明記甜品(佐敦)

去一些舊式的糖水舖,通常只會幫襯傳统的糖水!例如蕃薯或腐竹白菓等幾類.因為試過多次之後得出一個定律:舊舖試新嘢=瀨嘢!當然有例外,不過我未試到.
凍冰冰坐在室外本想叫碗有薑味嘅暖吓身,望望吓見到牆上面貼住呢款睇落幾吸引,於是轉軚!
花生糯米麥粥----上檯見到出晒煙,夠熱!用匙羹攪一攪睇落好多料,入口後發覺是另一回事,甜度是適中,但甜水的黏度卻似有加工的嫌疑,有點似埋了個荳粉茨.花生大部份是未煲淋硬身的而且有幾粒更是生的,但其它配料反而淋得沒有咬口.因為這款糖水應該是"有Ｄ嘢咬吓果類"
深水埗的綠林做得比這裡出色很多!
令到佢唔駛喊係因為夠熱!(坐喺街邊冷風吹住食,夠熱呢樣好重要!)
未致於要棄船逃生,但下次會行多兩分鐘去佳佳.

皇冠粥麵餐廳(油麻地)

在油麻地這區來計,這間已算是早餐收費較高的一間餐廳,來過幾次每次也有六、七成客人,發現有一點幾有趣,就是來這裡的食客及在工作的侍應都非常愛靜!推門入內坐下只會隱約聽見厨房傳出歌曲聲音,其它就只有餐具進食時撞擊的聲音!成間餐廳係無人講嘢嘅!好似...好似去咗圖書館開飯咁!
火腿炒蛋拼迷你雞尾包----從外貌完全聯想不到是雞尾包,但咬到中間就甜到飛起!
火腿是有煎過的痕跡,但决不會叫這塊黃色的東西做炒蛋!這只不過是將蛋漿倒在朳爐上沒用翻動,由得自生自滅地煎熟,跟著用鑊鏟將蛋皮對摺上碟!又嚡又無味.
沙爹牛肉麵----大光麵煮得軟硬適中,沙爹汁是濃味但下了太多油,牛肉發漲偏軟身無咩味,應該煮之前啤咗好耐水!(沙爹牛肉都係青山道孖寶新華同金園穩陣)
凍奶茶----奶味多過茶味,幸好甜度適中不難入口.
如果想安安靜靜食早餐,多付幾元來這裡是不錯的選擇!

龍蝦燒(佐敦)

天氣凍冰冰本來想食煲仔飯,有口碑嘅又排餐懵!門口望入去無人嘅又瀨嘢居多,迷迷吓去咗文英街,剛好在這門口對面有錶位!望入去比缸龍蝦仔吸引住咗!短短一個街口已有三間食串燒!(一間曰式、兩間中式)戰況都幾激烈.
入來坐下立刻點菜,點菜紙上食物種類款色有百多樣選擇,點菜入單後十多分鐘開始有得食!
全部肉類要了大辣,其它中辣.
牛脷----切得太薄!一燒就縮埋一舊,食落得一個靱字!
鴕鳥肉----仲嚡過牛肉,呢個有兩個靱字!
羊肉串----丁點羊肉應有的羶味也沒有,入口完全咬唔開,有三個靱字.
雞軟骨----燒得不夠乾身,油份略多.
XO醬燒蠔----雖然XO醬的味道不太特出,但蠔本身的質素唔錯蠔身飽滿!合格!
金菇牛肉卷----燒得有點過火,牛肉老了少許幸中間的金茹尚有水份,未致於要咬柴皮.
蒜蓉燒龍蝦仔----即叫即撈即劏即燒,龍蝦肉夠彈牙,蒜蓉味足!果然係招牌貨.
燒秋刀魚----燒得不錯!外皮帶脆,雖然有點腥,但魚肉尚保留一點油份,食落都唔錯!
安格斯牛柳粒----唯一唔靱的肉類!雖然肉粒本身油份不多但起碼咬得開吞得落.
燒全翼----一隻燒到連中翼位置都唔滑的雞翼!翼尖燶哂,其它位置就好似食雞胸.
蒜蓉燒茄子----蒜泥大割引!差不多仲多過茄子肉!似食一堆蒜蓉多過食茄子.
試過後發現這裡對肉類的處理必須再下一番苦功!
其實海鮮類只要新鮮實在是沒有難食的道裡.要回頭的話只會為了隻龍蝦仔!

輝記車仔麵(油麻地)

第一次幫襯是十多年前,那時還是不定期在永星里開檔的車仔檔!味道早已記不起.
自從搬入舖後未有再幫襯,因為舖中坐位不多只坐得六、七個人!旁邊又難停低車買外賣,
這晚剛好經過有位泊於是外賣回家懷舊一番.
點了六餸加麵底,份量一如以往,多得要用兩個外賣碗,
回到家裡也要分兩個湯碗先裝得哂!
韮菜----灼得剛剛熟,不過油落得太多!索油索到條條閃閃令.一口咬落啖啖油!
雞腸----最好味的一樣!雞腸帶有肥膏,入口油潤軟滑.
豬紅----沒有腥味,幾滑溜.
牛腩----炆得並不入味,肥膏多個腩,部份硬身有渣.
蘿蔔----沒有渣很淋身但亦都沒有甜味.(被車品品寵壞咗)
豬皮----無味及未炆淋!
份量超大一定飽肚,雖然話食車仔麵係食味精架啦!
但今次真係重手咗,食完口渴咗幾個鐘,年紀大對味精係敏感D!

桃源軒(油麻地)

這天趁外出機會來到油麻地,時間啱啱好嘆個下午茶,在這邊想找一間未試過嘅都幾難!唯獨這間不是未試過,而是很久沒來過!(從對面馬路搬過來也有好幾年)
這邊的舖面比較大一些,座位多一些,鬼殺咁嘈嘅樓面阿姐也多幾個......
點完菜,阿姐就插對筷子落杯熱水度隊俾你!杯水原來唔係要嚟飲係要嚟洗筷子嘅!
芋丸、薯丸、春卷----3款意外地原來全是素食!有點勉為其難擺入口,芋丸的芋蓉是甜味,薯丸原來是蕃薯當然又是甜!齋春卷有甘荀、冬茹絲和綠荳做餡料.食多兩件感覺幾"漏".
炒米線----配料是大量甘荀、椰菜及東菇絲加幾條疑似素火腿絲,味道清清淡淡!米線炒得有點糊,質感黏黏的不太討好.
茉香奶茶----餐轉凍飲再加大杯比多七蚊,由於本人非常飲得,食量卻一般!(只限非酒精類飲品)最緊要大大杯夠凍!對這類台式茶類沒甚要求,只要不甜得過份就OK!
這裡的食品不算難食,只是心理沒有準備吃素食.當然亦有葷的食物供選擇,只是剛好這次是全中!食咗$52蚊下午茶,感覺仲有點空虛!

札幌拉麵屋(大角咀)

星期日中午在奧海城看完一齣長兩個半小時的電影後,剛好下午茶!本想起這裡好像開了一家吃蕎麥麵的店舖,在商場內行了半個圈就懶得去找,剛好來到這店門前心想試吓呢間新開嘅都好喎!(一直也未發現這間就是北角札幌的分店!)此店面積頗大!如果坐滿一齊食拉麵都幾壯觀!下午茶時間客人不多,服務員效率非常高,帶位坐低遞餐牌另一人已將茶放低.打開餐牌看見「普通拉麵」才記起這間的本店是在北角!對本店的印象只是一般自不然降低了期望.
http://www.openrice.com/restaurant/commentdetail.htm?commentid=2036822
點了一個下午茶餐拉麵拼餃子:
普通拉麵----和上次吃的拉麵是同一款味噌湯底,有一片义燒及芽菜、海帶、葱及荀作配菜!有所不同的是湯的熱度非常高,接近燙口!湯底的麵豉味道濃厚!這次不須外加調味.义燒依然只得一片肉質尚算軟淋.麵條的彈性亦有所改善.
煎餃子----皮薄,整隻餃子非常飽滿!餡料味道新鮮沒有雪藏味,如果煎得脆口一點會更佳!
下午茶餐份量比正常散叫的小,不過只收$38加2蚊仲有枝可樂.如此質素巳無所求.
不知是不是本店的師傅來了分店坐鎮?分店的出品水準比本店穩定很多,難怪上次印象麻麻.

東海海鮮酒家(宴會廳)(尖沙咀)

往年吃大閘蟹多是從五豐行訂貨,幾個人夾份買一籮回來再分贓,跟著你又搞佢又搞大食會,個個食完做餐懵洗餐死!
今年懶得去做,一於想食就齊齊出街食,乾手淨脚食完拍吓欏柚走人!
朋友間口碑最好是這裡夠經濟水準穩定,於是訂試一試!
佛跳牆----有花膠、原粒搖柱、花菇、散翅加多隻雞腳.一個較簡單版本的佛跳牆,始終大酒樓處理這類材料是較為熟練,花膠沒有腥味,其它材料也能食得入口不似一般湯渣,一個非常濃味的湯水!
蟹粉小籠飽----飽身有黃油滲出,一口咬下湯汁不算澎湃但鮮味十足!(友人上星期試過另一家酒樓的套餐,內裡的蟹粉小籠飽是腥味十足.)
大閘蟹----套餐每人有2隻,分開兩次上檯.第一輪五隻都係公(第二輪一樣),蟹身不算大型,反轉蟹奄有少量黃油流出,內裡藏膏量不俗!蟹膏味道比蟹乸濃,質感較為實及黏一點!這裡的質素很平均,每隻的蟹膏也差不多,第二輪亦如是.
蟹粉蒜蓉多士----其實不要蒜蓉也夠味,法包烘得脆身(唔係硬),不過這次蟹粉處理得一般,要趁熱食!因為凍得很快所以有點腥味.
牡丹蝦烏冬----烏冬本身其實問題不大,出事在灑在上面的櫻花蝦!食落苦苦地有燶味,看來有點似包裝零食貨色.
油菜----普通灼菜但加上大量的油!令到每條菜也被燈光照射得華麗地閃閃發光!
蕃薯薑丸子----薑味夠濃!
六、日收$328,星期一至五有八折埋單無加一無茶芥實牙實齒$260!

南龍粥粉麵店(油麻地)

曾經希望這咐近會開一家乾淨企理的粥店!新鮮的油炸鬼牛脷酥食!因為另外一家實在太不争氣!衛生差(檯面及胡椒粉瓶黐立立,鹽又一舊舊!空氣中的油煙味仲勁過去食韓燒!)最重要是食物質素極差!吃過一次後覺得寫也無謂,只想忘記不想提起.
最近願望成真!出現了這家店.新裝修關係,燈光光猛檯面乾淨企理.
艇仔豬紅粥----有水魷、猪皮、碎牛肉,因為粥的温度夠,熱力足夠灼熟牛肉,令到碎牛肉咬開後不會外熟內生,水魷爽口脆身,豬皮亦夠淋.(很怕吃到硬豬皮及橡筋魷魚!)粥底不算突出,但嬴在夠熱!
牛肉腸粉----即叫即拉,豉油的調味偏甜,腸粉皮略厚尚算滑溜,餡料的牛肉有點鬆散.
油炸鬼----幸運地撞到剛新鮮炸起!脆身沒有油溢味,久沒試過燙手又燙口的感覺!
各樣食品的價錢也像回到九十年代,油器每件$4,粥也是每碗$12!雖然價錢平,但也提供了合理食物質素!希望這小店能生存下去.

串爆酸辣粉(旺角)

對辣味的食物是無法抗拒的,是喜歡但不是食得很辣!(以譚仔的麻辣作為一個指標的話,中辣是最合適!再上一級便會覺得辛苦.)幾年前在內地吃過一次酸辣粉,是一次味覺的災難!那種酸餿味道畢生難忘.(後來才知是我揀錯店舖)害得之後一直也沒有再去試這食物
今天剛看完"梳六",受了點刺激!行過登打士街見到海南雞變了酸辣粉!正好挑戰一吓自己的恐懼!這碗是在香港第一次食的酸辣粉!
酸辣粉----沒有令人牙較軟的酸味,入口時沒有嗆喉,有少少麻的感覺只嫌不夠辣!(因為無得揀辣度)薯粉是粗身的那一種,滑溜有彈性.配料有頗多的炸菜及花生粒,味道不錯.
泡椒皮蛋----泡椒是沒有辣味的,皮蛋雖非溏心但都可以接受.
紅油炒手----一口Size很討好,雖不知是何處版本(無蒜蓉無醋無辣油)但都算薄皮,餡料沒雪味,味道是不錯的.
牛肉、鱷魚肉串燒----牛肉未算淋但也咬得開食得落,鱷魚肉就真係靱到咬唔開,超韌!都係適合用來煲湯多Ｄ.
如果想靠串燒食糊就應該串唔起!不過酸辣粉呢就真係唔錯!

JW’s 加州餐廳(金鐘)

記得數年前的生日在大阪渡過,那天在心齋橋道頓堀望著かに道樂外牆的巨蟹招牌,心想不如今日食蟹都好喎!!入內沒看餐牌上的套餐,可能當造關係有特別的推介,,於是要了一個40000円的鱈場蟹餐兩個人食.刺身、炭燒、火煱、天婦羅、清酒蒸一次過試勻晒!咁就出事喇!試過食新鮮會郁嘅,從此對其它雪蒧貨無哂興趣!
(後來才知最貴的套餐是10000左右,難怪會有個厨師攞隻生蟹出嚟解說一番,又有個阿嬸教埋你點食咁好服侍!)
有長輩在此試過這裡的秋蟹套餐說俗!於是又燎起了心癮.
來到才知主要是吃皇帝蟹,鱈場蟹只佔其中一味.
King Crab Meat in Light Sour Soap----兩大條皇帝蟹柳拌酸醋汁,蟹肉是用蒸的方法去做,味鮮甜,酸醋汁調教得不錯,酸度適中不嗆喉.
Snow Crab Sushi----味道和日本吃過的分別不大,只是蟹脚體型較少,放在上面的蟹膏味甘甜,不用點豉油也夠味.
Grill King Crab Legs With Butter----牛油的味道較清,更能吃到肉的鮮味,一直認為用燒的方式最能吃到蟹的鮮味.
Grill King Crab Legs With Chilli Pepper----加了蛋黃醬及七味粉去燒,蟹的味道被搶去,但較惹味香口.
King Crab Hot Pot----賣相麻麻!蟹肉浸湯太耐變得鬆散味道亦變淡!煱內的荳腐及菜只是普通之物,不見突出.
Coffee & Chocolate Ice-cream----哈根大師出品.
$680 x 2 +10%
這個價錢當然有更好選擇,但經Member Discount 50%後,每人$400左右又好像可以接受!

玄拉麵(尖沙咀)

近期迷上日式菓凍(即是啫喱內有個完整的柑或桃果隻),雪櫃內梗有幾盒看門口.九龍城買的多是一盒八個送禮用的禮盒裝,反而City Super較多啱口味的散裝賣,雖然款式選擇始終不及Apita多.這天順道來尖咀補貨,離開時發現這間拉麵又轉了手,自稱為秋葉原玄流派,反正有點肚餓正好一試.
辛口麵豉义燒拉麵----賣相似模似樣!配料有高麗菜、半只蛋、义燒、大葱、葱花、芽菜、肉碎、
湯的温度能保持燙口,第一啖湯是ok的,有麵豉香味不過愈食感覺到愈咸.
麵條的質地和日本吃到的分別不大,偏向硬身及近似即食麵彎曲的形狀,吃到尾也不會變爛.
义燒全無油脂!雖未至於柴皮但一點也不討好!像湯渣.
蛋差不多全熟,未致於去到烚蛋般硬身但食落蛋味欠奉.
揀餐時非常頭痕!種類不多但複雜,相差幾蚊又分玄派又什麼全天然素材不含味精,煩!

和味菜館(旺角)

記得小時和家人在街邊打邊爐,當時只得炭爐,配料的選擇沒有現在那麼多.只得大或小的雜錦或海鮮可以揀,用一隻蒸魚用的大鵝春碟,粉絲同菜墊底跟住牛肉、雞件、丸類、豬膶、水魷每樣都有小小咁排滿隻碟,再插多幾隻用竹籤穿著的蝦,面頭擺一隻雞蛋(到現在也不明白那"一隻雞蛋"的用途!打落隻碗度定打落個煱度?定係成隻烚嚟食?唔知!)
這夜和數名80年代尾出生的小朋友來這裡見識炭爐的風味.
五個人沒有大肆掃場:
羊腩煲(大)----羊腩全部好似粒甄沾記椰子糖咁嘅Size!肉質炆得很淋很軟身!尚有少少羶味.
配料只有枝竹無馬蹄,不過份量真係細!汁的味道很濃,加幾次水都仲夠味.
手切肥牛----一碟有二十片左右,肉質出奇地軟滑!而且牛味頗重.
即劏鱔片----即叫即劏,半條都已經好大碟!而且上檯時個頭仲郁緊,新鮮!肉質爽脆,食味與雪藏貨無得比!(因為平時食果D多數係劏好唔知喺雪櫃擺咗幾耐)
豬頸肉($35)----急凍豬頸肉切條.
四寶丸----四款凍肉舖的"雪"丸.
滑雞件----雞件斬得頗碎有肉的部位不多,多數是皮連骨!不過食落都幾滑.
雲吞拼魚皮餃($45)、芝士腸($30)----全部都雪得幾實吓!
出前一丁x2----羊腩汁煮麵想唔好食都幾難.
環境不用提,怕小強唔好嚟!
價錢唔算平,質素唔係高!
食物份量小,食完成身炭味!
但係踎喺街邊用炭爐打邊爐有幾多人試過?

福元湯圓(北角)

這間店舖的位置對於駕車的人可算極不方便!咐近找個時租停車場並不容易(尤其對九龍人來說),這天剛好在咐近晚飯,終有機會一試!
鴛鴦湯丸----友人的先上檯,看見有三粒是芝麻、兩粒是花生,可能我較有好彩!少了一粒花生多了一粒無餡.薑水是意外地的重味!湯圓的皮薄及咬落黏性頗重.
芝麻餡味濃香,甜度適中,不過看來用了很多油,才令到芝麻變得這麽滑溜.
花生餡吃落口味道更濃!但如果多吃兩粒的話會覺得很膩.
糖不甩----糖、椰絲及花生碎是獨立包裝的另上,無餡湯丸有八粒.這湯圓如果是連湯一起食的話問題不大,但一撈起乾撈的話就變得太黏太軟身了!花生碎如果是粗粒的話效果可能會更好.
上檯時其中有一碗的芝麻湯圓穿了餡,賣相變得非常核突!(黑芝麻有油浮在薑水面,變得有點像工業排污…)

帝苑餅店(尖沙咀)

吃忌廉蛋糕的慾望一向不大而且所知不多,通常只注重味道而不太在意賣相.覺得Cova的忌廉蛋糕是較合心意的選擇(與之前在日本的經驗有關!講包裝賣相無可能有國家贏到日本,但味道就真係…通常大百貨公司內都一定有蛋糕賣,仲要幾靚幾貴都有!但試過很多次味道都是比不上一件賣$5的美心西餅!)
家人生日,今年試試新口味!在OR找到這家.
黑森林蛋糕----本來對蛋糕面的朱古力裝飾頗為反感,很討厭朱古力以這種形態出現!唔係脆唔係硬,軟奶奶入口又唔溶!想點?但當接觸到軟滑的忌廉及海綿蛋糕後,又改變了觀感,朱古力味濃而不甜,尤其是去到有野莓的那層,酸味令到整件蛋糕不覺得單調.牛油硬餅底真的過硬了一點.
難得太后會主動要多一件,看來這次買對了蛋糕.

富臨漁港囍臨門(荔枝角)

每次回母親家中和家人見面也很少出外用膳,原因當然與家母厨藝有關!
不想每次四個人食飯也出現八餸一湯的場面(煮嗰個你估真係唔辛苦),偶爾也要找個借口外出!
南乳香燒骨----非常惹味的一款菜色,排骨醃得入味,南乳香味十足,炸得酥脆不油膩.
花膠鵝掌煲----除了鵝掌是炆得夠淋之外,花膠及海參都是偏硬不夠軟身.
魚湯粉絲雜菜煲----魚湯味濃不腥,蝦乾的味道很出.
椰皇燉海星----火候十足,有淡淡的椰香及螺頭的味道,不會感到黏著嘴角,飲後感覺不錯!
脆香燒雞----水準頗飄忽的燒雞,每次來也有分別!但這次是屬於高水準!外皮脆而皮下脂肪不多,肉質嫩滑入口還温熱,近骨的位置不見血.
蒸魚----真不知母親的雀友們如何常常獲得這些什麽燒鵝換領卷、蒸魚換領卷!每次來這裡吃飯梗有一張在手!只知大約斤半重左右不懂分種類,蒸的時間掌握不錯!豉油的調味適中,魚肉不黐骨仍然嫩滑.
大閘蟹----純為一過心癮,蟹的肉質是屬於"削"的一類,膏的顏色深沉,味道欠甘香.不過$28蚊隻仲想點?!
看來最近晚市的生意真的差了很多,整間酒樓用圍板間開了一半,只用半邊做生意!但以乎更能讓侍應的服務焦點集中,沒有了如上次像快餐店式的服務.