韓樓 (尖沙咀)

近排一套「來自星星的你」寒流吹過本港，金巴利道一帶的韓國餐廳驚現人龍，本來我們一行四人是想彷效劇中女主角食炸雞飲啤酒，但奈何該間炸雞店的人實在太多，等位時間約超過 1 小時 30 分。經商討後，決定買盒炸雞返屋企食，然後求其搵間叫冇咩人的韓國餐廳醫下肚先。就在炸雞店隔離，就有一間出面冇咩人等，但裡面都坐滿人的韓國餐廳 - 韓樓。等左約 15 分鐘到就已經有位。

以前對於韓國菜唔係太好，以為不是燒肉就是泡菜、人參雞湯的我，一睇佢個 MENU 都估唔到原來韓國菜都幾多款式架喎。向來都好喜歡食泡菜，但一直都較喜歡食日式的泡菜，因為味道較甜較濃，平時係超級市場買個啲韓國泡菜，唔係過辣就係過酸，一係就味道偏淡，總之一句說話講晒，就係我覺得韓國的泡菜無日本仔腌得咁好，我自己就好喜款 City Super 賣個啲新鮮泡菜。 （下！泡菜都有新鮮唔新鮮之分！？） 
韓流的泡菜雖然不似日本仔整的泡菜般帶有甜味，但至少酸辣適中，個人認為尚算好食的。炒年糕拉麵就係一般辛辣面，有啲年糕咁。即食麵呢一定唔可以煮到佢軟身，軟硬度一定要係適中之上偏硬，咁食落去先會有彈牙的口感。韓流應該就深明呢個道理，出到黎麵身軟硬度適中之上偏硬，正！湯汁辣中帶微酸，還有一點甜味，感覺開胃！嗱！其實我就唔係好想點呢個芝士紫菜卷，因為唔洗諗都覺得應該係騎呢野，但因為同行者有人對牛肉敏感，而泡菜我地都有啦，無理由又叫呢兩種。咁係想食韓式紫菜卷的情況下，我就點左呢個芝士紫菜卷。一食！嘩！一如我所講，九唔搭八！味道完全配搭唔到！我係店主的話，我會從將呢道菜從 MENU 剔除！作為餃痴的我，基本上只要個間餐聽有餃子呢樣野，不論日式、中式我一定會點！韓國餃子係我眼中一直都係各式餃子中排名最低，因為係澳洲讀書個陣，我間唔中都會買啲泡菜餃返屋企煎嚟食，可能係我買個隻唔算太好食（唔好問我點解唔好食仲要買，你要知道係澳洲根本冇咩好食！），所以我對韓式餃子評分一向唔高。韓流呢碟餃子外型明明同我係澳洲買個啲一模一樣，但食落去係兩件事！我無諗過韓式餃子都可以好食！韓流煎呢碟餃子，煎得剛剛好，黃金色，不會太「火農」，但又保持到餃子皮夠脆！餃子汁酸中帶甜，又係夠晒開胃！部隊火鍋我係第一次食，以前跟團去過兩次韓國都未食過。在未食過的情況之下，我都諗到其實應該就係個啲士兵平時唔知食咩好，就咩都掉晒落去煮的一個鍋。出到黎同結果諗的都係一樣，裡面有菜、豆腐、腸、午餐肉、菇、紅蘿蔔，總之就係一堆野堆砌出黎，不要期望有咩靚的食材，因為咁樣先係部隊火鍋麻！如果裡面有埋公仔麵（即係辛辣麵）就更好。

四個人食左呢啲野，仲有飲野，買單都係 $520 左右，平均每人都係 $130 左右。我個人覺得尚算抵食。

荃豐撈麵 (荃灣)

早一輪見到有個朋友在 FACEBOOK 上載了荃豐撈麵的照片，對於一個其實對食物唔算好大要求、最愛頹飯的我即刻心動。奈何你要我專登過去，我又唔會喎！咁啱個日有野想買，就諗起不如去荃豐啦，順便可以試下個撈麵。

一睇餐牌，除左可以點 SET 外，亦可以好似車仔麵咁自行選料。餐牌上的SET好多都係扒類，我自己個人對扒類的興趣不大，所以就點了個 A 套餐！
A 套有兩個營多撈麵，兩條腸、兩粒牛丸、兩隻雞翼。呢個套餐的特點係所有配料都係以滷水汁滷過，滷腸仔我都係第一次試，滷水味濃亦甜，啱晒我。滷水雞翼俾佢滷到好軟，入口即散！正！唯讀滷水牛丸呢下我覺得真係唔多掂，九唔搭八。至於撈麵啦喎，咪就係一般營多囉，你可以有咩要求？我自己就鍾意食硬身啲既麵，如果佢個麵唔好咁軟身會更好！

你話 $30 抵唔抵就好見仁見智，當大家樂的焗豬扒飯都賣緊 $40 的時候，我真係零願食營多，都唔想食生的米。