君滬鍋貼大王(土瓜灣)

昨日朝打完風，等埋同事返公司接完更收工已經差唔多十二點喇，上左116去到紅隧口又唔知醒落車，咁結果又係去到洋葵樓先至識落車，落左車又見肚餓，咁就入左去呢間君滬食些少嘢喇....

呢間君滬都係第一次食，不過土瓜灣道同埋鰂魚涌果兩間就食過，可能啱啱打完風，所以入去果陣只得兩三個人

咸豆漿唔咸，鰂魚涌果間咸D

煎餃兩隻，就肥膩左些少，不過都唔錯

生煎牛肉飽，多汁，最正係佢

祥利飯店(灣仔)

星期日行完電腦展影完磨豆已經係九點半喇，諗住同在電腦展撞到的朋友行返出去春園街食大排檔，點知去到春園街先至發覺以前食過果檔已經整棟樓拆左，咁唯有周圍搵下有冇好野食，誤打誤撞下比我地撞到黎三角街的祥利飯店。

去到岩岩好只剩一張細枱，所以我同大蛇都即刻坐低，坐定定後先至發覺原來呢間係好耐之前飲食男女介紹過的小炒王飯店之一，加上幾乎坐無虛席，即係我地白撞都冇撞錯喇。咁肚餓，即刻叫野食.........

呢檔原來開到半夜兩點，以後又多一個聚腳地喇


食物唔平，四碟餸每碟要六十蚊，不過食過之後一定會話：抵食....

四碟餸，兩支老青，一碗白飯，共$277

澳洲牛奶公司(佐敦)

都好耐朝早冇行過佐敦喇，不過昨日朝早要去九公做野，所以又不其然諗起這裡的招牌早餐，所以住在沙田都要早D出門口去食。

餐廳朝早七點半開門，七點七去到，已經坐左好多人喇，不過仍然比我搵到位坐，櫈都未坐，我已經好順口咁對住伙記叔叔話『多士炒蛋熬奶茶』，叔叔已經急不及待地落單，放低個袋一坐低，已經放左一碗火腿通粉喺我面前喇，熱辣辣的火腿通粉，粒粒通粉爽口彈牙，唔會好似其他茶餐廳咁煮到又林又爛，加埋又濃又好味的湯底，真係好味到冇野好講咯。

食通粉食到半路再黎埋炒蛋+多士，炒蛋炒得滑滑又少油，食多份都唔怕肥，多士烘到脆卜卜，又唔太燶，其他大小餐廳好少整到咁好味的多士的.....

唯獨係杯熱奶茶可能漏左單，比我遲來搭枱的，食左一半先黎杯凍檸茶都黎左，我果杯熱奶茶都仲未黎，不過問左個叔叔一次之後，半分鐘未到又黎左喇，相對腿通同埋炒蛋多士，熱奶茶就普通左D，但都不失為一杯好飲的熱奶茶。

不過要廿四蚊一份早餐，就好似貴左D咯.........

強記美食(灣仔)

上星期四晏左起身，返工前又諗唔到食乜，諗住落去銅鑼灣食，坐車果陣，心血來潮諗起好耐冇去強記食糯米飯，所以就去左強記食晏仔喇.

在酷熱天氣警告下食糯米飯同埋豬骨粥，某程度上其實係折磨緊自己的，不過無計啦，鬼叫D糯米飯同埋豬骨粥鬼咁好味咩.......

坐左入舖裡面較涼地方，例叫糯米飯加臘腸同埋豬骨粥，在酷熱天氣下食熱辣辣的糯米飯豬骨粥真係幾辛苦的，不過原來又係另一番滋味，或者，自己就係攞苦黎辛既人黎掛.......

熱到噴火的天氣下，食到咁好味的豬骨粥同埋糯米飯，都無所謂咯..

Saizeriya Italian Restaurant(荃灣)

前幾天有會員朋友說『再平也不會來』，可能這位朋友對食真的抱著太高要求；亦有朋友提過『衛生不得忍受』，不過我又唔係太覺咯；更有會員朋友說『不知所謂』，因為服務太差，這個point反而贊成，因為真的太少服務員了，忙到根本沒服務員招呼可言。不過如果好似我呢D『大件夾抵食先決』的，這間餐廳絕對岩我喇。

1930在北角收工，趕入去荃灣，就是為了朋友替我慶祝生日，雖然距離真的很遠，但有好野食，走幾遠都值得。因為朋友已吃了多次，所以對他們來說已沒甚驚喜，不過對我未吃過的，就真的非常驚喜了。


煙三文魚，切得夠薄，唔錯，比酒店自助餐還好味

青口焗海鮮飯，用鐵板上，朋友讚不絕口，其實都算好味，但我就覺得普通左D，不過廿幾有咁大隻青口而且係炒底，已經好唔錯

蒜蓉焗田螺，只售二十蚊；非常抵食，下頁有會員話蒜蓉配料太多蓋過田螺味，咁我又唔覺喎..........

辣肉腸pizza，這個pizza雖比Pizza Hut少饀料，不過食起上黎味道仲好味過Pizza Hut 的。

蒜蓉焗青口，其實味道和青口海鮮焗飯果隻青口好似，不過都OK。

只售十蚊的抹茶雪糕，亦是一個驚喜，本以為只係雪糕一舊，不過食落口好重抹茶味之餘又唔太甜，而且雪糕內冇雪粒，食夠兩個都仲得。

唯一一樣較貴的就係Asahi細支啤酒要$13一支，不過係水貨日本貨，一隻中文字都冇的，可能咁成本貴左掛......



食物及價錢真的一流，這兩項係可以比哈哈笑的，但這店幾乎毫無服務可言，及地處染廠大廈真的『隔涉』一點，所以整體上只可以比OK。

胖子肥腸煲(羅湖黃貝嶺)

前年同朋友去過呢間呢間位於鴟鳳凰路的食店，朋友因嗜辣，無辣不歡，所以係辣既食物都會係咁質落口食，呢間小店就最岩佢喇....

果次只係三個人去，不過已經叫左四個餸，因為朋友話實在辣得太好味喇


水煮魚，一上枱就比一整盤辣椒嚇親，我問朋友乜我地叫左兜辣椒黎食咩？朋友話辣椒下面咪係魚黎咯，夾上黎食，一放落口，辣味即刻攻上中樞神經，雖然勁辣，不過好好味

辣炒腰片，可能冇辣椒浸住，食落口相對冇咁辣，不過咬多幾啖，原來都好辣下，不過炒得爽口，用黎送啤酒一流

招牌肥腸煲，間店名叫肥腸煲，黎到一定要叫呢煲招牌菜啦，呢個煲望落去冇咁多辣椒，以為冇咁辣，岩既，上枱時岩岩開著邊爐冇耐就食，的確係冇咁辣，不過當邊爐著左火耐左之後，煲裡面辣味先至慢慢攻出黎，呢個時候肥腸開始盡吸辣味精華，先至放落口咬一啖，嘩，好過癮啊

糖醋魚，四個餸唯一一個唔辣的餸，很大條，上枱時條魚係企直咁上枱的，條魚做得皮脆內嫩，酸酸甜甜，因為呢條魚係最後先至上枱的，所以我地係差唔多食飽辣野，食到咀都"咩"埋先至食既，一食落口，D酸甜味好似識中和之前D辣味咁，食完個口竟然冇晒辣味，亦因為先前的辣味，令到條魚食起上黎格外鮮甜好味。呢條魚唔係招牌菜，但原來用黎配辣野竟然係一絕，好野

三個人，四支老青，兩罐王老吉，埋單差唔多二百蚊，抵喔，不過，下次要約多D人上黎食先至得

新益美食(黑沙環)

計落都有兩年未去過新益了，所以趁復活節假期先去橫琴食蠔(因為食埋下個月以後冇得食喇)，夜晚就專程返回澳門，去望廈的新益再擦餐飽了。

一行九人在氹仔坐34號澳巴去到黑沙環，再行上去新益時還未夠六點，不過原來已有數十人對住店舖內服務正準備著的枱『虎視眈眈』，原先有朋友還嚷著駛唔駛咁早要去到，但看到這情景後，已心知不妙，因為再遲多十分鐘到達，就一定要等足個幾兩個鐘喇。這或者係上個月肥佬滔過嚟介紹過、『日日有食神』效應嚟掛.....

見勢色不妙，即和朋友入去霸定枱，不過幸好有服務員問我地到齊人未，亦咁岩仲有一張橫枱，本來已有人留下，不過留枱的人仲未齊人，所以就讓比我地先喇....

這間大排檔式的食店，老闆肥仔俠計仔多多，替每款菜式改了很多鬼馬抵死名字，食足咁多年已改了數百款鬼馬菜式，到現在看到仍不禁捧腹大笑。


當晚九個人，叫了八個菜，已食到行唔到

先嚟鮮薑蔥魚皮，一般叫『省港澳齊撈起 』或者『撈起』，薑蔥魚皮花生wasabi等等撈均後先至好食，食落口魚皮爽脆，連薑蔥食非常鮮甜，連平時唔食蔥的都忍不住要食一啖。

跟住有蔥油雞，這裡的蔥油雞沒有紅街市的龍華茶樓咁好肉，不過薑蔥和龍華的一樣多，雞雖然冇咁好肉但仍很有雞味，最有心思的，就係盛雞的碟分兩層，底下的係盤，面的一層係隔篩嚟，雞內的多餘油份會留落底層內，令肉身保持乾爽，亦不會太油膩，老闆這樣的心思，過百蚊一隻雞已值回票價啦。

再嚟有咖哩蝦球班球大包，大包其實可以配雞或者蟹的，不過朋友們揀了蝦球班球，咖哩香口，不過嫌不夠辣，蝦球班球蘸滿咖哩放入口裡，原來感覺係好唔同的，而大包用附上的大較剪慢慢剪開，再點咖哩汁食，一流。

食食下咖哩包，再上一個煲，就係啫啫通菜煲，一開蓋啫啫聲加埋啫啫煙，再把通菜兜多幾兜，嘩，就好似岩岩炒起碟通菜一樣，好神奇喔。

通菜還未食完，又嚟多一個煲，水蟹伊麵煲，一開蓋同樣啫啫聲四起，不過可能分量太多，啫啫聲不及通菜煲的響，不過伊麵已經盡吺水蟹精華，每啖伊麵都可以食到鮮甜水蟹味。

跟住仲有鴛鴦豬扒，兩大塊釀豬扒，一塊釀白汁火腿餡，另一塊釀黑椒餡，每塊剪開十小塊，放入口裡，豬扒分別跟黑椒同埋白汁火腿撞埋的感覺，woo...........

再嚟係黑椒牛利粒，呢個新款菜黎，以前唔見有的，有朋友食落口嫌有酥味，不過我就唔覺有喇，用嚟送酒一流，最衰唔可以邊玩骰盅邊睇波，如果有呢碟牛利粒送酒睇波，食到輸波都開心喔...

最後一款係芝士牛油焗大蝦，十多隻大蝦在長盤上排開，芝士和牛油恰到好處，冇蓋過蝦的鮮味，不過可能最後先上枱，已經食飽晒，食落口時已經冇以前咁有驚喜lu....



飲飽食醉，飲左六大支青島，幾支蔗汁，埋單$636，即每人約七十蚊，抵到爆啦。

明華餅家(旺角)

其實我經常會去旺角，但就好少行到去花園街近登打士街果邊，上星期日晚收工後要落去攀山中心買野，所以買完野就過去買合桃酥同埋蛋散喇。

合桃酥做得又香又脆，係少有的餅店做得出色，而蛋亦都係一樣，夠脆而且又唔太咸，咁多年都依家仍然出色，十分難得。

其他麵包款式就未試過買。

金利來食坊(牛頭角)

同朋友睇完公民黨首映已經係九點半，咁岩又諗起牛下都『果頭近』喇，所以就趁牛下仲未拆，去九座搵好野食，行過呢間金利來食坊，就比佢裡面幾近坐滿的食客吸引住入左去喇.....

有好多招牌茶，都唔知叫乜食好，最後叫左四個餸，有細蠔粥、豉椒炒蜆、椒鹽尿蝦同埋辣酒煮花螺。豉椒炒蜆，夠辣，送酒一流；椒鹽尿蝦夠香口，啖啖肉；細碗蠔粥，用魚湯湯底，夠晒鮮甜，食完仲加多一煲辣酒煮花螺，上枱時啫啫聲，D辣煙辣到隔離枱食客打咳痴添呀。

不過無奈地炒蜆都有唔少係未開殼既，而開左殼既亦有好多係冇肉既；而椒鹽尿蝦亦有幾隻係訓覺蝦，相中前方就有一大隻訓覺蝦，D訓覺蝦一搣殼D肉係散晒爛晒既....

兩個人九點半食到十一點半，四個餸三支老青埋單$233......

小肥羊(荃灣)

在振華路同埋國貿食小肥羊食過好多次，昨晚在港食反而係第一次，一位荃灣的朋友的邀請，當然要去試下啦。

朋友相約去城市花園以前係機舖俌位的小肥羊打邊爐，可能六點九較早去，去到都唔駛等位，就咁入去就得，坐低後，搏命係咁tick火鍋料，比左待應姨姨後，要等大半個鐘先至黎得齊，而且期間有侍應叔叔送錯左另一枱的小食過嚟，我朋友想叫佢攞走，但點知佢越叫越走，最後三小碟小食一直放係度等到埋單都冇食....

講番個湯，叫左鴛鴦麻辣+清湯，湯底冇深圳的咁辣，但滾耐左出左味就開始夠辣，都算好味，羊肉都拍得住深圳的，但就冇深圳的咁多款選擇，而且其他小食及鍋料好似串燒、羊眼、羊寶等等就冇得叫，可惜....

雖然食物任叫任食，但飲品超貴，一楂酸梅湯要$32，細支獅威要$6....

原本剩係睇食物我可以比哈哈笑的，不過扣番D服務態度同埋D飲品價錢，我只可以比OK lu.....



相片補充：

#1: 食左一半先至識得影，三個人食如果D鍋料如果只係寫"1"字咁就每款只係得好少，呢度兩碟已經包括十幾款鍋料喇......

簡單廚房(旺角)

昨日7/3中午行開朗豪坊，朋友打比我咁岩又在附近，所以便相約和朋友去food court食飯，不過見food court太多人，咁就入左去呢間Match Too.....

坐低後，很快看過午餐menu，兩人不約而同地點了石頭窩飯，一個黑豚肉另一個牛肉，點了後，只需等約一個多字便上桌，以石頭窩飯黎講速度驚人，不過原來這麼快上到桌背後，梗有一點地方有問題，就係個石頭唔夠熱，連美心MX的石頭窩都熱過佢，不過還幸好窩飯及配菜還很熱，但已失去石頭窩飯的意義喇，再加上服務員遲了上醬汁，淋汁後石頭窩當然不會出煙啦，這點又真係失望。

上次黎食過這間的豆腐芝士餅，不過今次黎唔記得左食lu....

大漁鐵板燒(福田華強)

早前原本和朋友晏晝去皇崗試新場拆骨，一路拆骨朋友就一路問我夜晚去邊度食，因為同事們曾經提過皇崗的大漁好抵食，任食任喝都只係$150，所以我第一時間醒起這間大漁，一拆完骨，朋友在等付款埋單同埋送另一位朋友返港的同時，我即刻走去這間福民大漁霸位先。

真係大鄉里，原來要嚟這間福民大漁擦餐飽，係要早一兩日訂定位的，要不然就一定唔駛旨意有位坐；我們一行四人當然係冇訂到位啦，所以我五點十上到時，服務員亦頭痕左一陣，究竟仲有冇位比我地坐呢？不過最後亦找到一張僅餘的四人枱比我地，真係幸運，walk in 竟然都有位坐。

我另外三位朋友因為要送另一位朋友返港，所以要到六點半先至到，但服務員在我坐定定後已經同我講，這一轉時間係五點到八點的，我地要八點正埋單，換言之，我地四個只有個半小時食，所以佢地一坐低就乜都唔埋喇，清酒啤酒紅酒魚生牛肉卷等等乜都叫，所以我都食到唔記得有乜野食左lu。

可能因為太多人，所有食物都起碼要等兩三個字甚至更耐時間圥至到，不過每款食物都很好食，印象最深刻的要算係煎鰻魚，煎得很香很脆口。

無奈地數款食物真係等得好耐，叫左好耐都唔黎，不過我地竟然可以坐到八點九先至埋單走，飲左咁多杯清酒紅酒，又食左咁多，雖然要$150咁肉赤，但乜都抵番晒咯。


下面的食評話食物唔乾淨食到要sick leave，不過我地四個又冇事喎，所以下次有朋友生日我都會諗住再黎多次慶祝既.....

生昌潮洲海鮮酒家(大圍)

前日星期日，日間要連聽兩個briefing，飲晏晝茶，臨天黑又要去辦些事，飲茶時，我阿姨話夜晚出街食，突然間阿姨又諗起好耐冇去顯徑的生昌，所以前晚就去了生昌吃了。

平時搵位的工作應該係我做的，沒理由要阿媽去霸位掛，不過因為今晚有事要做，要搞掂先至趕過去，去到已經係八點半了，因時間關係，我阿媽已經一口氣叫了五個餸，包括蠔仔粥、蠔餅、花枝蟹棗、腰果花枝片及鹵水鵝片。不過因為我沒帶相機，所以沒有為各菜式拍照了。

蠔仔粥 - 係我在生昌的至愛，每次嚟食都要例叫的，粥底的湯聽講是翅湯，加上地魚，其他潮州食店係整唔到咁好味的。

蠔餅 - 印象中嚟左咁多次只係叫了一兩次，因為每次嚟都有叫蠔粥，所以也沒有叫蠔餅，不過今次阿媽竟然叫了蠔餅，食落口夠香口，又不太實，又不太"水"，少少脆口，好味！

花枝蟹棗 - 亦是例叫的菜式, 墨魚加蟹肉打成膠再炸，送酒一流，不過阿媽覺得這次的偏咸。

腲果花枝片 - 花枝片炒得爽脆，連西芹也炒得香口，我平時唔食西芹也吃了幾條。

鹵水鵝片 - 師父刀功出色，鵝片切得很薄，不過嫌鵝片數量太少。


最後，我忍唔住又叫了一條鹽焗烏頭，來生昌這裡，十枱有九枱都會叫烏頭，因為這裡的烏頭實在太好吃，烏頭連鹽一起蒸焗，令烏頭內的油份迫出滲進魚肉內，令魚肉份外香口。

自從新翠的金滿棧開張後，我阿媽就開始唔肯去顯徑食喇，嫌遠喎，所以已經有大半年沒有去生昌了，隔了咁耐之後，仍然好吃，真係難得。

金總統火鍋(荃灣)

昨晚返工睇完同事今期的新x期飲xx番，覺得呢間的牛骨煲幾吸引，而且撞岩荃灣朋友吹雞開飯，所以今晚就捉埋佢兩個落去試下新野喇.........


一坐定即刻叫了一個招牌牛骨煲，上左邊爐開火煲滾開蓋後，發覺真係冇叫錯，貴些少都係值得既，因為呢煲原來唔止係牛骨煲，而係牛雜煲黎，所有牛雜盡放煲內上桌，滾起後牛味四溢，最緊要係個牛煲咁多牛雜一D都冇酥味既。嗜牛者一定讚不絕口。

鍋料當然要叫招牌手切肥牛同埋金錢牛展啦，睇番其他食評，雖然肥牛同埋牛展已加左價，現在每碟要$128，但只要灼一片放落口食過後，就知百幾蚊一碟手切肥牛同埋牛展真係物超所值喇。

大食的肥仔叫了其他鍋料包括黑葉、牛丸、自製雲吞、西洋菜等等加埋十幾碟，食到自己都唔記得食左乜lu......

所以到埋單果一刻就真係眼到突埋，三個人埋單$853，不過貴得有道理。

寶哥味館 (放題店) (太子)

舊同事想約番一班同事出來一聚，所以找我找一個在旺角的打邊爐地方，本來都沒有頭緒，因為旺角太多任食火鍋，很多同事都食過了，所以便要找一些較有特色的火鍋店，在各大blog及食評(包括openrice)找到這間寶哥味館，所以昨晚就決定一試了。

坐低後每人先在三款主食先點一款，包括和牛，肥牛同埋海鮮，幾位同事每人點一款之後撈亂食，其他大堂自助火鍋料任取任食，任取火鍋料一D都唔差，有象拔蚌、生蠔同埋最搞野的釀油炸鬼，一行九人食得超開心瘋狂。而且酸梅湯蔗水及汽水任飲，啤酒都只係十蚊五罐，昨晚就用左五set啤酒黎向一同事迫供，於啤酒效應下，該同事當然要坦白從寬啦


下次在旺角可以再去，就算只係一兩個人都可以食得盡興