家中長輩最愛食好西，飲食情報緊貼過XO仔多多聲！Auntie J喺灣仔區發現有新店「永8舫」上場，二話不說即設宴一席款待姨媽姨丈們，嘻嘻，仲預埋鄰近嘅細佬添，實在太有心啦！中餐廳佔用二樓全層，接待大堂寬敞得黎燈光較為暗淡，令𨋢門對面嘅大型酒櫃更加突出。四周嘅藝術擺設極富中國色彩。店子以做廂房為主，其中三間細啲嘅可容納上十至十二人，大啲嗰兩間可容納十四人，最大嗰間則做散枱為主。間間啲房名深到小肥冇一間識讀。十二人派對安排於十四人房內進行，尤其舒適！室內設計華麗有氣派，而且空間感好足。房內有個私人洗手間，仲有個好闊落嘅小偏廳，兩個大電視不停播放出有關餐廳嘅資料，包括大廚及其招牌名菜。原來夜晚可以唱埋K，隔音超強，堅豪華！客氣嘅主人家早已預先試菜並定下菜單。每位席上都有齊備嘅自用及公用餐具，配上龍王茶杯及金色餐墊更顯貴氣。蝦餃皇：蝦餃皮潤蝦爽，上枱時仲出緊煙，証明熱力十足！叉燒腸粉：半透明嘅腸粉皮巧薄軟潤，入面嘅叉燒量足爽甜。部份點心、小菜、湯同單尾都係續位上，精緻得體。啤梨咸水角：呈啤梨形嘅咸水角外表相當迫真，皮層綠綠嘅色調乃菠菜汁所染出，煙韌帶脆且有嚼勁，入面嘅冬菇肉碎都好香甜，粒椗椗原來係脆卜卜嘅百力滋，真係幾盞鬼！黑毛豬叉燒：塗上桂花油嘅黑毛豬叉燒件肥瘦均勻，肉汁豐沛，爽潤甜美。龍皇竹笙帶子羮：豆腐羮底稀杰適中，味道鮮甜，其實都食到軟嫩嘅帶子粒，不過自己嗰碗就好似冇乜竹笙，如果可以多啲料相信會更香濃。香醋黑豚咕嚕肉：每人都有四件嘅咕嚕肉皮脆肉鬆軟，酸甜醒胃，一啲都唔覺溜。煙燻雞：雞雞嘅煙燻味唔過火，雞皮脆薄，肉質軟潤，最重要係姨媽們食得開心！翡翠金牡丹：小弟自認一向怕食菜，但面對著餸名及賣相同樣高貴嘅翡翠金牡丹當真不禁垂涎三尺！形態似足牡丹嘅一球雪耳十分清脆，紹菜亦軟腍甜美，翠綠嘅一束原來係菠菜心，爽爽脆脆都幾得意，最正就係有厚滑濃甜嘅湯汁調味！黑松露牛肝菌蒸絲苗：單尾每人一小碗暖胃嘅飯飯，份量恰到好處。熱辣辣嘅白飯飽滿彈牙，舖面嘅黑松露牛肝菌及冬菇粒粒芳香柔韌，簡單可口。灣仔新店「永8舫」環境高雅有氣派，設備齊全，招呼貼身，午市行政級飲茶高質味佳，點心及餸菜精美講究，最適合商務客戶用餐。

週末收到嬸婆邀請過海午膳，地點為其相熟嘅「瑞士餐廳」，為食小XO唔洗返工喎，當然立即答允。原來長輩早於開店前經已認識大廚及經理，緣自半島酒店！據悉，英文店名中嘅「Swiss Chalet」其實係一種傳統瑞士小木屋設計，室內木造嘅裝修及打獵嘅裝飾好自然地亦以此作題。食客大多都係三代同桌用餐，故用餐大堂擺出嘅都係長枱。八口子被安排入座店內嘅方形上座，印有餐店大名嘅布餐墊滲出歐陸風情。散點餐牌共有四頁之多。午市亦有兩款素食及行政套餐可選。另有是日推介項目。經理哥哥推介嘅白酒好清新，炎炎夏日可助降溫。點好菜，即由外藉服務員派發暖手嘅麵包。大肥爸爸真係好眼，見到配備嘅牛油都印有餐廳個名。Oven baked Burgundy Snails（$132）：是日精選嘅焗田螺香潤彈牙。烘瑞士（辣力芝士）配新薯、酸洋蔥仔及酸青瓜仔（$78/Taster Portion）：熟客們極力推介嘅芝士超級巧薄嘅同時竟能如此香脆，真係冇介紹錯，必吃也！忌廉菠菜湯：忌廉湯輕盈芬芳，稀杰度適中，叔公一口氣飲咗兩碗，證明一啲都唔溜！Beef Tartar flavored with Calvados with toast（$198/as an appetizer）：牛肉他他香濃惹味，頭盤份量都配夠四件鬆脆嘅多士，建議可兩個人分享。Black Mussels “a la Poulette our favorite” white wine herb cream sauce（$218）：席上嘅長輩們大讚青口BB細細隻，容易食，而且好鮮甜。食完仲要排埋個殼陣，勁搞笑！Fresh German White Asparagus：粗粗嘅白露筍清脆甜美，一啲渣都冇！扒美國牛柳配什磨菇汁、跟薯餅及時菜（$358）：主菜揀咗美國安格斯牛柳，厚厚嘅牛扒肉香鬆軟。尖沙咀老字號「瑞士餐廳」格調輕鬆，服務生親切落力，有求必應，西餐菜式量足味佳，溫情洋溢嘅瑞士小木屋似乎不少愛共聚天倫嘅棒場客支持。

Mad Pink牛一，舞友們為滿足其愛拍照嘅喜好，上網專登揀咗間打卡聖地「ULURU」開P慶生。入夜後，西餐廳隱蔽於橫行嘅門口非常光猛，不易錯過。通往一樓用餐大堂可步上梯級，或抵達時至電接線生話想搭𨋢，年輕嘅服務生都好樂意協助。店子嘅黑白二次元主題非常獨特，梳妝台、書架、鏡框等裝飾均為平面圖，置身其中彷如進入咗童話世界入面。室內面積寬廣，連走廊通道空間感都一樣咁足，洗手間好似通過機關門入返現實時空，都幾過癮。生日派對被安排入座梳化靚位。飲品餐牌共有兩頁，不過XO仔訂座前已探咗路，知悉餐廳不收分毫開瓶費，結果當然係自己帶酒啦！嘻嘻，壽星女唔洗返工，兩口子一早就帶齊架生率先狂影兼𣈱飲一番！晚市單點項目則有八頁。最後兩頁為打卡熱選嘅靚靚甜品，其中兩款粉紅色同粉藍式嘅招牌二次元蛋糕必先預早訂定。有名你叫「Mad Pink」，即為粉紅而瘋狂喎，生日梗係要有粉紅色啦，做足功課嘅小肥一定唔會令佢失望嘅！炸香脆粗直薯條配黑松露醬（$68）：歡樂時光先點咗客薯條送酒酒。薯條外脆內軟，點埋另上嘅黑松露醬即倍添芳香！煙三文魚露筍卷（$98）：三文魚卷一客只有三件，舞友們讚好新鮮，細佬自己唔係咁好煙燻味，所以只交由相機代食。酥皮焗田螺（$108）：看似為店長但不願透露身份嘅樂哥哥極力推介酥皮焗田螺，盛意拳拳一定要試啦！圓碌碌、熱辣辣嘅小食一口一件，皮層真如餸名般酥脆香口，入面嘅田螺肉軟潤彈牙，份量恰到好處，就連原本話唔食田螺嘅M王子試咗一件都話好食，咁即係掂啦，果然好介紹！阿根廷紅蝦刺身配蕃茄沙沙多士（$138）：一眾舞友緣自阿根廷探戈，因情意結關係而點黎捧捧場。金黃嘅多士底十分鬆化，蝦多士震撼地原隻大蝦連頭上，甜潤爽脆，一客兩大件其實可以四個人分享。柚子鮮蝦沙律（$78）：沙律嘅菜菜同已去殼嘅蝦仁都好爽，女仕們最欣賞混入嘅沙田柚肉好清新同個沙律汁係另上嘅，屬輕盈健美之選。白酒忌廉牛油紐西蘭半殼青口配蒜蓉包（$118）：青口鮮甜香滑，一啲餲味都冇，真心覺得高質美味過某比利時連鎖店。羊扒大蝦配新薯紅酒燒汁（$238）：半生熟嘅羊肉好軟熟，開咗邊嘅大蝦明顯冇蝦多士嗰隻咁正，不過白雪雪嘅蝦肉都好爽身。香煎美國有骨豬鞍扒伴蘋果燒汁（$258）：厚厚嘅豬鞍尚算爽口，但個人覺得偏乾咗少少，肉汁未為最豐沛。虎蝦海鮮冬陰功韓式年糕（$138）：虎蝦其實好爽彈，韓式年糕亦煙煙韌韌，不過敗筆在於調味過咸！受酒精影響下成枱人基本上係零怕醜，直接同樂哥哥反映意見，真係冇諗到佢不單意見接受，仲靜靜地加送靚靚嘅抹茶甜品，甜甜嘅心意成功擺平咗過咸嘅重口味，一眾女生都覺得誠意行動同其外表一樣低調得可愛！富士芝櫻祭 - 丸久小山園抹茶Tiramisu（$118）：呈富士山形嘅抹茶味Tiramisu外表吸睛，頂面座鳥居菂薂尤甚，微甜嘅糕身軟綿且夠潤，抹茶味芳香怡神，混埋綑邊嘅朱古力泥直令口感更有層次！粉紅色ULURU二次元立體夢幻蛋糕（$138）：招牌蛋糕嘅平面設計勁襯牆上嘅手繪壁畫，粉紅色玫瑰味厚層忌廉下嘅海綿蛋糕夾入甜甜嘅荔枝同紅莓，甜度剛剛好，感激師傅特意寫上祝福字句！夢 - 森の家（$128）：甜品嘅蘑菇造型實在逼真，取名為「森林之家」不禁令人聯想起藍精靈嘅蘑菇屋，喺二次元嘅背景下尤其趣緻夢幻！蘑菇外層乃濃甜脆脆嘅白朱古力，一層一層一層的剝開，驚喜更陸續有來！蘑菇頭入面原來係香軟嘅士多啤梨慕絲包住件蛋糕，菇柄竟然塞滿士多啤梨果蓉同果醬，連同大大粒士多啤梨及朱古力泥食落去又一啲都唔覺溜，細緻精妙得連一向咀刁嘅M王子都食個不停，讚口不絕，確真難得！花見（$98）：樂哥哥細心提點玫瑰啫喱檸檬撻內含杏仁，小肥即只准睇唔准食。灣仔打卡熱店「ULURU」光鮮開揚，輕鬆幽閒，服務生親切幽默，黑白嘅二維空間與鮮美奪目嘅魔幻甜品將二次元主題發揮得淋漓盡致！價格不高、免收開瓶費、細心體貼之情等有心舉動足以令壽星Mad Pink及舞友們樂在其中，讚嘆不已，有心食肆絕對值得支持！

大肥爸爸忙於開會，細佬就帶咗媽咪去威威，一試於大半年前喺報章睇到食評家推介嘅親民小店「Daap」。餐店隱蔽於永吉街上，入夜後招牌尤其明亮。正門前方打出嘅燈影成功為食客引路。落地玻璃身後為俊男廚神光鮮企理嘅大舞台，共有十四個高櫈吧位圍繞住。開放式廚房透明度高，花園式設計滲出健康嘅大自然氣息。訂座時講明同行有年長人士，四人就被安排入座內側較闊落嘅半梳化式散座。晚市只有一款五道菜套餐（$680/位），其中主菜一、主菜二、甜品均有兩個選擇，但遇上客人有敏感問題，師傅都樂於作出調整。為確保食材新鮮，客人必先於用餐兩日前定下菜單。據悉，店名「Daap」取自廣東話個「嗒」字，以迎合主廚融會粵菜與西餐嘅概念，咁真係要慢慢嗒清楚喎！開瓶費為$200/樽標準裝紅、白、汽酒；如果客人從一頁酒牌點一樽酒，即可免一樽開瓶費。四口子正常都要飲兩樽，結果帶咗枝紅酒，另外點咗樽西班牙汽酒「Codorniu Blanc de Noir Grand Reserva, Spain, 2015」（$340/樽）。除咗甜品之外，每道菜都係由大廚Luke哥哥親自呈上並作出簡介。外籍服務生態度良好，食飯中途會自動波地斟添酒水。唯一有點奇怪嘅就係餐桌上嘅餐具原來係供全晚所用，莫非係效法中餐文化咁一對筷子食哂成餐飯？！煙燻北海道帶子配蓮藕脆片：頭盤十分輕盈，頂面塊蓮藕片好似薯片咁巧薄香脆，巨型嘅北海道帶子外脆內軟嫩，煙燻味唔會太激，連同帶子上嘅黑醋珠珠及綑邊嘅金柚肉食落口即倍添清新！靚靚媽咪因藥物敏感出哂紅疹而不能進食海鮮，師傅就轉咗個爽辣嘅「泰式柚子沙律」俾佢。栗子湯配羊肚菌：蕃薯uncle嫌栗子湯偏咗少少杰身同過甜，仲話當中嘅栗子味好似燶燶地。蟲草花忌廉湯：應對細佬有果仁敏感，Luke哥哥就轉咗個以洋蔥、甘筍、西芹、大蒜打造出嘅蟲草花忌廉湯。意外地，忌廉湯香甜濃滑，毫不膩口，舖面嘅炸蟲草花好似魷魚絲咁煙煙韌韌，配搭和諧討好。跟湯每人有一塊香脆暖手嘅自家製酸麵包件，浸一浸湯湯浴後腍少少仲入哂味。臘鴨髀意式雲吞配法式鴨湯：法式鴨湯於上枱後先會斟進碗內。呈半透明嘅兩件意大利雲吞皮層超薄，質感柔軟，中間嘅臘鴨髀濃味得黎唔會過咸，鴨湯清澈唔油，毫無衝突，頂面以脆卜卜嘅臘鴨髀皮點綴成功增強口感及層次，一啲都唔溜，極容易接受。臘腸卡邦尼手工意粉配溫泉蛋：受酒精影響下，整穿咗隻蛋蛋後先記得自己未影相。自家手製嘅意粉麵條濶濶長長，食落好似刀削麵咁厚厚地同彈牙，新潮地換上微辣嘅臘腸代替傳統嘅卡邦尼煙肉轉接得好順暢，撈入埋隻溫泉蛋更添上香滑，組合細膩得很！肉眼牛扒配豆豉法式牛油汁：墊底嘅油麥菜好爽脆，牛扒尚算軟腍，只係唔係好食得出加咗豆豉煮出嘅法式牛油汁有乜特別。為一解蕃薯uncle冇牙力食牛扒，廚房就為佢改咗個份量好足嘅鱸魚。菊花焦糖燉蛋：焦糖燉蛋又硬又實兼且唔軟滑，唔睇餐牌真係唔知內含菊花，廚師冇刻意出黎介紹都有種不祥嘅預感，都估到佢咩料啦。正當兩位女仕們批評成餐飯最唔掂係個甜品時，蕃薯uncle就話好欣賞佢點嘅「自家制酸種菠蘿包配花生小紅莓牛油」，小弟因花生敏感冇試到。位於中上環嘅歐陸小館「Daap」輕鬆幽閒，服務優良，中西合璧嘅菜式有新意得黎都不難接受，嗒得出用材新鮮及設計者花下不少心思，可以一試。

近年頗活躍嘅「LUBUDS」飲食集團兔年又有新搞作，今次夥拍廚魔以時興嘅「農場到餐桌」概念推廣本地優質食材，開設「Café BAU」；嘻嘻，卓越會員可享九折優惠喎，當然係要盡快試試啦！一樓平台餐店正正就係廚魔取三星嘅「Bo Innovation」舊址，店名中嘅「BAU」剛好同「Bo」同音，仲唔係刻意設計？！餐牌首頁道出，「BAU」取自香港市花洋紫荊英文名「Bauhinia 」，以強調廚師選用香港食材嘅主題，同時亦喻意著「Business As Usual」，希望餐飲業可於疫情後盡快復甦，有意思極！樓底高高嘅西餐廳接待處放出零星嘅家居小擺設，簡約得黎感覺溫馨親切。可容納上十人嘅私人廂房吊出嘅燈飾就好似一個客廳咁典雅，據悉最低消費為一萬大元。用餐大堂光線柔和，厚墊皮櫈十分舒適，內側位置可清楚睇到廚房嘅實況，透明度非常高。飲品牌共有兩頁。如客人欲自攜佳釀，開瓶費為$500/枝標準裝紅白、汽酒；$750/枝Magnum大瓶裝；$800/枝烈酒。意大利汽酒（$108/杯）份量都好足。不過$80/枝大圍啤酒就唔係咁啱小肥口味。晚餐只有兩款套餐，其一為「八道菜嚐味套餐」（$998/位）。四人用餐想試多幾味，友善好客嘅服務生就推介可從「三道菜精選套餐」（$650/位）揀不同頭盤、主菜及甜品黎分。點好菜先有鮮紅色嘅餐前小食。錦盒上嘅原來係爽甜多汁嘅西瓜方磚，夏日炎炎最恰當，綠色舖面嘅四川風味蟶子肉醒神醒胃得黎唔會辣得好刺激，新穎獨特嘅組合明顯出自廚魔嘅腦汁。麵包籃中嘅兩款包包都好鬆軟，伴配嘅橄欖醬柔滑輕盈，甚為討好。照燒魷魚．沙田柚辣醬．大地魚魚乾煮薏米．魷魚汁脆片：哥哥真係好眼，上枱已經見到頭盤碟上印有大大隻魷魚，認真搞鬼！黑漆漆嘅魷魚汁脆片香脆巧薄，白肉紫紋嘅魷魚爽脆彈牙，無奈墊底嘅薏米煙燻味及咸魚味過濃，超重口味連兩位長輩都話唔係咁易接受到。農場直送法式凍批配自家製醃菜醬汁．本地水耕菜沙律：沙律菜菜翠綠清脆，只係大樖咗啲，好在西餐有刀切。以本地豬製出嘅法式凍批肉香厚潤，焦糖批底甜脆酥化，多點金黃亮麗嘅五柳醬即倍添清新。生牛肉他他．流浮山桶蠔沙巴翁配自家製薯片：生牛肉他他香濃軟滑，應建議連同惹味嘅桶蠔沙巴翁醬塗上紫色嘅薯片上，效果比用麵包更為香脆兼冇咁溜滯。手工製芝士黑椒長通粉配蜆蚧醬及三黃雞翼：手工製長通粉質感柔韌，師傅巧妙地混入蜆蚧醬吊出一份鮮濃；圍邊嘅雞中翼件已預先上去骨並釀入蘑菇及木耳碎，皮脆餡嫩脆，即脆上加脆！蝦米油煮新鮮虎蝦配手工製意粉：主菜黎講，連雀仔肚嘅蕃薯uncle都覺得份量比較少，三兩吓手勢好容易就清碟。開咗邊嘅虎蝦薄身得黎唔夠爽彈，反而橙黃鮮亮嘅手工製意粉麵條煙煙韌韌，經理姐姐鄭重講解所用上嘅「蝦米油」乃廚師𤉶咗三日三夜所提煉而成，果然秘汁濃縮嘅蝦味鮮甜尤甚。慢煮香港家豬五花腩配甜酸汁．水耕蔬菜，羽衣甘藍：元朗豬豬厚厚嘅豬腩肉外觀不甚肥膩，咬落鬆軟柔潤，肉汁豐沛，最有驚喜係碟上嘅紅點山楂醬，其溫馴嘅酸甜味成功中和五花腩嘅油份。配角中，修長脆巧嘅白甘筍同個紅蘿蔔蓉好夾且夠清，最得XO仔款心嘅係炸至脆脆嘅羽衣甘藍薄片！平原三黃雞配羊肚菌及黑皮雞樅菌．本地白米飯（另加$300；製作需時45分鐘）：點菜時，姐姐提及到要另加錢嘅招牌雞主菜屬二人份量，而且要預長少少時間烤製。小肥自認見識少，原來「平原雞」生長於新界北區平原河附近，係香港本地嘅新雞種，仲要係香港第一家環保雞場所養殖，堅稱不含激素、抗生素、類固醇或荷爾蒙，來頭一啲都唔野小！靚雞原隻煮好當然係要先擺個靚甫士俾客人影多幾幅相啦！之後先再交由廚房斬件。真係冇諗到雞雞竟然係用椰奶浸過夜，因為食落絲毫不覺有椰奶味！雞隻於煮製時中間塞滿香草、斑蘭葉及雲南雜菌，當中煮完雜菌嘅水仲用埋黎蒸出香港出生嘅二澳米，絕無浪費廚餘！金黃嘅脆皮下見到嘅肥膏不多，白滑嘅雞肉幼嫩無比，雞味香甜濃郁，超！墊底嘅二澳米散發出芬芳嘅菇香，軟糯飽滿，加幾滴另上嘅雞汁，飯品嘅香味更上一層樓。多款甜品中只有梨梨一味不含果仁，其他「九龍維記牛奶意式雪糕．印度香料雞蛋仔」、「蘋果撻配淡奶雪糕」、「鹹牛油吉士撻配自家製法式酸奶油．杏仁金寶」細佬都唔食得。薑汁意式雪糕燴梨子：梨梨甜品爽甜清香，意外地伴配嘅薑味雪糕夠淡，組合相當和諧。灣仔新店「Café BAU」雅致闊落，服務周到，帶有廚魔獨特創念元素嘅菜式唔會過火，價格亦冇咁揦脷，比起名廚驚險嘅分子料理易受落得多，香嫩軟滑嘅「平原雞」尤其印象難忘！感激西餐廳用心善用高質嘅香江食材締造出紫荊版「農場到餐桌」以作回饋及推廣，希望下次可以食埋平原雞盛產嘅雙黃蛋蛋就好啦！

於香港大酒店參加完喪禮後留在區內晚膳，可以坐成圍嘅中菜選擇似乎只有過兩條馬路就到嘅「富嘉閣」。講真原本都冇諗住寫文，所以連環境同餐牌都冇特別去影，無奈質素實在太麻麻先想俾個忠告大家。中式酒樓嘅大圓枱多數都有轉盤。年長嘅服務生都好客氣，只係推介嘅食物唔多掂。

酥炸脆魚皮（$38）：尚算脆口嘅魚皮敗筆在於唔夠鬆化。涼拌海蜇（$50）：海蜇爽脆醒胃。陳皮香酥骨（$148）：排骨大件夾硬，好難先咬得開，加上唔酥脆，完全唔掂！蜜汁叉燒（$98）：肥肥家族一向食開肥叉，客氣啲評論，碟上零肥膏嘅叉燒健康得黎唔算特別嚡或硬嘅。海南土雞（$180/半隻）：好在只係叫咗半隻黎試咋，真係冇諗過海南雞會如此白賴晒兼冇油水，土雞肉又乾又粗糙，半絲嫩滑都冇，失敗到極！咕嚕油條蝦（$138）：反而以油炸鬼釀入蝦隻炸製出嘅咕嚕油條蝦酸酸甜甜，爽脆彈牙，新穎嘅組合甚有驚喜。紅酒牛尾（$150）：差不多每位服務生都推介一次嘅牛尾又硬又實，明顯火候未夠，未腍已經上枱。珧柱肉碎蒸水蛋（$128）：肉碎蒸蛋軟滑輕盈。蝦乾粉絲節瓜煲（$118）：節瓜切得夠幼，不過啲蝦乾就韌中帶粉，調味仲有啲腥，不吃也吧。豉汁煎釀三寶（$138）：小肥怕鯪魚有骨所以冇試，乾爹爹讚煎釀三寶惹味足料。滑蛋牛肉炒河粉（$105）：滑蛋牛河濕潤滑溜，牛肉香軟易入口，簡單可口。鄰近大酒店嘅中餐廳「富嘉閣」光鮮企理，服務優良，雖則小菜價格不高，但主要係質素問題，請恕小弟直言，區內冇其他選擇都情願跨區覓食囉！

別號「Mad Pink」嘅舞伴發現銅鑼灣Midtown大廈天台有打卡新熱點「Arcadia」，得悉網上訂座可享八五折優惠，即相約爛蒲小組探索一番！酒吧餐廳合共兩層。有瓦遮頭嘅三十樓接待處旁有隻巨型啤啤好嘆咁hea咗喺個浴缸度。門口兩旁為酒吧區域。用餐大堂樓底高高，面積十分寬廣，上下內外嘅主題都一樣咁花花世界。厚墊絨櫈相當舒適。人少少的話，最正係坐到窗邊個輕氣球位，入夜後著埋燈更覺情調尤甚。人多就梗係入房玩最盡興啦，最低消費$5,000一啲都唔難過！通往粉紅天台可行上裝飾別緻嘅樓梯。不接受網上預訂嘅天台室外散座都配有大大把沙灘遮，只係炎炎夏日，未必人人頂得順三十幾度嘅高溫。大家要留意，不同時段嘅用餐限時及最低消費都有所不同。蕃薯uncle嫌熱唔肯上上落落，小肥就快速幫Mad Pink女神喺個粉紅鞦韆位影咗幾幅靚相後即閃返落樓下。厚本酒牌列出多款世界各地出產嘅氈酒，明顯係主打。酒鬼們早就打聽到新店下午三點至六點玩緊瘋狂時光優惠，指定酒酒$28/杯，款色每天不同；當日碰巧有名牌Hoegaarden生啤飲喎，堅抵玩！只可惜XO仔早極都要五點先收得工，開行turbo六點前都只能飲到四杯。好似唱K咁，除咗另收加一之外，每位客人係要收$30果仁錢嘅，即使小弟有果仁敏感都一樣要收！脆炸薯條配黑松露醬（$58）：因為唔食得果仁，瘋狂時光先點咗客香脆嘅黑松露醬薯條送酒酒。懶得轉場嘅三口子結果從兩頁餐牌點埋晚餐，因為經網上訂座可享八五折優惠。松子羽衣金藍配香梨汁（$98）：菜后大讚羽衣金藍幼嫩，拌入輕盈嘅香梨汁及白色嘅酸梨片份外清新開胃。生牛肉他他伴黑松露配10年陳醋（$168）：惹味嘅牛肉他他不單量足，撈入生鵪鶉蛋黃成功添上香滑，以彩美嘅食用花點綴仲襯埋餐廳四周個花花裝潢。芝士焗大燒烤菇伴新鮮海膽（$128）：成餐飯最唔掂係個菇菇，一啲鮮味都冇，完全食唔出入面有海膽囉，絕對唔值$128！香烤加拿大 “保濕技術” 豬鞍配伯爵茶汁（$368）：意外地，豬鞍厚肉得黎勁爽脆，而且肉汁豐沛，「保濕技術」果然有料到！銅鑼灣頂樓酒吧餐廳「Arcadia」開揚闊落，幽閒有特色，服務生友善且樂於助長者，西餐菜式精美味佳。有心食肆勁多優惠，相信瘋狂時光應該算係區內最抵玩，爛蒲一族一定要支持啦！

蕃薯uncle約咗幾隻麻雀腳去銅鑼灣「睿私房菜」飲茶，叫細佬幫忙訂位，嘻嘻，好人獲得嘅酬勞係免費午餐！位於二十八樓嘅中菜廳佔用面積全層，一邊對住跑馬地馬場，絕對有景睇。光鮮企理嘅用餐大堂並無花巧之裝潢，餐桌與餐桌之間有足夠嘅活動空間。每位席上都有齊備嘅自用及公用餐具，十分衛生。午市點心款式唔算特別多。大路嘅蝦餃同燒賣每籠正常有四隻，經理哥哥好好人，特別安排夠五隻俾五口子一人一隻，極俱變通能力，長輩都非常感激。冰鎮咕嚕肉（$188）：由於細佬最後一個到，所以唔知咕嚕肉嘅份量有幾多。咕嚕肉皮層冰脆，肉質尚算鬆爽。鮮蝦蝦餃（$85/五隻）：蝦餃層餃皮厚得黎好黏，雖然個餡都好鮮嫩，敗筆在於食落黐住哂啲牙仔。特色燒賣皇（$75/五隻）：燒賣就偏實咗少少，唔係好夠油潤，莫非特色在冇落肥豬肉？！香脆咸水角（$58/三隻）：咸水角外脆內煙韌，味道都唔差。香煎手工蘿蔔糕（$68）：蘿蔔糕個賣相有啲爛溶溶，辣味多過蘿蔔味，不過起碼食落唔硬唔實嘅。XO醬炒腸粉（$118）：腸粉軟潤滑溜，auntie們只係略嫌XO醬份量唔夠多，未為最惹味。生炒臘味糯米飯（$168）：上枱先發現糯米飯用咗花生炒製，小肥因敏感問題就冇試到。樓上中菜「睿私房菜」服務優良，無奈點心質素平庸，只有價錢最高級，中午時份拍哂烏蠅實不無道理。

疫後遊東京，同對上一次一樣繼續選乘「全日空航空公司」。「全日空」於香港國際機場並無設置貴賓室，暫時商務艙嘅搭客可享用「環亞優逸庭貴賓室」（Plaza Premium First Hong Kong）。由於辧理手續時航空公司職員冇提過，登機證又冇注明，小肥都係去錯咗先知鄰近一號登機閘原來有兩個「環亞機場貴賓室」（Plaza Premium Lounge Hong Kong）！其中門外打蛇餅嗰個係普通版，除咗可以俾錢入（$640/成人；$448/小童；2歲以下免費），出示指定信用卡更可免費入場。或許因人手短缺問題，暫時只限指定航空公司高級會員、商務艙及頭等艙乘客享用嘅「環亞優逸庭貴賓室」係半隱蔽於走廊，冇咁遠嗰間。周圍探索，發現貴賓室原來喺2018年先開，應該好新吓喎。樓底偏矮嘅「優逸庭」唔算特別大或者豪華。指示牌所示，除咗有浴室、酒吧同餐室，其實仲有暫停中嘅按摩服務。室內最光猛搶眼就係個酒吧。晨早七點幾已經有紅、白、啤酒飲。可惜日本啤酒機同按摩服務一樣玩緊暫停。媽咪真係心水清，一眼就留意到陳列出嘅酒品中冇一款係背景提到嘅單一麥芽蘇格蘭威士忌。XO仔都係第一次見到可樂同雪碧用透明容器裝住，唔睇牌仔仲以為係椰水同凍啡添。最入嘅自助飲品區有凍水、熱水、茶、奶、橙汁同咖啡機。自選食物質量及選擇比較一般，有大路嘅沙律、香腸、烚蛋、薯餅、粥等。當中只有熱辣嘅魚蛋米啱口味。由於湯中嘅椰油味太突出，所以估佢係星馬泰代表，冇諗到標籤竟然係「港式魚蛋河粉」！細佬真係未食過有椰香嘅港式魚蛋河，而且睇相都認得出湯入面嗰啲係米粉喎，莫非係廚師hea煮，定係標籤hea呢？！香港國際機場內嘅「環亞優逸庭貴賓室」離出境檢查大堂非常近，位置堅方便。可能係因後新冠影響下，貴賓室以接待處最為專業，室內環境及餐飲質素冇乜獨特標青，酒酒毫不吸引，感覺各方面都好hea，完全唔似商務或頭等囉！

閉咗關咁耐，週末唔洗返工就決定要玩盡少少，起身同契妹食完個下午茶就去咗時代搵蕃薯uncle尋歡，點知佢揀嘅地方正正就係小肥晚餐飯局嘅西餐廳「Club Albergue 1601」。Uncle原來係被門口推廣緊每日下午三至六嘅歡樂七折迷倒。優惠依家野細佬絕對支持架，何況同一個地點走兩場可以慳埋腳骨力，掂呀！「1601」面積寬廣到可以分開不同區域。正門身後好似一個客廳咁。當中最受歡迎就係室外座，不過掛住飲所以唔記得咗影相。最中央有個光亮嘅橢圓形酒吧，頭頂有個電視機俾球迷觀賞賽事。內側嘅用餐大堂一樣咁寬闊。先由黃昏前嘅頭場講起，厚厚嘅飲品餐牌共有十七頁之多，其中只有限定款式可享七折歡樂優惠。平心而論，$62/杯三得利黑啤唔算特別平，仲要唔係大杯裝攞！飲得烈酒嘅蕃薯uncle更驚嘆威士忌竟比紅、白、汽酒抵飲。送酒小食共有六款可選。新鮮熱辣嘅「炸薯條」（$118）金黃乾巧，外脆內軟且唔係好油膩。到咗晚餐時份，點菜任務全交由冇乜酒意嘅契妹包辦。香煎法國鵝肝伴八珍甜醋汁（$168）：大大碟頭盤上枱後，四口子第一個反應就係搵鵝肝，好在都唔係收得好密。配角麵包夠香口同鬆，鵝肝則皮脆肝嫩滑；好就好食，只係份量少咗啲。香草包糠炸牛舌（$168）：以薯蓉墊底嘅炸牛舌層炸皮硬咗少少，牛舌亦偏嚡同咸，不吃也吧。烤西班牙乳豬（$398）：整晚之最必選超級脆皮、肉香軟熟、肉汁豐沛嘅招牌乳豬，必吃推介也！烤大啡菇（$98）：兩件大啡菇軟腍易入口。北海道元貝蟹肉意大利燴飯（HK$288）：海鮮燴飯濕潤有嚼口，四件厚厚嘅帶子厚嫩鮮美，個人只係略嫌調味過酸同微微苦澀。64%黑朱古力心太軟配雪糕（HK$128）：如相所示，心太軟真係流心嘅，不過64%黑朱古力黎講算幾甜。榛子朱古力梳乎厘（$148）：契妹大讚榛子朱古力梳乎厘清香鬆軟，特別在伴配朱古力碎供食客自行加上，不錯之選。「Club Albergue 1601」屬走高級路線嘅商場餐廳，環境闊落時尚，服務生雖未有黑面，但同參差嘅食物一樣仍有頗大嘅進步空間。