泰誇張 (西環)

講到泰國野去通常都會去九龍城，但朋友就話佢食過呢間位於西營盤嘅泰國菜小店，一直念念不忘，就帶我黎試下啦！

椰汁雞湯 $68
通常去泰國餐廳都會飲冬陰功湯，但朋友極力推薦呢個椰汁雞湯，就一於試下佢！呢個湯頭非常濃郁，啖啖帶椰奶的鮮甜，而家香氣極重，又夠足料，正呀！

爆炸軟殼蟹 $128
呢個爆炸軟殼蟹，蟹肉幼嫩，又香又辣，好適合做下酒菜，非常美味，我同朋友都係好鍾意食海鮮，覺得呢一個做法嘅軟殼蟹好有新鮮感好好味！

鹹蛋魷魚 $108
魷魚本身已經好鮮甜好食，再夾埋惹味嘅鹹蛋黃，個種奶香濃郁味道同埋酥脆可口嘅口感，濃而不膩，相當出色。

黃咖喱炒虎蝦 $158
呢隻虎蝦未食就已經知道係啖啖肉，超級大隻，咬落好結實唔會鬆散，係屬於好新鮮嘅蝦。配上香醇濃郁嘅黃咖哩，完全係食極唔停口。所以我哋都加咗個印度薄餅，撈埋啲汁嚟食簡直係一流！

泰式炒金邊粉 (雞） $88
食泰國菜就一定要嗌金邊粉啦，呢個金邊粉屬於較甜嘅口味，唔會話好辣，而且炒得夠乾身，推薦！

神木日本料理 (觀塘)

今日去左觀塘搵食，朋友話好耐無食過日本野，於是我地去左一間網上介紹過癮世日本餐廳，一去到已經見到個裝修非常日系，員工都非常友善，好快安排左我地入座，一去到都見到好多年輕人，果然係非常吸引年輕人既喜愛。

牛肉他他
一上枱已經見到個賣相好靚，有個蛋黃係d生牛肉既面頭，撈埋牛肉好香，個汁調到岩岩好，食落有少少帶酸，味道層次非常豐富，推介之一，份量亦都唔少。

神之特上刺身 (6點盛)
呢款刺身一上枱既時間已經震憾眼球，大大個刺身拼盤重要有齊我最中意既刺身，每款刺身都有2件，同朋友share簡直岩岩好，而且師傅係擺設上都花左好多心機，抵讚啊！

雞五味盛
我同朋友都最中意食串燒，今次我地就叫左呢個雞五味盛，佢總共有5個唔同部位。包括有：雞肉、雞翼、雞心，雞潤同雞軟骨，我最難忘既係雞心，食落非常爽口同埋入味，雞軟骨亦都唔似一般放既店既質素，咬落非常有口感，大推啊！！

鍋燒烏冬
雖然烏冬份量唔算大，但勝在材料非常豐富！包括有大大隻既天婦羅蝦、蟹柳、冬菇，個湯聞落已經覺得好香，烏冬口感非常彈牙，配上雞蛋提升左個鮮味，而且d配菜都非常健康，下次必定會再到訪。

藍柑乳酸梳打
草莓乳酸梳打
兩杯飲品既甜度適中，而且大大杯，非常解渴，如果夏天黎簡直消暑一流！

The Salted Pig (九龍灣)

今日同朋友去左Mega Box搵食，朋友話不如試下呢間豬既專門店，有好多唔同豬既食品可以品嚐到，一入到去，親切既店員好快帶我地入座，睇過個Menu，好多唔同種類食物都有，睇到我地心大心細，基乎每一樣菜式都想試下。

招牌手撕燒烤豬肉三文治
之前試過呢到既手撕烤豬肉，所以今次黎必定要encore，手撕烤豬肉好香BBQ醬煙熏味，配上酸種包，呢個組合真係無敵！而且手撕烤豬肉口感一流，加上呢個餐配上薯條，大大碟，性價比好高，食左半碟已經開始飽。

雜菌松露意大利飯
雜菌同意大利飯真係好夾，松露既味道都濃郁，好creamy，食完一啖真係忍唔住想再食既感覺，而且雜菌份量都幾多，好健康既感覺，食完個口好香！意大利飯米口感非常豐富，每啖都充滿住松露既味道。

脆焗火腿芝士雞胸扒
上菜既時候真係嚇親，無見過d咁大塊既雞扒，西頭配上番茄醬同水牛芝士，極為邪惡，每一啖都充滿芝士香，加上番茄汁酸酸甜甜真係好好味，雞胸好Juicy，而且唔會好「鞋」，配搭得岩岩好。

舌丼 (觀塘)

最近工作壓力太大，放工之後同朋友去左觀塘食個飯，朋友介紹去食一間主打牛舌既餐廳，平時好少特登食牛舌，最多只係放題店接觸過。呢到位於觀塘，位置交通都非常方便，好彩我地去既時間都尚早，否則都未必有位。

呢到有好多唔同既丼飯同鐵板餐可以揀，價錢亦都相當合理，重有得加錢升級套餐或者追加其他食物，岩晒我呢d大胃王！餐廳重要全日免收加一，值得黎喇！

牛舌芯拼雞扒&鰻魚
朋友點左呢個餐，追加左個紫菜飯，一上菜既時間果然香噴噴，淋上牛肉汁，每樣食物都非常掛汁，第一次試牛舌芯既我無想過原來咁爽口彈牙，雞扒亦都好多汁又有份，我最欣賞係個饅魚燒到外脆內軟，重要唔多骨，岩晒我呢d懶人。

牛舌尖拼牛板腱飯
呢個已經係一個套餐，包埋沙律、紫菜飯同埋湯，一黎已經大大份，睇見都覺得飽，個牛舌尖咬落就比較淋身d，同埋每一塊都好入味好有咬口，牛板腱食落好爽口，我最中意佢個紫菜飯，份量十足

司華力腸
基乎每一枱都有叫，好巨型而且好爽口，作為小食或者前菜簡直一流啊。

Bedu (中環)

放假過黎中上環古蹟遊，朋友好有心思地簡左間中東菜，呢到除左環境有氣氛外，食物質素亦相當有驚喜！

MEZZE PLATTER
Starter黎左個扁麵包併盤，係Pita麵包，打開麵包就會好似一個袋，可以發揮你嘅創意搭配任何配料入去，配料有扁豆鷹嘴豆蓉、紅菜頭乳酪、鷹嘴豆蓉、醃菜、蔬菜、醃橄欖，呢一種麵包煙煙韌韌都幾好味，再配埋唔同口味嘅配料，真係好有新鮮感呀！

SPINACH NARGESI
呢一道菠菜煮蛋配乳酪檸檬我自己私心覺得好好食，因為乳酪檸檬係一種好帶到人開胃嘅醬料，估唔到咁夾菠菜煮蛋！好簡單嘅材料，但非一般嘅好食！

香料紫米醃煮羊腿
本身自己對羊冇乜偏愛，但朋友話聽講呢到嘅羊係好出色，所以就即管試試！首先上碟擺盤係好靚，對於我黎講已經好加分，食落口感軟嫰且香味濃郁，都真係勁濃羊味好酥香，朋友好鍾意食！

SIGNATURE DESSERT SELECTION
鮮果拼盤、開心果朱古力忌廉酥餅及乳酪奶凍配無花果及紅雜莓果
甜品嚟講最出色嘅係開心果朱古力忌廉酥餅，本身好鍾意食開心果，有埋朱古力就更加無敵啦，佢好似整到雀巢咁咬落一絲絲好有口感！