一直都偏愛去搵無麩質嘅蛋糕嚟食，食完唔會肚脹脹，但係市面上都得返唔係好多間容易買到。聽聞呢間InfinitiC今日係最後一日堂食，特登慕名而來食吓佢嘅切餅。之前食過幾次都覺得，佢嘅味道係甚至比有麩質嘅蛋糕更好食。可惜每次食完一間，嗰間就執笠，例如西環、海港城、K11Musea店，而家已經執剩呢間中環店，今日之後都冇了。🥺 未來要轉做網上訂購，要預先訂貨，就唔係咁容易食到了。 巴斯克檸檬芝士蛋糕 + 熱黑朱古力 (Keto version) 而家潮流興食巴斯克芝士蛋糕，呢間都出咗，個芝士蛋糕做到軟滑軟心效果，甜度點到即止，亦都唔會有好臭嘅芝士味。上面嘅檸檬醬簡直係畫龍點睛，增加咗清新嘅感覺。市面嘅巴斯克芝士蛋糕切餅都偏細件，但係呢間份量夠大。簡直係相逢恨晚 購買一杯飲品就可以半價買sliced cake 🍰 。呢度嘅飲品可以加$5轉Keto version。出面好多Cafe轉用植物奶都只係得豆奶同燕麥奶可選擇，但呢度係用杏仁奶實在太好了，真係好適合生酮人士。 希望未來佢會再出堂食啦，到時一定會支持

有朋友推介呢間餅店嘅蛋撻，今日行經附近決定來試試，去到門口先發現唔係普通港式蛋撻，而係叫做布甸蛋撻，size有一件西式撻餅咁大。 布甸蛋撻 （$12） 首先去收銀處俾錢，之後去門口嘅蛋撻爐搵店員拎蛋撻。雖然唔係新鮮出爐，但係有用個暖爐去暖住，蛋撻放入紙袋內拎上手時候仲係熱熱地，好食啲 原來所謂嘅布甸蛋撻係一杯布甸咁嘅size嘅一個曲奇皮蛋撻。蛋撻中間嘅蛋唔係布甸味，比較實少少，似燉蛋甜品不過味道比較淡，唔係好甜。但對於鍾意食曲奇皮蛋撻嘅我嚟講我覺得係好食。個蛋撻嘅甜味似乎主要係來自燉蛋表面嘅糖漿。

好嚇人呀，我去拎外賣時偷聽到染髮細眼的女店員向另一位店員表示剛收到嘅外賣平台外賣訂單好xyz@&$! 話諗起上次又係有張order阻住佢收工，想摷返個xx嘅電話出來騷擾佢！

今日係Aeon會員95折日，我行Aeon超市行到夜晚接近8點去花斑茶社買杯飲品，去拎飲品時，聽到以上嘅對話……

焙茶鮮奶 （$36）
味道ok，好足料，仲飲到未溶晒嘅焙茶粉。不過飲完1個鐘後開始肚瀉……回想起唔通我有阻到人收工？ 利申：舖面寫9點閂門

其實成間舖頭貼滿某當紅偶像組合嘅應援，佢咁樣趕客法真係「fans行為偶像埋單」

一心諗住來買個本地檸檬🍋，順便食啲gelato做comfort food，果然冇白行一趟。 我鍾意呢度主張「本地耕作、不時不食」，Gelato都係用新鮮時令本地耕作嘅食材製作，每隔一段時期就會轉款式，總係會有驚喜。 今期係咩芫荽雪糕、咩菇雪糕等等，比較驚心😂 我都係揀返啲大路嘅😂 本地蕃石榴氈酒雪葩 （$58) 幫襯小店嘅好處係客人少少，店舖嘅製作特別用心。店員捧碟雪葩過來嘅時候特意介紹返，佢話係用本地嘅蕃石榴加蘇格蘭嘅氈酒整成嘅。雪葩嘅表面倒多咗啲氈酒而隻氈酒係用(唔記得咩)莓釀造嘅，所以有陣陣莓味。另外，雪葩表面加咗啲碎咗嘅檸檬、橙味糖，想模擬返番石榴一粒粒嘅口感。我留意到隻裝雪葩嘅碗仔都係雪凍咗嘅，令我打咗咁耐卡都未咁快溶味道都唔錯，食得出有蕃石榴肉 #支持小店

芝士燒雞扒溫泉蛋丼套餐（午市）（$65） 一碗硬冷飯 + 一塊仔炸雞扒 + 一塊芝士 + 一大pat美滋乃 + 少量中華沙律和蛋碎+ 一隻溫泉蛋 食醬佔居多，啲飯超硬，似係未煮熟，同埋啲飯係凍嘅。雞扒都係就咁用炸爐炸出嚟而唔係燒嘅。前菜有蒸蛋、沙律、麵豉湯，連一杯免費飲品（橙汁）或甜品（雪米糍一粒），都幾豐富，才$65另加一，以地區來講係幾抵食。 不過就唔好盼望會有咩Service，個較senior嘅女店員態度麻麻地，唔肯幫唔識掃碼落單嘅老人家顧客。 環境就幾好坐。

如果你唔係熟客，就唔好旨意幫襯呢類住宅區內嘅酒樓會食得順氣。 因為要趕住用埋之前食利苑夠$2000送嘅$200現金禮券，所以今日諗住來食少少嘢用埋佢。但估唔到呢度叫得利苑都做到咁肉酸，咁令人失望。 即片皮鴨半隻 （$230） 一坐低見到隔離檯食緊片皮鴨，所以我地跟風叫片皮鴨 可惜，即燒？是違反商品說明條例嗎？居然落單後幾分鐘就上到菜，仲快過我碟菜芯炒牛肉上菜。除咗籠餅皮係熱到有蒸汽出之外，碟片皮鴨係凍嘅，試問佢有可能係即燒嗎？我地叫得半隻，難道就係隔離檯食剩嗰半隻嗎？講返個鴨，半隻鴨切咗11塊皮出來，基本切成12塊是常識吧？味道方面，一啲片皮鴨嘅酥香味都冇，正中間嗰塊仲有好臭嘅羶味（常見於鴨屎忽嘅味道🤮） 籠餅皮都好離譜，總共12塊餅皮，但佢居然係4塊交疊成一層，合共三層，連蒸籠紙都咁慳皮？食開皮鴨嘅人都知，啲餅皮黏埋一齊係幾難搣開架啦，即使我去屋村酒樓同小店食嘅片皮鴨，都會係每一層餅皮用蒸籠紙隔住，唔會容許佢哋黏埋一齊。 片皮鴨嘅配料都好縮水，佢每束京蔥只用一粒辣椒仔箍住，但係得6束邊夠分？ 菜芯炒牛肉 ($150) 牛肉和菜芯都好乾，唔講以為食緊乾炒菜芯牛肉乾，連茶餐廳級數都不如。唯一值得可取之處係肯定佢係即叫即炒，因為係熱嘅，唔似得上述嘅凍片皮鴨。 而家利苑真係慳皮，每個牙籤套內得1支單頭牙籤。每個座位本身已經得1支牙籤，仲要一撩就斷咗。 我叫個遮遮俾過兩支我，佢行開咗之後冇咗回事。 包括部長，部份員工嘅態度都好有問題。我眼見佢哋好似好唔願意做咁。舖設新檯時，將每一隻碟垂直拍在枱面上，令碟敲在枱上，造成的噪音真係好難頂呢。

「扒王之王」呢個朵簡直係香港人嘅集體回憶，今日特登來試一試呢間新開張嘅老牌餐廳。 V.12 美國頂級安格斯西冷牛扒餐 ($148) 見佢寫開張致慶驚喜價，又限量每日30份，今日晚餐時段來都仲有quota剩，就試試佢 港式牛扒🥩，識食一定係鐵板上配黑椒汁。個汁可以選擇佢幫我淋，或者我自己淋。經理提示我哋舉起紙巾，然後佢幫我淋，太好了 我揀咗7成熟，佢嘅生熟度整得好適中。 薯菜方面，薯仔係幼薯條，吸咗黑椒汁就好食咗，不過略嫌有啲炸得太燶。睇餐牌介紹，薯條係用白色嘅真牛油來炸，成本比較成高。配菜就得少少粟米，有啲頹。 羅宋湯中規中矩合格，唔會係好稀好淡嗰隻。 煙火雞沙律都幾難食。啲沙律菜唔係好爽口，應該擺咗好耐。個沙律汁好似豉油味，好奇怪。啲煙火雞肉好濃防腐劑味。 今日上來呢度嘅經歷都幾令我印象深刻，首先係上來呢間餐廳一係要搭一部好窄嘅古舊lift，一係就要行樓梯經過一間夜總會上來，餐廳嘅上下層都是娛樂場所。第二係餐廳嘅裝潢同傢俬都好新淨，但餐具就頗為殘舊及款式唔同，懷疑係二手餐具。隻湯羹嘅柄特別短，第一次用咁短柄嘅西湯羹。同一張檯每個人把餐刀嘅形狀都唔同。 食緊途中有隻烏蠅飛來飛去好騷擾，同埋見到有隻小強喺水吧前面嘅櫃爬過。衛生方面要注意下了。 港式牛扒🥩就唔係為來食靚肉嘅，而係食佢個風味，要鐵板上、大大塊肉、多黑椒汁。來呢度唔好睇食物質素，有新裝修，又有卡位，環境都坐得幾舒服。

呢間人氣樓上Cafe，之前唔係為咗食生日飯呢啲重要日子，都唔會特登去食，因為好難book位，要提早去book。 近期居然收到SMS推廣，話銅鑼灣新開咗分店，經網上book位可以免費送小食，不過估唔到即日book位都竟然有位 海洋生物沙律 ($128) 比起一般樓上Cafe嘅沙律真係相對又足料又好食，有炸蝦🍤炸帶子火龍果紅桑莓藍莓🫐值得encore 吉列你隻牛 ($258) 一set有牛肉有沙律有飯，可以自己燒一燒牛肉去決定牛肉嘅生熟程度，夠晒玩味。可惜牛肉味偏淡，唔夠肥美，主要靠個吉列粉衣去掛燒汁來帶出味道。個火燒得好快，啲燃料好快用晒，可以叫侍應幫手換。 蜜糖芥末雞翼 (網上book位送) 炸得好香口嘅單骨雞翼再配埋一個辣辣地嘅蜜糖芥末汁，好唔錯。一碟得五隻單骨雞翼，餐牌內唔知有冇得點呢道菜。 而家唔係好多人食，所以坐得好舒服。味道保持一貫水準，如果容易book到位的話可以再encore

又來一間過江龍日本連鎖壽司店 網上預約就full晒㗎喇，但係晚上八點幾walk-in來排隊，唔指定卡位的話，大概十分鐘就入到座了。 新開就咁容易食到，點解嘅睇睇啲食物就知答案了。 多春魚籽軍艦 ($12) 平時食開飛魚籽軍艦，唔知多春魚籽係咪同一樣嘢。但賣相真係十分之差，中間好似俾人刮咗個窿咁，而且口感也很奇怪，似乎唔係咁新鮮。 (直接從運輸帶拎落嚟嘅樣) 炙燒芝士沙律醬玉子壽司 ($12) 同一碟內，兩塊玉子嘅厚度竟然可以爭咁遠，點切㗎好馬虎。玉子普通，但面頭啲醬最好味。 章魚燒 ($12) 呢樣壽司郎冇，所以要叫嚟試吓。呢個性價比較高，新鮮炸好，又夠飽肚，面頭啲醬同樣好味。咁嘅價錢都知唔係新鮮做而係用現成嘅拎去炸。炸物嚟講都算做得OK，表面脆口，裏面軟熟，熱辣辣，可以一試。 總括嚟講，我覺得呢間點都贏唔過壽司郎(香港分店)㗎喇，無論氣氛、食物、服務、衞生都有待改善。 我覺得比較有好感嘅係佢嘅壽司飯，壽司郎有時啲飯係熱嘅，但呢間嘅壽司飯係做得比較好食，店內寫係100%日本越光米，唔知有冇關係。 另外，唔想中伏嘅話，就嗌啲多醬嘅壽司就應該入得口。佢啲醬係幾好食

好耐未食過咁難食嘅河粉了。 今日遲咗去搵位食午飯，見到呢間繁忙時間仲有好多位剩，就唯有入去一試。 一坐低就俾杯水我，然後自己掃QR code落單。餐牌上都冇乜選擇，我點咗個鯪魚球湯河 ($48)，另外單點一份蠔油生菜 ($18) 鯪魚球湯河 ($48) + 蠔油生菜 ($18) 賣相一般。 湯底也一般，但冇乜味精味。我諗餐牌上寫「用心熬製每碗湯」唔係指湯粉麵嘅湯底吧。 鯪魚球一咬落去，舊鯪魚球嘅中心係凍嘅 河粉好厚，好粗，一點也不爽滑，也沒有米香味，唔似係每日新鮮製造嘅河粉。 冇得好似一般粉麵店有得加錢配油菜，唯有單點。但除咗蠔油好味之外，生菜是苦苦的。甚至有條咁嘅形狀嘅毛髮纏繞住其中一條生菜！ 由於冇乜客嘅關係，就算食完都可以坐喺度打躉，店員唔會話做啲小動作來趕你走。 如果想喺尖沙咀繁忙時間搵個位好好打躉但對食物要求唔高嘅話，可以考慮吓呢間。