好味屋餐廳小廚(灣仔)

20-11-2009

收工後「下場」喺灣仔, 喺灣仔返工的朋友又要開夜, 不如一齊食 dinner 吧. 是日對交加里的速食店無興趣, 見未食過的呢度供應星馬菜色, 又試試. 叫了魚喇沙配米粉; 朋友就食呢度的招牌海南雞飯.

先嚟朋友的熱奶茶 (海南雞飯的餐飲), 堂食竟然用外賣紙杯 serve!? 色水不錯, 飲落幾滑, 奶味 vs 茶味約 3:7, 朋友嫌太「茶」, 我就覺得剛好, 結果由我「包底」

海南雞原來並無去骨, 朋友好唔 likey , 我倒覺得無所謂, 不過雞皮軟弱無力, 完全唔爽口; 雞肉亦一般, 黑肉就叫幾嫩滑, 但白肉係嚡得「挖喉」 另上的醬汁只得薑茸及酸辣汁, 試了後者又覺得唔夠酸唔夠辣, 唔多掂.

油飯 / 雞汁飯唔「油」, 食落乾身煙韌, 但實在太唔夠味了, 還是般咸道嗰間 (http://www.openrice.com/restaurant/commentdetail.htm?commentid=1940028) 好.

冬瓜雞湯幾清, 帶輕微胡椒味, 無乜 MSG 痕跡, 叫 ok 吧.

仲有碟前菜 / 花生 / cashews, 食了點漬木耳, 酸酸爽爽, 又反而不錯.

魚喇沙米粉底就完全係一碗面頭淋了咖喱汁 (?) 的雜錦米粉... 湯底薄, herbs 香薄, 無椰香, 遑論海鮮湯了; 魚係炸過的急凍魚柳, 叫幾腍滑; 面頭的疑似咖喱汁唔辣, 帶椰香咖喱香, 反而幾惹味; 米粉十分索汁, 叫 ok; 其他配料有豆卜, (雪)青口, 魚片及炲蛋一隻, 其中最喜歡甜甜的彈牙魚片, 又最唔喜歡硬硬實實的無誠意炲蛋...

食物一般, 環境就係幾乾淨光猛的茶記格局, 不過伙計們太唔理人了, 印象麻麻.

埋單每人約 $50, 唔貴, 但食物絕對稱不上「好味」. 連新加坡文華海南雞 (!?) 都搞成咁, 無興趣再來了. 下次都係食返泰妃雞 (http://www.openrice.com/restaurant/commentdetail.htm?commentid=1973730) 吧.

老地坊小館(上環)

20-11-2009

原本想去阿爸介紹的隔嚟「金葉」食海南雞, 但見到呢間上海店又好似不錯, 結果撞了入嚟食碗醉雞拉麵 ($48).

呢味 menu 上有「老地坊」推介 label, 不過質素認真麻麻 -- 醉雞份量唔少, 但完全係「醉還醉」,「雞還雞」, 雞件食落完全唔入味0架喎 , 雞皮軟撻撻又勁多肥油, 連 (寥寥可數的) 雞肉都係嚡口的, 唔得 酒汁就好勁酒味, 帶點苦澀, 麻麻哋喜歡.

拉麵質地幾煙韌, 不過麵條及湯底都淡出個鳥來, 唯有自行淋上大量醉雞的酒汁, 叫做無咁悶.

環境係茶記格局, lunch hour 人多擠迫, 搭檯在所難免, 食完快閃好了.

$48 埋單, 唔滿意, 唔抵食,「淒涼面」唔想慳了. 唔知其他食物會唔會好 d?

峇里閣 - 馬來咖喱屋(中環)

19-11-2009

又係朋友 J 約的即興 lunch, 行上行落嚟到「山腰」Green Mouse (http://www.openrice.com/restaurant/commentdetail.htm?commentid=1952268) 旁呢間咖喱店, 平平哋一試佢的午市飯餐 ($35). 叫了咖喱牛腩, 跟例湯及熱奶茶; 朋友的就好似叫 「馬來棧煎秋刀魚」, 跟甜品及凍檸茶 (凍飲加 $2).

例湯好似係節瓜排骨湯, 味道好甜, 唔知仲落了 d 乜嘢? 天氣乾燥, 飲一碗幾清潤的, 感覺還不錯.

咖喱牛腩飯賣相「頹」得很, 味道亦唔好咗去 -- 咖喱係港式, 但唔香唔辣, 一味鹹, 仲要水汪汪得拌唔到飯 ; 牛腩就係 either 硬硬嚡嚡, 口感「湯渣」到爆的勁瘦, or 一舊舊軟撻撻但又無味的肥油, 唔掂. 唯一叫做好 d, 應該就係夠粉腍的薯仔, 及寥寥可數的軟腍牛筋. 勉強食晒佢, 但食完好口渴, 睇嚟 MSG 度唔低喎?

朋友的秋刀魚賣相似「炸」多 d, 另奉上一小兜疑似泰式酸辣汁. 望落乾爭爭, 我無試, 但據聞幾難食

熱(港式)奶茶又反而 ok -- 滑口, 奶味 vs 茶味約 6:4, 都收貨吧.

無試朋友的椰汁西米露, 不過朋友又話「麻麻哋好食」...

食物麻麻, 環境就叫幾好坐, 不過阿姐態度認真差勁, 悔悔氣氣又一副唔想睬你的樣子 , 令原本已幾爛的心情「再爛一成」, 真不得不送個「淒涼面」俾佢以洩心頭之憤.

埋單 $35, 唔貴, 但唔會再來了,「山腳」嗰間咖喱店 (http://www.openrice.com/restaurant/commentdetail.htm?commentid=2038328) 好食得多!

連累朋友 J 陪我浪費 quota, 真有點唔好意思. 下次唔好咁「即興」, 早 d 約我哋再去食好一點吧.

景記咖啡(上環)

18-11-2009

食完蛇羹成身暖晒, 但當然未夠飽, 近近哋到上環街市搵個茶檔食份三文治, 嚟到最近門口的呢檔. 簡單叫了熱奶茶 ($10), 加份蛋牛治 ($10).

熱奶茶色水幾「茶」, 飲落唔算滑溜, 奶味 vs 茶味比例約 3:7, 係幾香茶味, 幾喜歡.

蛋牛治 (又唔記得叫烘底喇, 唉... ) 純為填肚, 又估唔到幾好食 -- 蛋炒得好滑, 鹹牛亦當然滑, 食落鹹得來香, 而鹹牛 vs 蛋比例係 50:50, 滿足.

熟食中心阿叔阿姐們快手快腳又幾友善, 不過環境就當然唔好 expect 太多, 呢度無九龍城 / 跑馬地咁乾淨的.

放低 $20, 可以一試, 有機會再食公仔麵吧.

蛇王林(上環)

18-11-2009

凍到甩鼻的一天, lunch 腦裡只有 5 個字 --「我要食蛇羹」!

無分大中細的蛇羹 ($35) 份量唔少, 比已經幾大碗的銅記「蛇王二」(http://www.openrice.com/restaurant/commentdetail.htm?commentid=1875928) 更大 湯底極級濃甜, 配料就有新鮮蛇肉幾「粗壯」, 木耳絲, 薑絲及冬菇, 勁多「湯渣」夠晒有咬口, 啱晒我 仲有分開上的檸檬葉及薄脆, 檸檬葉令蛇羹清香唔少, 薄脆就真的又薄又脆 , 帶點麵粉香及「炸雲吞」feel, 浸落蛇羹一齊食, 滿足

環境簡陋又懷舊, 坐喺一個二個貼滿「毒蛇」label 的「百子櫃」旁食嘢, 都咪話唔驚, 哈哈 店員全屬上了年紀的老伯, 好友善好有禮貌, 離開時身心都覺得暖笠笠

$35 一碗, 值得一試.

Pret A Manger(中環)

17-11-2009

忙了一個早上, lunch 又時間緊迫, 唔傷腦筋諗食乜了, 又去 Pret 買 d 嘢返公司速食吧. 是日天寒地凍, 唔食 salad / salad wrap 了, 買一個熱 wrap 搭一份凍 sandwich 吧.

熱 wrap 係 Malay Chicken Curry Wrap* ($36), 用 tortilla 包住 chicken, roasted pumpkin, red pepper , red onion 及 curry sauce... tortilla 頭頭尾尾烘得有點脆口, 食落帶麵粉香及 cracker feel, 不過餡料就麻麻了, red curry 汁稀如水, 少甜, 但唔香唔辣; roasted pumpkin 唔甜, 口感亦略嫌唔夠粉; red onion 就爽而無味道. $36 一碌, 試過就算了.

Sandwich 係 crayfish & roquette# ($22), 有小龍蝦, roquette 辣菠菜, 檸檬汁及 mayo, 呢個一向係我的至愛, 不過今次的整得麻麻哋 -- roquette 一貫新鮮, 但小龍蝦太乾了, mayo 又落得太少, 食到口都乾埋

今次食物麻麻, 當 comfort food 真係唔多掂, 不過我相信會繼續幫襯的 -- 鬼咩, 樓下「疑似咖啡店」咁難吃

* 資料來源: http://www.pret.com.hk/menu/wraps/hwrap_malay_ckn_1056.shtm

# 資料來源: http://www.pret.com.hk/menu/sandwiches/sw_crayfish_roqu_390.shtm

La Bouteille (New)(中環)

16-11-2009

是日「亦師亦友」, 但又「師多過友」的 V 約食 lunch, 帶路嚟到呢間幾隱世的法國 (?) 餐廳. Set lunch 一律 $110, 有 soup or salad, 一 main 及 coffee or tea, 想食甜品就加 $20:-

湯係 tomato soup, 質地濃稠, 飲落勁(茄膏嗰隻)酸, 稍鹹, 又帶點 bolognese 汁的味道, 個人而言一般喜歡, 還是清一點的蔬菜湯較對胃口.

跟湯的 bread basket 就反而唔錯, 小法包烘/焗得外鬆脆內軟熟, 可惜牛油無 soften 先奉上啦.

V 食 Parma ham salad, 賣相不錯, 唔知好唔好食?

大家的主菜都揀了 braised lamb shank, 屬 today's special... 羊膝燴得軟熟, 唔會太乾, 味道清香, 配上帶點蕃茄味的 gravy (? 味道同 tomato soup 有 9 成相似 ), 好好食喎 On the side 的亦唔馬虎, 紅蘿蔔軟腍又甜, potato puree 唔膩又十分軟滑, 好食. 份量勁大的一個主菜, 据吓据吓食吓食吓, 結果係清了碟

咖啡就認真麻麻 -- 唔夠香, coffee base 稀如水, 齋飲味道已覺得幾淡, 落奶及糖後就直程成杯「疑似咖啡」咁味, 唔掂.

加 $20 的甜品就揀了 creme brulee (亦可選 praline cheesecake 及 blood orange sherbet), 呢個就叫不錯 -- 下面 custard 極滑, 帶 vanilla 香及蛋香, 不過面頭層脆糖勁厚, 食落好硬喎; 仲有舊士多啤梨, 幾甜幾清新, 唯一唔好係太大舊了, 影響了成個甜品的 presentation.

走時仲每人送了一小個 banana muffin (見圖), 幾鬆軟濕潤, 帶點 cinnamon 香又食到粒粒 nut 的脆口粗糙質感, 幾喜歡.

食物不錯, 環境就十分好, 坐喺近 window 的 2 人檯, 開揚舒服, 比起出面的車水馬龍, 感覺十分「世外」呢 Waitress 們幾有禮貌又 helpful, service 亦不錯.

埋單每人約 $135, 張單由客氣到爆的 V 埋了, 多謝晒 亦多謝妳幫我發掘多個不錯的食 lunch 點, 我會再來的 -- 下次食 duck confit 定鵝肝 penne 好呢?

P.S. 是日無帶相機, 睇住張 muffin 相頂住先啦...

滿滿春和樓餃子店(九龍城)

15-11-2009

未及試試呢度前身「金池」(http://www.openrice.com/restaurant/commentdetail.htm?commentid=2015493) 的 dinner 佢已執笠, 果真「愛得咁遲」了, 唯有試試新店的餃子吧, 雖然佢喺黃埔時代難食到爆 (http://www.openrice.com/restaurant/commentdetail.htm?commentid=80165)

是日阿爸阿媽買外賣, 搭單要了一客 10 隻京蔥羊肉餃 ($38), 原來係「無湯」版... 餃皮厚度 ok, 食落帶點煙韌; 京蔥羊肉餡一般鮮美, 無汁, 羊味輕輕的, 京蔥味反而幾搶, 唔係太喜歡.
另奉上一小包疑似菜甫及疑似蒜味豉油, 聞落帶蒜味, 食落帶點醋嗰隻酸, 食咗都唔知係乜?

唔算好好食, 但比黃埔年代係好唔少, 睇吓幾時有機會試試其他餃子及涼菜吧.

千口甘甜品屋(大坑)

15-11-2009

食完 shabu-shabu 其實已幾飽, 但諗起上次路經的呢間糖水鋪, 又想試試, 今次嚟食個飯後甜品吧.

先嚟朋友的芒果腸粉 ($20), 賣相一般, 味道就不過不失 -- 帶點流心 (!?) 的芒果唔 in season 所以唔夠甜可以理解的; 但蛋白皮太厚, 而且好似帶點杏仁味 (??), 唔太喜歡.

我食「推介」之一的朱古力湯丸 ($20), 原來係配麥精維他奶「湯底」? 賣相一樣麻麻, 食落一樣不過不失 -- 朱古力餡甜度稍高, 係「麥提莎」味 , 湯丸皮就厚到阿媽都唔認得, 不過都叫幾煙韌的.

小店格局同小甜谷 (http://www.openrice.com/restaurant/commentdetail.htm?commentid=1969398) 差不多; 店員哥哥好有禮貌又友善, 仲會提議「我哋有榴槤, 但仲未熟, 未必會好食喎, 不如試其他?」, 招呼較嗰邊的「唔得閒理你」好得多.

埋單每人 $20, 無驚喜亦無乜特別, 不過都可以一試的.

勝手(大坑)

15-11-2009

朋友 J 介紹呢度的 shabu-shabu lunch "for its price it's very good", 是日天氣又濕又凍, 又拉了朋友嚟試試.

坐低先嚟一碗鹽燒(?) 枝豆 -- 一向喜歡食枝豆, 呢度的燒得外皮乾身微燶, 入面的豆就幾肥大, 夠粉腍, 帶枝豆獨有的清香, 幾好食, 可惜唔熱啦

大家都叫了最簡單嗰份 set lunch ($68), 我就揀了(魚立)魚清湯, 黑豚肉及稻庭烏冬:
- 最正當然係奶白色的(魚立)魚清湯, 真材實料, 飲落滑溜, 真係有點似飲緊牛奶 , 初時飲覺得清清的, 但愈滾當然愈濃鮮,「畢」吓「畢」吓, 最後成 pot 俾我「乾」掉了
- 黑豚肉呈淡粉紅色, 薄得透光, 放到湯內涮吓涮吓好快就熟, 食落嫩滑, 帶點肥脂, 但又唔覺得油膩, 就咁食或蘸點幾香又帶甜的麻醬食, 一樣好食
- 其他配料有紹菜, 白菜, 金菇, 冬菇, 豆腐及靈芝菇, 放晒落去滾到腍晒又索滿魚湯, 正! 咁多樣我最喜歡豆腐, 滑得似豆花, 仲帶點豆香, 正
- 稻庭烏冬亦不錯, 索湯滑溜, 滾極都唔會「爛」晒; 不過話雖如此, 喜歡煙韌口感的話記得唔好滾咁耐.

朋友揀了 sukiyaki 湯底, 美國牛肉配白飯:
- 試了點 sukiyaki 汁, 味道(醬油嗰隻)鹹多過(糖嗰隻)甜, 送飯都不錯的.
- 亦試了美國牛肉,「雪花」度一般, 食落亦無乜牛肉味, 不過係幾嫩的, 配 sukiyaki 汁效果又比魚湯好, 都幾好食.
- 又試了一啖白飯, 黏黏軟軟帶點米香, 討好.

每人仲跟一杯汽水及雪米茲做甜品, 但唔係喺度評呀嘛?

食物好, 環境亦不錯, 喺門口睇落好似好迫, 但坐落又唔覺, ventilation 亦做得好, 食完唔會成身火鍋味; 招呼亦十分好, 店員姐姐友善健談, 會耐心介紹湯底有乜特徵, 又會提議 e.g.「紹菜較難熟, 可以落咗紹菜先喎」, 服務貼心, 值得一讚.

連加一每人 $75, 勁抵, 喜歡日式火鍋的, 值得試試.

Oliva(荃灣)

14-11-2009

到荃灣大會堂聽音樂會, 入場前 dinner 近近哋喺荃灣廣場搞掂. 企喺商場 directory 左睇右睇, by method of elimination 選了呢間所謂意大利餐廳. 叫了 2 個 appetizer, 1 salad, 1 pasta 及 1 甜品 share 食, 點知除咗其中一份 appetizer 之外, 係無樣得! :

先嚟 table bread 及一早已落的 olive oil + balsamic vinegar: 麵包極乾, 韌得咬唔開, 隔夜的? Olive oil 及 balsamic vinegar 就又稀又無味, 超級唔新鮮喎 , 點解唔俾客人自己落!?

Appetizer #1 煎鵝肝伴白酒蘋果: 賣相麻麻, 可幸食落叫 ok -- 鵝肝面頭煎得唔脆, 但中間都叫軟滑, 無渣, 而且品質一般嚟講味道都算香了; 完全食唔到「白酒」, 只見蘋果切到勁厚, 但食落唔軟又唔酸, 感覺怪怪的.

Appetizer #2 炸芝士配蕃茄醬: presentation 不錯, 但食味認真差勁 -- 芝士係「卡夫」味 , 炸得唔油, 但唔溶又硬硬實實, 難吃! Tomato sauce 新鮮蕃茄茸及茄膏比例適宜, 食落酸酸香香, 反而不錯.

Salad 係蕃茄水牛芝士沙律: 沙律菜新鮮度一般, 蕃茄及芝士就切到「一楷楷」(非「一片片」!), buffalo mozzarella 質地異常實淨又異常嚡口, 味道淡出個鳥來, 加埋蕃茄, 無味 olive oil 及無味 pesto, 同「好食」完全扯唔上關係, 真係

Pasta 係辣牛油汁蜆肉扁意粉: 其實應該係 linguini alio e olio with clams, 不過來了一碟面頭灑了蒜粉, d 汁就稀如水的「疑似湯意」 Linguini 唔算煮得太腍, 但同 "al dente" 仍然好大距離;「湯汁」帶牛油香蒜香及少少辣, 味道其實 ok, 不過好鹹; 蜆肉係雪藏貨, 唔算韌, 算吧; 仲有炸過的蒜片, 被「湯汁」浸到腍晒, 都係唔食了.

甜品係 creme brulee: 其實面頭已有層薄脆焦糖, 但 serve 時 waitress 又喺我哋面前落酒點火, 搞咩? 不過佢落油落得太多了, 結果「瓊」成面頭的「水 deh deh」啡色 liquid, 唯有自行將佢倒掉. 面層焦糖夠脆, 但厚了 d; 下面 custard 帶點 vanilla (essence) 味, 甜度 ok, 但極級嚡口, 結果 2 人只食了四份一, 以示抗議.

食物唔掂, 環境就叫 ok, 不過 waiter 們態度又麻麻哋, serve 嘢食時成碟嘢「車」埋嚟,「砰呤嘭 lang」嚇死人麼

一向唔喜歡美式意大利「肥天使」的出品, 但呢度的係更唔掂, 完全扭曲了人哋意大利菜的本義, 每人$140 唔抵食. 後會無期!

加勒尼書室(荃灣)

14-11-2009

食完茶餐廳周圍行吓, 行到攰搵路嚟呢度飲杯嘢, 因為睇了飲食雜誌的「荃灣‧秘店」介紹呢度的心太軟覺得幾吸引 叫了一份心太軟 ($18) share 食, 另一人各自一杯飲品.

先嚟我的熱 caffe latte (好似 $25), 面頭劃了唔知係乜的 latte art 聞落幾香, 奶泡稠密但較薄身, 咖啡算滑但酸度奇高, 落了點糖仍然無補於事, 唔太喜歡.

朋友的熱朱古力賣相水汪汪, 飲落亦然 但其實朱古力陣味聞落係不錯的囉, 點解要用水沖又唔落奶?

心太軟就好睇多過好食 -- 焗得香噴噴, 但 serve 時底部已開始漏漿? 蛋糕略嫌乾了少少, 食落較實, 不過朱古力味 ok; 流心度一般, 因為朱古力漿質地太杰了, 漿口到黐住喉嚨 朱古力味 ok, 但甜度稍高, 加加埋埋其實唔算好食. 不過只賣 $18 仲想點,「唯有」收貨吧.

食物一般, 可幸 cafe 環境幾好, 型格得來好舒服, 有點 Kubrick feel, 係幾好坐的.

每人放低 30 幾蚊, 可以一坐, 不過 as with 其他樓上 cafe, 食物就唔好抱太大期望了.

蘭香茶餐廳(荃灣)

14-11-2009

晚上有事要到荃灣一趟, 下午索性早 d 入嚟食埋 lunch 順便行吓. 2:00pm 到步, 想去的嘉樂人龍長到 , 結果退而求其次試試隔嚟無咁多人的蘭香.

大家都叫了「特餐」, 有火腿奄列, 多士, 餐肉公仔麵及熱奶茶一杯 (total $29):

熱奶茶, 色水淺得離奇 , 飲落就完全係奶水一杯,「奶茶」!? 零茶味0架喎

餐肉麵: 餐肉煎得一般香口, 食落軟撻撻的; 麵底係福麵, 淥得剛好, 但 MSG 粉落得太重手了, 可用「超級勁爆鹹」來形容, 感覺麻麻.

火腿奄列: 邊位脆身, 蛋本身就蛋白多過乜, 又炒得太熟, 無蛋汁但又太油, 可幸火腿正正常常...

多士就叫做最好, 薄薄兩片烘得算夠, 鹹牛油亦塗得夠, 食落幾香又幾鬆脆, 還不錯.

食物麻麻, 環境就係典型舊式茶記格局, 坐得迫夾之餘, 唔知點解有少少澳牛 feel? 店員哥哥 (老闆?) 就好好禮貌又好好「老脾」, 起碼搭檯嗰個女人坐低叫一杯咖啡後, 隨即喺手袋拎了個麥當勞包出來食, 仲要大大聲同身邊男伴講埋 d 咩「唓, 佢又無話唔可以食出面嘢, 我一坐低就叫咖啡啦, 佢奈我唔何0架」,「唔准食出面嘢呢 d 規矩係大公司訂出來0架咋嘛, 呢 d 細餐廳仔有乜所謂喎」之類的「偉論」, 店員哥哥看在眼內都無「出言相勸」或「面斥不雅」, 睇嚟真係奈佢唔何喎

每人埋單 $29, 離開時嘉樂仲排緊隊...

愛家(灣仔)

13-11-2009

一直幾想試呢間 vegan 食店, 呢日「下場」前夾硬拉了食肉獸朋友嚟 dinner, 真「好帶挈」

大家都叫了「碟頭飯」套餐, 跟飲品或「是日老火湯」:

漬物係青瓜及蘿蔔, 又被放棄.

湯係蜜棗紅蘿蔔西洋菜, 賣相一般清澈, 飲落幾甜, 不過又紅蘿蔔又蜜棗, 唔係唔甜呀嘛? 味道都 ok 的, 不過當然點都係豬肉好啦.

主食係「含五辛」的紐約素排飯 --「紐約素排」其實係炸麵筋, 炸得酥脆唔油, 食落煙韌, 無「肉」的感覺, 但充滿五香的味道, 蘸點酸酸辣辣, 帶茄汁味又好似帶點蒜味的醬汁, 又幾好食喎 飯係紅麴米飯, 除咗「紅」之外其實同普通飯無分別, 食落乾身帶點硬, 又無米香, 唔太喜歡.

朋友食素叉燒飯, 呢個就唔及紐約排好了 -- 人工紅色「鮮艷」得嚇人, 麵筋食落好甜, 甜得仲幾假; 奉上的係南乳醬, 鹹鹹的, 幾夠南乳香, 但同甜叉燒一 d 都唔夾, 難怪朋友食剩唔少.

仲有椰汁涼粉做甜品, 黑色一 pat 糊上淋了點白白灰灰的椰汁, 賣相超級樣衰 可幸食落唔算差 -- 甜度唔高, 淡淡椰味之餘起碼亦食到淡淡草香, 質地又唔會太軟, 感覺有點似走藥材味的「龜苓膏走龜」, 哈哈哈

食物叫 ok, 環境就係快餐店格局, 不過有我喜歡的白雪雪簡約主義, 感覺都不錯的.

每人約 $50 埋單, 食完 my memories of love 當然無呢度份啦 , 不過都可以一試的.

一叶爐端燒‧料理店(中環)

13-11-2009

天氣忽然轉涼的黑色星期五, 亦係同朋友 J 即興食 lunch 的一日, 本來喺隔嚟魚蛋粉門外等緊位的, 但見呢間未食過的啱啱「吉」了兩個位, 又諗住會好坐一點, 衝了過來睇睇. Set lunch 選擇不少, 但吸引度一般, 左睇右睇勉強叫了「冷蕎麥麵配三文魚壽司」($58), 跟沙律及味噌湯:

沙律菜新鮮度一般, 醬汁就勁酸又帶點芥末子味, 不過我覺得份量太重手, 不過不失吧.

味噌湯配料幾多, 有紅蘿蔔, 豆腐粒, 昆布及無味山芋 (?), 稀稀的, 味道淡淡的又好「沖粉」feel, 可以不試.

蕎麥麵就一味大堆頭, 腍得有一夾即斷的 tendency, 食落「水 deh deh」又腍 bad bad, 仲要十分冰凍 麵汁鹹多過甜, 幾稀, 落了(牙膏) wasabi 及無味蔥花, 仍然於事無補. 令人諗起當年「元」字頭迴轉壽司店的出品 , 絕對不值一試.
3 件三文魚壽司的壽司飯就係一夾即散的冰凍貨色, 三文魚我就一向興趣不大, 蘸點豉油再捽多幾捽牙膏 wasabi, 閉起雙眼啃咗佢就算, 不過朋友食嗰件佢又話「幾新鮮喎」...

朋友的「日替」($48) 係唔知乜嘢咖喱炒飯, 試了少少係唔熱, 炒得乾身但唔香, 咖喱味稀薄之餘, 仲見到好幾粒仍然未上色,「咖喱」!?

食物唔掂, 招呼就反而不錯, 店員幾有禮貌的.

放低約 $65,「料理」港式得令人想一拳揪埋去 , 唔會再來 lunch 了. 唔知 dinner 的「爐端燒」會唔會好 d?