吉吉點 (觀塘)

已經有成個月無去飲茶, 尋日見朋友share 佢係呢間吉吉點心店食野話唔錯, 見得閒就同咗呀媽去飲下茶.
雖然唔係酒樓, 但呢間點心店一樣有得開茶, 一樣用籠仔蒸點心. 見佢點心紙都有幾多選擇, 我地兩個人唔食得咁多只係叫咗5籠點心 + 一碗老火湯. 即蒸點心果然係唔同D, 每樣點心都新鮮蒸出黎, 皮同埋肉餡都唔會爛, 而且肉質都可以保持鮮嫰彈牙. 每款點心都有佢好味之處

燒賣皇 - 大大粒, 一口都食唔晒, 蝦肉同豬肉分佈平均, 豬肉肥瘦都適中, 咬起上黎有豬肉香味又有蝦肉鮮味, 唔錯

蝦餃皇 (半份) - 蝦餃皮好簿, 有透明感, 雖然皮簿但夾上黎唔會散, 仍保持一定煙韌度, 餡料夠豐富, 充滿咗成粒蝦餃

蒸排骨 - 呢幾年去酒樓都好少叫蒸排骨, 是關好多時都食到雪味或類似梳打粉的味道. 見呢度係手工點心所以大膽試下, 果然無令我失望. 排骨肉嫰, 無雪味, 汁料唔會傑tat tat, 而係清清地咁伴係排骨底.老火湯好夠火喉, 而且湯料都好多, 一碗湯夠兩個人飲.

呢間點心幾真材實料, 味道唔會太鹹或者太甜, 我同老媽子食完點心都唔覺得口渴, 應該係無味精之選. 埋單一人幾十蚊, 抵食!

WOFT (旺角)

對於芝士迷黎講, 芝士火鍋一D都唔陌生. 但好多時食黎食去都係意X屋個隻, 但價錢偏貴. 最近見個friend 屋企附近開咗間新餐廳酒吧有芝士火鍋食, 我地就即刻約好一齊去試下喇!

佢除咗有原味芝士火鍋, 仲有黑松露芝士火鍋同埋腐乳芝士火鍋, 兩隻我地之前都未試過, 今日就揀咗黑松露芝士火鍋試下

等咗一陣已經上枱喇, 陣陣芝士香同埋黑松露味已經令到我地流晒口水. 等佢”滾”咗一陣, 我同朋友就即刻放D配料落去喇! 配料有面包, 新薯, 西蘭花同埋長通粉. 幾款都有唔同口味, 新薯口感較爽口; 西蘭花就係清新之選, 因為佢個型狀係粒粒花, 所以可以沾上更加多芝士汁; 長通粉個心中空, 芝士汁可以充滿咗中間空心位置. 配料新鮮, 但最重要當然係芝士汁. 芝士汁比我平時食開的香濃, 而且亦加入咗足夠墨松露醬, 令成個芝士火鍋的香味更上一層樓, 芝士汁本身個質地較稠身, 所以亦都容易沾上配料上, 唔會一令上黎就滑走晒.兩個人食份量配對足夠, 以呢個質素黎計, 我個人覺得幾抵食. 下次會再黎試埋個腐乳芝士火鍋!

安安燒 (筲箕灣)

之前朋友介紹話呢間串燒店好食, 但一直都無機會試. 今日見放假, 就打電話黎book位試下
行到門口已經聞到好香, 係個D辣辣燒烤味道. 我地坐底就即刻剔野食喇! 野食種類都好多, 大致分為: 肉類, 丸類, 海鮮類, 菜類. 我地叫咗幾款BBQ必叫野食同埋幾款未試過的. 包括有:
1) 茄子 - 茄子好大條, 燒到好香, 熱辣辣咁放上枱聞到好香, 加埋面頭的蒜蓉同辣椒吊味, 好正
2) 烤雞腎串 - 面頭食到有燒汁, 令到佢個肉質保留到水份, 而且好夠味, 有微微焦香味道, 唔錯
3) 燒雞翼 - 雞翼係我呢篇食評的推介, 雖然雞翼看似普通同周圍都食到, 但呢間安安燒的雞翼係燒到啱啱好, 外層有脆皮的感覺, 裏面就好嫰滑同充滿肉汁, 加埋灑上面的孜然粉同埋辣粉, 非常惹味!

4) 麻辣牛骨髓 - 呢款係用鍚紙包住黎燒, 麻辣味都幾香但個人認為可以再辣D, 因為我自己鍾意食牛骨髓的口感, 所以會比個like
5) 沙茶醬墨魚咀 - 墨魚咀略嫌大粒咗D, 食到落中間味道有少少唔夠
總括黎講, 呢間安安燒D串燒辣度剛剛好適合香港人口味, 但如果覺得唔夠辣可以自行加辣粉同孜然粉, 我自己就覺得好夠味, 下次黎會試埋其它野食

尚上下夏 - 養生雞煲火鍋 (尖沙咀)

好耐都無打邊爐, 今日有同事生日就約埋去近近地尖沙咀附近食個雞煲火鍋.

呢間尚上下夏之前經過已經聞到好香, 但一直無機會試. 因為個名幾特別, 所以印象都幾深刻, 今日終於可以試下.

呢度最大好處就係有得揀鴛鴦煲, 可以揀一邊辣一邊唔辣, 同埋有得揀部位. 雖然我地幾個都食得辣, 但都想試下唔同口味, 所以叫咗一邊辣雞脾, 一邊唔辣雞胸. 雞煲份量好足夠, 雞件入味而且好香. 配料望落都好多. 包括有洋蒽, 芫茜等, 但最驚喜係裏面加咗豬皮, 我地食雞煲食到咁上下先發現. 當時豬皮已經索晒D汁, 好惹味! 我地開始打邊爐之前仲叫多咗一碟

到打邊爐, 我地一邊叫咗麻辣湯, 一邊叫咗芝士湯. 麻辣湯加埋雞煲餘香, 主要用黎焯肉, 貪佢辣得夠過癮! 而芝士湯就用黎焯海鮮, 焯完海鮮再加稻庭烏冬, 變成一鍋日式芝士海鮮鍋, 正

佢地個靚牛皇係幾正, 切得有厚度, 最佳做法係放落湯焯一焯, 但唔好太耐, 等到裏面仲keep 住有些微生, 咁樣就可以鎖住肉汁又可以有最佳口感. 另外黑柏葉都係市面上比較少見, 快速焯一焯, 沾上湯汁黎食好爽口. 其餘我地就選擇咗新鮮海鮮, 花甲, 蝗子就當然唔少得, 仲叫咗新鮮鮑魚, 非常鮮味

安安燒 (旺角)

睇到網上宣傳話呢度有芝士撈丁食, 我同好友兩個芝士鬼即刻話要去試一試. 記得以前係灣仔食過芝士撈丁, 但個間舖結業後已經好耐無食. 我地兩個都好壞念

今日終於搵到另一間美味芝士撈丁了! 呢間芝丁撈丁個名叫”三重芝士撈丁”, 意思係用三種芝士混合而成, 而Topping 就可以揀黑松露醬或者係饅魚汁. 我自己好鍾意黑松露醬的香味, 所以叫咗一碗我同朋友Share 食. 一上枱熱辣辣, 聞到D芝士香已經流酒口水, 加埋黑松露的香味, 食慾大震! 呢款三重芝士撈丁味道夠濃, 相比起以前食開的芝士撈丁更濃味, 亦唔會水汪汪. 而黑松露醬份量都好足夠, 撈晒成碗面都唔成問題.

上次去佢分店食都無留意呢間串燒店有芝士撈丁食, 而且做得非常唔錯. 真係一大驚喜. 當然我地仲有叫咗其它串燒食啦, 其它串燒食物都燒得好香好好味! 無奈得兩個人未能試太多款色, 下次叫多D朋友就可以食多D