見新加玻菜，見一面倒好評，一於去試。訂檯話有蟹，哦，留一隻。

去到，就黑胡椒蟹啦。$498，嘩，隻蟹一啲都唔飽滿，你邊度返貨？呢隻蟹俾三舊都嫌多！鮮味呢？零！究竟你啲蟹返貨幾耐？我眼見無人叫，就知中伏。

(Openrice編輯, 請問你睇唔睇到零鮮味? 你仲想我食乜? 一隻蟹蟹肉唔飽滿, 一啲蟹味都無, 仲唔夠??? ok, 咁加句有黑椒味, 夠唔夠?)

炒蘿蔔糕，嘩，粉嚟架？用你啲醬炒嚟想蓋過啲僅餘嘅蘿蔔味？博人食唔出？大佬呀！俾少少良心，俾返幾成蘿蔔出嚟啦！冬天呀！蘿蔔最當做都可以一啲味都無，食落一口粉，$78，衰過街邊檔！

(我已經寫到明完全唔係蘿蔔糕嘅味道, 仲未夠??? 食落一口粉喎? 你想我點描述???)

肉骨茶，叫煲大嘅，呢個比較起嚟算正常，加上我無食過新加玻肉骨茶，正宗與否俾唔到意見。

(有胡椒味, 夠辣, 藥材味唔重, 應該係新加玻口味, ok???)

其實大家俾好評，可唔可以嚴謹少少呀？

以往經常去千色後巷食泰好味
無他, 貪佢夠曼谷街頭FEEL, 加上食物水準高, 價錢平!

但自從自己識煮幾味泰菜, 又加上而家買生蝦好方便, 已經無再去泰好味

一別已經有一年有多,
今日係我特別日子, 特別想再去泰好味,
為既, 係想再見下三姊妹

有冷氣, 地方寬敞而衛生
已經想到食物價格必定大幅上升
生蝦已經賣到118蚊, 仲要食得出啲蝦細隻好多好多...
對上一次去, 88蚊, 大大隻

冬蔭公, 小食拼盤同以往差唔多
仲叫多兩隻燒雞翼, 無以前咁JUICY喇

值得一提
啲食物好快上檯
係咪一早整定呢?
至少生蝦同燒雞翼我肯定係

Well
呢班泰國合伙人
其實你明唔明
後巷有後巷嘅好?
不過, 我諗可能係有住客投訴, 你哋先要搵地方搬吧?
但, 奈何, 部份依物水準已經變差, 入屋後已經同以前嘅感覺不同(係舒適好多)
價錢, 仲好貴添...

4樣嘢食加埋$300, wow
應該貴咗至少3成...暈

但, 千變萬變
唯獨大家姐愈來愈靚女
大概, 下次返轉頭, 都係為咗你, 哈哈

一入去，門口開宗名義有句「新張期間服務如有不足多多包涵」之意嘅語句。
OK，明白！

坐得之後嘅半個鐘，由落單到上菜都真係幾混亂。
先Order幾款食物，見到有張menu service time直至5:30pm，
問問男waiter有冇南瓜蘑菇意大利飯？
等咗陣佢話有！OK，當然要試！

過多陣，個waiter埋嚟同我哋講，話廚房準備唔切材料做唔到個飯，
無問題，轉另一個泰式炒粉絲。
點知過多幾分鐘個飯送到@@，外加一個湯。
即刻叫人取消先前落嘅炒粉絲。問問男經理個湯係咪收錢？係！咁我唔要啦，無order到嘅我。

除咗個risotto，仲有蕃茄多士、華道夫沙律、夏威夷pizza（事後先知上錯菠蘿素腸@@）、芒果糯米飯。三個人食總共五樣嘢，因為個糯米飯，好夠飽。

好，食味如何？Risotto一啲都唔似risotto，個飯我個人認為唔係意大利米，一係佢煮過火腍晒，失敗。蕃茄多士帶酸但開胃，我鍾意。華道夫其實我唔知係乜，不過入面三幾款蔬果都算新鮮，還可以。Pizza餅底太hea，其實自己整都唔會需要好多時間，希望有改善。糯米飯應該係我全晚最鍾意食嘅一道甜品，雖然芒果略帶酸，但個米飯令我諗起去泰老日食夜食sticky rice個回憶。

好喇，埋單，e？點解個湯係跟餐？又話要收錢？問問男經理，原來佢話將menu今日臨急臨忙打，可能入錯餐入機，所以出咗呢個飯（即係話個南瓜risotto唔應該呢個時間出現，哈）。OK，我接受解釋。

管理不佳就真，開業一個月都會混亂，唔知係咪由上至下都係成班新手？食味不過不失，想做FUSION但技巧要掌握得好，意大利飯真係完全唔合格，希望未來有改善吧？有機會見到好評繼續累積的話，會再嘗試！

約一個月前去，叫往常叫開既火車頭餐。咦？無左既？招牌菜喎...惟有單點火車頭啦。一上菜，少左好多餸、湯底唔再係牛骨濃湯而係死鹹清湯、牛丸好鹹、牛柏葉似營養不良、牛腩同另一款肉少左/無左、新鮮九層塔欠奉。

一代元朗越式之王就此沒落。問收銀係咪轉手？佢話無，再問係咪換晒廚房，佢尷尬地話係，惟有放低句祝你好運。