四海一家(南山華僑城)

星期一從福永返到南山, 約左好耐無見既小妹子食lunch. 第一次黎衣度食野, 感覺地方好大, 好似好多野食咁. 第一次出去攞完野食差D盪失路返唔到埋位(我地12點半到, 2人台坐到好入).
食物方面, 主要試過燒豬同燒牛,. 牛就好唔掂, 好chewy .. 連要D生生地既cut都係咁. 其它酥皮湯(咸左D), 肉類, 炒菜各樣都試左少少, 食味一般. 炖湯, 即煮湯麵/粉, Pizza .. 等等因為太飽無試. 下次有機會先再黎食過.
平日Lunch 星期1-4 人仔118蚊. 妹子今日生日, 佢有20% off. 埋單total 213蚊.
服務都ok. 有waiter行過叫佢, 佢都有啋下我地(我地坐得好入).

潮成潮州牛肉店(福田沙嘴)

從汕尾玩完返黎, 好自然咁就去左沙咀既主場鬆鬆骨洗洗腳. 之前坐左成3個幾鐘巴士, 更係要去食D野先. 去左潮成, 叫牛丸湯河(本來叫麵, 無麵. 一向唔中意食內地既湯河, 覺得D河粉好"鞋", 炒還可以, 湯就 ... no good) 及蒜蓉炒大白菜. 牛丸算彈牙, 粉就唔好講呢, 湯就比較淡左D. 大白菜清甜好味. 埋單21蚊(包纸巾), 好似收多左我1蚊.

沙荔餐廳(福田沙嘴)

星期六同老友記及佢太太到平湖玩. 星期日中午自己去左沙咀鬆鬆骨及食晚飯. 鬆完骨後漫無目的四圍行, 最後選左呢間食晚飯. 叫左燒蚝(唔夠肥, 因未到食蚝季節啩), 回鍋肉(味度算ok), 白灼鵝腸(粉粉哋), 白飯, 王老吉+ 紙巾. 埋單80幾蚊, 好似貴左D咁.

四姐妹北方餃子(福田皇崗)

上星期日閒來無事就上左深圳探係上面成家立室既一位老同學嘆早茶. 午後自己四圍行, 去到水圍選左呢間食午餐. 叫左餃子, 炖粉及王老吉. 餃子油多左小小, 不過係內地食野都預左油多架啦. 味度方面都可以. 紅燒肉炖粉都ok, . 可以繼續幫襯.

一品紅川菜(福田皇崗)

今次試另一間分店. 11點多去到都仲有位, 之後就越黎越多人. 今次試佢地既招牌菜口水雞(半隻, 28蚊) + 水晶粉(20蚊). 從未食過口水雞, 所以唔知正中既味度係點. 呢度既口水雞小辣不麻(自己感覺), 不過都OK滑. 水晶粉味度略咸, 可以接受. 服務都可以, 祇係樓上厠所衛生好似麻麻. 總括黎講, 都算唔錯既一餐. 有機會都會再幫襯既.

家鄉味坊(福田皇崗)

一品紅午飯後就遊左去蓮塘, 再轉車返蛇口行街遊蕩. 6點幾返到水圍就返去自已既飯堂開餐(去親果頭10次有7次都係呢間食飯). 唔係話佢D野特別好食, 但幫襯左咁耐(食左不下20次), 都有D親切感. 今次食家常豆付及小炒羊, 味都OK, 會繼續幫襯佢地既.

一品紅川菜(福田皇崗)

星期日無野好做又上左深圳四圍遊. 午飯去左水圍衣間一品紅開餐. 叫左自磨豆付煲及回鍋肉. 豆付煲豆味幾香但唔夠滑, 味度可以. 回鍋肉辣味剛剛好(對我黎講)但紅油就多左D. 招呼OK, 地方都叫寬趟(2層), 唔會覺得逼. 好啱一家大細去開餐. 有機會會去試埋另一間一品紅, 果間好似旺過呢間添.

天天海鲜大酒樓(福田皇崗)

星期日無咩好做就一個人上左深圳遊巴士河. 晚上就係呢度開餐. 地方裝修都ok. 先叫乳鴿(on special 9.8人仔, 下同. Regular 要20蚊, 1-4人一隻, 5-8人兩隻 .. and so on) + 豬油渣蒜蓉炒農家菜心(20蚊) + 鹵水併盤(38蚊) + 追加半斤基圍蝦(19蚊). 乳鴿又干又瘦, 全無肉汁(差), 菜心爽甜(正), 鹵水併盤叮到熱哂(麻麻), 基圍蝦肉軟淋淋, 唔似係新鮮野(差). 飯後有西瓜盤送(甜).
食物就好一般, 但service都叫ok. 都有好多香港人係度食晚飯. 我就一次過, 比較中意食大排檔D鑊氣或去食外省菜.

源成興大排檔美食(西環)

果日上Openrice search吓有咩食, 見到呢間好多好評. 住係西環幾年都唔知街市有呢間野. 一於去馬.
其實寫呢個食評之前都叫過幾次外賣, 每次都無失望. 今次外賣肉絲炒麵 + 椰汁紅豆冰, 真係大件甲底食, 細食D兩個人都夠食. 肉絲炒麵大大碟唔在講, 椰汁紅豆冰係用平時D外賣湯碗裝既, $27邊度穩. 今次XO醬用外賣三文治袋裝 .. 哈.
唯一既投訴係每次D野都咸左少少, 不過係可以接受既.

漢和韓國料理(銅鑼灣)

呢間野我都幫櫬左年幾, 雖然唔係我既飯堂, 但一個月都會去一兩次(5:30pm - 7:30pm Happy Hour Buffet, 唔洗同人爭). 7月中去過一次, 因暑假關係, Happy Hour Buffet都好多後生仔後生女係度食野. 食物種類算多, 味度ok, 有味精就預左架呢. 可能幫櫬左年幾, 個個黑衫女captain都知我, 未試過同我講話夠鐘乜夠鐘物, 當然自己亦要識做呢. 比我既service都算係咁啦.
會繼續幫櫬, 因為幾中意食BBQ Buffet.

禮品印度餐廳(香港仔)

係Aberdeen返工咁多年都未黎過呢度食野, 尋日決心去試吓. 约左老同學2:00pm到, 客人己經走得7788. 我order左Set Lunch A - Soup + Curry Lamb + Naan + Coke, 老同學order左the same with rice + coffee. Set Lunch also跟炒雜菜. 湯ok. Curry lamb味度幾好, 唔係好辣, Naan都夠熱(叮番熱既). 炒雜菜就真係唔掂- 變左做中式garlic炒菜心, 獻汁又一pat pat, 好難頂. 食左幾條就收工. 見人地D炒雜菜有cauliflower又盛, 唔知係唔係我地晏去所以衹得菜心. 不過waitress小妹妹幾好service, 仲refill杯coffee at no extra charge. 埋單$37位無10%, 比夠$40因為小妹妹service好. 應該有下次.
Set Lunch $32起, 都算幾平.

劉森記麵家(深水埗)

尋日去開黄金睇野, 順便去試吓. 叫左豬手水餃撈. 豬手有兩舊, 好香南乳味但食落就無咩味, 唔夠"淋". 水餃都係兩舊跟湯上, 蝦幾爽又好味. 湯都OK. 竹昇面就幾"un", 唔彈口. 總结味度一般, 下次去舊店試吓東菇, 根腩同蝦子撈.

學利魚蛋(大埔)

尋日無無聊聊, 去左大埔行下. 落車時望見學利, 記得有食友介紹過, 咪入去E下肚先. 叫左鱼旦粉. 鱼旦好彈牙但好似無咩味咁, 鱼片好D, 湯同粉都可以呢. 都係王林記正D.

十三座牛雜(北角)

今日行過, 試左一串牛肺and大腸, 又腍又入味又干淨, 完全無異味, 未試過咁好味既牛雜....... 正

泰式小食館(西灣河)

其實係想講吓呢間泰式餐館門口檔車仔面, 佢地好似係同埋老細既.呢檔車仔面只賣牛丸, 豬腸及鱼肉粉面, 味度幾好架, 不過唔好落太多冬菜, 會過咸. 望落去佢又企理過太安樓其它兩檔車仔面, 又平. 食友們不妨一試.