今日去對面一遊～11點半有多，要醫個五臟廟先， 成日想試幸屋，咁啱今次起附近梗係試吓佢啦， 我叫咗個 ～期間限定～ 北海道蟹肉湯拉麵 ， 另一個係櫻花蝦味噌拉麵， 一個雞軟骨同埋一個自家製餃子。 先講北海道蟹肉湯拉麵，一上檯梗係飲啖湯先，味道濃郁，順喉，飲落去有香香的蟹味，配料除蟹肉仲有蟹籽，其他配料正常發揮。第二碗係櫻花蝦味噌拉麵，湯頭有濃烈嘅蝦香，料頭有大量的櫻花蝦，食完碗內仍有陣陣蝦味，叉燒正常發揮。自家製餃子(無影)，唔錯嘅 雞軟骨，正常啦 戴返頭盔先，我覺得好唔好食≠你覺得好唔好食，好唔好食因人而異。

有點事做，要去一去西環。 順道拜訪蛇王海，去到要等一下先有位。 落單後不一會便上檯。 叫咗蛇羹(大)，糯米飯配潤腸。 蛇羹足料，蛇肉份量正常，唔會偏向某一啲材料多，童叟無欺，蛇羹夠身唔削，味道濃郁，唔係外面某些店一係水汪汪咁，一係杰撻撻，佢真係羹。 糯米飯，糯米飯吸收咗臘味嘅香及油潤，香味撲鼻，潤腸甘香。 兩款食物份量都正常。 唯一係鋪面比較擠迫，有時大家要遷就一下。 戴返頭盔先，我覺得好唔好食≠你覺得好唔好食，好唔好食因人而異。

城仔記，多年來都唔係第一次食佢，不過早餐係第一次，我已經7:50am去到，8:10先出餐，本身諗住比足夠時間你煮，應該唔會差得去邊，而且朝頭早冇乜客，點知⋯⋯唉⋯⋯ 先講咗叫乜， 早晨西式扒餐 ～要豬扒/餐肉炒蛋，凍齋啡走甜。 茶記最正常不過嘅西早。 炒蛋～有半煎蛋feel，上面望落去嫩滑，下面係煎蛋，不過勝在夠熱。 餐肉～正常，厚度都正常，唔係手工嘢。 豬扒～咁基本嘅嘢，俾足時間你做，你落炸爐都算，你比塊柴我？！ 有人會話街市檔你想點，又乜乜乜，喂做廚應該對自己出品有擔帶架，比塊柴出嚟？ 齋啡～例牌黑水。 戴返頭盔先，我覺得好唔好食≠你覺得好唔好食，好唔好食因人而異。

今日第二次到恆香試早餐，今次終於叫到吉豬啦， 仲要見到覺得比錢係大晒嘅奧客～ 先講食物～叫左 吉列豬扒拼脆皮腸 配 3.6牛乳香滑炒蛋 ＋脆炸薯餅 ＋牛油粟米＋熱香餅 $48 例牌叫凍齋啡走甜～ 吉豬上檯時仲係出煙嘅，外脆內軟，外皮剛剛好不會太厚，調味恰當。 寫就薯餅，黎就薯格，雖然事小但最好同客講聲，炸到好嘅，咬落去唔會一口油。 炒蛋，夠熱夠嫩滑，冇滲水。 熱香餅，正常。 其他叫貨嘅正常啦。 凍齋啡，都屬於正常。 基本上同第一次食嘅水準一樣，屬於正常冰室以上嘅水準。 戴返頭盔先，我覺得好唔好食≠你覺得好唔好食，好唔好食因人而異。 同場加映～奧客～ 話說 四人卡位有貼繁忙時段兩人坐埋一邊， 咁我睇住個阿叔同個大媽，人哋店員入坐已經叫佢坐埋一邊，佢哋唔理，咁個店員都無奈，大媽到餐時店員再提一次，都唔理，阿叔果份到時再提個阿叔話得啦有客我會坐過去，點知，開始冇耐，真係有客，咁個店員有禮貌唔該前唔該後，但個阿叔鬧爆人，話食緊野叫佢調，應該一早講，⋯⋯睇到我O咀，個店員硬食，不過佢又豬左，阿叔同大媽講啲嘢都好信？ 店舖有時強硬多數都係由西客起，比個幾廿蚊當自己皇帝咁。

老婆告知石門有新冰室開，專門走去一試～ 去到睇到，恆香？副線黎？ 門口見到餅櫃一盤盤老婆餅，叉燒酥，皮蛋酥等等等等。 去到等左冇2分鐘，就入得，環境乾淨，店員係大聲啲，有禮貌嘅，人手落單嘅～ 講番叫咗乜先～老婆推介吉豬，點知😭買晒，咁就叫左 吉列魚柳拼脆皮腸 配 3.6牛乳香滑炒蛋 ＋脆炸薯餅 ＋牛油粟米＋ 熱香餅 滑蛋/薯餅/粟米，正常發揮～ 熱香餅係薄果款，有蜜糖面甜甜地ok 脆皮腸，室溫味道一般 吉魚 熱辣辣，外脆內嫩，好味嘅 蛋撻～ 蛋漿滑滑的，皮係靠酥嘅，但唔係一望就勁多層果款，熱辣辣好味嘅 同埋 蒜香脆脆雞扒番茄湯米粉 配 西煎雙蛋 ＋ 牛油吐司 個蕃茄蛋湯夠味夠濃，雞扒正常發揮， 牛油多士係用蜜糖包，烘完後軟軟脆脆(好似燒嘢食烘蜜糖包嘅味) 整體來講真心係正常茶記應有水準，不過就石門兩個商場黎講已經排頭位， 戴返頭盔先，我覺得好唔好食≠你覺得好唔好食，好唔好食因人而異。

今年第二餐同大閘蟹有關嘅晚餐，估唔到又係同荳子有關～ 早兩日見到佢有突發期間限定Menu ～ 自上次蟹拼盤引起大閘蟹引，已經想再食～ 見到出post梗係即刻定位啦～ 是日晚餐為～大閘蟹蟹黃沾麵伴焗蛋白 ～侍應上餐時，一走近已聞到有濃濃嘅大閘蟹味，🤤🤤，醬汁好豐厚，蟹黃蟹肉都融入晒醬汁， 每條麵都有足夠同豐厚嘅蟹黃醬汁包裹，徐徐入口，陣陣蟹香，醬汁沒有膩的感覺，反而有細膩的蟹香，麵條軟硬適中，唯一美中不足，由於醬汁比教多，如果多一塊半塊軟麵包索埋剩餘嘅醬汁就超完滿啦。(我當然唔放過清左佢啦)🤤🤤🤤🤤 戴返頭盔先，我覺得好唔好食≠你覺得好唔好食，好唔好食因人而異。

由於今日一早掛灣仔工作，咁搵下附近有乜推介又早開啦，見到”旺記”多讚就試吓佢啦， 見多人推薦食～特濃蕃茄湯咁就食個 A餐～蕃茄湯午餐肉粒通粉配 牛會乳炒蛋及多士～ 飲慣性嘅凍齋啡走甜啦～ 我係第一個客佢表示全即制預咗等，約5分鐘炒蛋到之後通粉到勒， 特濃湯通～好明顯見到條分界線，一面係湯質地，另一面比較杰身，食時要撈番均佢，湯唔熱只係暖，午餐肉粒比較乾及室溫度， 通粉偏”有咬口”質地。 炒蛋～ok嘅滑嘅熱嘅，係應有嘅炒蛋，多士正常。 齋啡～就係黑水囉⋯⋯ 只講早餐黎講 灣仔區$50以下(凍飲加$2共$48) 算係咁，不過食物可以再熱啲就好勒～ 後話～四眼叔叔有禮貌同對一啲問題有解釋嘅，係講嘢冇尾音，好似有個大媽一個人黎叔叔問佢幾多人佢話3個，咁叔叔問大約幾耐到大媽答坐緊車黎，因為開始多客，咁叔叔都問5分鐘內會唔會多一個黎，佢話唔知，咁叔叔都話其實有寫齊人入座，不過你坐住先如果太耐，可能會有人搭住檯，叔叔已經講得好婉轉，最後大約半個鐘係我走時大媽都係一個人坐張四人檯，叫咗兩個餐一個轉外賣，有時話舖店冇禮貌好多時係太多奧客做成 戴返頭盔先，我覺得好唔好食≠你覺得好唔好食，好唔好食因人而異。

今年第一餐大閘蟹，自己都估唔到係起荳子食。 昨天有幸試到朗豪坊期間限定隱藏Menu，大閘蟹拼盤。$88！ 蟹黃批～好味夠濃郁一口都係蟹黃～爆醇之作 蟹肉脆卷～啖啖肉一流加上香香的蟹味～ 正 蟹肉胡椒焗蛋～淡淡嘅胡椒香蛋香配上蟹肉一絕，(已經忘記影相) 最後～醋𦍑汁蟹肉沾面配黃羗醬汁，一大口蟹肉，配上軟硬適中嘅沾麵，黃羗醬另味道再提升，好食！ 再配上冰搖咖啡～完美～ 戴返頭盔先，我覺得好唔好食≠你覺得好唔好食，好唔好食因人而異。

有朋自遠回來，於呼朋喚友，齊飽餐，天轉涼，甂爐也。 肥牛，響鈴，炸魚皮，手打墨魚丸，手打蝦丸，桶蠔，醉雞，醉牛肉，鱆紅刺身，象拔蚌刺身，蟶子王，魚標，脆鯇，韭菜餃，雲吞等等等等～ 牛肉新鮮有牛味～ 花雕醉牛肉～有驚喜～入口有花雕味撲鼻，牛肉亦滑溜。 手打蝦丸，墨魚丸，絕對係誠意之作， 鱆紅魚及象拔蚌，極鮮味。 韭菜餃及雲吞，味道不錯，可以encore🤤。

良朋歡聚，一起品嘗，齒甲留香。 約一班夜鬼午餐難，早茶更難，經友人努力下，終於成局，事不宜遲當日叫咗如下， 灌湯餃，蝦餃，明蝦角，牛骨髓，芋角，蝦腸，流心奶黃包，雞卷，鮮竹卷，棉花雞，鳳爪，第一叉，沙翁，芝麻卷，海蜇頭。 灌湯餃～ 做法正統，料足，湯鮮味，一細口咬下去再吸，嘩！小心熱，辣到口。 蝦餃～ 晶瑩剔透，皮不會過厚，蝦味鮮，筍及肥肉配合下一流，兒時味道回來了。 明蝦角～ 足料，唔會食到一口油👍🏻 芋角～ 外夠蓬鬆，內夠飽滿，滿滿的芋頭蓉，一樣唔會食到一口油。 蝦腸～ 米味香，粉皮滑，厚薄適中，好味。 流心煎糯米雞～ 幾特別味道不錯 第一叉～ 美味，大大件，唔會鞋口，一定要試 沙翁同芝麻～ 水準之作！ 奶黃包～ 不用多介紹，料足，一咬開，流心即刻爆發，小心熱！ 雞卷～ 懷舊物其中之一，有如雞包，包皮沒有太硬及鬆軟，夠熱。 牛骨髓～ 滑嘟嘟，都係舊味道😍 鳳爪，鮮竹卷，棉花雞，水準之上 戴返頭盔先，我覺得好唔好食≠你覺得好唔好食，好唔好食因人而異。