日航咖啡室 (尖沙咀)

回想一年前, 因生日月有優惠走來嘗試這間自助餐. 喜歡其任食的麵包蟹, 很多蟹膏, 蟹膏的味道還留在腦海中.

今晚來試, 雖然沒有甚麼優惠, 但又想回味番當年的味道, 於是就來了. 不過好可惜, 今晚沒有了! 轉了其他的蟹類, 為有試其他美食啦!

首先來一個頭盤, 焗元貝粒配煙三文魚沙拉. 接著就係海鮮類, 有香港人喜歡的魚生, 長腳蟹, 白灼蝦, 龍蝦仔, 通通都好新鮮!

而當晚最喜歡的食品, 就是煎牛肉粒配鵝肝. 鵝肝煎得剛剛好, 外脆內軟, 入口即溶, 不用醬料也亦好味. 牛肉粒都是, 不太生, 亦不太熟, 咬落去, 肉汁流出來.

另一介紹, 就是燒牛肉! 又是另一好味介紹! 由原條肉眼燒出來, 這個部的肉質柔嫩, 一片一片地切出來, 上碟時就好似鋸扒一樣! 加上自己喜歡的醬汁, 就好似變成當晚的主菜咁!

最後當然不少得的甜品啦! 每一件都細細的, 好精緻! 加上因為細細件, 可以嘗試到更加多不同款式的甜品.

今晚再來, 其環境及衛生都依舊的好! 雖然沒有了我想食的麵包蟹, 但一樣找到另一好味的食品. 為一變了, 就是食客的質素! 點解咁講? 其實是當晚坐在我後枱的客人, 不只食自助餐咁簡單, 還用袋子裝食品拿走, 足足拿了三碟! 可留為宵夜或早餐之用呢! 而這些客人, 不好以為是上面來的遊客, 是香港人哦, 真是想也想不到

La Crêperie (灣仔)

與朋友到灣仔搵食，竟然俾佢發現呢間專食法國Crepe的樓上食店，真絕！被貌似衛蘭的waitress引領我們坐高椅，可憐短腿的我2腿fing fing吓；打開menu，見到一堆英文字，粒粒字都識但夾埋唔識解，死未？我的臭臉忍不住出動…朋友見勢色不妥，立刻召回衛蘭，要求換檯及解釋吓個set；成功換檯令我雙腳著地，“鄰居”由ABC變成日本太太，心情亦好轉過來~


尤其見到個main dish—La Marco Polo，真係嘩到個口都合唔埋；事關個crepe大過隻12吋大碟，個皮薄到0.001mm，脆口度滿分；餡料方面，就有雞肉、Emmental Cheese、三色椒、同埋越食越辣的醬汁，非常醒胃；最開心係伴碟有少少ceaser salad，好清新，亦減輕了全肉的罪惡感~其實個crepe有點似薄片pizza，面頸用芝士痴實d材料咁囉！可能我太貪心，想一口食哂各款材料，於是每件都切到大大件，塞爆個口為止，亦因如此，我吃了半件已經好飽，但都仲想食埋落去，你話幾好味！朋友的daily special就係La Vannetaise, 即係好似早餐咁，有煙肉、蔥、Emmental Cheese，好清新，感覺竟然比我那個更健康，今次，輪到佢食埋我那件至飽哩！


其實已經飽到反眼，足以埋單走人，但原來仲有個甜crepe上場，我那平平set lunch就有Chocolate/Caramel或者Butter & Sugar呢類普通貨色可以選擇，相對朋友的貴價set lunch 就有Stewed Apple & Caramel可以揀。既然未試過，就要order個穩陣的Chocolate，點知一上檯，又係靚到個咀收唔返，個邊邊位的crepe仲係脆卜卜的，加埋唔太甜的朱古力醬，就算中間位已經林咗，一樣咁好食！又係，飽死都仲食緊呀~


朋友的Stewed Apple & Caramel甜crepe就靚得多，焦糖漿中間有一堆燉得又甜又香的蘋果片，加埋個crepe食，又多一種食味，正呀！


呢度以法國西部的海邊城市Brittany為主調，見到船艙的裝修同埋waitress的水手打扮，真係好有放假feel，“C焗”呀！

紅蔥頭 (旺角)

見到呢間紅蔥頭好多小情侶幫襯，我都湧埋入去先。

先來的ceaser salad雖然好翠綠，可惜食得出唔太新鮮，仲有少少雪味，算啦，旺角嘛，值得原諒！起碼佢d芝士粉、煙肉粒粒同炸麵包粒粒都唔孤寒啦！

再來的主菜卡巴可以揀羊同雞，醬汁亦有3款可揀，包括秘製卡巴汁、蜜味燒烤汁同埋薄荷乳酪汁，仲可以自選配料，跟埋連皮薯條同埋涷熱飲品都只係$58，抵喎~雖然實物比想像中細件，我地d芝士煙肉全部見到樣，雖然個人認為同件羊肉唔太夾，但無所謂啦，好味就夠！至於薯條嘛，可以再好d囉，基本上的係食茄汁的，所以唔太介意薯條好唔好味~不過今次點個卡巴汁都唔錯！
跟住就係最愛的法國寶雲蘇羊扒配薯蓉，呢個可以算係食個menu最貴的（$88），好在都俾足3件lamb chop，味道方面真係唔錯，可能大家都係用香草醃同煎，味道唔會差太遠吧！

富臨漁港囍臨門酒家 (黃大仙)

今日同幾個朋友去飲下午茶,諗住要等好耐位,估唔到等左十分鐘左右就有位,心諗間酒樓好食有限啦,假期都唔駛等好耐位,好在都唔係,D食物都唔錯

鮮蝦腸粉--腸粉皮薄,蝦新鮮又大隻,仲要有蝦味,證明D蝦都唔錯
酥炸魷魚酥--炸得過火左少少,不過都幾好味,係有D鹹
奶黃馬拉糕--色澤OK,食落唔會太甜,幾好
蝦餃--蝦新鮮又大隻,仲好爽口
燒鵝瀨粉--好抵食,下午茶時間只係$9.8,仲要見到好多人叫,而且好多都會有燒鵝腿,唔會張貨就價
綿花雞--OK,食左件雞及蟹柳,無食到綿花,味道都OK
黑椒牛仔肉粒--有黑椒及牛肉味,真係唔錯喎!

整體上都幾好,係員工的反應慢左D,搵左三四個職員先可以搵到BB凳,叫野食想搵個人都要等好耐

帕莎 (尖沙咀)

今日老闆邀請我地去K11的Parsa食新疆菜~

一入去，已經好有feel。我地估佢裝修費都幾金~打開menu，價錢好似有點貴，於是點了呢個$320的4人餐。

前菜的涼拌豆腐，好有台灣feel，可能係受皮蛋同蔥菜影響吧！入口涷冰冰，果然係涼菜！

之後的煙鴨胸老虎菜沙律，其實又係一般有齊紫椰菜、火箭菜、洋蔥等的菜菜沙律，配個醋當沙律汁，一般啦！

先來的清燉羊肉，係咪賣相一流先？一打開個碗蓋，已聞到撲鼻而來的羊肉味，一飲落肚，果然好清，但肉味勁濃郁，總之飲完一碗，感覺成身暖哂，冬天飲就正啦！

之後就到香酥羊排骨，睇個presentation真係殺哂，可能又係用孜然粉醃過，感覺好似深圳食 “東北人”的羊肉咁，不過人地十蚊人仔大大隻羊脾，呢度幾廿蚊一小件羊排骨囉~

2隻辣椒的新疆大盆雞，感冒中，唔想食雞的我，唯有試吓墊底的“皮蛋粉”，質感好似小肥羊的寬條肥羊粉，QQ的，索哂個汁，幾好味架！而所謂的2隻辣椒，其實都係一般辣，唔食辣的朋友都肯定食得到！

醬炒包心菜似上海菜，好濃味，配飯就最正！

由於無甜品，所以老闆很體貼地請埋我地食拔絲香蕉（$70），上檯見到只有6件，就覺得呢度D野食超貴！好在，佢真係做得唔錯，個脆漿夠薄夠脆，甜度適中，香蕉夠熟夠甜，唔錯噃！

呢度的碟頭都幾細，我地3女1男都係勉強夠飽，如果4個男人幫襯，應該要來個double吧！

個人認為，除了個羊排骨同埋燉羊湯之外，完全唔覺自己食緊新疆菜，好在有氣氛搭夠囉！仲有，呢度lunch hour都唔夠10圍檯，希望佢晚市情況好D啦，否則都應該好難捱落去！