水準一般

大自然素食 (銅鑼灣)

2:00pm去到食午巿, 叫左個4人餐, 包括: 1碟小食, 一個湯/羮/翅, 4個餸(全部自選).首先黎左個小食牛蒡, 味道一般, 建議選擇另外兩款上菜速度值得一贊. 可能因為已經兩點既關係, 大部份食客一早到哂菜, 得我地呢枱新入席, 所以d菜都幾快上. 湯方面我地order左個翅, 賣相幾得, 但味道偏淡食完個翅就進入直路, 四個主菜齊上, 金銀蛋時蔬唔錯, 清清地, 岩哂送飯;

魚香玉子班腩煲較重口味, 煲底既白菜仔同埋做配菜既東菇片索哂d精華, 玉子滑嫩, 好入味, 但d班腩口感過硬, 味道偏咸(可能煲耐左), 拖沉左整體質素;

西班牙海鮮炒飯, 朋友形容: 好似冇落糖 / 落唔夠茄膏既西炒飯 (本人認同);

沙拉骨, 食落有d o趙緊肉既感覺(雖然明知係素食), 咬感唔錯, 係猴頭菇黎既, 可以一試.

兩點九左右已經見到d姐姐開始清枱同埋單(聞說呢度下午茶半價所以好多人), 一出門口已經見到條人龍, 好彩有幾部電梯, 即使人多候Lift既時間都好快, 對於我地呢d趕住返公司既打工仔黎講, 加分

總括黎講, 偶然黎餐清清地, ok既

賣單連茶介錢約$380多d, 感覺唔值呢個價錢, 建議下午茶時間黎會抵d