Roganic的3-course午餐真係冇得輸！喺銅鑼灣用$380可以食到呢個質素嘅食物，享受呢個環境及服務，個人認為超值！ 餐前小食永遠都係最令人期待嘅一個環節，香脆和牛撻真係靚到一個點！仲有自家製米通！頭盤今次揀咗食蒸蛋，上面有新鮮青豆。 主菜有兩款，三黃雞一直都係我嘅至愛，雞胸肉都可以做到咁嫩！今次有主廚Chef Ash入嚟serve我地，好開心！ 朋友點了sea bass，魚肉鮮美，仲有台灣來的白蘆筍！ 最後甜品，不會過分甜膩，帶有濃濃焦糖香氣。

佐敦百誠大廈最近好紅，2樓sell懷舊火鍋，3樓新開了一間靚裝燒肉店 [和牛燒肉一郎]，餐廳準備食物嘅地方全部以open kitchen設計，非常乾淨企理。任食區域全獨立包裝：沙律、飲品、蛋糕及雪糕選擇非常多，位置亦寬敞，唔會聚集人流。 餐廳以「和牛食べ放題」吸引顧客，最便宜套餐只需每位$298，澳洲和牛及海鮮拼盤放喺刺身船上，限時120分鐘，可以無限添食。另加$48/$58無限享用自助salad bar，那裏的飲品、沙律、蛋糕以及雪糕都係任食的。 $298套餐係入門價，呢度一共有6個套餐俾大家揀，價錢如下： Course A - 平日$298 | 週末$348 (澳洲和牛) Course B - 平日$348 | 週末$398 (更多部位的澳洲和牛) Course C - 平日$408 | 週末$458 (小田和牛、牛肉刺身、牛丼) Course D - 平日$498 | 週末$548 (更多部位的小田和牛、牛肉壽司、海鮮) Course E- 平日$708 | 週末$758 (餐廳絕大部份肉類 + 極上牛舌） Course F - 平日$888 | 週末$938 (餐廳所有食物，包括最推介大家吃的小田和牛 - 夏多布里昂部位) 餐廳另設小童價，收費由$188 起，基本上，我建議大家吃Course C以上的套餐，餐廳獨家供應的小田和牛由日本鹿兒島直送，獲獎無數，口感柔滑濃郁。Course D以上先有的牛肉壽司亦值得大家一試。 大家揀食邊個set都好，都要加錢吃招牌 [小田牛 - chateaubriand夏多布里昂部位]，係牛柳嘅中心部位，肉味濃且軟熟。服務員會細心幫你處理，首先將牛油放喺燒肉汁內融化掉，然後將牛柳放喺網上慢慢燒熟，期間兩次將牛肉浸入肉汁慢慢燒香，最後將蒜片放喺牛柳上。一啖放入口，滋味無窮。單點價要$398/份(約四件)，最貴的Course F雖然索價$888，但就可以任食呢款牛肉。 不可不提的，還有餐廳特製的 [燒肉新幹線]，廚師們將新鮮切割好的燒肉放喺輸送帶，撳個掣就將擺得超靚嘅燒肉拼盤送到你面前，為是次晚餐增添不少樂趣。提提大家，餐廳內唔係所有位置都可以接觸到輸送帶，如果大家想玩埋 [燒肉新幹線]，記住訂位時request埋。

75折吃🦞超抵龍蝦晚餐🦞三道菜只需每位$299 愛吃龍蝦的朋友要留意喇！如心海景酒店 Cafe Circles推出波士頓龍蝦套餐，而家做緊65折益街坊，只需$299便可品嚐到。 三道菜套餐有三款頭盤比你選擇，羽衣甘藍藜麥香橙西瓜沙律清新好吃；車厘茄牛油果擺盤勁靚。 主菜當然係Boston lobster，有兩種做法，分別係黑松露意大利飯或海鮮扁意粉。本身價錢包半邊龍蝦，始終全餐飯都係海鮮，如果想再飽肚㸃，非常建議大家加$80就可以升級食原隻龍蝦！龍蝦肉質好嫩，火候控制得好好，味道亦鮮。 最後的甜品也有心思，以青蘋果造型示人，內裏竟然係抹茶mousse，再配青蘋果泡沫。以這個價錢來講，二百幾，就可享以上食物，絕對收貨。

睇時裝雜誌，見到呢個包裝得咁靚嘅Afternoon Tea Set，立刻打電話去訂。後來得知，原來客人都可以喺餐廳食埋呢個粉紅色下午茶的，雖然外賣有八折，但我們最終都選擇了堂食，可以同親愛的朋友見見面。 穿齊整黑色西裝的服務員專業地將Afternoon Tea Set拿過來，為我們優雅地打開粉紅下午茶序幕。大家都興高采烈，用充滿期待的心神去迎接這個粉紅色炸彈，點知...... 先講粉紅色包裝盒，設計確有心思，紙質比其他外賣盒厚淨很多，粉紅色忌廉蛋糕設計屬Moschino秋冬推介款式；下午茶客戶亦可憑消費單據，到Moschino商店做簡單網上登記手續，換領20ml Moschino熊仔香水，品牌粉絲一定喜歡。但係究竟一個Tea set係送一支定係兩支香水呢？我只收到一支，但係我見到有人收到兩支... 很可惜，漂亮包裝裏面是令人失望的食物，鹹點同甜點均完全不到水準。新鮮攞出來的下午茶，差唔多所有撻皮都係腍的.....甜品甜到喊.....顏色娘到爆....係餐廳求其攞件蛋糕及生果撻出嚟都好味過佢。 鹹點賣相OK，但好鹹；最騎呢係用酸蘿蔔砌造型，配龍蝦撻，味道十級古怪，配搭亦令人摸不着頭腦。🤦🏻‍♀️🤦🏻‍♀️🤦🏻‍♀️🤦🏻‍♀️ 伏評係比呢個crossover tea set，Cova利園店今次真係好無辜....😣 見個包裝咁靚，最終都拎咗返屋企，影多兩幅呃like嘅相，平復一下心情先。

華麗fine dining午餐 • 超高性價比 • 每位$488起 • 星期一至日也有供應 最近出返嚟食飯，同朋友補祝生日。一行四位中學同學着靚靚去Petrus食返個birthday long lunch。 Petrus屬於傳統法國餐，去年換了主帥，由Chef Uwe帶領下獲米芝蓮一星殊榮。先講環境，位於酒店頂樓，景色開陽寬躺，坐擁無敵海景。裝修非常華麗，一身古典木制牆壁及大門，再配以優雅的藍色地氈，絕對是新開酒店及餐廳唔能夠媲美的大氣。 望一望餐牌，價錢真心優惠，選擇又多。細食嘅女士可以吃$488的2-course lunch，雖然係法國餐，但卻沒有規矩多多，迫全台人食同樣的course。以我們今日為例，我們點了三個3-course lunch($588)，另外一位點了2-course，亦同餐廳講明for sharing的。呢啲咁港女嘅要求，餐廳絕對冇嫌棄我哋，亦非常樂意配合。 不可不提的，還有這裏的午餐餐酒，索價$88/杯，也太抵飲了吧！連平時唔飲酒的我們，都忍唔住每人點了一杯助慶。 餐廳為了確保客人安全，要等到熱辣辣的餐前麵包上枱後，先容許客人除下口罩，謹慎一點也是應該的。頭盤有四個選擇，兩熱兩凍，最推介大家吃heirloom tomatoes，蕃茄非常清甜，配埋蕃茄啫喱吃，清新開胃。蟹肉牛油果凍湯賣相好靚，用上優質食材，絕對不會出錯。熱的頭盤也有看頭，蜆肉薯仔湯非常鮮味，魷魚沙律多士就相對普通了些少。 去到主菜，最精彩的一定係sea bream，連我這個不喜歡吃魚的人也大讚魚肉鮮甜嫩滑；其次是龍蝦pasta，pasta上印了綠色花紋，賣相超靚。Beef Tenderloin也是漂亮的medium rare，最後的羊肩肉配焗豆，羊味都幾重，比較切合外籍人士口味。這裏的主菜份量都幾大，女士們基本上食2-course都應該夠飽的。 去到甜品環節，有兩個選擇，另外亦有芝士拼盤。最近好多餐廳都推出無花果甜品，Petrus於檸檬撻上放了新鮮無花果，是非常時令及清新的一道甜品。朱古力撻表面上平平無奇，放入口卻不得了，質地超軟熟，可可味濃。 以這個消費，，換來這一頓午餐，大家都真心覺得超值。在此祝兒時好友生日快樂，身體健康，仔女同老公都聽聽話話。

中環隱蔽新店 • 正宗燒烤及煙燻美食餐廳 • 食肉獸天堂 大廚來自墨西哥及美國，最拿手整美式燒烤及煙燻美食。為了做到嫩滑的煙燻肉，兩位大廚首次引入 [The Beast] - 香港首個正宗柴火煙燻爐，為了將傳統美式燒烤的精髓帶給香港客人 呢個黑色猛獸焗爐真係唔講得少，所使用的山核桃木可以營造出標誌性的美式燒烤風味。餐廳剛剛開始試業，除了晚餐，亦於星期六及星期日，上午11時30分至下午4時供應每位$388的weekend brunch。另加HK$198更可於兩小時內無限量享用指定酒精類飲品。 我們一行四人嚟食Brunch，基本上可以試晒餐牌上嘅所有食物。先來非常大堆頭的sharing plates， 自家製焗豆配手撕豬肉和煙肉；炸薯寶配燒烤醬和水牛芝士；蟹肉沙律配Smoke and Barrel特色醬汁、牛油果和青檸；以及粟米麵包配Tabasco牛油等。 主菜就比大家五揀一，集合了牛腩、手撕豬肉、烤肋骨和芝士通心粉的 S&B煙燻肉拼盤係必食，工序繁複的美式腩肉散發著煙燻味道， 肉質軟熟，慢煮和低溫烹調方法果然零舍不同。豬肋骨亦做到傳統美式燒肉骨肉分離，帶有焦香。呢款主菜仲有芝士通心粉伴碟，份量十足。 另外亦推介大家叫這裏的pancake，有鹹同甜兩款俾你揀，我哋揀了甜的香蕉炮谷pancake，做得鬆軟，香蕉又多又新鮮。 甜品暫時只有兩個選擇，都是一貫的美式邪惡甜點，朱古力mud pie非常大件頭；另一款軟雪糕甜品上放了焦糖、烤夏威夷果仁，以及曲奇忌廉配棉花糖。 提提大家，餐廳最招牌的肉類基本上只於晚餐時段供應，每日都有廚師於凌晨4am返到餐廳，啟動The Beast為大家新鮮炮製最Juicy的美式燒烤肉。 雖然未見真章，都來食住Brunch先，等疫情緩和一下，先再來吃晚餐。

Grand Hyatt 外賣下午茶 • 推秋天menu • 照舊85折 掀起外賣下午茶熱潮嘅Grand Hyatt，以貨真價實作招徠，早前只需$330就可享用一盒由Tiffin’s預備的鹹甜點。10月1號起推出了秋天menu，而家買都有八五折，原價$438/兩位，而加賣緊$371。雖然比啱啱推出嘅時候貴咗$50，但仍然係眾多酒店嘅外賣下午茶裏面最抵食嘅。 這個秋天menu少了水果，取而代之的是綠茶及黑朱古力。甜品新加入了Tiffins招牌綠茶opera蛋糕，柚子味棉花糖亦頗有心思，楓葉造型的迷你紅桑梅椰子撻亦見精緻。 鹹點個人認為比上次更精彩，火腿芝士牛角包依舊非常足料，最驚喜的是龍蝦肉竹炭三文治，絕對係上次龍蝦泡芙的升級版。今次的鵝肝三文治造型比上次更精緻，味道亦更濃郁；新加入的和牛肉卷好惹味，一口一件。三文魚三文治同上次嘅做法相若，都係清新嘅青瓜味，眼利嘅朋友，可能會留意到，三文治今次冇放魚子醬.... Scones依舊外脆內軟，clotted cream、檸檬醬及士多啤梨果占都一應俱全。套餐亦跟了兩個綠茶茶包。至於包裝，表面上同上次冇分別，都係一個黑色盒，睇真啲就會發現今次個盒硬正好多，保護性高咗。 至於服務，個人認為有好大進步，酒店設有一個獨立嘅下午茶外賣counter去招呼大家，我係星期六10月3日嘅2:45pm去攞下午茶，基本上都唔使排隊，對好單據之後， 2分鐘就有得攞，更有專人幫你綁絲帶，方便你拎返屋企。

堅有料到下午茶 • 全海景 • 食物高質素• 貴得有道理

之前嚟過食lunch，已經好驚喜，餐廳上星期剛推出weekend下午茶，睇完Menu之後即刻訂位！三層架雖然唔算特別靚，但食物的矜貴及美味程度，個人認為絕對係全港top 3。

先講鹹點，有大家見到都會尖叫的馬糞海膽海鮮撻，一口撻上放了兩小塊海膽刺身，tart裏面係海鮮湯custard，絕對係一個強勁嘅鮮味炸彈。三文魚係下午茶最常出現嘅熱門食物，而餐廳竟然採用貴價的balik smoked salmon，上面還放了魚子醬，絕對唔係Hea做。

鵝肝配無花果，下面放了macaron，鹹甜配搭都幾新鮮；下午茶另一焦點～新鮮龍蝦牛角包配青口海鮮湯，牛角包裏面都有唔少龍蝦肉，牛角包焗到好脆，再配埋鮮味十足的青口湯，根本就係食緊fine dining.....蟹肉芋頭片相對冇咁搶眼，但係都好好食囉。

鹹點實在出色，甜點又如何呢？先講餐廳招牌甜品tiramisu，唔係大家食開嘅蛋糕形狀，而係比較濕潤同埋咖啡味重嘅版本，個人喜歡。伯爵奶茶瑞士卷係我嘅心水推介，一口一件，茶味香濃。芒果撻好搶鏡，芒果肉新鮮香甜。

當大家已經食到飽飽，原來仲有兩個雪糕～分別係超級清新開胃的檸檬雪葩及好味到搶食的黑松露雪糕。先講雪葩，用新鮮檸檬汁去做，比起平時喺日本餐廳食嗰啲雪藏貨好味100倍，真係想來一個encore；雪糕上有兩片新鮮即刨的白松露，與充滿松露香氣的柔滑雪糕一併放入口，真心奢侈。

下午茶收費$328/位，餐廳並沒有做任何信用卡優惠，但如果大家有海港城Zone B嘅餐飲券，可以盡情使用。Tea Set for 2 連加一的價錢係$722，大家最多可行使7張海港城Zone B $50 coupon，咁樣就可以半價享用到呢個矜貴下午茶。當然，大家另一個問題就會問，點樣先至會攞到優惠券呢？梗係要係海港城消費先有啦...

上次來Caprice，香港都仲未有米芝蓮，今次再訪，係因為之前買落四季酒店嘅dining voucher，等到而家疫情緩和，急急腳出嚟嘆番個尊貴的long lunch！ 買voucher嘅時候，四季係唔俾食lunch嘅，但基於疫情反覆，酒店最終都俾客人於午餐時段行使voucher。今日我哋食嘅五道菜餐單，由Chef Guillaume為我們發板，加埋wine pairing，埋單連加一約$2200/位，個人認為這錢花得值。 先講環境，午餐時段非常光猛，加上天公做美，喺藍天白雲嘅襯托下用膳，心情都靚啲啦。由終太遲訂位，坐唔到窗邊位置，但甫進餐廳，豪華招牌水晶吊燈在陽光照耀下閃閃新輝，兩個字，氣派！ 論服務，貼心度100%，郁一郁都會有人過嚟協助你。三星米芝蓮法國餐廳，當然有大量法國型男招呼大家，風度翩翩，再同你詳細介紹每個菜式以及所配對餐酒，都係兩個字，專業！ 先講麵包，新鮮熱辣是基本，超級推介大家吃辮子麵包，軟熟帶點辣勁。手工法國牛油用上le beurre bordier butter，有salted及unsalted兩款比客人選擇。 頭盤～夏天是吃蕃茄的季節，Caprice的蕃茄並唔係普通蕃茄，係Chef Guillaume媽媽喺法國指定農場空運過嚟嘅新鮮有機蕃茄。底層的蕃茄啫喱味道清新，配埋新鮮蕃茄肉、阿拉斯加蟹腳、同大量魚子醬進食，這個組合，有得輸嗎？ 接着是海鮮，今次吃的是小龍蝦，火候控制得非常好，肉質鮮嫩有彈性；伴碟的cannelloni注滿了味道濃郁的菇菌，同creamy的醬汁配合得天衣無縫。 Chef為我們準備了兩道主菜，seabream及鴨胸，大家都將focus放喺鴨胸身上，因為實在太出色了。由chef親自serve，打開煲蓋，香煙四起，粉紅色的鴨胸肉嫩多汁味濃，配對的餐酒，竟然用上滴滴金chateau d'yquem，靚仔sommen拎支6L的d'yquem(1996)過嚟，真係忍唔住要影多兩幅相。 甜品係招牌香蕉朱古力千層酥，配搭看似簡單，但係要做得好吃，絕對顯功力。基本上已經飽到反肚，最後的petit fours本來無諗住食，但基於每件都非常好吃的情況下，尤其係焦糖朱古力，卒之都係全部食哂..... 已經約定，每年中秋前夕都要嚟豪一豪，喺度預祝咁多位中秋節快樂。

超夢幻紫藤花下午茶 • 餐廳露台飽覽 💜紫色花海 • $258/兩位 • 滙豐信用卡再享八五折優惠 近期嘅打卡熱點，北角匯的3000呎[紫藤花夏祭] 必定榜上有名，佈置得超有心機超靚，唔講真係以為去咗日本福岡，不過每逢週末，就算上網登記咗都要大排長龍，唔想同人迫，又想影到靚相，仲要有好嘢食， PJ今次真係幫到你😜 位於商場裏面嘅法日餐廳Briketenia剛剛推出 [紫海花田下午茶]，更特別預備了期間限定紫薯泡芙及紫色氣泡特飲。下午茶有四咸四甜美點，兩者都出色。芝士漢堡包非常足料，厚厚的漢堡扒，大人細路都喜歡。日式炸豬扒三文治做得好juicy；三文魚脆餅及巴馬火腿法式多士都做得好精緻。 甜品都有驚喜，先講紫薯泡芙，除咗顏色靚，紫薯味道亦夠濃；最好吃是朱古力甜點，脆脆朱古力外殼包着藍莓味香濃的芭菲。檸檬撻夠酸夠清新，生果串串也用上新鮮生果，$258/兩位，仲要包兩杯靚靚紫色特飲真係超值。