24Jun2007 1510

都有好一段日子冇係鳳凰新村打滾，兼想見下人情世故，特意來到這裡到此一遊。見有少少餓，又係食野時候，聽聞前排這裡的海南雞取得食神爭霸戰銀獎，咁緊係要試下啦。呢段時候有特價時段，30蚊一碟海南雞飯，凍飲只不過俾多兩蚊，唔駛突登叫套餐。

上檯後賣相都算不錯，三色醬中其中一款薑油係用橄欖油開，橄欖油有好多級數，好難俾到最優質，但在大眾中絕對係一個賣點；而雞已去骨，有少少味，質地幾滑，油飯加上香茅、椰汁及雞油等香料煮，有隱隱的香味。雖則不是好頂級的，味道總比茶餐廳質素有過之無不及。

還有其他小菜例如肉骨茶及豬軟骨，在附近居住的可以到這裡一試。

20Jun2007 1747

臨開波前，休息一下，想搵的靜靜地地方，就來這裡。

不太肚餓，叫左照燒牛肉三文治餐。凍飲唔駛錢，而奶及糖漿係分開俾。牛肉是即煮，裡面還加了生菜及洋，加上照燒汁，頗為野味，這個餐都叫得過。

正因如此，這裡是收加1，鬼叫呢度叫銅鑼灣咩！

20Jun2007 1253

原本諗住去Al Dente，點知full booking，唯有諗定後路，想食爛鬼西餐又唔想行咁遠，係駱克道及謝斐道打滾一陣，終於在這裡落地生根，但求安靜地有餐飯落下肚。

這裡係典型的一間bar，午飯時間會比較靜，夜晚應該回覆正常。午巿有4道菜，而只有主菜係有得選擇，由於我不太好湯(Clam Crowder 週打蜆湯)，只選擇了3道。

頭盤為Tuna Niscons Salad，除左吞拿魚外，還有烚蛋、蕃茄、檻欖粒、薯仔粒及菜，再配白醋，侍應問需要黑椒與否，我當然唔會放過，味道中規中矩，醋及黑椒粒份量剛好沾染其他食材，令到開胃已經完成它的歷史任務；沒有湯，但仍有兩塊牛油香草蒜蓉麵包，新鮮熱辣仆仆脆，非常好味。

主菜可以選擇印度咖喱雞飯或燉牛肉配牛油麵(Beef Bourguignon With Buttered Noodles)，我緊係選擇後者啦。這道菜還有一舊西蘭花、椰菜花、紅蘿蔔及一條粟米仔為伴菜，Beef Bourguignon是法國傳統一道菜式，將各種蔬菜、香草、煙肉及紅酒配合牛肉一齊燉。喜出望外的好入味，還食到酒味，肉質地好嫩滑，雖不是驚天動地鬼泣神號，但真係好好味，真係想叫多碟黎食。

甜品為朱古力芝士餅，底部為朱古力，上面有半粒士多啤利粒及側邊有朱古力汁杻紋，一點也不馬虎，食落幾香芝士味，再濃味一點會更加好。

埋單共68蚊，多一個湯/頭盤為78蚊，午巿不收加一，食得相當滿意，在附近返工返學居住的，真係要黎一試。

19June2007 1405

星期日下午仲要涯世界，食飽飯後過對面斬條骨慰勞下自己。

一返到去立即食左少少，雖則要凍食，肉質地都唔差，燒肉皮已經薑硬，怪自己唔好彩，就算搭舊豬，亦難補頗多肥肉的問題，呢啖氣點「芹」得落呢？

19Jun2007 1323

18蚊一點乳豬四寶飯咁荀？

通常都要25蚊以上，上到檯又真係幾大碟，有叉燒、咸蛋及紅腸，乳豬望落怎麼不像乳豬呢？點解個皮咁樣呢？

食落有點似食燒肉薄切版本，最基本的脆皮都有，但真係唔係我杯茶。雖則真係平霸，但都要俾個喊面。

16Jun2007 1501

食完泰菜到樓下，見到小巴站後面有間「貌done」舊式茶記，又唔少人係度「打躉」，仲有quota，即刻入閘。

點了凍奶茶，加一個叉燒包。凍奶茶冇苦澀味，還有融冰時都唔覺沖淡茶及甜味。叉燒包唔係茶樓一類的，而係西式大餐包加叉燒在內，不是新鮮出爐，仍然鬆軟，加上大件，4蚊算是抵食。

見樓下講到湯粉麵類唔係好掂，下次來都係包類穩陣。

16Jun2007 1422

這裡似乎已經轉左手，味道亦迎合街坊口味，好似我咁黎呢度食，一定要叫佢地整得辣或濃味一點，唔係會投訴唔夠味。

海鮮冬蔭公湯望落一定唔夠辣味，亦同職員反映過，他們說要就客人的口味，唔係過淡，我亦唔會開口，希望現在有改善，勝在夠料，至於材料方面，包括秀珍菇、蕃茄、蝦及魷魚，海鮮當然好難有新鮮，但勝在夠料，這煲賣32蚊仲想點！

至於蝦餅($40)，共有八大件，蝦亦唔會好新鮮，蝦得幾香脆，好爽，不似落左料去醃，想當抵食。

我係度映相時，職員好有禮貌他們之前映開的相，同埋自己也提出一點點意見，最重是要盡快將這裡重新裝修。

13Jun2007 1725

係何博士做完野後，臨返歸前黎呢度食卡巴，之前在上環熟食中心食左碟極不滿意的所謂「泰式海南雞飯」，誓要報仇。一入到去見到個旋轉型式羊肉在上面，食的時候用刀片下來，這種做法的名稱便是Kebab，肉類亦可包括雞肉或牛肉，豬肉因宗教信仰而不在內。

我就點了最喜愛的Lamb Roll，等左10分鐘便有，裡面以生菜絲及蕃茄片為主，醬汁選了辣的，而羊肉在卷內佔左約一半位，羊肉有部份不淋，勝在份量多，而包熱辣辣，味道已經不錯，而這個餐可以有一罐汽水，幾位中東/印度員工招呼週到。

地點係大巷內，不太留意都唔會見到，作為一點點支持，會稍為俾高少少分數。

10Jun2007 1609

臨開波前，來這裡食少少野，還記得當日還下著雨。

最平的米暹都要32蚊，我就點了38蚊一款，裡面有蝦、雞蛋及豆卜。這裡的米暹是濕食，甜酸味適中，配料亦不少，汁唔會浸過材料之上，這裡的合格有餘，還覺得幾抵食。

下次來還會試其他食物。

8Jun2007 2037

舊公司老神子終要過檔，同事們幫佢慶祝，身為前同事都要幫口兼報到。人多點菜自然可以輕鬆一點，當晚共有6個頭盤/前菜、8個飯/意粉/主菜及4款甜品。

凱撒沙律配雞胸肉：一聽雞胸個名都知會好鞋，這裡都係鞋，但沒有想象之中嚴重，汁醬與麵包糠粒份量剛剛好，如落埋芝士碎及火腿粒更加正，味道亦不差，亦很開胃；
白酒忌廉汁燴紐西蘭青口：最好味又唔會被極度污染的相信都是來自紐西蘭，汁醬煮得非常濃味，不知是否不新鮮原因，硬係同汁醬夾不來，有點奇怪，希望只是一時之差；
炆牛：牛配上少少黑椒汁，能帶出本身的肉味，是不可不叫的；

芹香白酒煮鮮辣蜆：話須是有辣味，但一點也不辣，正好保持蜆的新鮮程度，這裡的蜆是用好細隻的，我地通常只會用來調味，因為真係冇乜肉食，但這裡的煮得不老兼嫩滑，質素不差，加上白酒及煙肉帶出香味，他們亦用了好少人用的中國芹菜來調味，更能突出優點，唔叫點叫過來呢？
茄汁蝦沙律：這裡用兩隻以茄汁煮過的大蝦，以紫椰菜載著，再以蕃茄及青瓜片伴碟，我只係食蔬菜，其他人食落個樣都似乎目無表情，起碼唔係；
多士拼盤：這裡的共有4款，每款1個，包括牛油果、BB露荀、巴馬火腿及煙三魚，多士稍為硬了些少，味道只是平平無奇，但作為小食亦不差。

蒜片白酒汁大蜆天使麵：話雖大蜆，實質都係細蜆，只是將前菜加上天使麵，便能包裝成主菜，麵浸著汁及與蜆一齊食亦非常美味；
鮑魚粒帶子BB露荀銀魚(anchovies)醬炒紅米飯：初頭以為係蝦醬，配料唔算豐富及多，勝在炒得乾之餘亦保持一定程度的濕氣，紅米亦唔會炒到爛，想食下不太討好的食物，可以一試；
什菌煮寬麵條(fettuccine)：炒得乾身，蒜容味夠香，清清地又要少少刺激既就要叫；
蕃茄意粉：每條意粉佔染蕃茄及茄汁，不會像港式炒到乾身，還食到蕃茄蓉，一定要叫。

芝士汁雞胸飯：雞胸一點也不鞋，配上芝士汁唔會太漏，飯亦亦有少少味道，唔錯；
燴牛膝配飯：牛膝煮得淋身，但味道唔夠濃，使到味道還欠了一點點，飯亦已有少少味；
茄汁大蝦配天使麵：茄汁剛剛夠份量被天使麵吸收，大約有三舊蝦，還加了少少炸蒜容，味道不會被蒜容搶去，很好食；
燴牛尾配雜菜，牛尾同牛膝都有同一樣老毛病，炆得唔夠味，唔係唔好味，加上蔬菜的水分，變上淡上加淡，要改進一下。

甜品我地沒有分享，要食自己-
特濃朱古力餅(Mississippi Mud Cake)：賣相相當好，除餅外，還有朱古力粉在餅及碟上，還有少少朱古力汁在粉底下；
意式甜品芝士杯(Tiramisu Glass)：有別外一塊的賣相，這裡是用杯載著，味道不算太濃，食落有好多的酒味；由於已雪好一段時間，變得有少少硬，但正合我口味；
傳統法式焦糖酒香燉蛋；燉蛋當然已整好，臨到客人面前時，落焦糖再用火鎗燒一燒，令到面上有少少焦，再配上士多啤利；
焦糖漿吉士燉蛋：這個我地點選紅酒加焦糖漿，亦有落左士多啤利，自己試了少少，味道相當好，好配合燉蛋，值得叫來食。

臨到尾聲，大家都食得好飽，我地冇叫好貴的菜式，但多款式，都唔駛百五蚊，唔難食，在中環來講，還有甚麼要求呢？