第一次幫襯, 本來想食湯河, 但河粉已經賣晒, 所以叫了雞絲撈檬同豬扒撈檬。好彩食左撈檬咋, 雖然無試過湯河, 但我覺得撈檬一定勝過湯河, 尤其依家天氣熱。撈檬份量好夠, 雞絲/豬扒 同菜的份量都佔差唔多一半。我依d大食的, 平時出街食粉麵一碗都唔多夠, 但依碗撈檬都夠八成飽。 再過一星期又掛住撈檬, 又再幫襯第二次。 今次試埋蟹膏蕃茄湯檬同牛油果沙冰。 蟹膏蕃茄湯檬的湯底好正, 雖然可能都有落些少牛湯精, 但佢都有自己煲湯底, 因為我食到有d牛肉係湯入面。蟹膏餅真係有蟹膏味, 都幾好食, 唔係蟹柳無蟹d friend 😂 牛油果沙冰打得好幼細, 完全唔覺有冰, 同埋佢應該加左椰奶/ 椰子一齊打, 椰味略嫌勁左少少蓋過左牛油果味。

第三次食outback, 覺得最好食都係黑糖面包，每次都會叫佢俾多個 本身想叫個combo, 想食豬肋骨，點知話豬肋骨無晒，其他combo又無興趣, 最後叫左個安格斯肉眼扒，同蘑菇鮮蝦寛條面 。

好食幾倍嘅肉眼扒我都食過，但價錢當然都幾倍。依個二百幾蚊有咁嘅質素真係唔差，佢又唔會有成舊肥膏唔食得，同埋都算幾有牛味。

蘑菇鮮蝦寛條面有點細碟（當然不是相中的細碟，但依度都已經係一半） 但係佢d蝦都算多,蘑菇白汁都幾濃，幾好味。 但最後總結，男友和朋友們都覺得outback最好食其實係黑糖面包

平安夜的市區到處都十分熱鬧，但赤柱就十分寧靜。 七點去到鍾菜都係得兩檯人。 第一次食鍾菜，本身以為係好貴個D價錢，但其實同出面酒樓差唔多，原來佢都係稻香集團旗下。 我地六個人叫左一個三百幾蚊餐，有炒 龍躉 ，浸豆苗，炸子雞半隻。 再叫隻BB豬，椒鹽鮮魷，咕嚕雞球。





BB 豬夠嫩夠脆，無乜肥膏，唔似平時食成大隻燒豬有成寸厚肥肉，又無果陣豬臭味。 椒鹽鮮魷都唔錯，脆漿好薄，椒鹽味道都岩岩好 炸子雞同咕嚕雞球都係一貫酒樓水準，都係咁嘅味。 我最愛食豆苗，上湯浸同炒都得，都唔會難食，唔使講 沙巴龍躉都係第一次食，佢起左肉來炒四季豆，好方便食，第一次食依隻魚嘅味道，都不錯呀

經細妹推介，已經想試大漠好耐，今日中午约了男友出來食飯，就想起這裏來。 他們有lunch set, 蠻抵的， $42有湯，主菜，飲品，羊奶涷。 但lunch set中， 只有一個是羊，就是羊肉pizza. 其他都是什麼炒飯之類沒特別，完全沒興趣。 他們另外還有兩個set，$85羊肉湯麵和$120鎮店羊架配飯／意粉，見之前食評話羊架好味，所以好想試下。 於是，我們叫了羊肉pizza和羊架意粉。
羊肉pizza真係唔錯，他的pizza是酥皮底，所以好香脆。 羊肉不是太羶，如果再羶會更好。 但焗得岩岩好，羊肉不會乾,配車厘茄酸酸地，又幾好，唔會太膩。
鎮店羊架就實在太太太失望，羊架太肥，好多都係油。味道不是我平時食羊架的那種，總之，完全無羊個重味。 個意粉就更加唔好提，又硬又乾。 至於，他寫住甜品是羊奶涷，但我食的那個應該是桂花涷，不過都幾好食，有淡淡的桂花味，不知羊奶涷是什麼味道呢？ 大家都說很好味。

在團購買左兩個餐，和風山賊和牛安格斯同四色芝士蘑菇和牛安格斯漢堡，今日終於有機會來食。 睇相就真係好似好好食，所以十分期待，最後好彩都無失望，只是嫌個漢堡不夠大，食完成個餐都唔夠。
這是和風山賊和牛安格斯漢堡，唔知點解叫山賊，我覺得可能講緊生菜 以$35一個餐來講，舊牛肉真係超出水準，好過M記同burger king好多。個汁都好好味，生菜亦好新鮮
四色芝士蘑菇和牛安格斯漢堡，相比和風山賊，我覺得和風山賊好味d, 因為依個無乜芝士味
薯條夠粗夠熱辣辣，好正。 但野飲就淡得濟，唔夠甜。

中秋夜，與男友到BLT Burger做節 之前已經想試，但成日都覺得百幾蚊食個burger好貴。 雖然今次都覺得真係好貴，但諗唔到有咩其他想食，而又無乜人排隊，所以揀左BLT. 我地叫左個Classic burger 同 Australian Wagyu Buger combo, 要左粗薯條同加錢轉Monkey Business milkshake, 兩個burger都叫左七成熟.
首先嚟左杯Monkey Business，佢係 chocolate icecream, peanut butter and banana blend埋，好好飲，但香蕉味就唔係好夠


和牛漢堡都算重牛味，亦都夠juicy. 薯角仲有薯仔皮，好香薯味。
Classic burger 係安格斯牛，牛味更重，但依個就dry 左d. 鐘意安格斯定和牛就見人見智，我就鐘意和牛多d. 仲有佢配埋個兜好細嘅沙律，好好食，相比起之下，反而沙律同奶昔比burger更出色。

今日約齊四隻腳去蓮香樓飲茶。之前一直都諗住試，諗下諗下就幾年。 今日諗住去PMQ元創坊，所以就順道去蓮香樓。 我地下午兩點到，等到差唔多兩點半先搶到位。 開左壺龍井茶，好少飲龍井，少少苦都幾好飲。

首先有車仔經過，是綿花雞和雞紥。綿花雞聽就聽過，食就未食過，原來佢都無雞紮D friend. 綿花就係魚肚，雞紮多舊芋頭，綿花雞多舊冬菇，present手法不同，這就是分別所在。雞肉幾滑，魚肚都夠淋，吸埋D雞汁／油，不錯。
跟住有馬拉糕和蓮蓉包車仔經過，兩樣都叫左。 馬拉糕好大舊，味道同出面食的不同，我諗應該係用唔同嘅糖，這個馬拉糕好食過出面，香D. 蓮蓉包十分足料，仲有咸蛋黃，好似食緊月餅。


跟住搶手果D都俾人搶晒，一推車仔出嚟，就成群人擁上去。我地幾經辛苦，先攞到排骨，鳳爪，腐皮卷。我地見到有熟客搶都唔晒搶，阿姐自己係後面塞俾佢，印都唔使給。 排骨，鳳爪都無咩特別。 腐皮卷好味，但唔太記得有咩料。 跟住我地叫左個炒面，炒面好食，係我食過最好食炒面之一。 味道夠，炒得均匀，加埋少少燶，值得一試。 幾次車仔出嚟都係個幾款點心，明明等緊位個陣見到人地有好多款點心食，原來佢地四點就落場，所以唔會再蒸點心。 所以下次請早 不過都應該唔會有下次，雖然食物是不錯，但環境真係麻麻，同埋搵食艱難，我寧願食得舒舒服服

四月去完新加玻食左當地的亞坤，個咖咉多真係一食難忘，要專登第二日再食多次。 番到嚟香港，五月份已經見到係尖沙咀話coming soon, 真係超期待。 開張左個幾星期，每日番工或放工經過都見排晒長龍。 今日終於有時間去食。 佢比起新加玻多左好多product, 有叻沙，鹵麵, 蒸飽，特式飲品等等。 我當然要試番咖咉多，同埋叫左個馬來西亞鹵麵試下。 見佢送到嚟嘅咖咉多，已經一睇就知無新加玻的好食。 佢層牛油同咖咉醬都好薄，人地新加玻果D係厚到咇晒出嚟。 同埋多士又唔夠脆又唔熱，又貴過新加玻好多，所有希望都幻滅。 仲諗住香港都可以食到亞坤......

馬來西亞鹵麵都還可以，個汁幾好味，有麻醬味，少少辣椒，甜甜辣辣，是不錯的
但都係個句，我好掛住新加玻亞坤咖咉多

與大學同學gathering, 在諾士彿台食完晚飯，要找食甜品的地方，有人提議到甜品工房，我和議，因為經常見到很多人在店外等位，見到D甜品賣相好吸引，想試好耐。 我地等左四,五個字左右先有位。 睇menu樣樣都好似好好味，好難揀，我最後揀左新地系列的紫醉之迷，朋友亦揀左新地系列的赤地之雪和綠茶之舞
還有宇治金時
紫醉之迷係巨蜂提子味，舊雪糕有d似藥水味，佢有D一粒粒好似魚子的，味道好淡，無乜巨蜂味。 跟住成杯都係無味的乳酪和栗米片，食到唔想食。 朋友的那兩杯都差不多，最上的雪糕都幾好食，但跟住成杯乳酪同栗米片，真係食到唔想食。 宇治金時係刨冰淋上綠茶同紅豆，最上個兩塊係好甜的餅，下面有一粒粒小丸子。 朋友最後食到成碗都係水，溶晒，都唔使再食。 總結，我和朋友們都覺得不會再有下次，甜品並不是真的好好食，而且又幾貴，試過一次已經夠

第三次來Green食晚餐，menu又唔同左。 感覺好似之前兩次menu d野食好食d.

首先叫左個沙律，健美果仁雞肉沙律，沙律醋調得好好，中和晒d菜的臭青味。（我一向唔鍾意食沙律就係因為好怕d生嘅菜嘅臭青味）沙律裏除左有果仁，沙律菜，雞肉，仲有好細粒的紅菜頭，一向又係好驚紅菜頭d味,但細細粒又無乜野。

炸魚薯條比係出面食過，甚至係歐洲食過的好味。 魚仲好嫰滑，仲有三個sauce配，青豆汁，茄汁同唔知係咪叫他他汁蜆肉意粉依d通常都唔會衰，白酒加忌廉加香草，都係咁。 我地數過蜆肉有成11隻，都算多。墨汁意粉就食得多，墨汁意大利飯真係第一次食
，其實都係同平時 d Risotto一樣，加上半隻波士頓龍蝦，（我唔就得有無墨魚，就算有都係少少）,無其他料。 不過隻龍蝦幾好味來到Green, 一定要食cake, 我不嬲都係佢地fans. 我食過咁多款，最鍾意都係綠茶，但今晚竟然話賣晒。我唔食唔緊要，但我d朋友們未食過，好想試。好彩我地一去到就問，發現無，個waiter哥哥好好，幫我地打去餅房問，話即刻幫我地整三件。
有綠茶蛋糕，又有綠菜 mousse, 有少少綠茶苦味，加埋朱古力個層脆脆，真係好正 芒果芝士同朱古力茉莉都係我最愛。
芒果味嘅皮，入面有芒果芝士 mousse. 朱古力味外層，入面有茉莉味mousse，朱古力蛋糕，朱古力脆脆，多層口感，多層味道。