得記念，當然有食家在場，就寫與她一起鬧爆的一間豆腐專門店。

周六收工在荃灣，知道食家愛吃豆腐荃灣又有呢間豆腐專門店，就帶佢去試下。

店子裝修新穎，牆上貼滿鏡子增加其空間感，可惜一入門口第一個感覺就已失敗，就係招呼的待應全是粗聲粗氣帶國內口音的姐姐。

8:30pm來到，阿姐姐話佢地9:00pm就關門，叫我地快0的叫野食，唔係就無，我心諗你咁趕就不如落半閘唔俾我地入來吧，都未坐低餐牌又未睇點叫野食，唔洗咁趕嘛？

全部野食都已豆腐作重心，見有幾款都幾得意就試下，點知問左三四款阿姐姐都話就收工所以賣哂，其實都係煎豆腐吧，煎多兩件唔洗死嘛？

咁最後就問佢有咩食，阿姐就介紹左話有紅菜頭豆腐同埋生菜魚肉豆腐羹。

同食家心中有氣，本來諗住來吃晚飯的點知阿姐又催三催四，食都食得唔安樂，不過一場來到就試下呢兩樣吃過就算﹗

紅菜頭豆腐是帶紅色的煎釀豆腐，豆腐下已經是吸油紙，亦都濕到爛咁濟，可惜豆腐仍不停標0的油出來，食家一咬仲有油從豆腐中溢出，射到一枱都係，嚇到佢掉到掉唔切，油不用錢嗎？還是由朝煎到晚的賣剩貨最後幾件﹗？

味道帶點點紅菜頭的草腥味，全無豆味實淨不滑溜，四件我地只係吃了件半就收手了﹗

生菜魚肉豆腐羹更令人不寒而慄，湯是凍的，湯頭是一陣麻油味，不是麻油味是根本就係麻油，油腍腍的俾我感覺就係清水加大量麻油了事，湯凍，豆腐又係凍，是旦搵件豆腐切幾片就放入生菜魚肉湯就係話係咩生菜魚肉豆腐羹，有冇搞錯？

豆腐與魚肉湯完全無關係，味道不融和有格硬o黎之嫌，差差差﹗

一人吃了一啖就走人，好在我地諗住去豬骨張打邊爐，唔係老遠走來呢度試食豆腐一定激死，這生也不會再來﹗

Billy Boozer(九龍塘)

友人話八點半放學，好心的我倆準時來到學校門口等候，點知來到先話未走得，即係難為了家嫂，只有走到Billy Boozer飲住等啦﹗

又有幾個月無來，呢度格局依舊，happy hour一杯嘉士伯生啤只係$26，我估其他地方都未必搵到咁抵了﹗

這兒是大學時期差不多每天都到的地方，又估到呢頭住宅偏少，酒吧人流卻不少，我地由8:30坐到10:00，顧客都出出入入如車水馬龍，又有國內朋友又有外國人，唔通0個0的係交流生？

叫左個椒鹽魷魚鬚做小食，魷魚鬚爽口卻味道偏淡，魷魚上的炸蒜是上碟後加的，未夠惹味。

Nara Thai Restaurant & Bar(尖沙咀)

收工無野做，老友話不如出來飲杯野，地點就選左呢一間﹗

第一次來，這兒是一泰國菜食店，門外有露天坐位作酒吧。

為了等埋另一友人放學一齊食飯，一人order一杯，happy hr買一送一，計埋加一一杯大約都係40蚊左右，相當抵飲﹗

我點了健力士生啤，友人就要了hoegaarden，價錢一樣。

這兒環境不錯，入冬後天氣涼快，微風吹送令人精神爽利，收工坐o下飲番杯，是偷得浮生幾小時的悠閒。

想說的是見到對面食客order的泰國野食味道相當香，搞到我地都望到流哂口水，有機會一於來呢度試o下先﹗

澳門豬骨張(荃灣)

天氣越來越凍，夜晚得番15度，又係時間提提我地要去.......
荃灣古坑道既澳門豬骨張，每年都必去一次，當然有深層意義﹗

今次見到佢門口貼於逢星期三跑馬休息，真係賭馬大過天﹗

點餸紙依然係呢張，引人無限回憶。

吃番上年覺得超好味的蕃茄薯仔牛腩煲，老闆阿姐走來同我地SOCIAL，我話我地兩個每年都來食一次，佢就話認得我地.......真識做﹗哈哈﹗

雖然地點是在街邊，不過我一0的都唔覺得凍，因為......
有個炭爐真係爭好遠，我直頭熱到想除衫﹗

能在香港可以找到用炭爐打邊爐的地方已不多，呢間是我最喜愛的﹗

唔係我偏愛，我同食家敢講呢度既湯底是全香港最好的﹗
湯底有大量牛腩粒、蕃茄、菜、薯仔及藥材等﹗
不用叫肥牛及太多配料，就呢個湯底已經可以食飽人﹗

老闆娘話邊爐唔洗咁快打住，最緊要飲左個湯先﹗
湯頭鮮甜得不得了，滿口牛腩濃香，估不到蕃茄同牛呢個配搭可以如此出眾，同食家兩個人飲了大半鍋﹗

牛腩惹味香濃，帶五香味及超重牛味，入口香甜得不得了﹗不用蘸醬汁已一百分﹗

認親認戚總有著數，老闆娘話見我地一年來幫趁一次私人送0的鮮炸魚皮及雲耳我地食﹗

呢度既竹笙不是白雲雲的漂染貨，用來吸湯吃又爽又脆是最佳的選擇。

墨魚滑一定要試﹗
師傅話佢地每日新鮮手打。
入口彈牙，墨魚味濃得不得了，勁多墨魚粒口感十足過癮，超好味﹗

兩個人係咁飲湯，食入面0的牛腩同菜，吃兩樣配菜已飽得不得了，來這兒打邊爐準沒錯﹗

埋單300蚊有找，又飽又滿足又暖洋洋，我同食家說要每年都來一次啊﹗

更多相:
http://hk.myblog.yahoo.com/smallsmalllin/article?mid=18523

咖喱至尊餐廳小廚(沙田)

抵食既野永遠都會記得，其中一間我覺得相當抵食又好味的就係咖哩至尊。

地點在河畔花園的一間小餐廳，坐位不多亦比較迫狹，不過勝在抵食夾大件，食客不絕。

每隔幾個月就會想起呢度，當然就係叫番我覺得超正既$76二人餐。

包一款咖哩，一個小菜，仲有白飯同湯及甜品，一人都係三十幾蚊﹗

咖哩要了咖哩雞，相當大碗，有如相中所見，大雞胸肉有成四五件，抵食到爆，雞肉雖未算滑溜不過肉多而結實好送飯﹔雖然要左中辣，不過都係唔多夠辣，味香而鮮，我最鍾意就係咖哩撈飯，一個人可以食兩大碗。

小菜要了簡單的通菜炒牛肉，牛肉口感嫩而不o鞋，食飯都係有條菜較為健康。

四十蚊就食到，邊到搵？

佳餚坊(觀塘)

一條友在官塘，再來呢間佳餚坊食飯﹗

點了個韮菜炒鮮魷套餐，包白飯一個及例湯一碗。

買完野食搵位坐，食物做起之後有阿姐親自送埋枱，服務抵讚﹗

例湯是冬瓜湯，味淡得很有如飲水，不飲也罷﹗早知叫餐飲更好﹗

韮菜炒鮮魷相當香，一上枱已經閒到陣陣香蒜味，鮮魷份量都不少，鑊氣十足，配飯同吃一流﹗

要說這兒的食物偏油了一點，吃完之後碟底滿是油，是好吃不過如果可以少油健康一點會更好，食客亦都食得放心了吧﹗

大家樂(沙田)

冬風起，一日跌成十幾度，最好就係去打邊爐﹗
一個人，最簡單就係一人一爐，上次試左吉野家的，今晚就試下大家樂既一人一爐火鍋﹗

特級雪花肥牛雜錦鍋$54﹗
呢0的一人一爐最怕就係食到吊喉吊肺，所以我再加多$18要特級雪花肥牛﹗
野食方面都算幾豐富，有三條芝士腸，一條墨魚仔﹗

一支可以開到四至五粒蝦丸既蝦滑﹗

手打豬肉丸三粒﹗

湯底要要豬骨湯，味道甚淡﹗

食物下層是大量蔬菜，冬菇，粟米，腐皮餃，仲有一個烏冬﹗

多菜我鍾意，好健康﹗

肥牛紋理不錯，肥瘦均稱，一定比起吉野家的六肥四瘦好很多﹗

味道就牛味尚算美味，不過就唔細滑同韌少少，不過不失啦快餐店來說﹗

開餐﹗飲品方面加左$6飲酸梅湯，唔錯﹗

不要要求太高，其實我覺得呢0的快餐店既一人一鍋都幾方便同埋出色，亦比幾年前吃到的進步不少﹗

至少一個人也可以來玩下，幾十蚊過下邊爐癮﹗

一路食一路睇我最近追緊既三國演義電視版，一樂也﹗

愛討論，來呢度:
http://www.discuss.com.hk/viewthread.php?tid=10982860

小廚之味 (銅鑼灣)

無端端要出銅鑼灣鑽地，鑽完之後身水身汗就到左呢間食lunch﹗

原來已經2:30pm，就叫較便宜的下午茶﹗

我點了海鮮炒烏冬，同工就要左吉列豬扒蕃茄米線。

海鮮炒烏冬用料不少，有蟹柳、日式魚旦、魷魚、細蜆及青口仔，再配以椰菜及雜豆，雖然食落比較油膩不過醬油夠味亦惹味，烏冬雖不是貴價貨但有咬口亦帶煙韌，唔錯﹗

同工也讚蕃茄米線的湯底濃郁出色，豬扒熱辣辣亦香脆有肉汁﹗

羽壽司(藍田)

試過官塘新開的羽壽司，喜見原來藍田都有，當然又入去試下﹗

中午時份，點左個最平既烏冬餐配壽司，飲品加多杯coffee﹗

刺身沒有官塘的新鮮，色水不夠潤澤，壽司飯也比較爛唔夠粘。

牛肉烏冬湯底味道濃郁，牛肉雖然不多也不是勁肥貨色，收貨了吧﹗

整體來說還是官塘新開的比較做得有心機，反而藍田呢間開左比較耐的要增值下喇﹗在吧枱上仲見到壽司師傅互相嬉戲，爭0的0的﹗

大家食(旺角)

工友食評

食到令我上癮的大家食，次次都係食茄蛋牛肉上海粗，貪佢味夠濃夠香，依家好左一個最愛，就是十三定唔知十八會，樣樣嘢有一兩粒，0岩哂貪心的人!

當中的魚腐最有驚喜，超大舊，又入味