夜晚想食放題, 不過好多地方都超多人, 咁岩行過銀城廣埸見見有間新野, 而招牌又標榜有 200 個位, 即管上去試下, 可能真係新既關係, 上到去真係唔多人, 即刻有位.. 食既野都有好多款.. 不過最值得讚既係, 呢頭落單, 轉頭就黎, 而且冇漏單, 有俾多冇俾少, 加上汽水啤酒任飲, 雖然時間得兩個鐘, 不過都夠.. 要食放題, 火鳥真係個唔錯既選擇..!

好耐冇寫食評, 不過今晚幫襯完真係唔寫唔得..

今晚九點八未夠去到夢見屋, 門口個 waitress 完全係企係度夢見佢自己間屋, 完全冇意慾招呼我地入去.. 要開口同佢講兩位, 佢先黑晒面極唔願意咁帶我地入去.. 坐低啦, 另外一個 waiter 竟然餐牌都唔羅過黎, 就話 "last oder 係九點九, 十點閂門有野呢家要叫.." 嘩, 大佬呀, 睇住我地岩岩坐低, 餐牌又唔俾, 叫我地有野好呢家叫.. 如果係趕住收工 / 阻住佢地收工咁就唔應該放我地入去啦.. 不過既然都入到去坐低, 費事又起身走, 所以就拿拿聲問佢羅個餐牌叫野, 最後只係兩 set 甜品, 但係要等差唔多十分鐘.. 好啦, 個鐘先係九點十一個字, d waiter 同廚房大佬已經走晒出黎行入後欄換衫.. 之後行返出黎坐晒係冇人坐果 d 位度玩電話, 佢地見唔見到餐廳仲有客人未走..? 呢 d 係乜野服務態度..? 食得一半, 另一個 waiter 就行過黎放低張單話 "截數".. 你地截數關我乜事呀? 就算真係截數, 都有禮貌 d 講, at least 都講多謝你地幾多幾多錢.. 最後一個仙 tips 都冇俾.. 呢間餐廳真係要好好咁重新 train 下 d 員工..

行過水街, lunch 要搵野食唔係真係咁多選擇, 見到 derby west, 其實都唔知佢係 pub 定西餐廳? 不過見門口棟個牌 d 野食都 ok, 就入左去, order 左個唔記得叫乜名既雞扒飯, 味道唔可以話好好味, 不過都唔差, 但係塊雞扒真係超大塊, 飯又夠多, 仲要跟湯送餐包同野飲, 都係 40 蚊, 真係低食..!

南翔饅頭店基本上係銅鑼灣區食上海野既首選, 亦都幫襯過唔少次, 今晚兩公婆去, 見餐牌有 d 新花臣, 又有 d 平時好少會叫既送, 咁就 order 左個二人餐, 有醉雞, 蝦, 賽螃蟹, 椒鹽腰果酥, 粗炒, 另外再加多籠小籠包.. 用某張 credit card 仲有折加送橙汁..

食物方面, 份量識中, 唔會太大碟或者太細碟, 醉雞好香酒味, 雞肉又唔鞋, 蝦同粗抄都好味, 不過略嫌多油左少少.. 賽螃蟹同椒鹽腰果酥都好好.. 全晚唯一有少少唔滿意既, 反而係佢地既招牌小籠包, 因為之前食咁多次 d 皮都好薄, 但係今晚 d 皮真係厚到好似食饅頭咁, 希望只係個別事件, 整體黎講, 要食上海野既 openrice fans, 南翔饅頭店係唔錯既選擇...

題外話: 應該大家都知賽螃蟹唔係真係蟹, 不過今晚坐我地隔離檯既一男一女, 一路食一路大大聲講, 多多怨言, 話碟賽螃蟹一 d 蟹味同蟹肉都食唔到, 全碟野只係食到 d 類似蛋既野......... 唔知賽螃蟹係乜既, 即管多口係度講句, 賽螃蟹唔係蟹黎架..

晏晝行過筲箕灣見到間鋪裝修都唔錯, 加上門口又寫住 Queenie Chan (陳莉敏) 推介, 兩公婆就入左去, 下午茶款式唔多, 冇記錯好似得五六款, 咁就 order 左一個意粉同一個 blueberry cheesecake, 意粉同 cheese cake 味道都幾好, 但係值得一提既係, 雖然我地只係食唔貴既下午茶餐, 但係入到去, 佢地服務真係好好, 我地完全覺得我地係上賓咁, 無論係浸水或者講解都做得好好, 加上親切笑容, 就算唔係住筲箕灣區, 但第日都一定會再幫襯!

讚讚讚!!

簡單食評一個, 只作參考.. 鎮店甜品 "五代同糖", 話好食又唔係好好食, 話難食又唔講得上話難食, 只可以講係普普通通, 加上 size 超細, 但價錢遠超所值, 各位 openrice 覓食既人士可自行考慮..!

一家人食夜晚飯, 六點鬆 d 去到, 不過都開始多人, 但係都好好彩唔使等好耐, 坐低睇完餐牌, 但係有野唔明, 好聲好氣問位侍應姐姐, 用返唔咸唔淡廣東話答返你, 咁都算, 再問多句開始唔耐煩.. 客都仲未係好多已經係咁, 客再多 d 都唔知點算..?

講返食, 四人更係 order 四人餐, 一湯三送, 另外再加多個送, 包括招牌鹽焗雞, 中式牛柳, 炒通菜, 同一個班腩煲, 送 d 味道都唔錯, size 都適中.. 加埋飯其實都夠晒飽, 不過撇除食, 侍應唔會沖茶遞水, 叫佢加水慘過叫乜咁, 就連賣單都好似懶懶閒咁, 由叫賣單到俾錢足足等左幾個字.. 以泉章居咁有名幾食店, 如果服務可以再好 d 既話, 咁會更加好..

好耐冇幫襯康怡呢間 pizza hut, 今次經過康怡見其他地方都好多人, 就入左去, 兩人只係叫左個 pizza, 意粉同小食拼盤, 味道同其他地區 pizza hut 大同小異, 不過值得讚既係, 上菜速度, 服務態度到好好, 比起以前既超差服務真係大大有改善..!

夜晚係九龍城食完飯, 之後諗住食甜品, 可能係週末關係, 檔檔都排長籠, 最後都係黎左地茂館, 等左個幾兩個字有位, 入面都幾逼, 兩個人叫左綠豆沙, 杏仁豆腐同芒果班戟, 都好好味, 宵夜想食甜品既, 地茂館都係唔錯既選擇..

睇完咁多笑既食評, 就去試試, 六點幾去到, 不過都要等左兩三個字先有位..

睇餐牌, 大多數係套餐, 再睇睇散叫, 其實差唔多, 起碼套有埋野飲同甜品, 咁就叫左其中一個二人餐, 先上六小碟前菜, 都幾好味, 不過碟kimchee就真係好似少左d.. 之後粉絲湯都幾好味, 到鍋飯, 服務既姐姐好有心機同我地加蛋同加汁撈飯, 最後上埋個kimchee薄餅, 雖然款式唔多, 不過都夠飽, 甜品係芝麻雪糕, 賣單都係230, 仲要係免加一.. 所以絕對抵食..