Egg benedict嘅俵俵者
應該非The Flying Pan莫屬
半熟嘅水煮蛋上面鋪滿荷蘭式嘅芝士醬
下層的煙三文魚亦都好豐富
成個層次好分明
另外side dishes配咗番茄湯同烤薯仔
就算係深夜先食
佢都係一份感覺好幸福嘅早餐*另外, 本小姐三不五時都會好有衝動
自己一個夜晚走去食早餐
以下為另一個夜晚嘅早餐一份

是日早放工家中無飯開
同妹子傾咗一輪睇咗一輪到差唔多9點
率之就衝咗去石塘咀市政大樓搵飯開

去到成發睇咗陣菜牌
就點咗個咕嚕肉, 鑊仔清酒煮蜆, 啫啫雞軟骨煲同個北菇滑雞煲仔飯 (細)

咕嚕肉個色澤好鮮艷
炸得唔算好燶好脆
肉質唔算好韌都ok
反而伴碟嘅洋蔥就生咗啲鑊仔清酒煮蜆酒氣好重好香
不過食落又唔太覺
啲蜆唔算好大隻
勝在無乜沙
之但係慢慢食落會覺得咸咗啲之於個啫啫雞軟骨煲就出咗事
煲底啲油差唔多成1cm咁厚
食兩啖已經覺得好熱氣好咸
就連啲西芹都油淋淋反哂光
妹子要用紙巾索咁啲油先敢食
真係有啲怕怕最後個北菇滑雞煲仔飯亦都係so so only
滑雞一啲都唔滑
另外可能焗得耐咗嘅關係
連帶啲豉油都有啲燶味

是日興起到元朗同友人開飯
揀當咗一輪就決定去食Savour
因為無訂枱而室內又fully booked嘅關係
我地就喺12度左右嘅環境之下被安排坐室外
好彩個侍應都肯幫我地將個暖爐拉埋啲我同友人各自點咗個set dinner
我個set dinner包括磨菇湯，凍食翡翠螺，鵝肝松露菌意大利飯同個熱Bailey's 朱古力
友人個set 包括磨菇湯，鴨胸凱撒沙律，白酒青口扁意粉同熱樂家杏仁糖朱古力

首先頭盤嘅螺同鴨胸凱撒沙律都無乜特別正正常常接住嚟個磨菇湯
啲磨菇好蓉
成個質感都好rich 好thick
仲要夠creamy
唔錯輪到主餐
我份鵝肝松露菌意大利飯份量唔算好大
但係因為配上鵝肝
有少少漏得嚟又會剛剛飽
塊鵝肝煎得幾香不過中間有少少根
個飯食得出有菌類喺裡面
之但係就唔覺有松露嘅香味友人個白酒青口扁意粉相反就好大份
青口嘅數量亦都好多
不過成碟嘅味道偏淡之於最後果兩杯朱古力
賣相唔錯
我果杯尚算飮得出有Bailey's 嘅味道
反之友人果杯嘅樂家杏仁糖味就欠奉

某日無意中發現公司呢間隱世豆腐店
是日走咗去食晏
點咗窩貼同熱豆花
窩貼剛剛用大鑊煎起
大大隻新鮮滾熱辣
皮唔算薄但勝在能夠包住啲肉汁
𥚃面餡料好足不過好易散豆花啲豆味唔算好出
不過起碼夠滑如果想喺北角grab a light lunch
呢間老店算係一個唔錯嘅選擇

得知Killiney進軍香港一段時間
終於有時間一試
同友人點咗份咖央多士+兩隻半熟蛋 同 米暹 餐

上一次喺新加坡老店食過咖央多士同半熟蛋
今次喺香港食
個質素同味道同新加坡有得揮
咖央多士夠鬆脆
望住多士中間夾住果塊牛油
內疚感雖然好重
不過都抵唔住誘惑咬落去
咖央同牛油搭得剛剛好米暹鋪得好靚
個湯底甜甜地
唔錯唔錯是日嘅精粹在於兩杯飲品 - Teh C 同 Kopi C
我杯Teh C 很滑
雖然煉奶味好重
不過都無完全蓋過哂茶香
友人杯Kopi C 亦都好出色
咖啡味好香

同友人喺公司附近搵飯食
行咗一陣就見到水晶晶無乜人又有卡位坐
所以就決定食泰國嘢
兩個女生點咗份生蝦沙律, 炭燒豬頸肉, 乾咖哩炒蝦, 肉碎辣椒炒飯加青檸梳打

首先嚟份生蝦沙律
啲蝦出奇地比出面其他泰式餐廳大好多
同時亦都好鮮甜爽口
份量亦都唔少
伴碟嘅苦瓜係本小姐嘅大敵
所以一件都無掂過炭燒豬頸肉嘅份量同樣地都比出像中大好多
炭燒味唔算好強烈
不過都幾香幾爽
最重要係夠抵食乾咖哩炒蝦椰香味好重
蝦球都幾彈牙之於個肉碎辣椒炒飯我就唔太好
不過友人係飯桶加辣椒精
所以就like 爆

原本想嚟多個椰青糕做終結
何耐待應話先一晚賣哂未整得切
雖然我地心諗點解你地今日唔整番
但係最後都點咗份千層糕
剛剛蒸(番)起嘅千層糕係就係熱辣辣
不過我就覺得佢唔夠甜同無咗份煙韌感
so so only

Merhaba為每個weekend happy hour 或者夜晚飲野嘅老地方
是日時間尚早
所以同友人到果道食晚飯
兩個人點o左三道菜 - lamb pizza, eggplant puree with pita bread 同個羊肉串燒

lamb pizza 剛剛焗起即上枱
個薄餅皮雖然有少少燶
但係勝在夠薄夠脆
面頭啲羊肉碎亦都夠香夠多
亦都唔會太膻羊肉串燒都唔錯
羊肉夠嫩唔會好韌
之但係就欠缺咗熱辣辣嘅感覺
不得不提伴碟嘅蒜蓉焗蕃茄
半個蕃茄面鋪上蒜蓉嚟焗
食得出蕃茄嘅鮮甜之外亦帶點蒜香反而個eggplant puree with pita bread 就遜色咗啲
eggplant puree 本身係凍
但係問題在於佢係非常之淡
加咗鹽都好似無乜味咁
下次應該唔會再點另外剛剛呢個weekend 同另一友人試咗個南瓜酥
鬆脆熱辣辣嘅酥皮配上creamy嘅南瓜蓉
又一推介之選

好耐無上黎寫過食評
不過今日呢餐真係一食完就忍唔住返到屋企即刻開電腦上黎讚

其實已經係第三次食
平時其他餐廳食得多都會不知不覺感覺質素每下愈況
反之呢間店我真係覺得佢一次比一次出色

第一同第二次去都只不過係上個月嘅事
分別食淨燒烤同燒烤加火鍋
都已經覺得唔錯
燒羊肉串騷得黎夠吸引
個豬骨湯底又濃郁又鮮甜

咁今日放工諗住同兩個friend落去食燒烤
點知去到個waiter話宜家唔知燒烤
散嗌都無, 淨係做放題
百二蚊左右全包無加一汽水啤酒另計
開頭我地都好猶豫, 因為一心諗住係食燒烤
再加上裡面一枱都無
諗咗諗, 又懶得去再諗食咩, 所以最後都屈服

坐低後個friend order咗支啤酒
跟住就幾個一齊出去拎野食
當我地見到d野食, 即刻目瞪口呆
首先d 海鮮冷盆 -
原隻花蟹, 螺, 蝦, 蜆, 青口
排得靚靚仔仔不但止
仲要係有份量果隻, 真係睇見會即刻想食果隻
每隻花蟹都有成隻手咁大, 我地開正果隻仲要係有膏
蝦d色澤好鮮艷, 仲要係大隻之餘肉質係彈牙
螺同青口我無食到所以唔知
蜆每隻都開口, 不過都仲有少少沙
另外佢仲有叫點叫片嘅三文魚刺身

火鍋食材方面
例牌嘅肥牛佢好似無
反而佢有鮮牛肉同牛柳粒
我本人就唔食牛, 所以不予置評
另外佢仲有大路嘅雞肉, 豬頸肉, 墨魚丸
芝心丸, 蘿白, 菜類, 獅子狗, 出前一丁, 大大舊炸魚片等等
不過最令我地為之震驚嘅係以下幾樣:
1. 瀨尿蝦
- 佢一大盆瀨尿蝦, 有大有細
細果d 就比較生猛, 仲會彈下彈下, 都有四節手指(中指)咁長
而大果d 真係有出面街成百幾蚊先得兩隻果d咁大
具體d 黎講有成隻手咁長, 仲好似長少少tim
肉質好鮮甜彈牙, 真係食得出夠新鮮
2. 菠菜釀雞翼
- 完全覺得呢個係應該拎黎燒多過拎黎打邊爐
不過烚完食落又唔算好怪
3. 花膠
- 出奇地估唔到會有花膠
仲要唔係得三四舊你夾
花膠吸收咗豬骨湯嘅味道, 正
4. 醉雞翼
- 我地打緊邊爐途中黎多咗一枱
原來係友人嘅朋友
我地臨走果陣佢地同我地講個雞翼勁得
烚完都仲食得出花雕酒嘅香味
只可惜我地無試到
5. 羊肉
- 佢唔係平時打邊爐果d羊肉片
而係真係好似韓燒果d羊肉, 不過係無調味果隻
反而今次火鍋呢個羊肉無我上次食果個咁騷
不過都好鮮嫩
6. 不知名嘅透明麵條
- 有少少似蒟篛條, 又有d似蕃薯粉
QQ地幾得意

我地叫咗三支啤酒
埋單每人百四蚊
簡直係物超所值
食過咁多次打邊爐/任食打邊爐
今次呢一間真係咁耐以黎最抵而又最高質素
只可惜佢無咗燒烤
同埋果個位人流唔旺
好驚佢會做唔住被淘汰
所以真係忍唔住一返到黎就要推介俾大家
有機會大家真係要一試

(P.S. 今次真係因為掛住食嘅關係, 無乜點樣影到相, 請見諒)

是日放假同友人黎一個late lunch
但由於太late嘅關係
大部份茶樓嘅茶市都已經做完
同時大家都唔想一個月之內再一次要排成個鐘先可以食到點心
所以就選擇試下呢間點心棧

整體質素唔錯
不過講味道真係唔夠隔幾條街果間添好運好味

本小姐特別推介佢個灌湯餃, 燒賣同春卷

個灌湯餃好足料
有蝦有豬肉有香菇, 漲卜卜咁
仲要有一隻小鮑魚,
另外佢個湯都好鮮甜

燒賣裡面d肉肥瘦適中
咬落去唔會覺得太膩
同埋佢d蝦都幾爽口

春卷堅係好脆
一d都唔油, 熱氣得黎勁好味

成間店d坐位格局都幾舒適, 一d都唔局促
不過就係冷氣大咗d
如果想食點心, 又唔想排長龍
呢間其實都幾唔錯

tutti frutti開張第一日已經想上黎食評
可惜當其時佢仲未on the list
難得今日上開黎
所以宜家黎補番個食評先

開張第一日
揀咗試綠茶同荔枝兩個口味
雖然綠茶口味比較淡,但個荔枝yogurt真係很出色~
好清新亦都唔會太甜*
佢嘅生果選擇勁多
我揀咗嘅芒果同草莓都好鮮甜
另外仲加咗d QQ嘅mochi & 脆脆嘅古力片
成個感覺又健康又幸福*

佢另外仲有粟米口味嘅yogurt
同埋兩個超受歡迎嘅栗子醬同栗子粒toppings
但係當日無緣試到...
唯有留番下次先啦