原本打算食韓國菜但實在太想食日本菜
最後求其行入一間食
最後我哋決定要腐皮壽司，鰻魚手卷，炸蠔拉麵，金龍卷，三文魚反卷，蒜蓉焗生蠔。

其實唔係好多人點壽司，
但係我哋啲壽司都等左好耐，
應該有半小時，
但係仲要黎錯左，
卷物等得更耐，等左九個字，
個拉麵仲將近一個鐘
明明人哋同我地一齊落單一齊交單入廚房，
但都可以早我哋三個字到。
最有趣嘅係刺身對要等超過一個鐘！
我哋相信之所以卷物同啲壽司咁耐未到，
因為佢根本就無飯，
我睇住佢地兩碗岀煙嘅飯拎去整壽司嗰度。

味道方面，壽司同手卷好正常
卷物啲飯係暖嘅，一大舊飯，啲飯仲要係散嘅，好多飯又得少少刺身，唔知係因為佢暖定係本身味道嘅關係，食落有D奇怪。
至於炸蠔拉麵，個拉麵都好正常，
但係個蠔就一 Pat粉無乜蠔味。
蒜蓉焗生蠔上面D蒜蓉好燶，啲汁都苦嘅，
刺身幾好，好大隻，而且只係8蚊有兩隻

服務方面，啲姐姐都好好人，
不過有食物放左係到好耐都唔拎比人。

食左一大半先記得，所以只影左兩張相

心血來潮想食燒鴨瀨，
所以就黎左呢間專食燒味嘅舖頭。

一坐低就落單，朋友都點好就到我點，
我落到一半個侍應開始同人吹水，
當然唔係同我地，我就話要凍檸茶，
佢無反應，我再大聲啲講，
佢又無應，我又怕佢會漏單，
就再講多次，之後佢就走左，
好啦我諗佢聽到，因為我講左三次又好大聲，
佢又手郁郁，應該落左單。

之後過左一陣，佢竟然問我，
你要唔要嘢飲，
我個下真係有啲忟，
我叫左三次你掛住吹水唔專心聽，
但我都算，就再講多次凍檸茶。

啲嘢食到左，朋友叫左碟口水雞飯，
碟雞勁大碟，唯獨唔太辣，
另一個叫左海南雞飯，
明顯比口水雞少，但都正常份量，
但個醬就得兩隻，普通葱油加酸辣個醬，
無點雞豉油，
飯係白飯，都好爛，不太好吃，
燒鴨瀨，瀨粉個樣勁似米線，味道正常。

食完想飲嘢，見嘢飲未到，
以為比較慢，點知朋友一早到左，
之後發現個位侍應又無落到，
真係激到我呢
落左五次都無得飲。

好啦，幾經辛苦有得飲，
佢就行埋黎，一手拎起我枱上兩舊紙巾放落我碟未食完嘅鴨到，先再問我要唔要，
有無病？你未問就放上去，咁我可以點？
之後我話要佢就拎起返紙巾，
不如你倒完落垃圾桶再問？

呢個侍應真係無敵，我以後見到佢都唔會再食

一日去左食兩次，原因係因為女朋友勁中意食呢到嘅炸雞，同埋連我咁怕炸雞啲辣醬都覺得好好食。
之所以發現呢間嘢係上網見到人講起好抵，咁岩去開呢到就帶憎爆韓流又偏偏好愛韓國嘢食嘅女朋友黎。
店舖位置好近佐敦地鐵站，過兩個街口轉個彎就搵到佢嘅座地招牌寫住haruharu。
一行到發現長方形店面好細，得六張二人枱砌成兩張六人枱，但門外有多幾張摺枱，摺枱隔離仲有graffiti，店內有電視播韓國mv好洗腦，我一哼就比女朋友睥 。
之後點嘢食，一開頭我明確聲明我只會食一兩件雞，最後決定左叫紫菜包飯(~$25)，雜菜粉絲~$45)同半份炸雞(~$68)。

一點完嘢食就送上三款泡菜。左係女朋友最憎嘅合掌瓜 不過佢都好勇敢地試左舊之後就無再食，合掌瓜味道無乜特別，中間係泡菜，都幾辣但又好好食，右手邊係豆芽，我最中意呢個

食完泡菜就等主菜，第一樣到嘅係紫菜包飯，女朋友好中意食紫菜包飯，原因係因為啲芝麻同麻油，不過呢到嘅同平時食到嘅無乜分別，都係醃蘿蔔青瓜午餐肉同紅蘿蔔，無hungry korea個魷魚紫菜包飯咁好食，唯獨係點嘅醬油有小小唔同，但係又幾好食喎


之後就到我最愛嘅炒粉絲 ，不過不失但葱未好濃，淡返小小就好，唔會太油，有冬菇，所以比好多得菜嘅算「多料」。

又到返女朋友最愛，炸雞 有分有骨定無骨，我地兩個懶人緊係點無骨，睇相好似好少但其實份量好足，半份都好多，八到至十舊，係之前食一份嘅份量，最正係可以叫半份，因為有啲地方無得叫，攪到我地兩個又食唔哂無得食。呢個炸雞正在佢個甜辣醬唔膩，一開頭明確地話只會食兩舊嘅我都同女朋友爭食，因為平時食嘅都好膩令我食兩舊就唔想食，呢到唔會，實在一百萬個推介 不過對我地好唔食得辣嘅人而言有點辣。


夜晚同女朋友又唔係好餓又口痕，女朋友又話相再食就又返黎，不過要等，因為入面有枱食完無視岀面十幾人等緊慢慢傾計，其他人又岩岩先食嘢，最後等左四個字，到夜晚乜都無哂啦，無紫菜包飯都無無骨炸雞，所以成功迫女朋友就範試我晏就已經想試嘅芝士蛋卷($68)，都唔平，不過討厭茄汁嘅我覺得茄汁太多，但中意茄汁嘅女朋友就嫌太少 芝士味略嫌比茄汁摭左，不過都幾好食
唯一可惜嘅係飲品無乜揀，除左酒精飲品就得罐裝飲品，仲要得可樂橙汁，無大多韓國餐廳有嘅韓國芒果汁等等。

但姐姐服務好好，多謝前多謝後，食得太開心，絕對會帶朋友黎。

整體黎講真係好好食，令到女朋友繼續心思思炸雞同紫菜包飯，環境不錯，坐店入面好舒服，外面則還好，但姐姐連岀面嘅地都拖算係咁，服務一流！絕對會再黎！

一心諗住同女朋友去食韓國野 但openrice入面係元朗既韓國餐廳都試過哂 見依間未食過 張封面圖又幾有韓國味道就黎試下喇 我地去到門口都覺得好似唔係依間 但對一對個名又一模一樣 所以都係入左去 我地六點半到到 所以都無乜人 唔使等 入去坐低 望一望成個環境 個幅寫滿韓文既牆已經無左 女朋友行過個陣已經唔信呢間同一樣 再望埋餐牌 心諗中伏了 韓式野食只係得番炸雞 無左另一個食評寫嘅餐 其餘既都係西餐 意粉牛扒之類 但坐低左又唔好意思走 所以都係死死地氣叫野食喇 無乜野食揀 叫左半隻炸雞 同黑椒牛仔骨配意粉 問waitress有無得揀幾成熟 佢好驚訝呆左一陣 之後問返我地:你想幾成熟 我地叫左五成 好快上左蒜蓉包同忌廉湯 個湯我覺得幾好飲 女朋友話似飲加左人工花香嘅湯 之後上左黑椒牛仔骨 上之前個waitress强調五成熟 一切開 全熟…………其實無得叫咪講無得叫囉 不過個扒幾好食 但意粉好好好好少 我地q左四下(細啖)就食哂 之後炸雞到左 好好食 有啲辣 份量幾足 原本以為唔會夠食打算再食另一間 最後女朋友已經飽到死左我都夠就算 最後+1 total $197

女朋友住開呢頭但都無食過麗江， 但每次經過都見到好多人等， 又聽人講好好食所以先把心一橫等一次。 拎左9號飛，岩岩叫到5x，到60又叫返1號， 咁都唔係等好多個，而且走左好多人所以都等。 但最後我地等左就黎一個半鐘 點解？ 因為佢不斷比熟人入先， 我地真係想問點解要派籌呢咁？ 不過女朋友話等左咁耐又聽人講咁好食先等。 入到去，一張60*60cm左右嘅枱坐四個人， 個碗又大，25cm左右，迫到喊，轉個身都撞到人。 不過都算喇，好食嘅嘢先多人等嘛！ 之後叫左兩個酸辣湯嘅米線，一個要左腩肉，一個叫左雞翼尖同雞翼。 之後又等左半個鐘 難怪咁耐先有位，因為比人打尖加好耐先煮好。 幾經辛苦等到嘢食，一黎到個味係好奇怪嘅酸叔味(聽返人講好似放左啲唔知乜落去先咁)， 不過食落ok，正正常常， 腩肉味淡又鞋， 雞翼尖一般，唔夠"林"， 不過雞翼真係幾好食，見好多人叫 但overall唔太好食囉。 入面侍應態度ok，係收銀個個令人側目,因為佢不斷比人打尖，又勁惡！從未去過咁差嘅食店，真係不得不係到打我第一個食評！ 如非必要，我唔會再去！ ！！