因為有小食同飲品coupon先嚟，趁呢間舖頭仲喺度就用咗佢。 Fries+ chicken shack+fifty fifty 其實佢個包真係唔得，麵包係凍嘅，其實好多小店嘅burger都會幫你煎一煎個包，做到外脆內軟，所以呢度嘅麵包絕對係扣分。雞肉俾你揀雞胸定雞腿，我揀咗雞胸，唔「鞋」嘅，熱辣辣嘅雞胸配凍嘅麵包係好大對比，但雞胸配埋醬汁都好開胃好食，最鍾意就係嗰兩塊酸瓜。 而家好少地方有波浪薯條，一定唔係啱啱炸嘅，不過又未去到凍晒囉，都仲香脆。 Fifty fifty淡味嘅檸檬茶，頭嗰幾啖好甜，應該係啲Lemonade未撈勻。 最欣賞shake shack就係佢部洗手機😅

作為柴灣舊街坊，難得柴灣呢個美食沙漠有間咁有質素嘅咖啡小店，當然要支持。之前返嚟柴灣幾次都咁啱撞正冇開，呢日終於可以試喇。 叫咗杯flat white ，店員好有禮貌咁問係唔係prefer冇咁酸嘅咖啡。咖啡味好香，最鍾意夠thick嘅咖啡 。一邊欣賞柴灣公園啲花，一邊慢慢嘆杯啡，正 。 下次返嚟柴灣再幫襯！加油呀小店

行完南豐紗廠，見到裏面冇乜人（平日），又未試過，就支持吓。 一次過滿足晒三個願望：飲品加甜品set (+$48) 熱抹茶鮮奶：抹茶同牛奶嘅比例剛剛好，唔會比其中一邊dominate，呢個set最滿意就係呢杯抹茶鮮奶 。 抹茶雪糕配抹茶啫喱：雪糕同埋啫喱都係冇抹茶味！真失望，可以唔試！ 芝士蛋糕 ：普通出面都食到實實地嘅New York cheese cake, 但配咗杯抹茶鮮奶就perfect fit 。 通常啲過江龍食店都令人失望，但今次我覺得有啲驚喜，因為杯抹茶鮮奶真係好好飲

從社交平台素食group裏面知道呢間小店做到今個月月尾。（即係仲有幾日）咁啱今日嚟大埔就把握機會過嚟支持吓！

比想像中好，無論係食物同飲品😻


Impossible Burger with fries: impossible meat 一啲都唔乾，bagel 剛剛烘完，脆！仲有而家burger好少見嘅酸瓜 。bonus: 薯條本身冇鹽，如果想要額外嘅調味料係自己加，非常好👍🏼👍🏼


白汁蘑菇意粉：白汁濃得來唔會重口味，食落好creamy


flat white：雖然用燕麥奶，但依然滑，隻咖啡豆唔錯 。


最後我問店員佢哋會唔會搬去第二度？ （而唔係結業），佢哋暫時唔清楚。。。


希望有機會再幫襯啦，香港小店越來越少，唔想淨係有連鎖店

要咗熱豆花，原來本身已經已有糖漿，所以其實唔使額外加黃糖。（如果唔想太甜嘅話） 好滑，豆味都出，但又未至於去到山長水遠特登入嚟食豆花，所以去開呢頭嘅話可以試吓 。 欣賞佢堂食嘅話（其實冇得坐喺度，只係拎住個碗企喺出邊食），佢唔係用膠兜！

雖然地點格攝啲，喺荃灣行過去要行到仁濟醫院嗰邊，但都非常值得。希望香港多啲呢啲尊重食材，同埋用優質食材嘅食店/麵包店。呢度嘅食物食完唔會好似食其他連鎖店嘅麵包，個口有種唔舒服/唔自然嘅感覺、或者好咸，食得出係用天然材料，貴少少都值得。 整體上麵包、烘焙品都高質。反而想講啲比較普通或者可以唔試嘅食物😬 1) 綠茶撻：去咗幾次都發現賣晒、但有一次俾我見到就買咗嚟試，點知覺得綠茶味唔太出、紅豆就得兩粒（唔知係咪咁啱錯手少咗幾粒），比較奇怪。如果同嘉多X個綠茶麵包布丁比、我鍾意嗰個綠茶苦澀味多啲，因為濃好多。呢度我覺得原味布丁撻好食d，蛋味好香！ 2）朱古力咖啡scone: 咖啡味唔重，又係同嘉多x比嘅話, 我欣賞佢哋多啲。享樂嘅話綠茶同埋好有伯爵茶scone 好好多。 其他必試：bailey’s 蜜瓜包（比較甜，但裏面啲bailey’s cream好濃郁）、Bailey’s toast、綠茶同焙茶bagel (裏面有麻糬好有口感）、綠茶牛角包（裏面又有麻糬又有綠茶custard cream), 但呢個超級飽當做晚餐都可以。 店內有太多選擇，想試新嘢之餘又想食返之前食過好食嘅食物，所以每次入到去都有選擇困難症。 雖然係廢話，但大部份返去烘返熱會好食好多，例如Toast同埋撻。雖然店內非常繁忙，但店員都唔會嫌棄我自備盒裝麵包，阻到佢哋一啲時間，讚🙏🏼

平日下晝四點幾到，當然唔使等位。 芫茜肉餃加薯粉：可能加咗薯粉嘅關係，飲唔出椰子湯嘅味。薯粉冇乜味，亦唔係好掛到湯，口感太淋。芫茜餃子，好味嘅，但我覺得太濃味，而且偏鹹，食完好口渴。成晚要不停灌水。 唔使排隊嘅話，就試吓無妨。

行花墟，滿載而歸之際，想食啲嘢加去個廁所，太熱關係又唔想行好遠，呢個時候見到呢間舖頭，就入咗去啦。 星期日大約兩點唔太多人，即刻有位坐，坐低之後發覺同出面花墟嘅環境實在太大對比，呢度好靜，加上好有禪意嘅音樂，望出去有京都庭園嘅感覺，非常舒服。慨嘆太遲認識呢個地方。 呢度只提供素食，叫咗個紫米淮山糭，飲黑芝麻何首烏茶。糭入面有紫米、糯米、淮山、冬菇，清清地唔錯。 之後隔個禮拜又嚟花墟，今次唔知點解係咪個冷氣壞咗入邊非常熱，淨係開大個風扇同門口，所以就冇食到。

諗住喺bakehouse田買個蛋撻同杯啡做早餐，點知見到新嘢（其實可能唔係新，不過第一次見）Tiramisu Danish!! 就當然要試！ 作為一個Tiramisu fan, 覺得$52淨係食Tiramisu 嗰part到抵。mascarpone cheese夠thick又滑！而且咖啡味濃，加埋上面嗰幾粒好香口嘅nuts(唔好睇少呢幾粒nuts)有好豐富嘅口感, 但食埋底部嘅danish真係飽到lunch都唔駛食, 因為danish好實好多（可能要托住上面嘅tiramisu) ！好滿足。

成日行小西灣至大浪灣，之後肚餓嘅話都會嚟呢度食嘅，又或者掛住呢度嘅西多士都會行呢條短山路。 西多士好重蛋味，切開裏面都好「蛋」，軟綿綿，唔係度度都食到，當然要加晒成嚿牛油啦。雖然好邪惡，但呢個真係要試！ 泰式炒粉絲：如果你鍾意食芹菜，呢個就啱你，味道係特別嘅，不過我唔係特別鍾意食芹菜，所以覺得一般。另外，肉係雞肉。 菠蘿炒飯：炒飯都算乾身，香口嘅，不過感覺上比以前細碟咗，同埋少咗啲材料。 好彩平日佢都開！唔使驚冇西多食