嘩
咁大個人第一次食咁求其既鐵板
我生平至憎既大家樂都可能比佢好
叫五成熟牛柳，佢整舊鞋底黎
何謂鞋底? 就係粗糙到日日踩住佢都可以CUM著幾年果D
仲要起碼有8成熟
跟住彈返轉頭叫佢整過塊啦(大佬話哂都俾成$62食，你冇理由叫我食塊鞋底掛)
跟住換第二塊黎可能連三成熟都冇lol
冇所謂~~~你敢賣我敢食姐
(算你好彩我冇肚痾)

我最唔明既係點解佢鐵板要用生菜墊底，嘩D生菜比個鐵板燒哂D"鐵質"既味道出黎
影響食慾囉唔該...
跟住再求其放D粟米,兩條仔甘荀,一舊好生好生既西蘭花
D長通粉勁淡，又唔落少少汁係上面搞到個板有一半係冇色水
跟住又勁多通粉係燒焦哂
總之呢個鐵板真係負分!!!!!

跟住話每叫一個餐可+$1換兩舊炸茄子
點知係勁咸勁咸勁咸既一大舊粉!!!!!
師傅刀功真係深厚，片茄子如果有幸"起得返"出黎，真係可能睇到佢係透光

簡直唔係人食!!!!!

近排愛上食元氣，又唔算貴，又大大件，味道都中等唔錯~
試過奧運、葵芳、沙田的分店，今次又試下旺角店

個人就覺得海膽壽司真係平夾好味
不過唔知係唔係撞岩我去旺角店果日唔新鮮
有點怪怪地的味道
不過之前去奧運同葵芳都叫過海膽~都一流咖!!

而呢間旺角店既"當日鎮店之寶"
我就覺得係$9 大大粒帆立貝壽司
自問個口都幾大，要一啖過食左佢都好高難度
淨係呢點都值回票價
再加上佢勁勁勁鮮甜，簡直係WONDERFUL+AMAZING!!!!

此外，呢間既師傅幾大方，三文魚壽司上面片三文魚真係勁大片啊~~~~
可惜吞拿魚就差左少少~

OVERALL我都係會選擇比正評~

10蚊係旺角可以食乜野?

一兜瘋薯? 一個武大郎? 定係兩串肥姐呢?

黎呢一間店10蚊只食到掌心咁大個餅仔

值得嘉許既係，佢真係即造，好熱好多汁

不過~ 10蚊得手板咁大個餅仔

皮係就係薄，弊在薄到連舊餡都裝唔實，穿鬼埋

餡都幾多咖，但係就食唔到肉既質感，同生竹牛肉果D口感差不多啦

更加唔好講佢一D蒙古風味都冇:S

5蚊的話必食，6蚊的話食得過，7蚊的話要諗諗先，10蚊的話我點都唔會再食

其餘既環保佢又唔係好~凳都唔好坐，服務佢又冇乜，遞下野咁

所以10蚊真係比多佢

其實呢間店都人所共知~純粹分享下我感受~

味道：
其實佢話係滷水，但基本上食唔到滷水味，似係白灼多D
口感方面，之前試過哂佢咁多樣野都覺得幾好，冇過生過熟
醬汁，個汁有點淡，味道來源主要黎先甜醬芥辣

環境：
算叫做街邊檔吧?環境好一般
路邊好多垃圾桶乜桶物桶咁
店內好光猛，唔會話隱藏D乜野秘密咁都OK既

服務：
服務就認真一般啦
雖然我明白佢地每日做同一工序係好悶好機械化
不過佢地只問："你要咩呀?" 同 "甜醬辣醬?" 似乎顯得有點不近人情

衛生：
食物有冰鎮住，不過好似冇隔隔住喎，如果排隊既客人唔覺意散播細菌咁就全部中哂招
處理過程只係徒手用鉸剪剪，個人認為頗唔衛生

抵食：
十蚊一串果D超唔抵食，食過一次就冇再買了
五蚊一串果D，係家陣呢個時勢，仲要係旺角，算係抵到爛咖啦

總結：
純粹係因為5蚊串咁抵食先會幫襯
不過如果佢味道、服務皆有改善的話
加價加到7蚊都尚可考慮一下

前兩日下午突然好大雨
咁係旺中走唔到就去大家樂坐下啦
女朋友話肚餓，就買個下午茶食

叉燒瀨粉($19)+紅豆冰(另加$4.5)

碗叉瀨極唔得
個湯勁重味精
粉既份量都OK，冇煮到勁淋既
不過得3舊好硬既叉燒同幾塊娃娃菜

個紅豆冰仲離譜，D紅豆仲脆過花生，完全冇椰子味，我真想問佢點做到
簡直五體投地!!!

係..廿三個半係唔算貴，但你都唔洗俾D咁既質素既野人食掛??
差!

呢間野十年前就有幫襯開咖啦
果陣D小菜好好味咖
蒸鱔，灼魚皮，蒸魚頭都好正
估唔到今次幫襯，又貴又差

ORDER左
咕嚕肉
灼魚皮
炸鯪魚球
豉汁蒸鯇魚
腰潤粥

個咕嚕肉甜酸味不足，燈籠椒太多搞到味道澀澀地，粉太太太薄，薄到完全唔脆，肉質幾好，似係豬腱，不過反而令到"咕嚕肉"變得有點唔真實

灼魚皮(冷盤)OK，真係整到好爽好爽，鮮味就食唔出啦不過加埋醬油食都算好食，不過份量少左好多好多

炸鯪魚球，算係咁多年水準最KEEP到之菜色啦，又大粒，又炸到滾熱辣，配埋特製蜆芥真係一流

個豉汁蒸鯇魚真係差到冇人有，條魚唔知死左幾耐，D肉一夾就散，豉汁冇豉味...好心落D成本用"李X記"或者"淘X"既蒜蓉豆豉醬啦

腰潤粥又一失敗之作，冇錯D豬腰豬潤係就係好滑，但完全冇味，個足都夠淡，D料又要冇醃D味先，叫人點食呀 D粥少米左勁多 諗深一層海景都好過佢

嵐山料理
19蚊 三粒芝士蝦丸+四條粗薯條
令我深深體會到乜野叫貴夾唔抵
仲要等三個字先有得食，認真冇哂野講

味道方面又唔係話好掂
咪就係冇乜蝦味，又唔彈牙 (((仲好意思話手打))) ，芝士味都OK GE
薯條直頭唔掂
本來想之後再試埋炸芝士同炸蠔既不過唔洗指意我再幫襯

仲要開係後巷隔離......扣哂分

19蚊
俾多蚊食兩個武大郎冇咁嬲

相信堂食過既朋友都應該領教過
呢間店有位二十出頭既女侍應服務有幾差幾黑人憎

間野本身食物唔差既，所以叫外賣係唔錯選擇

但係同樣係石夾尾區內，用GOOGLE MAP計左距離先400米左右，步行5分鐘
但要叫夠50蚊先肯送
於是我就叫左一個大窩米線(OPEN RICE登果張餐單寫$38，但其實係要$41)
加一個腐乳通菜$9，外賣+$1

個大窩米線有好多送
牛丸貢丸墨丸，牛肉豬肉雞肉，豬皮腐竹豆卜魚腐竹笙…炸醬酸菜…好多野
酸辣湯底小辣，打開蓋已經比D酸味刺激到流哂口水
先試啖湯，其實小辣只係剛剛好有DD辣味，唔食得辣既人都接受到~
此外，仲有好濃既雞觧味，我就食唔出佢係落足料淆定係用D湯粉好靚，總之個湯底好味就得啦

米線，份量唔算多，軟硬算適中
D丸口感有D怪，牛丸好淋，貢丸太彈，正常應該掉返轉至係
炸醬既色素似乎好重... 隻酸菜甜甜地幾好味咖
其他料都冇乜特別，都唔會特別好味咖喇，過關有餘啦不過
但不得不提佢既腐乳通菜隻腐乳真係好惹味，必試!!

食物方面，呢間野真係唔差，甚至唔會差過好評如潮既譚仔
但求下次有機會堂食，唔好再見到果位服務超差，大聲夾惡既女侍應就好了

懶得煮懶得落街，於是叫外賣
附近唔係間肯送唔知點解D店唔憂做
呢間幾好,,可能因為佢舖仔細細,所以肯送

$38便當賣到5PM好似好多野，就叫左個試下

入面有
面豉湯
蟹子沙律
三文魚刺身三塊
燒雞串兩串
鰻魚飯
凍綠茶

面豉湯，難飲，似水但又鹹鹹地，混混濁濁咁…
蟹子沙律，OK，蟹子算多，沙律醬略少，不過清清淡淡都唔錯
三文魚刺身，幾肥美，但唔新鮮(預左)，D芥辣完全唔掂
雞串，燶左忽，反正都係入貨，真係寧願佢叮熟好過再燒，燒哂D致癌物出黎
鰻魚飯，飯略少，汁都幾夠，唔會叫你乾啃，但件鰻魚就太淋…
凍綠茶，會酸酸地咖囉仲難飲過大陸果隻X師傅...未飲過咁難飲既綠茶啊真係

整體味道上，唔合格
但呢個價錢有咁多野食，仲送到你屋企門口，我覺得幾抵
區內朋友可以一試~
但如果係用食家既心態去評佢就免一試啦

前幾日去紅磡篤波，就搵定紅磡有咩好食
竟見到有呢間有近300個好評
就捉埋我幾個朋友去試下

入到去，其實都幾熱，冷氣似乎唔太WORK
而凳有D破舊

叫野食，雙層芝士蛋漢堡，$16一個，冇得跟餐
另叫左杯凍啡好似$11

個漢堡既包稍為烘熱左，份外鬆軟
而個扒口感幾好，唔會乾憎憎，有D洋蔥係入面
另外隻蛋真係好大隻，係超市買特大號果D煎出黎都冇咁大隻
配特製沙律醬，有少少酸酸地，巧妙地消除左啖啖牛肉既肥膩感覺
整體配合得好好!!

而杯凍啡，可以話係不過不失，滑就夠滑，咖啡豆一般而已
再加呢個價錢，偏向唔抵飲

黎呢間野，似乎只叫雙層芝士蛋漢堡就OK了