今日同男朋友黎西環搵野食
因為有朋友去左台灣,見到佢地係咁POST野食相,所以黎左呢間阿元來了黎滿足下自己嘅心靈

喺門口等位嘅時候已經覺得鋪頭嘅裝修好得意,都幾有台灣嘅感覺
因為未坐得住所以店員俾左張點菜錢我地剔住先,不過都好快有得坐
我同男朋友每人叫左一個魯肉飯($29*2),另外叫左一碟鹽酥雞($35),一碟蚵仔煎($35)
野飲方面我要左一杯凍嘅奶蓋綠茶($20),男朋友要左熱嘅皇室奶茶($20)

魯肉飯真係好好味,啲醬汁好濃,肉質都好淋,而且29蚊一碗都覺得幾抵
鹽酥雞嘅肉質ok,不過我覺得上面淋左啲類似華鹽加唔知咩嘅香料,其實可以唔駛落,感覺好似食緊豪大大雞扒咁樣,我曾經食過最好食嘅鹽酥雞,面頭都唔洗落呢啲粉嘅,靠醃已經好好味
柯仔煎淨係我男朋友食,因為我唔太鍾意蠔嗰種質感,唔記得問佢好唔好味,不過佢無食晒,話因為碗飯都已經好夠飽
奶蓋綠茶,無乜特別,啲奶好甜
男朋友杯奶茶好滑,但唔夠味

總括來講,我覺得其實淨係食個魯肉飯同環境都ok,算係一個食飯幾舒服嘅地方

一早就已經喺openrice度搵左呢間日本野,專登預先打左電話去訂枱
第一次打時係大約1:00pm,打嘅時候同佢講晒想訂幾點幾多位之後話叫我1個鐘後再打黎
2:00pm時我再打左個電話訂枱
我覺得兩次聽電話嗰個人(應該係同一個人黎)冇乜禮貌同無心機聽我講野,但可能我打去時佢地lunch time太忙,所以都無損我要去食野嘅決心

去到的時候,職員話要等,我諗坐左5分鐘倒,bar枱有客人走,職員就想安排我地坐bar枱
(我覺得佢地應該無尊登留位俾我地,而且訂枱時都無提起過要坐bar枱,唔同客人有唔同喜好,問聲會好啲)
後來等多大約10分鐘,安排左我地同另外三個人坐一張大枱(其實有啲搭枱feel,加上嗰三個人嘅其中一個成餐飯係咁喺度自吹自擋,聽到佢講野有啲辛苦 )

坐低左就即刻叫野食,最先黎到嘅係sukiyaki牛肉鍋($88)
職員幫我地係上面淋左隻生蛋,然後擺番個蓋焗佢
牛肉鍋個湯味道甜得岩岩好,唔會好似出面啲放題咁樣個湯好甜好甜搞到好漏,但係啲牛肉可能因為焗得太耐嘅關係有少少韌
蟹籽沙律(唔記得幾錢)幾好味,而且蟹籽同蟹柳嘅分量都ok,唔會話食食下已經冇曬蟹籽同蟹柳
另外叫左兩客三文魚腩壽司($18*2),一客火炙三文魚腩壽司($18),一客火炙芝士蟹柳壽司($15),一客芝麻醬帆立貝壽司($18),一個唔知咩芒果三文魚天婦羅卷($58) 
壽司都好新鮮,好味,而且我覺得價錢都幾實惠,但我覺得個芒果三文魚天婦羅卷個味道好怪,男朋友幫我食晒

另外值得一提既係有一個剪非常短頭髮差唔到好似平頭裝咁樣既員工,帶住灰/啡/綠色眼鏡嘅(隻顏色好複雜,分唔到)好似有啲燥,反應超級冷淡同埋唔係好理人

埋單連加一$342.1,野食就ok,但服務真係可以改善

睇完戲9點幾先食飯,就諗住打邊爐
新星唔算好多野揀,但真係幾平,銅鑼灣任食邊爐佢都係大約100蚊倒

任食既餐廳既問題佢都有
包括就係你寫幾多佢唔會俾幾多你,好多野亦都會漏
以為肥牛個D先會咁,點知菜都係咁

肥牛我認為肉質太韌, 無乜牛味
蔬菜類例如白菜及生菜都好新鮮
最好食反而係蟹籽丸,芝心丸呢D
另外我覺得拎醬料既地方太污糟
尤其D鼓油,好似好多油咁, 同埋D鼓油無乜味

汽水好多時宵夜時候去, D汽水係唔凍
個桶已經無晒冰, 得番D凍水不過整體黎計係幾抵食, 不過就寧願去灣仔間秋東

呢個月太忙,要寫番成一個月前既食評

不過我記得當日3點幾好肚餓,又咁岩係旺角,就去左呢間一直SAVE左係電話想試既餐廳度
坐底ORDER左個午餐 (我驚下午茶唔夠食), 先睇到OPENRICE既食評話D野食要好耐先到
心諗死得啦...因為真係好肚餓
野飲等左都幾耐,因為得一個店員(負責埋水吧)
我叫左杯朱古力,我覺得好好味,朱古力味濃,而且仲有綿花糖 野食比我想像中快 (我見D人話起碼等半個鐘),我就等左20分鐘
雞扒配芝士配蕃茄醬係幾好味,不過我嫌D醬唔夠多餐廳環境係幾舒服,野食亦唔錯,不過我覺得可以請多幾個員工
因為我淨係ORDER野飲都叫左3-4次佢先得閒黎

我同朋友加左$50升級
不過LIKE PAGE諗住有鮑魚送,問左幾次都話黎緊
到最尾原來話無晒,轉左送四隻大蝦 (但我升級已經可以任食...仲洗乜你送)
呢點令我有D唔滿意點解無唔一早講?

講番刺身先,通常放題既刺身,三文魚都係最HEA,因為好多人放題都係食帶子/甜蝦多
所以唔知點解放題D三文魚都係好難食,成日切個邊俾你,咬都咬唔開個D
但番本既三文魚係我食過咁多間最好味既
同埋食得出好新鮮其他刺身都不過不失,其實咁大隻蝦同普通甜蝦味道分別唔大我覺得熟食既選擇比其他放題少
我記憶中芝士年糕同牛舌串燒都係無

截單後,我問侍應仲可唔可以俾個D迷你糯米糍雪糕我,點知佢真係話得,仲問我要幾多
呢點一定要讚!!
好多放題都淨係肯送一粒/截單後唔俾加甜品
但呢間截單後我至少仲食左4粒咁多
好開心
要知道女仔都係鍾意食甜品
呢點加番分
(不過鮑魚無左...嗚)

男朋友一早幫我訂左位係呢度同好耐無見既朋友3個人食餐飯

山東燒雞真係好味,好快已經俾我地清到見底,尤其個皮,好脆 (燒雞一定要食皮!唔好怕肥)
蝦醬通菜,非常有"獲"氣,而且唔會太咸
咕嚕蝦球,醬料既甜酸度調較得岩岩好,不過食個蝦時咬到一半有條蝦屎走左出黎,有D影響食慾送左個豆腐花,無咩特別
無試到其他甜品

今日心血來潮想食海南雞飯
呢間既海南雞飯之前我係上環食過一次

佢既雞肉係幾嫩,同埋去左骨, 食起黎好方便
不過個飯真係唔得,我覺得太過乾身,無左油飯既感覺
杯野飲好多冰,好快就飲完

想試呢間牛角包好耐
唔記得係邊度見到話出左新野, 叫大膽菠蘿油, 就同左男朋友黎食

$30既大膽菠蘿油如圖好好好好好好味, 而且暖暖地, 個包好鬆脆
牛油亦都唔手軟, 俾左一大舊

初初都覺得30蚊食個包好ON居,但食完只想再食一個
實在太好味

今日有事去到大角咀,男朋友介紹之前係附近食過一間泰國海南雞飯好味
係OPENRICE搵左好耐終於確認左係呢間

個飯幾平下, 三十蚊倒, 我加左錢飲龍眼冰
龍眼冰既味道好特別 (唔係平時既龍眼味)
飲左有好爽既感覺,好消暑

送既紫菜湯既紫菜好好味 (我本身好鍾意食紫菜)
差D想叫佢加D紫菜俾我
不過D湯我就無飲晒,因為我已經有杯凍飲啦

主角
泰式去骨海南雞飯雞好嫩,飯如果係油飯既話仲好
重點係個汁,甜甜酸酸又有少少辣
我唔食得辣但我都係咁落落D飯度食

天氣太熱,唔想食熱野,最好就食食壽司
咁岩係下午茶時段,揀左壽司+冷烏冬+蟹籽沙律,另外加左個炸軟殼蟹卷(+$9)

炸蝦卷係元氣做得最好食既野,但如果唔夠熱唔係新鮮炸就會變得唔好食
今日既炸蝦卷只係暖暖地,扣分!!!!
另外個3件普通野,唔係好好味又唔係難食

冷烏冬上面加既薑蓉其實一D都唔夾個冷烏冬

蟹籽沙律今次既份量比我上一件黎食少左一半

炸軟殼蟹卷新鮮炸出黎,好味

整體黎講普普通通,填到肚