無名炭爐伯伯雞蛋仔(大坑)

我有經驗喇, 上次Mon 3:00pm, 今次Sat 2:00pm, 我已經掌握到伯伯開檔時間, 但始終唔敢開口問佢幾時休息

今日去到要排隊呀, 等一陣就到我喇, 見到伯伯間唔中加炭加炭, 第2度真係好少見到架.

至於雞蛋仔呢~外層脆脆的, 裡面軟淋淋, 仲要好有內涵添, 食得飽人架! 但我愛甜, 如果佢甜d就更好喇

炳記(大坑)

大坑人氣排檔炳記真係好人氣呀,去到正值午飯時間, 好多人但我一個都好容易攝到位, 就算要等都好快有位, 因為D人都唔會話慢慢坐, 食完好快走.

我首先叫左豬扒米&凍OT, 凍OT唔使講啦咁平常, 豬扒米呢~米粉唔好, 浸左一陣先食都係唔夠淋, 豬扒就好喇,有D西餐味,係黑椒汁而且可能有落香草添, 好香. 豬扒係有質感, 唔會到淋過件豆腐.

其實食完豬扒米已經飽架喇,但又醒起依度麥多都好味喎, 所以又叫左個奶醬麥多, 件多士外脆內軟甜甜地, 不過我今次件無提子, 奶醬份量剛好, 唔會食到成手奶, um~好甜蜜呀 ^.^

梓記牛什(新馬路)

我唔係特別鍾意食牛雜,但絕不抗拒,我都好耐無食過牛雜,見大家咁推崇,一於試啦.起初以為好多人,唔知點解我到時有好多位任坐,4:00pm應該係下午茶好時候喎

牛雜$25,細細碟,唔係平架,不過就樣樣有d啦,仲有d唔知係咩添.

除左牛根之外,其餘都炆得好稔好入味,又其是個汁,好香濃,但食完又唔會太口渴

祥記麵家(新馬路)

白灼魚皮,爽滑彈牙,但個豉油太咸啦,可能淨食唔係咁啦.

米通炸魚球,炸得好香脆,唔油膩,2個人食哂成碟都ok

蝦籽撈麵,蝦籽好香呀,d麵又爽喎,撈埋d豉油食唔會太咸,good!

雲吞麵,麵身當然都係爽啦,雲吞係細細粒,蝦同豬肉比例傳統雲吞,正!

船屋葡國餐廳(媽閣)

早一個星期打電話去book位食lunch,佢話要2:00pm先有位,ok無問題,後來先知完來2:00pm開始d食lunch人漸漸埋單,而且已經無乜人等位.所以如果大家唔介意食個late lunch,其實唔使打long d book位.

燒葡國臘腸,咸咸油油的,凈食可能太咸,不過跟埋餐廳奉送的熱辣辣脆豬一齊食,嘩無得頂呀!

炭燒牛仔肉,好香炭燒味,不過無咩牛肉味,可能佢仲係牛BB關係吧.但照計牛BB肉應該好嫩滑,唔知點解我切極都切唔開wor,結果要勞煩老公幫手切到一粒粒等我吉住食

海鮮燴飯,果然名不虛傳,好多人叫,真係好味,湯汁充滿蝦味,香濃而不過咸,材料豐富,有4隻青口,好多蝦仔,蟹腳仔.不過其實有幾多都唔重要,因為凈係得d湯,食哂成鍋飯都唔係問題呀

榮記荳腐麵食(新馬路)

捐窿捐罅終於找到喇, 其實依間舖唔只係賣豆腐花,仲有麵食,不過我千辛萬苦黎到目的只得一個"豆腐花".

我一向鍾意食奶露豆腐花,所以叫左一個普通&一個加花奶.

結果花奶只得少少,完全唔感覺到佢存在,大家可能會諗"落花奶太多會蓋過豆香". Oh! sorry~係完全無豆味,基本上加唔加花奶都只係一碗帶甜味的滑

完全無豆味,咁都算係豆腐花嗎??

洪馨椰子(新馬路)

椰汁,椰子雪糕各$10.
椰汁少少甜,唔杰身,飲落口好舒服,仲有d椰子肉,好好,不過$10咁細杯有d貴.
椰子雪糕可以話係椰子雪芭,好香椰子味,應該落左好少糖,所以好fresh.

大堂街炸雞(新馬路)

我就唔多鍾意食家鄉雞, 因為覺得好咸, 依到d雞唔咸,不過就太甜
層炸粉又甜,雞肉醃得唔夠味而且又係偏甜,怪怪咁,真係唔明點解咁多人讚,可能唔我口味啦

自助山(中區)

$238 + 10% 大堆頭大製作, 總會搵到想食的, 但味道&食物質素就.............
可能太多人都話好啦, 搞到我期望太高喇, 但細心一諗, 依個價錢, 有咁多野揀, 可以接受, 不過無下次law~

安德魯餅店(路環)

第一次去,原來唔難搵, 一入去就叫左葡撻&檸檬水, 然後行去海邊吹住海風慢慢嘆.不過慢唔到呀, 因為實左太好食喇

葡撻焦焦地又香又脆, 甜味剛剛好, 無得頂呀!

檸檬水酸咪咪, 大熱天時飲, 感覺良好.

下次一定要再黎

帝影樓(氹仔)

Friday 11:00am

環境好好,好寧靜(原本),後來有一檯佬係咁講粗口

露鮮蝦餃, 金箔帶子燒賣皇 & 菜帶子角都好好味,唔覺肥膩.

黑豚叉燒包食唔出同普通叉燒包有咩分別, 但味道仍是good的.

XO醬珍珠雞好普通,唔知d XO醬去左邊

依個環境依個食物水準, 點心平均收$2x, 茶錢$15, 包埋酸菜花生, 好合理.

鴻星海鮮酒家(鰂魚涌)

話說鴻星20週年, 有個 "原隻鮑魚.翅.海斑全包宴" , 半席$1,380. 依個價錢, 依個份量, 依個質素, 抵.

鴻運六小碟:
六款都好食, 特別推介川辣牛(其實唔辣)夠稔又夠味 & 炭燒腩肉, 正.

椒蒜安格斯牛柳條:
炒得好香, 牛柳條好稔, 好好味.

XO 醬爆蝦仁:
都係炒得好香, 蝦仁大大隻, 好爽口.

順德砂煲蟹:
唔掂, 好明顯係雪藏蟹, 但調味唔錯.

紅燒瑤柱鳳絲翅:
OK, 無特別, 當然預左翅唔多啦.

清蒸海斑:
蒸老左.

原隻鮑魚花膠筒:
好味, 鮑魚好稔, 花膠好滑, 冬菇好大隻.

玫瑰豉油:
好滑, 味道好.

長壽蝦子乾燒伊麵:
適逢爸爸生日, 有依味野應下節都幾好, 水準一般.

精美甜品:
車, 紅豆沙, 仲以為會開支楊枝甘露嘆下添.

千歲蟠桃包:
賣飛佛, 食完飽哂.

煌府酒家(銅鑼灣)

價錢$128全包, 明碼實價, 幾好. 話食2個半鐘, 但其實無趕你走, 可能客唔多啦.

火鍋食物都係一搬貨仔啦, 不用多講. 雞蛋$3隻, 竹蔗水, 酸梅湯, 汽水生力任飲.

特別一提, order紙上的"公仔麵"其實係"出前一丁".

Service都唔錯, 成日加水, 又成日幫你睇夠唔夠gas.

最開心係每人可得片皮鴨一件, 我真係好鍾意食片皮鴨架.

松屋日本料理(銅鑼灣)

一去到,點解只得3款食物order紙咁少揀, 無鍋物無煮物

雖然話選擇不多,但其實都可以食到好飽.

串燒真係掂, 差唔多試哂咁多款, 每款都唔錯, 只係隻蝦霉左.

刺身都ok, 但劍魚&章紅魚無味, 吞拿魚雖然有筋但魚味幾好.

手卷, 好奇怪, 明明一上就已經即食啦, 但點解快紫菜可以韌成咁,而且完全無紫菜香味.

天婦羅好正, 新鮮熱辣脆卜卜, 一定要試.

芝麻雞翼如之前幾位所講咁好味啦.

雪糕試哂咁多款,綠茶,紅豆&芝麻都好食, 士多啤梨就一般貨式啦.

收紙快, 食物黎得快, 收碟快, good.

最抵讚就係無乜漏單, 成晚都只係漏左一次枝豆, 加上我食8:00pm段, 好多客, 所以值得原諒.

新波士餐廳(灣仔)

肉眼扒餐 $85
火焰牛柳餐 $88
焗田螺 $33(跟餐)

肉眼扒, 味道一般的正常, 沒有驚喜亦唔會失望.

火焰牛柳, 上前, waiter會你面前上演一張火焰show, 相當好睇, 至於件牛柳, 肉質好稔好軟, 肉味一般.

焗田螺味道ok但太多油喇.

Service係唔錯的.