呢間之前係美麗華商場時都巴巴閉閉的，老闆係葡萄牙十幾年，煑得一手巧手葡菜，菜色很多，甜品也很出色，在美麗華商場時已有一班擁躉，不用過大海都可食到好味又道地的葡國菜，不過前年敵不過疫情結業了，三月中我發現它在尖沙咀一個比較偏的街道重開了，但店舖細了很多，衹能說變了一間小店，氣氛都有點變了，不過牆上裝修仍是富有葡萄牙色彩，大大個老闆的畫像在牆上。 講番今日來食午餐，比起上個月，多左牛扒可以揀，先來餐湯(也可選擇沙律)，今日是牛尾湯，濃濃番茄底，少少牛尾肉，湯亦少少辣，餐前飲好開胃 😋 主菜叫左一個「 葡式燒牛扒飯」和「 傳統葡國雞飯」，午餐劃一 $98 + 10%，有野飲，牛扒似薄西冷，算是燒得嫰和香，不過另一塊就燒得燶d，葡國雞汁好濃，吾係椰香味，係香料味。我加 $20 要左一個檸檬蛋糕，鬆軟檸檬味香 😗， 揾次會來試下晚餐

冇去朗豪坊一段日子，又有一批餐廳改頭換面了，我諗有一段時間可以來試下菜了。 Good Day 名字改得好，我地真係需要 Good Day 🤠 呢間餐廳算寬敞，服務員多是年輕人，所以客人 8 成以上都是年輕人 ☺️ 叫左兩款 set lunch 同一款甜品： ▶️ 日本櫻花蝦飛魚籽忌簾汁意粉 $128 不過不失，不算出色 ▶️ (素) 烤珍寶磨菇牛油果芝士漢堡配薯條及沙律 $118 呢個有驚喜，配合味道好夾，第一次食素漢堡，無違和感，薯條新鮮連皮炸，夠特別 ▶️ 風味焦糖脆脆爆谷窩夫配雪糕 $78 從賣相到口味都值得讚，推!

食左多年大快活，由早餐，午餐，下午茶至晚餐都有吃，雖不是美味食物，但也是打工仔的快餐選擇之一。 今晚由於見到有減 $5 優惠，便叫了兩款泰滋味套餐試下，分別是 「泰式香矛鴛鴦扒飯」和 「青咖哩豬頸肉飯」，兩個套餐都是跟一杯菠蘿椰汁特飲和甜品芒果糯米飯。但整個餐來到真係覺得有點不知所謂，鴛鴦扒極細塊，賣相怪怪的，豬扒乾到一個點! 青咖哩衹係綠色的液體，沒有咖哩味，粗條的豬頸肉，整體像吃兩餸飯，但味道比兩餸飯還要差! 菠蘿椰汁特飲沒菠蘿味，基本上甜味都沒有，椰汁味有少少，都吾知飲緊杯乜野! 芒果糯米飯有賣相，味道還可，芒果比較差! 今晚第一次來呢間新開的分店，吃了一餐太難吃的食物，其實好難想像做飲食的，點樣煮 d 甘難食既野出來，如果吾識煑泰國嘢，不如吾好搞？專心做好本身的食物， 咁先對得住啲消費者 !

晚餐食過幾次，今日第一次來下午茶，見到泰式船麵 $44 連一杯飲品，都幾抵吖 😋 我叫咗一碗生牛肉河粉 ， 可以選擇清湯或牛肉湯， 我就揀咗牛肉湯， 味濃啲。來到既時候見到 d 河粉好似好少甘，但牛肉竟然有六大片 😲 仲係有牛肉鮮味個 d，飲啖湯，果然牛肉味都濃，勁似係泰國食緊，初時以為河粉甘少，會吾夠飽，點知食完好飽，可能係食左六片生牛肉卦 😆 最後飲埋杯泰式奶茶，奶和茶配合適宜，當然甜度是略甜的，但泰式就是甜，幸好茶味也濃，飲完更滿足了 😘

香港的冬天雖然不算很凍，十零度都已有少少氣氛，去食蛇羹、羊腩煲、火鍋等，特別有 feel 🥰 今次去了西營盤一間很多好評的蛇羹店，距離地鐵站一分鐘腳程，當時衹是晚上六點左右，小小的店舖已經坐滿了人，我們 4 個人等了 20 分鐘終於可以進店了，其間店員很親切，盡力幫我們安排坐桌，很貼心 🫶 我們叫了大蛇羹，雙腸糯米飯，原來店內還有秘製浸鷄，咖哩牛腩，味道都有驚喜 😋 食評如下： 招牌蛇羹 (大) $88 古法炮製，滿滿的料，味道好味吾在講，條條長長的蛇絲，足證真材實料 雙腸糯米飯 $46 糯米飯雖然不是生炒，仍是很香很軟綿，潤腸+臘腸不算肥膩，不過為了留肚試其他的食物，我衹每款試了一口 秘製浸鷄半隻 $85 賣相已看出鷄肉嫩滑，食落好有鷄味，推介大家試下 咖哩牛腩例牌 $110 比較港式的制作，咖哩味香濃，牛腩炆得好稔亦入味，薯仔都一樣，最後當然全碟都食曬 😆

一間可遇不可求，既破格又創新的糖水店，位置別樹一角，出品既糖水都別樹一格。時常路經都吾一定碰啱佢開門，門外亦冇營業時間，真係要食都要講緣份 😆 除左糖水，店內都有供應一些傳統小食，如菜乾豬骨粥，狗仔粉等，但最玩野係燒賣(看圖片)和腸粉，最近新作「凍檸茶炒腸粉」，我未試，聽講味道不錯 ☺️ 今晚專程來都係食糖水，吾敢試佢既「蒜茸麻辣蕃薯」，叫左「芒果超級撈」，勁多生果同芋圓藏在芒果蓉內，啱曬芒果控 🥭 另一款都算新作 「焦糖爆谷楊枝甘露」，爆谷勁脆，靚仔哥哥話因為「當造」喎 😜 真搞笑! 楊枝甘露有層次，椰奶漿，大西米，芒果肉，西柚肉，大滿足 🤤

公司同事聚餐，揀左呢間中菜館，聽講餸菜夠鑊氣，湯都好好飲 #馳名鳳梨生炒骨 #涼瓜枝竹炆龍躉腩 #濃湯帶子蒜子浸蛙娃菜 #蠔油菜遠炒生牛肉 #瑤柱蛋白炒飯 #輝哥煎咸鷄 #薑葱煲 #椒鹽鮮魷 整體食物質素和服務都有 ✴️✴️✴️✴️ ，唯獨環境比較狹窄，枱與枱之間距離比較近，其他都值得推介 👍

之前係呢度買過兩次便堂外賣，覺得味道不錯，每次等的時候都見到好多人入去食拉麵，見到都多款選擇，心諗要揾日來試下，終於這天來到了，揀了下午不算多人的時間來，五點幾，都坐滿了六成。 原來佢出名係沾麵，見到d 叉燒都好似幾靚，叫左 「神山炙燒叉燒沾汁麵」和「神山豚角沾汁麵」 。 麵送到來賣相都不錯，炙燒了的叉燒香氣撲鼻，可惜呷了一口湯，發覺湯頭冇咩特別，好像濃湯煑開了水，沒有鮮味，再吃一口拉麵，麵質不彈牙，吃了一半感覺真係一般，可能抱著期望而來，結果失望而回，應該不會再來了。

曾經係灣仔好受歡迎既兩間擁有幾十年資歷既 「快樂餅店」和「順景茶餐廳」係去年敵吾過疫情而結束營業，好彩今年有心人將佢地兩個拉埋一起，聯乘成為「快樂•順景Happy Cafe」，今日我去左試下，叫左份「全日早餐」，佢有一個迷你菠蘿包，好扎實又熱辣辣，塊魚柳又大塊，炒蛋加左黑松露同蘑菇，仲有粟米，沙律菜，火腿和長腸，$62 真係好抵食 😋 杯凍檸茶好有茶味，聽聞最出名係茶走，下次一定要試下，行過都可以買門口 d 懷舊麵包架 🍞🥨🥯

呢間酒樓已很多年，裡面環境裝修都很舊，昨晚晚飯超多人，全埸爆滿，可能出了消費券的關係，見很多枱都叫了名貴海鮮。 我們三個人叫了一個八寶海鮮冬瓜盅 $168 (冬瓜好多肉，海鮮料好少)，一個片皮鴨 $88 （片皮鴨不算肥，少少鴨香)，一個上湯龍蝦伊麵 +金銀蛋上湯勝瓜 $218。(是晚飯孖寶，勝瓜上湯不太咸，可以當湯飲埋，但個龍蝦伊麵遲遲未來，食哂其他食物又催左幾次，都仲話做緊，最後來左，龍蝦有油泡過特別香口，不算細隻啖啖肉，伊麵入味仲係彈口的) 雖然呢餐吾算貴，不過d 服務員做到發脾氣，又叫都應，應你d 語氣都勁差，家人都話吾會再來幫襯 😮‍💨