神緣 (天后)

見到新開，鋪面又靚靚仔仔即刻試下，我地叫左1杯焙茶，1杯紅茶，買時仲有fb ig offer，有得free upgrade所以要左大杯🤣店員好Nice👍🏻

2杯茶味都好香，雖然本人唔太好奶，但係好茶🤭2種茶味都好出，焙茶真係有烘焙味，紅茶就係偏澀個種，2個茶味好開心，入面仲唔係普通珍珠奶茶啲珍珠，係蕨餅！好特別😋但係老實講，賣相真係麻麻🤣一pat野咁，不過啜落，都食到佢係1粒粒嘅🤣蕨餅粒粒質地偏淋，本身有甜味👍🏻成杯野整嚟講係好味嘅，可惜佢對我嚟講有啲太奶，如果佢第時有出純茶就好喇～

伊呂波燒肉 (銅鑼灣)

以前成日跟契爺黎既伊呂波，比我既感覺係好貴好貴，食服務，食靚牛既地方。覺得佢太“高貴”既我，次次都係契爺請我食，一直都冇試過自己黎食 今晚約左剛剛加拿大返黎既daddy，決定肉痛都要請佢食靚肉。

我地1家4口，daddy揀左個家庭餐，咩都有啲，千5蚊左右，但其實我印象中以前係冇餐既，或者咁，所以先覺得佢以前貴。

首先有前菜同沙律，前菜係平時韓國菜個啲前菜，豆芽，KimChi同菠菜，3樣都同其他餐廳一樣，正常味道，但冇咩大驚喜。沙律okay，菜好新鮮爽甜，加埋少少dressing同好多芝士，件事好清爽，好開胃

跟住黎既有煎餅， 簡簡單單，掛住食其他野既關係，我食既時候已經凍左了，但雖然話就話凍左， 但係都幾好味， 相信上枱熱辣辣既時候食，應該都會幾正。

之後黎左一堆海鮮， 有蟹腳有蠔有蝦， 唔食蠔既我將我個份俾埋daddy，佢個樣食得鬼咁滋味， sorry 恕我唔識欣賞。蟹腳好正，佢整得好容易食，燒熟左之後，剪開頭尾，成條肉幾乎一抆就出，蟹肉好鮮味，完全唔洗點野，就咁食就已經好好味。大蝦肉質好彈牙，味道幾好。

接住黎就係肉肉肉肉肉， 初初睇落好似好少，都驚唔夠食， 但其實慢慢食落去原來都好漏。 有牛油帶子，煙肉捲車厘茄，牛舌，雞柳，粟米，腸仔，金菇肥牛卷，煙肉捲蘆筍，仲有當然係呢到既主打牛肉喇。其他野正正常常， 無咩特別， 但係呢度既牛肉真係值得一讚， 原本以為叫餐，啲牛肉應該冇咁靚， 但原來依然咁好味， 好肥美，好香肉汁，有款仲有入口溶化既感覺。

其實食到呢到都已經有d飽，之後仲黎左個芝士牛筋，不得了，食左幾啖已經食唔落lu... 最後仲有個湯同埋飯糰，呢幾樣我都係樣樣食左少少就比埋daddy食 btw...飯糰都幾正，有個醬油比我地一齊燒，邊燒邊搽，好玩又好食，或者因為我一向細食，比晒daddy之後，都堅係有啲滯....

大家都好滿意呢餐，其實食咩，食幾錢都唔緊要，最緊要有個地方一家人坐埋一齊食餐飯，傾下計。人大左之後，一家人齊人坐埋一齊食飯真係越黎越少。

BBQ 7080 (旺角)

係屋企附近新開左2間韓國菜，次次經過都想去試下，但次次行過都覺得貴，所以忍住冇衝入去。係呢頭幫男朋友仔買完野，見到呢度原來都有屋企附近新開個間，即刻心裡暗喜，一陣佢黎接我仲唔比我試到？(奸笑)。最後男人都係輸比女人，哈哈哈哈~ 耐唔久都要對自己好啲，食貴少少都不為過呀！嘻嘻…入到黎呢度感覺好多都應該係韓國人，個個都好有禮貌。坐低時候個waitress姐姐打開左我張椅個頂，表示叫我放啲野入去。勁搞笑，張椅係一個大鐵罐咁既，打開面頭個軟墊蓋入面可以storage。真細心，我件毛毛褸食完都唔會太大Barbecue味。坐低睇睇Menu，我地好快就揀左5花腩，雪花牛同我最鐘意既牛舌。

佢地即刻就上前菜，有泡菜，蓮藕同翠玉瓜，之後仲一人有一個沙律同豆腐。翠玉瓜超好味，食完好想叫佢加，但好似都係留返個胃啲位比之後呢野食開心啲。泡菜都幾好，最怕啲太酸既，同以前啲韓妹朋友請我食個啲有啲似，豆腐都唔錯，滑啫啫，有個凍汁拌住，都幾開胃，唯一一樣我麻麻地既係個沙律，因為我硬係形住有wasabi味，但男朋友就話好好味，仲清埋我個碟添。

5花腩黎既時候得2舊，好似好少咁...我錯了，原來之後燒燒下waitress姐姐走過黎同我地剪剪剪，最後變左好多，加上佢好肥美，所以其實都幾filling。牛舌唔洗講，我最愛食品之一，好好味，口感質地煙韌爽口，哈哈哈哈，勁有偏見。之後仲有雪花牛，佢黎既時候個樣靚到不得，煮好食個陣都冇失望，肥同肉之間，肉味好夠，又有啲肉汁唔會鞋，幾好幾好。好似食左好少野咁，但加埋前菜同白飯，其實我已經好滿足，甜品都食唔落了。總括黎講呢個價錢，呢個食物質素，同服務都好滿意。最後一提，佢個枝凍既類似玄米茶既物體都好好味，哈哈哈哈。

樂意扒房 (灣仔)

Happy Friday Lunch，我地今次因為素食者同事仔有約，所以我地全體人員決定去食肉~ Rah~~ 一直都知呢度有間扒房，但從來都未黎過，今次決定一試！一入到黎就聞到好香，即刻流晒口水，因為我地比較多人既關係，waiter哥哥姐姐都好幫手幫我地左掉右掉，拼到一張長枱比我地。真心覺得佢地好好人，好Nice。等左10分鐘左右，終於成功坐低了。

因為我地一早係等位時揀左野食，所以好快就即刻Order。我叫左Angus Sirloin，原來同 Black Pepper Sirloin係一樣，只係人地有汁我冇汁既分別。

冇問題，因為我依然認為靚扒係應該唔落任何汁的，當我充滿住期望之際，麵包到了。有厚切同薄切2款，薄個款係脆既，但略嫌有啲啲硬。厚個款其實都比較硬，但只少個中間心位置都唔會太乾，有少少軟。食緊包既同時，餐湯黎喇，係我平時好少飲既雜菜湯。話事話，個硬包浸一浸湯食，都幾好味！湯比較大碗，我飲完應該食唔落了，所以冇飲晒。冇幾耐，我既主菜黎喇，唔.........確實賣相唔太吸引，扒好薄，我叫4成的，但一啲肉汁都冇，肉心亦唔係粉紅色。有點失望，正諗緊係唔係師傅過左火之際，同枱既同事都有一樣既問題，叫5成個樣係well cooked既，叫4成既都同我一樣，唔緊要，都試下佢肉質同味道。無言....冇肉味，質感比較"鞋"，傷心爆，仲諗住自己醒目叫冇汁，可以一試呢度既靚扒。總之就失望而回，最後上埋個甜品，芒果so皮，好彩都唔差，幾好幾好。總括黎講，食品試一次就夠，服務就真係抵讚，10分好。

呂仔記 (筲箕灣)

上次weekend遲左起身，冇同屋企人飲茶，同男朋友出黎搵野食，突然心血來潮想食平時早餐食既粉糰燒賣。佢就提出話過黎呢度食，今次叫左燒賣，碗仔翅同生菜魚肉，當然仲有我最鐘意既椰汁喇！一落單，野食好快就黎喇，燒賣個質感好好，好彈牙，唔乾，味道仲好鬼魚，查實我就唔係特別鐘意呢種味道，但佢質感攞晒分，Very Good！之後既碗仔翅都okay，多料唔馬虎，感覺唔錯，唔會太杰太稀。生茶魚肉係唯一失望既位置，其實係一樣好普通既野，但佢成碗野比超強勁既胡椒粉味蓋過左。失手了嗎？之前食過都唔係咁，傷心。最後我杯鮮椰汁，挽回一切！簡直係呢度既signature，次次黎都一定要飲！


後補一句，呢度啲野真係越黎越貴，之前既10蚊燒賣，依家已經要20蚊了。