寶哥上海味館 (荃灣)

行過見唔駛等位就試下啦, 點知就出事
兩個人叫咗 :

紹興醉雞飯(轉菜飯) $35數得出得7件雞, 除咗三件係雞翼, 其他係雞背, 講真味道係OK, 不過太少喇
至於個菜飯就非常非常非常之唔得 第一, 碗飯本食已經唔熱, 第二, 一D味都冇, 同食白飯冇分別(但係菜飯係要加$3 ), 而最大問題係菜飯中的菜, 有D係已經變黃咗! 令我覺得佢地係將D隔夜飯"no"埋D新鮮的飯再買過

鎮江小排骨 $28又係唔熱 點解? (有冇人可以話我聽, 鎮江小排骨究竟係熱食定凍食??)
仲要用個碗仔上而唔係用碟, 我同老公都O咀

大排擔擔麵 $35個湯似清湯, 完全冇擔擔麵應有嘅味道, 唯一可取係, 終於有樣野係熱的!!
大排新鮮炸起, 但味道一般

招牌小籠包4隻 $18
唔記得映相, 但呢個係我唯一一樣野覺得係好食

埋單$116, 講真係唔貴(如果同同類的店比), 但以咁既質素黎講, 我覺得唔抵食

另外, 呢度D員工真係好似游雲一樣, 好似完全唔知自己做緊咩, 坐低水都冇杯, 小籠包黎咗又唔比薑絲人, 要我望咗好耐佢地先識拎比我, 如果老闆見到我呢個食評, 唔該你再培訓下你D員工啦

題外話, 食完之後睇返其他人D食評先知原來個老闆係王家沙的前副總廚, 我去食之前都唔知所以對呢間野冇咩祈望, 但結果都令到我好失望, 如果D人係抱住祈望黎食, 我想佢地一定會超失望

小曼谷泰國菜館 (屯門)

成日想黎食不過次次都好多人, 今次終於等到, 不過真係等咗足足一粒鐘
兩個人叫咗
冬陰功(細) $30"畢"完先記得映相, 味道OK, 不過我覺得喊咗D

泰式鳳爪 $30(好似係)呢個好好好好味!!如果再雪凍D仲正!
其實佢都幾大碟, 不過我食食下先記得映相

泰式炒通菜 $33味道OK

紅咖哩雞(跟白飯) $38 + 蒜茸包 $12咖哩偏甜, 用黎送蒜茸包一流呀

炸蝦餅 $35好得, 一碟應該有五件, 又係口快快食咗先記得映

埋單$177(其實唔知點計出黎), 冇加一唔駛比貼士, 一個字:抵!!
下次要再黎試埋個豬頸肉同埋蠔仔餅

發記腸粉粥品 (元朗)

食過幾次, 今次係第一次寫食評
兩個人叫咗
炒麵 $8即叫即炒, 麵身較粗, 只係賣$8一碟, 抵!

炸兩 $13食過幾次D油炸鬼都係淋, 今晚呢碟比較脆, 讚!
仲可以自己加好多好多麻醬, yummy~~

蠔仔粥 $22一個字:鮮! 蠔仔份量都算多

牛肉粥 $18我覺得牛肉仲多過粥

鍾意呢度嘅粥係因為唔同配料嘅粥真係有唔同嘅味道
唔似D連鎖粥店咁, 無論叫咩粥都係同一個味....就係"味精"
呢度已經變咗我地嘅飯堂
唯一唔好係冷氣位唔多, 遲D再熱D如果要坐出面冇冷氣嘅位都幾辛苦

泰味軒 (屯門)

噚晚突然想食泰國野, 見呢間門口可以泊車就試下啦, 都唔錯喎! 兩個人叫咗
海南雞半隻 $58賣飛佛, 味道OK, 個醬好好味

鐵板蠔仔餅 $48我的另一飛佛, 上台枱果陣熱辣辣, 超好食呀

咖喱牛腩 $58 : 呢個唔記得映相, 佢用煲上, 又係熱辣辣, 好多料, 不過個汁甜咗D

泰式薄餅 $15 : 又係唔記得映相, 好似印度薄餅咁, 用黎送咖哩一流

加罐可樂, 埋單$189, 我覺得好抵食, 老闆娘好好人, 幫我地睇住架車有冇比人抄牌(因為已經冇錶位), 臨走又問D野啱唔啱食, 下次一定會再黎

甜心鮮果園 (元朗)

噚日放假,同老公入元朗,醒起有間甜品店做緊任飲任食,於是就走去試下啦
依家加左價喇,$38 / 人,但都好抵食
我同老公倆個人,叫左雞翼+雞尖+魚蛋x3碟,蜜瓜汁x2杯,什果沙律x2碟,果黑糯米,果西米撈,楊技金露,鮮什果涼粉,老板仲送左一人一個果布甸,唔洗45分鐘已經比我地掃哂
樣樣野都好好味,又新鮮,d雞翼雞尖熱辣辣又入味,個果西米撈同楊技金露都有好香既果味
總之一句,真係好食又抵食!!!
值得一讚,雖然限食45分鐘,但老板絕對唔會拖慢上野既速度,而且佢仲好好人添,我地叫左咁多野食佢都無黑面,仲好好笑容添,下次一定會再去~~