憶食尚臘味煲仔飯 (佐敦)

天氣凍想食煲仔飯，喺openrice搵到呢間多好評，環境睇落又乾淨，星期六晚就去試下

點知原來好多人去食，冇諗過要book位，餐廳又冇限時（其實係好事黎，唔洗食咁趕），所以要等好耐……
我地6點9去到留電話，話7點幾左右應該到我地，但一等就等到8點都仲要等多幾張枱……一直到接近8點半先有得入座……附近又冇野行，好彩有兩張凳可以坐下……建議餐廳擺多幾張凳比等位嘅人坐

入座前已經叫定廣式臘味煲仔飯（二人份），入座後等咗一陣就有得食
但……等位等咁耐真係好失望！

1. 侍應拎個煲仔飯上枱，一打開個蓋，竟然冇臘味香味飄出黎？！
2. 臘肉臘腸臘鴨味道正常，但居然一啲油香都冇滲入飯入面!!!!!感覺上臘味還臘味，飯還飯，兩樣分開煮完之後擺埋一齊咁！煲仔飯叫臘味唔係就係想食臘味油香同飯撈埋一齊嘅感覺？
味道試已經大扣分，失望！
3. 啲飯生！好硬！味道唔好都算，連基本整熟都做唔到……
4. 飯焦唔算多，但其中一邊嘅飯焦直頭又黑又碎到似鑊撈，唔係一塊塊，而係碎到一粒粒
5. 份量少！又話二人份，但食完唔多夠飽

呢到優點係乾淨企理，坐得好舒服，侍應有禮，廁所都整潔
但唔好食，下次唔會再黎亦唔會推薦比朋友

窩子 (新蒲崗)

星期六接近12點黎到，已經有4組人排緊隊
不過cafe冇準時12點開門，等咗一陣先放人入去

叫咗意大利烘蛋（蝦）、檸檬吉士伯爵茶醬窩夫、熱flat white
食物好快到齊哂，唔洗點等

意大利烘蛋：
一上枱就聞到好香蛋味，邊位微微焦脆，入面嘅蛋好嫩滑，好似蒸水蛋咁～餡料主要有蝦、車厘茄、菠菜，如果可以再多啲芝士會更香更好食。蝦有少許雪藏味，扣咗啲分

檸檬吉士伯爵茶醬窩夫：
好大份😯有四塊，每塊都好厚好脆😋😋
每塊入面都夾咗伯爵茶醬，伯爵茶醬好濃～有少少澀味～
旁邊有檸檬吉士、cream同一杯仔奶茶😯😯檸檬吉士幾清香，檸檬酸味幾出，杯奶茶仔好香濃好好味😆仲正過主角伯爵茶醬同檸檬吉士～

近年好興咩都加麻糬，雖然我都好鍾意，但窩夫黎講都係脆身最好食！！好耐冇食咁脆口嘅窩夫，好滿足！

Flat white：又係好香濃👍👍

食到1點左右，見門口都唔係好多人排隊，下次可以唔洗咁早黎～

結論：值得encore！

大圍小館 (大圍)

食物：
第一叉：不愧係招牌！豬肉好嫩，而且真係有豬味。陳皮醬甜而不膩，唔會蓋過豬肉香味。一碟只有5舊，但每舊都好厚身，食落好滿足，就算咁厚啲肉都依然咁嫩，正！

薄荷蒙古羊肉：唔錯，羊肉冇乜羊騷味，不過咸咗少少，建議配飯食。本身以為佢係落薄荷醬，原來直頭係成塊薄荷葉一齊炒，薄荷味好清新。

牛骨髓鍋：呢鍋入面有牛骨髓、魷魚同蝦，味道都ok，點埋佢嘅辣醬會更惹味（呢到嘅辣醬好辣🥵）

山葵海蜇頭：好爽脆，仲同山葵味好夾，唔錯

冰花蛋球（沙翁）：非常失望……估唔到衰收尾……
齋睇個樣，已經覺得佢入面唔夠鬆化。食落口，直頭似馬拉糕咁實……我家長者話傳統沙翁唔應該係咁嘅口感
都未擺入口，淨係擺近個鼻都已經聞到有陣亞摩尼亞味，應該係膨脹劑嗰類野落得太多（？）
食落口就冇亞摩尼亞味嘅，但除咗表面嘅砂糖之後，成舊糕係一啲味都冇……麵粉味/蛋味係零，唔知自己食緊乜

桃膠蓮子紅棗糖水（送嘅）：質素仲好過$58一份嘅沙翁

服務：親切有禮
環境：呢個價錢黎講，坐得有啲逼
價錢：9百幾

希望下次可以試下飲茶食點心，但希望啲點心唔會似個沙翁咁

韓川 (旺角)

臨近新年，夜晚條街周圍都好多人，好彩電話book咗19：30，冇限時。一坐低就落單，野食都好快送上。

🍴真露焗蜆 $118 👍
啲蜆都幾多下，食落都算新鮮、冇沙。粉絲充滿牛油同蒜蓉味，勁香。如果想要食到真露味，就要直接飲汁先會食到😂

🍴韓川菜包五花腩（唔辣） $128 👍👍
三大條五花腩！！睇落已經勾起食慾！
調味唔知係咪有孜然粉，好香好好食。生菜都好新鮮，加埋生蒜片同生洋蔥粒，食得幾過癮但個口好臭😂
我覺得送黎嗰兩個醬都幾普通，反而枱面有枝韓式甜辣醬，配五花腩仲好食。

🍴三味山炸雞 $158
全部係單骨雞翼，食落幾方便，但感覺上就唔夠啖啖肉。
雖然熱辣辣夠香口，但淨係食到糖粉同辣醬味，食唔到芥末醬味，可惜。

下次再黎會encore五花腩～另外想試燒蠔/串燒/鍋飯😛

Schnitzel & Schnaps (中環)

平日中午waik-in去食，坐樓上，大約7-8成滿。
餐廳環境真係好靚好典雅，waitress都好親切有禮，但係…一行上條樓梯就聞到有陣羶臭味，坐喺樓上都隱約聞到，我估應該係樓梯隔離個廚房入面啲生肉/內臟氣味，好raw好似喺牧場咁(?)

Lunch set前菜叫咗一個Smoked mackerel pate、一個Beetroot soup。
Smoked mackerel pate好味，有魚香但唔腥，可惜麵包得兩小片實在太少!!淨返好多肉醬冇麵包送…
Beetroot soup係素湯，酸酸地幾開胃，仲有啲連皮嘅薯仔粒，煮到好稔~

Main揀咗新出嘅Duck Leg，係將鴨脾撕碎再砌成一個厚圓餅咁整，下面墊咗好多紅菜頭碎。鴨脾調味剛剛好，配埋紅菜頭碎+去油膩嘅柑橘味醬汁，係幾有趣嘅一道菜~

另一道main dish揀咗招牌Schnitzel a la Holstein (+$80) ，呢個真係必食!!! 好好食!!!
首先塊炸豬扒打扁咗後好大塊，差唔多有我兩隻手掌咁大，上面配咗隻大陽蛋同一條細魚仔(好咸) ，賣相令人食指大動~塊炸豬扒一定要趁熱食，皮脆、肉又香又juicy，正! 😋
佢另外會比一小壺olive oil淋上豬扒到食，雖然佢嘅olive oil好香，但淋咗去豬扒到又唔覺有咩火花出現，冇加乘作用。但值得一提嘅係，壺olive oil最底有好多olive，我平時唔鍾意食olive，但呢到嘅olive冇平時有嘅怪味，淨係酸酸地咁幾過癮。

今次lunch set嘅甜品係Red wine poached pear。個梨燉到好稔好入味，呢個係正常操作啦，值得讚嘅係紅酒唔會太澀，易入口。最好食嘅反而係配燉梨嘅cream!!!! 好香濃嘅牛奶味!! 好滑，texture都幾濃厚，好似食緊特濃牛奶雪糕咁😋

最後係餐茶，揀咗熱咖啡，杯咖啡好濃好苦😂
落哂奶同成包糖都覺得好苦，但苦得黎好有咖啡香味👍唔酸，好適合鍾意濃味嘅咖啡友~我宜家打緊食評回想返杯啡，都想再飲多次😋