在純住宅區內仲要係死位去頂食店，真係一件好勇敢既事。外賣味道很好，包裝也貼心，牛仔骨用錫紙再包才入盒，這點讚👍。海鮮薄餅不會過咸，煙韌有口感，不過堂食應該會更好味。另外有三小碟，我最愛銀魚花生，其他ok。我覺得真係韓國人經營，講英文和普通話的，要支持下。

openrice 訂左枱有9折，食過幾次都keep 到水準，次次一定有牛肉漢堡，因為仔最愛。 今次漢堡都ok，係肉差少少唔夠juicy,飽就焗得非常鬆脆，薯格次次都很好食，脆卜卜又夠味。 慢煮雞胸沙律，雞胸一d都唔鞋，醃得入味，沙律菜新鮮又多，85蚊連飲品CP值高，我食得飽喎。 炸雞中東飽，炸雞醃得入味，飽焗得脆脆地，加埋醬汁味道好夾，好快食哂。 九折後$270，座得舒適，對大玻璃望街，有空間感，值得我午餐多幫趁既餐廳。晚餐價錢就略貴，午餐真係好抵食。

好差好差，叫左蕃茄豬扒炒蛋多士。豬扒un 到無朋友，炒蛋無味，蕃茄通粉淡茂茂，又貴$55，一定無下次。 廚房大佬見唔見到d 食物跟本唔洗食落口都知唔好食啦，柴皮豬扒點樣可能好食呢？

一行四人訂左枱聚下，去過其他百佳都無乜問題，估唔到呢間例外！

三個意粉一個蛋包飯。我的龍蝦汁意粉先到，侍應未放下我忍不住講：嘩，咁核突既！意粉完全over cooked, 淋bat bat, D配料碎濕濕咁撈在其中，成碟好似食剩咁款。味道好差，雖有D龍蝦汁味，但意粉實在太爛，太濕，我食左1\3就放棄。其他意粉樣好過我少少，無咁濕，但全部都係over cooked, 一pat pat.

基於太差，唔再花時間形容呢餐飯，太可惡了。永不再來這間！

都算係佢既fans, 因為好味又穩定，坐得舒服過澳記，唔駛走難咁

十一點半到，想食叉燒通歺，但未夠十二點真係唔供應喎，貴D都無計傾。無理由散叫嫁，唯有照舊腿通。好快到齊，但發覺少少縮水，炒蛋份量少左四份一同唔夠蛋香，多士薄左同細左，以前好厚嫁！通粉量就差唔多，但係唔夠熱，奶茶都係。因為唔算多客，伙計食緊飯，圍住馬經黎睇，再望其他客人，有三、四個都刨緊。噢，食物質素下降原因，明白鳥！！

希望老闆有成日黎呢度睇下自己的食評啦。

開張后第一次幫趁, 特登選過午飯後才來, 不用迫.

主打英式all day breakfast, 好想試egg benedict, 但今早才吃muffin, 留待下次啦. pasta 有款跟餐, $52-68不等, 包奶茶, 但咖啡要加$4, 這在於cafe 裡這有點奇怪 但我今天不喝咖啡, 試了奶茶加拿破倫意粉.

很快有得吃, 賣相不俗, 意粉煮得剛好, 不會太淋, 配料有香腸, 肉碎及蕃茄洋蒽等, 醬汁甜甜的很開胃, 味道不會太濃, 香腸肉頗嫩滑, 不錯呀. 份量女仕剛好, 男仕就可能不會太飽. 奶茶我出乎以料不是港式而是泡沫奶茶, 有少少綠茶味, 因為不是用淡奶的關係, 不會有飲完黏口感覺呢, 我没有加糖都很好喝,

看到鄰座點的特大份量早餐, 二人用都可以 賣相很好, 薯餅好像很鬆化, 香腸煎得亮亮的. 下次我都要試呢.

一向鍾情茶餐廳，見咁多好評，便要來核實一下。

上午11時多，正好brunch 時間。特意乘6號巴士來到。店門外賣自家制麵包，蛋糕，聽說這裡的雞批也馳名呢。很喜歡這種格局，很港式，地道感覺。

不算很濶落，兩旁卡位，中間正方枱。有數枱客人各自爲政，優閒的看報，進餐。店內非常乾淨整潔，幾位[伙記]亞叔禮貌週週的招呼，傳統的白上衣也頗乾淨，更添好感。當然點了沙嗲牛麵特餐啦，餐包+火腿奄烈，奶茶，$29蚊。

很快全部到齊，賣相整體很好，麵是熱騰騰的，肉汁豐富的牛肉，雖不是丁麵，但煮得剛好呀。本人不太喜歡太濃味的食物，便將沙嗲牛與湯麵混起吃。很有花生醬味的沙嗲，也沒有一般用梳打粉弄至不似牛肉的肉質，終於都有＂真＂牛肉喇！麵包微溫，但很鬆軟。奄烈不過不失，但肯定是即做的，包著不少的火腿絲。我最喜歡夾著吃，很豐富的感覺。奶茶也合格，如茶味再濃一點更好，口感雖不算很滑。但窩心一點的是，杯是熱的，不知是剛洗完還是刻意預熱，這保持茶的溫度是很適中的。

整體很滿意，個人又偏愛注重衛生的食肆，這點很加分，証明老闆的用心經營，為客人提供完善的飲食體驗。

離去不忘外賣雞批，讓自己下午茶時延續這滿足的感覺。無容猶豫，一定再來。

下午茶時間，未食晏但唔想咁飽，潮式粉麵岩哂。見食評幾好，一於試下。

粉麵$23起，熱飲+$6。叫左牛腩河，好快有得食。唔細碗，粉量同牛腩都唔少。牛腩唔係全瘦，有連住少少肥同根，好鬆軟，入味，湯底好味，牛腩汁加埋葱係一流配搭。河粉雖然唔係十分滑，但熟度剛好，加埋湯汁，好野味。

見幾枱人都叫牛腩飯$38，賣相好，又有蘿蔔，應該好好食，下次可以試。

久仰大名，本身都幾喜歡食麵類，咁岩係CWB, 五點幾應該不用等吧，即刻要試。

店內7成滿，但不用等位，正如其他食家而言，非常細小及擠迫的小小店，一小圓枱有4位搭枱，理解hk租貴嘛。但如果食品質素真的非同凡嚮的話，都願屈就。點了豚王，所以野都選普通（湯濃度，蔥花，麻油份量、之類）以可以試出本來味道。等的時候，看別人的食品，麵份量不算太少，但點解無煙既？本人最最怕要熱食的食物是暖的，自己再攤涼一點是另一回事，尤其麺食呢！熱騰騰才夠過引嘛！

anyway, 2分鐘后已經上麵，哎呀，幼麵黎既？個人喜好粗身的日本拉麵，已經有點失望了。湯底好濃郁，有點油，好重麻醬味，麻麻地岩我，都系果句，唔夠熱囉。麵質，好一般貨色，唔覺彈牙，又因為幼麵關係，似食緊上海麵多D。配木耳絲，我覺得有D九唔搭八，仲有2塊肥瘦都適中既豚肉。不過，都係2塊啫，又唔係銀紙咁大塊，駛唔駛薄到咁呀！味道只可以叫不過不失，但絕對唔會回味。

店員很多，其實服務可以，如果清潔衞生度再好D的話⋯⋯整體而言，$78\碗，𣎴論食物質素及幫趁體驗，水準實在過不去，去茶餐廳食仲舒適好多，除非⋯食品真係非同凡嚮。好明顯，只有今次。

朋友慶生, 7人飯局, 因為通常都太多話題, 要找一個座得舒適及可以久留的食肆, 剛巧幾個朋友的友人都試過大讚, 便卜鎚了. 其實見到個價錢不貴, 以私房菜而言, 心想是否會有好質素呢? 即管一試便知龍與蛇.

點了鮑參翅肚餐, $248/位. 没加一,茶水. 餐牌見圖. 大厦位置不難找, 但13/f, 15/f 字側令我走了好幾層樓. 地方嘛, 不太整潔, 舊式酒家汚糟格局, 抽氣差, 如坐廳的話包你一陣油煙除, 這是我最最怕的. 慶幸我們有房, 也不會吵到他人.



齊人可以起菜, 大約15分鐘后有得食, 賣相普通, 味道嘛, 見下評語, 10分滿分計:

1. 生拆蟹肉扒金山勺翅 - 肉絲就見到有, 蟹肉唔多覺, 莫講話蟹味. 碗仔翅果d 翅+獻, 3分

2. 花雕蛋白蒸海蟹 - 健康問題, 我不能食蟹, 只食蛋白, 都可以既. 可能肚餓啦, 朋友話蟹ok, 幾好味. 5分

3. 原隻魚扣山珍海味 - 新鮮鮑魚, 炆海參, 冬菇, 花膠, 生菜. 味道用料普通, 冬菇都無乜味, 整碟餸都係得一個蠔油味. 4分

4. 清蒸游水海班 - 約1斤2兩到. 賣相極差,連我呢個小師奶都蒸得靚過佢. 呢條魚都曾經游過水既,一過都係一段相日子之前喇. 好唔新鮮, 肉質梅的, 無味, 好下價的班仔. 1分

5. 天下第一雞 - 賣相唔錯, 但好睇唔好食. 炸左有一段時間, 可能就外廳幾圍一齊做起. 零雞味, 肉質鞋,明白大定用冰鮮雞, 但做法不精, 不能起死回生, 快餐店口感. 3分.

6. 金銀蒜粉絲蒸元貝 - 呢味餸計正好易整, 但都失手. 都係時間問題, 整好一段時間同過左火, 老左, 有d un, 唔係用靚料, 無味同好多油. 3分

7. 瑤柱扒西蘭花 - 呢碟算係最好, 最少見到不太少的瑤柱, 菜不會太熟, 可能之前既餸太差, 食好少, 呢味食得最多. 5分

8. 招牌三式蝦 - 如果呢味係招牌菜既話, 咁要拆招牌喇. 炸到黑mu mu, 完全過哂火, 蝦非常唔新鮮, 肉質梅, 無味. 炸起好左耐, 三款蝦都食剩,冇乜人食. 1分

9. 飄香炒飯 - 下價米, 断開哂, 什豆楊州炒飯咁上下, 無味, 食剩好多.

總括而言, $248/位水準太差, 因為用料下價, 又要接多d客而好早整好, 煮法又不精, 難登大雅之堂, 普通酒樓水準都比他好很多, 地方不乾淨. 完全没有私房菜應有的用心及精緻, 令光顧的客人失望離去, 也敗了私房菜的名聲.