韓宮 (紅磡)

 黃埔有港鐵之後，方便咗好多。今次呢間餐廳係正地鐵站A出口旁邊，超級方便。

餐廳環境舒服，台與台之間不會太迫。一入門口係一位韓國大叔作招呼，而貌似老闆嘅係一位韓國女仕，全程用英文溝通，感覺到好地道

叫咗個燒肉Set C，$499，有牛有豬 (調味牛肋骨、牛五花、豬五花、豬頸肉)，仲有一堆大豆芽、泡菜、茄子、芝士、腸仔。
豬五花，燒到焦香，入口香脆，包埋泡菜、生菜食係一流。
豬頸肉肉質爽口，味道適中。
牛五花可以燒到咁上下攤出嚟燒，會快d熟。
調味牛肋骨醃得好入味，味道較濃，建議最尾先食～
醬油蟹加白飯，$198

蟹肉蟹膏十分香滑，蟹蓋有隻生蛋，白飯上面鋪滿紫菜，3樣撈埋嚟食係一種享受～

餐廳器皿都是金屬製，不是膠質野，較有質感，對我來說十分加分。

絕對是少數有禮貌的韓國人餐廳，加分！

焱丸水產 (尖沙咀)

廢話唔多講，直接介紹食物，不過提提大家要book位!

今次叫咗3款燒物，首先係必食嘅味噌甲羅燒、仲有芝士蟹肉甲羅燒。店員仲會幫你燒埋，唔洗驚Fail，個蟹膏加埋鵪鶉蛋撈埋一齊超好食。

另外芝士蟹肉甲羅燒有陣陣芝香味道，但又不會太過over，沒有蓋過本身蟹肉蟹膏味道，正！仲有浜燒鮑魚，外面充滿焦香味，內裏肉嫩彈牙，鮮香惹味，十分有口感!左口魚、三文魚腩刺身。左口魚配上特製醬汁，非常開胃，三文魚腩刺身啖啖肉。龍神號壽司。有多款刺身配搭海膽小卷而成，一份食到多款刺身食材，好抵食！三文魚牛油果油酢漬。三文魚他他及牛油果粒，配以新鮮嘅貝芽菜、沙律菜、車厘茄，富濃厚酸甜味，非常醒胃，同行友人讚口不絕!蟹子蟹肉薯仔沙律。沙律足料，好多蟹肉、蟹子，口感豐富。溫泉蛋天婦羅。天婦羅炸得外層香脆，內層溫泉蛋流心，再加上天婦羅醬油作點綴，十分特別！和牛炒飯，賣相雖然普通，但入邊係勁多粒和牛，食落去絕對好味!當然唔小得整返杯Highball 及 生啤啦！一流配搭！

Orange Elephant Thai Restaurant (大角咀)

新年新開始，咩都要好先會有運行，所以今日梗要食得好！
諗左一大輪後，最終就同左老媽子去左食泰菜~~
 
這泰菜餐廳係表姐之前過話幾好食同唔太貴，因此今晚就帶左媽咪去食吓開年飯先
坐低無耐睇左陣餐牌後，就點左我同阿媽平時都like飲既冬蔭公湯
呢間味道微辣，爆開胃又陪晒熱，入面隻蝦好大隻又爽口，好鮮味
飲完一碗成身暖晒，真係good！！
老媽子最愛既泰式咖哩炒大蝦登場喇！超大碟！
食左啖汁，好好味，得好少辣，但有少少甜，反而有濃郁既咖哩同雞香
醬汁爆多，用來撈白飯或者薄餅食都係世界級正！
蝦好大隻！口感爽彈，仲好入味添，所以我食完碗白飯後，仲叫左薄餅
實行要食晒碟汁！
最後我就梗係食清喇！

今餐好食又唔太貴，食得開心，今年實有好運行喇

My Day (尖沙咀)

我成日都同自己講"辛苦得來志在食" 係做到痴左線後，我一定會食餐好既！係又做到隻狗之後，今日就帶左屋企人去食返餐~

係網上睇左一陣就睇到呢間餐廳做緊著粉藍/粉綠色衣服或飾物就可以4位半自助晚餐送1位免費，咁抵又加上我地一家剛好4條友就諗都唔使諗就揀左呢間餐廳

上到去一見到環境真係好靚仔，座位同座位之間有足夠嘅空間，唔會坐得唔舒服，地方好乾淨！原來呢間餐廳主要係做婚宴，而無婚宴既日子就會變返做1間餐廳，真係唔係想食就有得食，好彩我今日有位，睇黎今年爆黑仔既我都黑唔晒喎
欣賞完環境後就梗要食喇！話明半自助餐，當然要揀左主菜先，睇睇餐牌都有好多款揀，有扒同羊架之外，又有乳豬同鮑魚，食材都係貴價野，最啱就係鍾意食好野既我
前菜同甜品都係任食既，一出到就自助區就俾呢堆多到就嚟跌哂出嚟嘅松葉蟹腳吸引住！味道鹹度適中，非常鮮味
另一邊箱仲有三文魚及冷凍肉，味道都係好鮮甜，食得開心
仲有仲有！！就係我既最愛翡翠螺！！每隻都好大隻又爆鮮甜！好好味！海蝦亦都唔細隻，口感也好彈牙同鮮！
我印象中記得最少食左6隻翡翠螺，真係抵！
甜品方面都有好多款，有熱情果朱古力慕絲、綠荼芒果蛋糕、意式咖啡餅等，細細件咁真係好，咁就可以食勻全部款我本人覺得唔係好甜，精緻得來又好食
仲有成座山咁既草莓玫瑰慕絲&芒果凍慕絲，同樣細細杯真係good！口感柔滑又冰涼，係仲係咁熱既環境下食真係正！
食畢前菜後，就食返按位送既龍蝦先！龍蝦大大隻，肉質彈牙又鮮味
我主菜就揀左澳洲羊架，有啲人或者會怕啲羊架會有陣味，但係呢個無，點埋啲薄荷一齊食仲好味，加上廚師煮得唔會過火，每口食在口中都是享受！
臭妹係食肉獸，佢就揀左美國頂級肉眼扒 (10安士)，堅抽大大件，大到有點擔心食唔晒個隻肉質鮮嫩又多肉汁，厚身食落有口感，亦都唔會煮到過熟，Good呀！
食完一輪又休息一輪後，我同臭妹再次衝刺，拎左草莓奶凍、燕窩燉蛋、藍莓芝士蛋糕等再食過！個燕窩燉蛋好滑，藍莓芝士蛋糕味道濃郁，食到我真係要鬆褲頭鈕咁滯

大戰過後又是找數時間，由於臭妹係著粉藍色衫，所以就有1位係免費，真係爆抵！出左門口覺得更飽！飽到宵夜都唔使食嚕

黃記煌三汁燜鍋 (尖沙咀)

晚晚都食飯，唔通個個都想食來食去都係個幾間餐廳咩！
最怕悶既我就最鍾意去新開既餐廳食飯，好食一定就街唱，唔好食就更加倍就街唱，今夜就係舊同事既相約之下去左這新開的餐廳食晚飯
我地坐低後就立即叫左個涼拌鮑片海蜇頭小食來，海蜇爽脆可口，再加埋有清甜的青瓜絲同埋蘿蔔絲下，層次口感更感豐富，另鮑片都好彈牙鮮甜，作為前菜真係幾出色！
一不離二，二不離三，好食定要成雙，so就叫多碟夫妻肺片嚐嚐，味道辣辣地幾開胃，以川菜嚟講都唔算係超辣個隻[利申我個人係好食得辣]，本人及朋友都覺得係整得唔錯既！
食完前菜就係開始主菜的時間！一場來到就當然要食吓人家做得最好既招牌菜式！我地就揀左店家既麻辣三黃雞燜鍋，好大鍋，根本就係夠4個人食雞肉非常嫩滑，麻辣鍋辣得嚟又唔會搶咗啲雞肉嘅味，反而係突出咗個雞嘅鮮味同令個辣嘅味道更加有層次
個麻辣真係好香，所以我地都忍唔住叫埋位個蜂巢豆腐去吸晒個鍋入面既醬汁，放入鍋一陣就已經吸晒味，本身豆腐都充滿豆香，確是好食！

一邊食一邊吹水又一個晚上，人生就是這樣工作>放鬆食返餐>休息>再工作，定要從中找一點樂趣才不致白過！